Read Dagara, Northern Ziditɩ 10 Bible Online

Ziditɩ 10 - Dagara, Northern bible

Ziditɩ 10

¹A Ziditɩ na tɩ puori baarɩ, ɛ́ ƴɛ̀r a ƴɛ̀rʋ á ŋá za kʋ̀ a Ɩsɩrayɛl Naaŋmɩn baar'a,

²ʋ tɩ lɛb'a ìr ɛ́ bʋɔlɩ a ʋ tõ-tõ-bi-pɔw. Al pùorí ʋ siw a dĩó, a be ʋ na mɩ́ tɩ be kʋralɛ a pɩ̃ɛnʋ-bibie nɩ a cuwr bibie a.

³Ʋ tɩ yaa nɩ a vʋɔra ʋ na tɩ sɛ a nɩ a ʋ pɔw-kʋɔlʋ bʋ̃-suuri bɛr. Ʋ tɩ so n kʋ̃ɔ ɛ́ zɛ kãá-nyuure a daarʋ na bɛ gbʋ́r a. Al pùorí, ʋ càarɩ a ʋ zu ɛ́ de pɛn 'lẽ nɩ, ɛ́ su a cuwr kpar-vɩɛlɩ vɩɛlɩ al ʋ na tɩ suur a ʋ sɩr Manase cãafʋ daar a.

⁴Ʋ tɩ ƴãw nɩ nafawr ɛ́ ƴãw a ʋ pɩ̃ɛmɛ za: kɔkɔrɩ́ lɛgɛ, nuru bamɛ, nũ-tʋɛ nɩ tokpamɛ. Ʋ tɩ su na tɩ pɔ̀l k'aa dɛbr mɩ́ nyɛ̃ ʋ cen gù.

⁵Ʋ tɩ de nɩ divɛ̃ nɩ wɔ-gbãw nɩ kãá nɩ duwle kʋ̀ a ʋ tõ-tõ-bi-pɔw. Ʋ tɩ paal'ɩ vʋɔra nɩ ɔɔzʋ zɔ̃, tɩ-wɔ̃-kon gato-been, dipɛ̃ nɩ bʋ̀r-kãá-gbil, ɛ́ 'lẽ a za vla vla de kʋ̀ a ʋ tõ-tõ-bi-pɔw.

⁶Al pùorí, bɛ za ayi tɩ cen nɩ a Betuli tẽw dɩ̃dɔr ƴãw, tɩ nyɛ̃ a Ozɩasɩ nɩ a tẽw nɩ-kore ayi, Kabirisɩ nɩ Karmisɩ, a be.

⁷A nɩbɛ bɛ ŋa na tɩ nyɛ̃ a ʋ niwn bɛ cãà ŋmɛ̃ a ʋ ŋmɛ̃a, ʋʋ lɩɛrɩ a ʋ bʋ̃-suuri a, bɛ tɩ háa nɩ nʋɔr jɩ́rɛ nɩ ʋ na pɔ̀l a, ɛ́ yel ʋ:

⁸«A tɩ sãàkʋm-kore Naaŋmɩn, ʋ wul fʋ a ʋ nɔ̃wfʋ, ɛ́ sàw fʋ tʋ̃ɔ́ tu a lɛ za fʋ na tɩɛrɩ a, a Ɩsɩrayɛl nɩ-bʋʋrɛ ƴãwfʋ ƴãw nɩ a Zerizalɛm yúor zɛwfʋ ƴãw!»

⁹A Ziditɩ tɩ lo na gbĩ dume puori a Naaŋmɩn ɛ́ yel bɛ: «Nyɩ ƴãw bɛ yuo a tẽw dɩ̃dɔr, ɩ̃ tʋ̃ɔ́ yi tɩ tu a bom nɛ ƴɛ̀rʋ tɩ na ƴɛ̀r a.» Bɛ tɩ yel'ɩ a pɔ́lɛ́ na gùre a zie a, kɛ́ bɛ yuo ʋ a dɩ̃dɔr mɛ̃ a lɛ ʋ na zɛlɩ a.

¹⁰Bɛ tɩ yuo ʋ na. Lɛ n'a ʋlɛ nɩ a ʋ tõ-tõ-bi-pɔw tɩ yi. Ʋ na tɩ cere a, a tẽw nɩbɛ tɩ jɩ́rɛ ʋ na, ʋ tɩ siw a tãw ɛ́ gãw a fʋɔla. Al pùorí, bɛ bɛ tɩ cãà nyɛ̃ ʋ ɛ.

¹¹A Ziditɩ nɩ a ʋ tõ-tõ-bi-pɔw tɩ tori nɩ niwn cere a fʋɔla pʋɔ. Bɛ tɩ tuor'ɩ a Asiiri tẽw dem sojarɩ na gùre a zi-dãw-niwn sob a.

¹²Bɛ tɩ ŋmãa nɩ a Ziditɩ sowr'ʋ: «Nɩ-bʋ̃ʋ-bʋʋrɛ nɛ b? Nyɩnɛ n'a fʋ yi waar? Nyɩnɛ n'a fʋ cere?» Ʋ tɩ sɔw bɛ na: «Ebre bʋʋrɛ pɔw nɛ m. A bɛ zie n'a ɩ̃ yi zɔrɛ, bʋ̃ʋ n'ʋ vɛ̃, bɛ kʋ̃ yaa kɛ́ lo a nyɩ nuru pʋɔ ɩ.

¹³Ɩ̃ wa na k'ɩ̃ɩ wa nyɛ̃ a nyɩ zɛbr-nɩbɛ nɩ-bɛrɛ nɩ-kpɛ̃ɛ kpɛ̃ɛ za, a Holofɛn, manɩ wul ʋ a lɛ a yele na sɩrɩ ɩ a. Ɩ̃ na wul ʋ nɩ be ʋ na na tu tɔl de a tan vuo za, ʋʋ nɩ-been bɛ kpi a.»

¹⁴A sojarɩ tɩ bɛrɛ na wone a ʋ ƴɛ̀rʋ jɩ́rɛ nɩ a ʋ niwn. Bɛ tɩ nyɛ̃ ʋ na ʋ pɔ̀l bɛ tɛr tɔ ɩ. Bɛ tɩ yel ʋ na:

¹⁵«Fʋ na paw siw wa nyɛ̃ a tɩ nɩ-kpɛ̃ɛ a, fʋ faa nɩ a fʋ nyɔ-vʋʋrʋ. Ƴɛrɛŋa a, cen tɩ ta a ʋ pɛn-sɛw pɛr. A tɩ nɩbɛ bɛ mɩnɛ na bɩɛlɩ fʋ na tɩ ta n a ʋ zie.

¹⁶Fʋ̃ʋ wa ta a ʋ niŋé a, fʋ̃ʋ bɛr dɛ̃bɩ̃ɛ. Lɛb yel à à ŋá fʋ na yel kʋ̀ tɩ a, ʋʋ na maalɩ fʋ nɩ vla.»

¹⁷Bɛ tɩ kaa na ír dɛbr kʋba (100) a bɛ pʋɔ ƴãw bɛ bɩɛlɛ a Ziditɩ nɩ a ʋ tõ-tõ-bi-pɔw. Bɛ tɩ tɛr ʋ na tɩ ta n a Holofɛn pɛn-sɛw pɛr.

¹⁸Nɩbɛ tɩ yi n a laɩ pʋɔ ziir za zɔrɛ waar, bʋ̃ʋ n'ʋ vɛ̃, a pɛnɛ-sɛwr za pʋɔ a, bɛ tɩ yel'ɩ a ʋ waa. Bɛ tɩ wa na wa ŋmãa viiri koli ʋ, a lɛ ʋ na tɩ àr a yẽw a Holofɛn pɛn-sɛw pɛr, gùre kɛ̀ bɛ yel a ʋl Ziditɩ waa kʋ̀ a Holofɛn a.

¹⁹Bɛ tɩ mʋʋrɛ ʋ na ʋ na pɔ̀l a, ɛ́ mʋʋrɛ a Ɩsɩrayɛl nɩbɛ a ʋ ƴãw, ɛ́ yere kʋ̀rɛ taa: «Ãa n'ʋ na sàw yel k'aa nɩ-bʋʋrɛ bɛ ŋa bɛ ɩ nɩbɛ, bɛl na tɛr a pɔwbɛ bɛ ŋa taabɛ a? A bɛ sɛw k'aa bɛ nɩ-been cãà vʋʋrɛ ɩ: a bɛl na na cɛ vʋʋrɛ a, na bɛlɩ nɩ a tẽw za!»

²⁰A sojarɩ na gùre a Holofɛn a, nɩ a ʋ sojarɩ nɩ-bɛrɛ tɩ yi na tɛr a Ziditɩ kpɛ n a pɛn-sɛw pʋɔ.

²¹A Holofɛn tɩ gã nɩ a ʋ gado zu pɩ̃ɛnɛ. Sãje bɛ na maal'ɩ pɛn-zɩɛ-vla vla kãw a, ɛ́ ƴãw salm-zɩɛ pɩ̃ɛmɛ, nɩ emerodɩ nɩ kʋsɛ-bi-nyɩlɩ a mɩnɛ pɩ̃ɛmɛ a, tɩ 'lẽ na ƴãw a gado ƴãw.

²²Bɛ na wa yel kʋ̀ ʋ k'aa Ziditɩ be n be a, ʋ cen nɩ a ʋ pɛn-sɛw dɩ̃dɔr nʋɔr. Tõ-tõ-biir na tɛr vũuni na be salm-pla koli pʋɔ a, tɩ de ʋ nɩ niwn.

²³A Ziditɩ na tɩ ta a Holofɛn nɩ a ʋ sojarɩ nɩ-bɛrɛ niŋé a, bɛ za tɩ mʋʋrɛ ʋ na ʋ na pɔ̀l a. A Ziditɩ tɩ gbĩ n dume a Holofɛn niŋé ɛ́ gũu tɩ tɔ tẽw, ɛcɛ a Holofɛn tõ-tõ-biir tɩ nyɔw ʋ na ʋ lɛb ìr.