Read Dagara, Northern Tobi 6 Bible Online

Tobi 6 - Dagara, Northern bible

Tobi 6

¹Lɛ n'a a pɔlbile tɩ yi lo a sɔ́r, ɛ́ a malkɩ bɩɛlɛ ʋ. A baa[27] mɩ̀ tɩ tu bɛ na cen. A tɩ̃ɩsɔw-dãw-niwn sob a, bɛ tɩ maal'ɩ a bɛ laɩ a Tɩɩgɩr man nʋɔr.

²A pɔlbile tɩ siw nɩ a man pʋɔ k'ʋʋ tɩ pɛ́w a ʋ gbɛ́ɛ, ɛcɛ zʋm-kpɛ̃ɛ kãw tɩ ƴaw na yi a kʋ̃ɔmɩ́, bɔbr k'ʋʋ vɔl ʋ a gbɛ́r. A Tobɩasɩ kõ cɩɩrɩ.

³Lɛ n'a a malkɩ tɩ yel ʋ: «Nyɔw ʋ tɛr kpɛ̃w za!» A Tobɩasɩ tɩ tʋ̃ɔ́ nɩ a zʋ́m nyɔw, ɛ́ tɩ vɩr ʋ yi n a man kõkowrí.

⁴A malkɩ tɩ yel ʋ na: «Wɛr ʋ, ír a kalɩ̃kaar, a socir nɩ a sabr maal tɛr. Al pùorí, lɔb a nyagɛ bɛr. Bʋ̃ʋ n'ʋ vɛ̃, a kalɩ̃kaar, a socir nɩ a sabr ɩ n tɩ̃ɩ-vla na sanɛ a.»

⁵A pɔlbile tɩ wɛ̀r'ɩ a zʋ́m ír a kalɩ̃kaar, a socir nɩ a sabr. Al pùorí, ʋ ŋmãa a zʋ́m nɛn sɛ̃ 'wɔb, ɛ́ ƴãw a ŋmãa nyaarʋ k'aa taa pʋ̃ɔnɛ ɩ.

⁶Al pùorí, bɛ za ayi tɩ cãà lo a sɔ́r cen tɩ ta a Medi tẽw tʋr-bɔw ƴãw.

⁷Lɛ n'a a pɔlbile tɩ sowri a malkɩ: «Ɩ̃ yɛb Azarɩasɩ i, ŋmɩŋmɩn n'a a zʋ́m socir, a ʋ kalɩ̃kaar nɩ a ʋ sabr na tʋ̃ɔ́ ɩ tɩ̃ɩ?»

⁸A malkɩ tɩ sɔw ʋ na: «Kɔ̃tɔn bɩɩ vʋʋr-faa wa fɛrɛ dɛb bɩɩ pɔw a, bɛ mɩ́ nyɩw nɩ a zʋ́m socir nɩ a ʋ sabr a nɩr nɛ niŋé. A zʋ̀ʋ́r na íre dúor a, mɩ́ diw nɩ a vʋʋr-faa daadaalɛ, ɛ́ a dɛb bɩɩ a pɔw sanɩ a nʋɔr kʋ.

⁹Alɛ wa cɛ a kalɩ̃kaar a, nɩr na tɛr bʋ̃-pɛlɛ a ʋ mimie pʋɔ a n'a fʋ mɩ́ ɩ sɔ a mimigbile, ɛ́ pɛblɩ a bʋ̃-pɛlɛ al zu a mimie sanɩ.»

¹⁰Bɛ tɩ ta n a Medi tẽw. Bɛ na tɩ pɩɛlɛ a Ɛkɩbatan a,

¹¹a Arafayɛl tɩ yel'ɩ a Tobɩasɩ: «Ɩ̃ yɛb Tobɩasɩ i!» A Tobɩasɩ sɔw: «Ɛ́ bʋnʋ?» A malkɩ lɛb yel: «A dɩ̃a tɩ̃ɩsɔw a, a Araguwɛl na ɩ a fʋ nɩr a yir'a tɩ na tɩ gã. Ʋ tɛr'ɩ pɔwyaa a yúor dɩ kɛ́ Saara.

¹²Alɛ bɛ wa ɩ a Saara a, ʋ bɛ tɛr bidɛb nɩ pɔwyaa ɩ. A Saara nɩbɛ pʋɔ a, fʋ̃ʋ n'ʋ pɩɛl'ʋ zuo a bɛ za, ɛ́ ɩ a nɩr ʋl na tɛr sɔ́r na dãw kul a Saara ɛ́ dɩ a ʋ sãà gbãw a. Ʋ ɩ n pɔwsɩrale na tɛr yã, tɛr kanyir, ɛ́ pɔl yaga za a. A ʋ sãà ɩ n nɩ-vla.

¹³Fʋ tɛr'ɩ sɔ́r na kul ʋ. Bɛr wõ m vla, ɩ̃ yɛb i. Ka nɩ a zaanʋɔra a, ɩ̃ na ƴɛ̀r'ɩ a pɔwsɩrale ƴɛ̀rʋ a ʋ sãà zie, bɛ de ʋ kʋ̀ b. Ɛ́ tɩmɛ wa yi a Aragɛsɩ lɛb wa a, tɩ na maal'ɩ a kul-taa. Ɩ̃ bãwnɩ a na, a Araguwɛl bɛ be za na sɩb fʋ a Saara, ɛ́ de ʋ kʋ̀ nɩ-yũo ʋ ƴãw nɩ yúor ɛ. Alɛ bɛ wa ɩ lɛ, a fɛr'a kɛ́ bɛ kʋ ʋ mɛ̃ a lɛ a Moyiir wulu na ƴãw a. Bʋ̃ʋ n'ʋ vɛ̃, ʋ na faa bãwnɩ a kɛ́ fʋ̃ʋ n'ʋ tɛr sɔ́r na de niwn kul a ʋ pɔwyaa a ƴãw. A lɛ ƴãw a, ɩ̃ yɛb i, bɛr wõ m, a zaanʋɔra ŋa a, a Araguwɛl nɩ a mãa na tɛr'ɩ ƴɛ̀r-sɔw-taa a pɔwsɩrale ƴãw, ɩ̃ɩ zɛlɩ ʋ a sãà zie kʋ̀ b. A lɛn daar tɩmɛ wa yi a Aragɛsɩ lɛb wa a, tɩ na de ʋ na tɩ za lãw kul a fʋ yir.»

¹⁴Lɛ n'a a Tobɩasɩ tɩ sɔw a Arafayɛl: «Ɩ̃ yɛb Azarɩasɩ i, ɩ̃ wõ na bɛ yel k'aa Saara kul'ɩ sɩr gb'a ayopõi, ɛcɛ a ʋ sɩrbɛ za kpi n a kul-taa dĩó. A tɩ̃ɩsɔw daarɩ́, bɛ na mɩ́ wa bɔbr kɛ́ bɛ taw pɩɛl'ʋ a, bɛ mɩ́ kpi na. Ɛcɛ bɛ cãà na lɛb yel kʋ̀ m kɛ́ kɔ̃tɔn n'ʋ mɩ́ tɩ kʋ bɛ.

¹⁵Alɛ n'a so dɛ̃bɩ̃ɛ ɩrɛ mɛ̃. A kɔ̃tɔn bɛ ɩrɛ a pɔwsɩrale bom za ɩ, ɛcɛ ʋ mɩ́ kʋ n a ʋlɩ sob na mɩ́ bɔbr k'ʋʋ pɩɛl'ʋ a. Ɩ̃ ɩ n a ɩ̃ sãà bidɛb-been yõ, ɛ́ mãa wa kpi a, ɩ̃ na ƴãw nɩ a ɩ̃ sãà nɩ a ɩ̃ mã bɛ siw a yaa pʋɔ nɩ kpɩɛrʋ. Bɛ bɛ tɛr bidɛb-yũo ʋ nãà wa ũù bɛ ɩ.»

¹⁶A Arafayɛl lɛb yel ʋ: «Fʋ yiir'ɩ a lɛ a fʋ sãà na wul fʋ kɛ́ fʋ kul pɔw a ʋ bʋʋrɛ pʋɔ a bɩɩ? Bɛr wõ m, ɩ̃ yɛb i. Ta zɔrɛ dɛ̃bɩ̃ɛ a kɔ̃tɔn ŋa ƴãw ɛ, ɛ́ kul a Saara. Ɩ̃ bãwnɩ a na k'aa zaanʋɔra ŋa a, bɛ na de ʋ na kʋ̀ b, ʋ ɩ a fʋ pɔw.

¹⁷Ɛcɛ fʋ̃ʋ wa kpɛ a kul-taa dĩó a, fʋ̃ʋ ŋmãa a zʋ́m sabr blã de nɩ a socir dɔwlɩ a vũu-bie na be a tɩ-suur-zɔ̃-na-nyùur-vla-vla-a nyɩwfʋ-kole pʋɔ a zu. A kɔ̃tɔn na zɔ na zãá ʋlɛ wa wõ a nyũu na ìre dúor a, ɛ́ bɛ kʋ̃ lɛb nyɛ̃ ʋ a pɔwsɩrale zie towtow ɛ.

¹⁸A nyɩ lãw-taa daar wa ta a, nyɩɩm de niwn ìr nyɩ za ayi, puori a Sore na be a salom zu a. Nyɩ zɛlɩ ʋ k'ʋʋ zɔ a nyɩ nɩbaalʋ ɛ́ gù nyɩ. Ta zɔrɛ dɛ̃bɩ̃ɛ ɩ, bɛ kaa na ír a Saara a fʋ ƴãw koro kãw za. Fʋ̃ʋ n'ʋ na faa ʋ. Ʋ na tu b'a kul, ɩ̃ɩ bɔbr'a k'ɩ̃ɩ yel kʋ̀ b, ʋ na tɩ dɔw nɩ bibiir kʋ̀ b. Bɛ na ɩ na mɛ̃ yɛbr a, a fʋ zie. A lɛ ƴãw a, taa wa ɩ a fʋ tɩɛrʋ damnɛ fʋ ɛ!»

¹⁹A Tobɩasɩ na tɩ wõ a Arafayɛl zie, k'aa Saara ɩ n a ʋ sãà yir nɩ a ʋ sãà dɔwlʋ nɩr a, ʋ tɩ tĩ na nɔnɛ a Saara nɩ a ʋ pʋɔ za, ɛ́ a ʋ tɩɛrʋ bɛ mɩ́ lɛb tɩ tʋ̃ɔ́ yi zaa a ʋ zie ɩ.