Read Dagara, Northern Tobi 5 Bible Online

Tobi 5 - Dagara, Northern bible

Tobi 5

¹Lɛ n'a a Tobɩasɩ tɩ sɔw a ʋ sãà Tobi: «Ɩ̃ sãà a, ɩ̃ na ɩ n a lɛ za fʋ na yel kʋ̀ m a.

²Ɛcɛ ŋmɩŋmɩn n'a ɩ̃ na ɩ tɩ páw a libie à ŋá de? Mãa nɩ a Gabayɛl bɛ bãw taa ɩ. Ŋmɩŋmɩn n'a ɩ̃ na tɩ ɩ ʋ bãw kɛ́ mãa n'ʋ, bɛr tɩɛrʋ ɛ́ kʋ̀ m a libie? Lɛb waar mɩ̀, ɩ̃ bɛ bãw a sɔ́r na cere a Medi tẽw a ɩ.»

³Lɛ n'a a Tobi tɩ sɔw a ʋ bidɛb: «Mãa nɩ a Gabayɛl maal'ɩ sɛbɛ tɩ za ayi na dĩ nũu ƴãw a tɩ bãwfʋ a. Ɩ̃ tɩ põ nɩ a sɛbɛ ŋa ziir ayi kɛ́ ŋa za mɩ́ tɛr a ŋmãa, ɩ̃ɩ tɩ kʋ̀ ʋ a ʋ dem lãwnɩ a libie. Yome lɩzɛr'ɩ à ŋá ɩ̃ na bin a libie a ʋ zie a. Ƴɛrɛŋa a, ɩ̃ bie e, ƴãw fãw bɔ nɩ-dẽdele ʋ bɩɛlɩ fʋ a Medi tẽw. Tɩ na ya ʋ nɩ a nyɩ lɛb-waa daar. Cen tɩ de a libie á ŋá a Gabayɛl zie.»

⁴A Tobɩasɩ tɩ yi na k'ʋʋ tɩ bɔ nɩr na na tʋ̃ɔ́ bãw a sɔ́r vla na cere a Medi tẽw a. A yẽw a, ʋ tɩ nyɛ̃ nɩ a malkɩ Arafayɛl[25] ʋ àr a ʋ niŋé, ɛcɛ ʋ bɛ tɩ bãw kɛ́ Naaŋmɩn malkɩ n'ʋ ɛ.

⁵Ʋ tɩ yel ʋ na: «Ɩ̃ bá a, nyɩnɛ n'a fʋ yi?» A malkɩ sɔw ʋ: «Ɩ̃ ɩ n a Ɩsɩrayɛl bʋʋrɛ nɩr, a fʋ yɛb kãw, ɩ̃ wa n a ka k'ɩ̃ɩ wa bɔ tome.» A Tobɩasɩ sowr'ʋ: «Fʋ bãw nɩ a sɔ́r na cere a Medi[26] tẽw a?»

⁶A malkɩ tɩ sɔw ʋ na: «Bʋnʋ ɩ! Gb'aa yaga za n'a ɩ̃ cen a be, ɩ̃ bãw nɩ a sɛ́ɛ za tɩ pɩɩrɩ. Mãa wa cen a be a, a tɩ yɛb Gabayɛl na kpɩɛr a Aragɛsɩ a yir'a ɩ̃ mɩ́ tɩ kpɩɛr. Fʋ̃ʋ wa yi a Ɛkɩbatan ɛ́ cere a Aragɛsɩ a, bibie ayi n'a fʋ mɩ́ maalɩ. Bʋ̃ʋ n'ʋ vɛ̃, a tẽ-bɛrɛ ayi á ŋá be n a tan pʋɔ.»

⁷Lɛ n'a a Tobɩasɩ tɩ yel ʋ: «Ɩ̃ bá a, àr a ka ɩ̃ cen tɩ yel kʋ̀ a ɩ̃ sãà ɛ́ wa. Ɩ̃ bɔbr'a kɛ́ fʋ bɩɛlɩ mɛ̃, ɩ̃ɩ na ya b'a.»

⁸A malkɩ sɔw: «Yel bɛ ka be ɩ, ɩ̃ gùre fʋ na, ɛcɛ paw fɔ̃w!»

⁹A Tobɩasɩ tɩ lɛb'a cen tɩ páw a ʋ sãà yel ʋ: «Ɩ̃ nyɛ̃ nɩ nɩr, a tɩ yɛbr Ɩsɩrayɛl nɩr kãw n'ʋ.» A Tobi tɩ yel ʋ n'a: «Bʋɔl'ʋ kʋ̀ m. Ɩ̃ bɔbr'a k'ɩ̃ɩ bãw yir buor nɩ dɔwlʋ buor sob pʋɔ n'a ʋ yi, ɛ́ nyɛ̃ tɩ na tʋ̃ɔ́ na bɛr tɩɛrʋ a ʋ ƴãw, ƴãw k'ʋ bɩɛlɩ fʋ bɩɩ?»

¹⁰A Tobɩasɩ tɩ yi na tɩ bʋɔlɩ a malkɩ, yel ʋ: «Ɩ̃ bá a, a ɩ̃ sãà bʋɔlɛ fʋ na.» A malkɩ tɩ kpɛ n a yir, a Tobi de niwn puor'ʋ. A malkɩ sɔw: «Ɩ̃ bɔbr'a kɛ́ fʋ nãà tɛr nʋ̃ɔ̀ yaga za!» Ɛcɛ a Tobi tɩ sɔw na: «Bʋ̃ʋ nʋ̃ɔ̀ n'a ɩ̃ mɩ̀ na cãà tɩɛrɛ? Ɩ̃ ɩ n zɔ̃w, ɩ̃ bɛ cãà nyɛrɛ a mʋ̃tɔ̃w cãà ɩ, ɩ̃ be n a lige pʋɔ mɛ̃ a kũuni na kʋ̃ lɛb nyɛ̃ a cãà a. Ɩ̃ na saa vʋʋrɛ a, ɛcɛ ɩ̃ be n a kũuni sɔgɔ. Ɩ̃ mɩ́ wõ n a nɩbɛ na ƴɛ̀rɛ a, ɛcɛ ɩ̃ bɛ mɩ́ nyɛ̃ bɛ ɩ.» Lɛ n'a a malkɩ tɩ sɔw ʋ: «Dɩ kanyir! Naaŋmɩn kʋ̃ yaa kɛ́ sanɩ fʋ ɛ, dɩ kanyir!» A Tobi yel ʋ: «A ɩ̃ bidɛb Tobɩasɩ bɔbr'ɩ Medi tẽw cenu, fʋ na tʋ̃ɔ́ na bɩɛl'ʋ wul ʋ a sɔ́r nyɩ cen bɩɩ? Ɩ̃ bá a, ɩ̃ na ya b'a.» A malkɩ tɩ sɔw ʋ na: «Ɩ̃ na tʋ̃ɔ́ na bɩɛl'ʋ tɩ cen. Ɩ̃ bãw nɩ a sɛ́ɛ za na cere a Medi tẽw a, bʋ̃ʋ n'ʋ vɛ̃, ɩ̃ cen nɩ a be gb'aa yaga za. Ɩ̃ tɔl'ɩ a ʋ tɩ̃talɛ nɩ a ʋ tan pʋɔ, a lɛ ƴãw a, ɩ̃ bãw nɩ a sɛ́ɛ za pɩɩrɩ.»

¹¹A Tobi tɩ sowr'ʋ na: «Ɩ̃ bá a, yel kʋ̀ m, yir-buor nɩ dɔwlʋ buor sob pʋɔ n'a fʋ yi?»

¹²A malkɩ yel ʋ: «Bʋ̃ʋ n'ʋ so fʋ bɔbr kɛ́ fʋ bãw a?» A Tobi lɛb yel: «Ɩ̃ bá a, ɩ̃ bɔbr'a k'ɩ̃ɩ bãw a yel-mɩŋa. Ãa bie nɛ b, ɛ́ a fʋ yúor dɩ kɛ́ bo?»

¹³A malkɩ sɔw ʋ: «A ɩ̃ yúor dɩ na kɛ́ Azarɩasɩ, Ananɩasɩ-Kpɛ̃ɛ bidɛb nɛ m, ɛ́ mɩ̀ ɩ a Ɩsɩrayɛl nɩr mɛ̃ a fʋ̃ʋ a.»

¹⁴A Tobi tɩ yel ʋ na: «Ɩ̃ yɛb i, sàw a fʋ waa yãanɩ. Ta nyɛ̃ nɩ mɛ̃ suur ɛ, a fʋ yir yel-mɩŋa tɛwr'a ɩ̃ tɩ bɔbr k'ɩ̃ɩ bãw. A sãá na kɛ́ fʋ ɩ n a ɩ̃ tẽ-bi-tɔ ɛ́ yi yir na tɛr yúor a pʋɔ. Ɩ̃ tɩ bãw nɩ a Ananɩasɩ nɩ a Natan vla, bɛ za ayi tɩ ɩ n Semelɩasɩ-Kpɛ̃ɛ bidɛbr. Bɛ mɩ́ tɩ lãwnɩ mɛ̃ na cen a Zerizalɛm kɛ́ tɩ tɩ puori a Naaŋmɩn. Bɛ bɛ tɩ bɛr a sɔr-vla tub ɛ, a fʋ yir dem ɩ n nɩ-vɩɛlɩ vɩɛlɩ, fʋ yi n yir na tɛr yúor a pʋɔ. A lɛ ƴãw a, sàw a fʋ waa yãanɩ!»

¹⁵Al pùorí, a Tobi tɩ yel'a ƴãw pʋɔ: «Ɩ̃ na ya b'ɩ a lɛ bɛ na yarɛ a: salm-pla libi-ɓɛl been bibir za. Ɛ́ a fʋ bʋ̃-bɔbrɩ a mɩnɛ ƴãw a, ɩ̃ na kʋ̀ b a mɛ̃ a lɛ ɩ̃ na kʋ̀ a ɩ̃ bie a.»

¹⁶A lɛ ƴãw a, bɩɛlɩ a ɩ̃ bidɛb cen nɩ, ɩ̃ɩ na dɔwl'ɩ bom a fʋ yar zu a nyɩ lɛb-waa daar.

¹⁷A malkɩ yel ʋ: «Ʋ̃ʋ, ɩ̃ na bɩɛl'ʋ na tɩ cen. Ta zɔrɛ dɛ̃bɩ̃ɛ ɩ, a yele na tu n vla a tɩ cenu nɩ a tɩ lɛb-waa za pʋɔ, bʋ̃ʋ n'ʋ vɛ̃, bʋ̃-faa bɛ be a sɔ́r zu ɛ.» A Tobi sɔw ʋ: «Ɩ̃ bá a, a Naaŋmɩn, ʋ maalɩ fʋ.» Al pùorí, a Tobi tɩ bʋɔl'ɩ a ʋ bidɛb wa yel ʋ: «Ɩ̃ bie e, cɔbrɩ a alɩ bome nɛ za a na fɛr kɛ́ fʋ tɛr lo n a sɔ́r a, yi páw nɩ a fʋ yɛb Azarɩasɩ nyɩ cen. A Naaŋmɩn na be a salom zu a, ʋ gù nyɩ a be ɛ́ lɛb tɛr nyɩ wa n a ɩ̃ zie nɩ ƴã-ɓaarʋ! A ʋ malkɩ ʋ bɩɛlɩ nyɩ, ɛ́ gù nyɩ, ɩ̃ bie e!» A Tobɩasɩ tɩ yi na k'ʋʋ lo a sɔ́r. Ʋ tɩ nyɔw nɩ a sãà nɩ a mã weri, ɛ́ a sãà yel ʋ: «Nyɩ na cen nɩ vla!»

¹⁸A Tobɩasɩ mã tɩ nyɔw nɩ kon, ɛ́ yel a Tobi: «Bʋ̃ʋ n'ʋ so fʋ bɛr a ɩ̃ bie k'ʋ cere, ʋ na tɩ be a ka a, ʋlɛ bɛ n'ʋ tɩ kaarɛ a tɩ zie ɩ?

¹⁹Bʋ̃ʋ n'ʋ so a libi-bɔ á ŋá? Tɩ bɛr a, a tɩ bie zuo a nɩ polpol lɛ.

²⁰A al za a Naaŋmɩn na kʋ̀ tɩ kɛ́ tɩ vʋʋrɛ nɩ a sɛw na!»

²¹Ɛcɛ a Tobi tɩ sɔw ʋ na: «Ta ɩ a fʋ tɩɛrʋ damnɛ fʋ ɛ, a tɩ bie cenu nɩ a ʋ lɛb-waa na tu n vla. Fʋ na nyɛ̃ a na nɩ fʋ mimir ʋlɛ wa lɛb wa a fʋ zie nɩ ƴã-ɓaarʋ a.

²²A lɛ ƴãw a, ɩ̃ pɔw i, ta ɩ a fʋ tɩɛrʋ damnɛ fʋ ɛ, malkɩ vla kãw na bɩɛl'ɩ a tɩ bie, a ʋ sɔ́r na vɩɛl'a, ʋʋ lɛb wa n ƴã-ɓaarʋ.»

²³Lɛ n'a a Tobi pɔw tɩ bɛr a kon.