Read Dagara, Northern Ziditɩ 11 Bible Online

Ziditɩ 11 - Dagara, Northern bible

Ziditɩ 11

¹A Holofɛn tɩ yel'ɩ a Ziditɩ: «Pɔw i, ɓãá ƴãw! Ta zɔrɛ dɛ̃bɩ̃ɛ ɩ. Ɩ̃ bɛ dãw dɔwrɩ nɩr na yel k'ʋʋ na tone nɩ a tẽw za nãà, Nabikodonɔzɔɔr a ɩ.

²A fʋ nɩ-bʋʋrɛ na kpɩɛr a tan vuo ŋa pʋɔ bɛ tɩ sãw mɛ̃ a, ɩ̃ kʋ̃ʋ de a zɛbr bome yi n a bɛ ƴãw ɛ. Ɛcɛ bɛlɛ nɛbɛ bɔ.

³Ƴɛrɛŋa a, yel kʋ̀ m bom nɛ na n'ʋ so fʋ yi a bɛ zie zɔ wa a tɩ zie a. Bʋ̃ʋ n'ʋ vɛ̃, a fʋ faafʋ ƴãw n'a. Ɓãá ƴãw, fʋ na faa nɩ a fʋ nyɔ-vʋʋrʋ a dɩ̃a tɩ̃ɩsɔw nɩ a nɩdaar mɩ̀.

⁴Nɩr za bɛ ɩrɛ fʋ faa ɩ. Bɛ na nɩ̃ɛ na kaa fʋ zie vla, mɛ̃ a lɛ bɛ na mɩ́ ɩ a ɩ̃ nɩ-kpɛ̃ɛ, a nãà Nabikodonozɔɔr, tõ-tõ-biir a.»

⁵A Ziditɩ tɩ sɔw ʋ na: «Sàw a mãa na ɩ a fʋ gbãgbaa a, ɩ̃ de a ƴɛ̀rʋ. Bɛr wõ m, sore e, bʋ̃ʋ n'ʋ vɛ̃, ɩ̃ bɛ ŋmaarɛ ziri kãw za kʋ̀rɛ fʋ a tɩ̃ɩsɔw ŋa ɩ.

⁶Fʋ̃ʋ wa tu a yã ɩ̃ na wule fʋ a, Naaŋmɩn na ɩ n a lɛ fʋ na cɔbrɩ a tu vla. Fʋ kʋ̃ ɩ bom za gù ɛ.

⁷Alɛ wa ɩ sɩza n'a a Nabikodonozɔɔr, a tẽw za nãà, vʋʋrɛ ɛ́ a ʋ kpɛnʋ ɩ kpɛ̃ɛ a, ɩ̃ pɔ na kɛ́ ʋlɛ n'ʋ to b, kɛ́ fʋ wa ɩ bʋ̃-vʋʋra za de a sɔr-dẽdẽ. Fʋ̃ʋ n'ʋ so a nɩsaalbɛ za sàwr a nãà nʋɔr. Mɔ̃ mɩ̀, a fʋ fãw zũú na a wɛ-dʋn, a yir dʋn nɩ a lili na vʋʋrɛ, a Nabikodonozɔɔr nɩ a ʋ yir dem ƴãw.

⁸Tɩ wõ n a lɛ fʋ na bãw yã ɛ́ bãw yele a. A tẽ-daa za bãwnɩ a na k'aa naalʋ tẽw za pʋɔ a, nɩr bɛ kpɛ socir ta b ɛ, nɩ k'aa zɛbr yele fʋ na bãw bɛ tɛr tɔ a, ɩ na fʋ ɩ sojarɩ nɩ-kpɛ̃ɛ a yúor na yi yaga a.»

⁹«Alɛ wa cɛ a ƴɛ̀rʋ a Akɩyɔɔr na ƴɛ̀r a fʋ yã-wulbɛ lãw pʋɔ a ƴãw a, tɩ bãw ʋ na: a Betuli tẽw nɩbɛ faa nɩ a Akɩyɔɔr, ʋ man nɩ a lɛ za ʋ na yel a fʋ niŋé a kʋ̀ bɛ.

¹⁰A na ɩ à ŋá a, ɩ̃ nɩ-kpɛ̃ɛ nɩ ɩ̃ sore e, ta de dɩ̃ɛnʋ ƴãw a ʋ ƴɛ̀rʋ ƴãw ɛ. Nɩ̃ɛ cɛlɛ a zie vla, bʋ̃ʋ n'ʋ vɛ̃, yel-mɩŋa n'a a Akɩyɔɔr yel: a tɩ nɩ-bʋʋrɛ bɛ wa maalɩ yel-bier sãw a bɛ Naaŋmɩn a, nɩr kʋ̃ tʋ̃ɔ́ dɔwrɩ bɛ ɩ, zɛbr-sɔ-kpɛ̃ɛ bɛ tɛr bɛ yel-ɩra ɩ.

¹¹Ƴɛrɛŋa a, a kũu na lo n a bɛ zu, k'aa ɩ̃ nɩ-kpɛ̃ɛ ta zɛb tʋ̃ɔ́ gù ɛ́ lɛb ɛ, bʋ̃ʋ n'ʋ vɛ̃, a yel-bier nyɔw bɛ na, ɛ̀ bɛ na ɩ a Naaŋmɩn suur ìr, mɛ̃ a lɛ ʋ na mɩ́ ìr a lɛn daar za bɛ na mɩ́ maalɩ a faa a.

¹²Bɛ bɛ cãà tɛr bʋ̃-dɩrɩ ɛ, ɛ́ a kʋ̃ɔ bɛ cãà nyɛrɛ ɩ. Alɛ so bɛ yel kɛ́ bɛ na kʋ n a bɛ dʋn 'wɔb nɩ bom nɛ za a Naaŋmɩn wulu na yel kɛ́ bɛ ciir a.

¹³Bɛ na dɩ n a ble-dãw bɛ na de a, nɩ a divɛ̃ nɩ a kãá ziir-pie-sob bɛ na tɩ maal bin kõkowrí a. Ɛcɛ a bome á ŋá ɩ n Naaŋmɩn sób, a bàwr-maalbɛ na tone a tɩ Naaŋmɩn tome a Zerizalɛm Ŋmɩn-yir-kpɛ̃ɛ pʋɔ a, bɛlɛ so a. A nɩbɛ pʋɔ a, nɩr za bɛ tɛr sɔ́r na tɔ a bome á ŋá ɩ.

¹⁴Ɛcɛ a Zerizalɛm tẽw dem zawr'ɩ a nʋɔr ŋa baarɩ. Alɛ so a Betuli tẽw dem tõ nɩbɛ a Zerizalɛm nɩ-kore lãw nɩbɛ zie, k'aa lãw nɩbɛ kʋ̀ bɛ sɔ́r bɛ tu mɛ̃ a bɛl a.

¹⁵A ʋlɩ bibir nɛ tɔr za bɛ nãà wa páw a sɔ́r ŋa a, ɛ́ dɩ a bome á ŋá a, Naaŋmɩn na de bɛ na ƴãw a fʋ nuru pʋɔ, ɛ́ fʋ na tʋ̃ɔ́ na kʋ bɛ pàw pɛr.

¹⁶Alɛ n'a so, a mãa fʋ tõ-tõ-bi-pɔw na wõ à à ŋá a, yi a bɛ zie zɔ. Naaŋmɩn tõ m'ɩ a ka, kɛ́ mãa nɩ fʋ̃ʋ wa tõ tome na na ɓãá nɩr za na wone a nʋɔr, a tẽ-daa za zu a.

¹⁷Bʋ̃ʋ n'ʋ vɛ̃, a mãa fʋ tõ-tõ-bi-pɔw, ɩ̃ tu n a Naaŋmɩn na be a salom zu a pùor, puore ʋ mʋ̃tɔ̃w nɩ tɩ̃ɩsɔw za. Dɩ̃a na ta a, ɩ̃ sore e, ɩ̃ na be n a fʋ zie. Ɛcɛ tɩ̃ɩsɔw za, ɩ̃ na mɩ́ yi n a laɩ pʋɔ cen tɩ puori a Naaŋmɩn a fʋɔla pʋɔ. Ʋlɛ n'ʋ na yel kʋ̀ m a lɛn daar a Betuli tẽw nɩbɛ na na maalɩ a yel-bier ŋa a.

¹⁸Ɩ̃ na lɛb'a wa wa yel kʋ̀ b. Lɛ n'a fʋ na yi n a fʋ zɛbr-nɩbɛ za ŋmãa nɩ bɛ a zɛbr, ɛ́ nɩr bɛ be a bɛ pʋɔ na bà gbɛ́r a fʋ niŋé ɩ.

¹⁹Al pùorí, ɩ̃ na tɛr fʋ na tɔl'ɩ a Zude tẽw tɩ ta n a Zerizalɛm, ɩ̃ na ƴãw na bɛ bin a fʋ naalʋ-dà-kɔw a tẽw sɔwlɩsɔw. Fʋ na cɩ̃ɩnɛ nɩ a tẽw dem mɛ̃ píir na bɛ tɛr cɩ̃ɩnɛ a, ɛ́ baa bɛ wowre ɩ. Naaŋmɩn ƴɛ̀r'ɩ a ɩ̃ zie, ʋ ɩ na ɩ̃ de niwn bãw à á ŋá za, ɛ́ wa k'ɩ̃ɩ wa yel kʋ̀ b.»

²⁰A Ziditɩ ƴɛ̀rʋ á ŋá tɩ pɛlɩ nɩ a Holofɛn nɩ a ʋ sojarɩ nɩ-bɛrɛ pʋɔ. Bɛ tɩ mʋʋrɛ nɩ a ʋ yã-bãwfʋ ɛ́ yere:

²¹«A tẽ-daa za na yi ka tɩ tɔ ka a, pɔw bɛ be be pɔ̀l à ŋá ɛ́ bãw yã à ŋá a ƴɛ̀rʋ pʋɔ ɩ.»

²²Al pùorí, a Holofɛn tɩ yel'ɩ a Ziditɩ: «A Naaŋmɩn maal'ɩ vla, ʋ na to b a ka, fʋ de a fʋ nɩ-bʋʋrɛ niwn, kɛ́ fʋ ɩ ɩ̃ zɛb tʋ̃ɔ́, ɛ́ kʋ a bɛlɩ dem na sãw a ɩ̃ nɩ-kpɛ̃ɛ Nabikodonozɔɔr a.

²³Ɛ́ a fʋ̃ʋ a, fʋ pɔ̀l'a, ɛ́ bãw ƴɛ̀rʋ ƴãw pʋɔ. Fʋ̃ʋ wa ɩ mɛ̃ a lɛ fʋ na yel a, a fʋ Naaŋmɩn na ɩ n a ɩ̃ Naaŋmɩn. Fʋ na kpɩɛr'ɩ a nãà Nabikodonozɔɔr yir pʋɔ, ɛ́ a fʋ yúor na yi n a tẽ-daa za zu.»