Read Dagara, Northern Ziditɩ 12 Bible Online

Ziditɩ 12 - Dagara, Northern bible

Ziditɩ 12

¹A Holofɛn tɩ ƴãw na bɛ tɛr a Ziditɩ cen nɩ a ʋ dɩb tabal pɛr. Salm-pla labɛ n'a tɩ dɔwlɩ paalɩ a tabal za. A Holofɛn tɩ yel'a kɛ́ bɛ ɩ a ʋ bʋ̃-dɩrɩ nɩ a ʋ divɛ̃ kʋ̀ a Ziditɩ.

²Ɛcɛ a Ziditɩ tɩ sɔw na: «Ɩ̃ kʋ̃ tʋ̃ɔ́ dɩ a ɩ, alɛ bɛ ɩ lɛ, ɩ̃ na sãw nɩ a ɩ̃ Naaŋmɩn nʋɔr. A al ɩ̃ na wa n a tɛwr'a ɩ̃ na dɩ.»

³Lɛ n'a a Holofɛn lɛb yel ʋ: «Ɛ́ a bʋ̃-dɩrɩ fʋ na tɛr a wa baarɩ, ŋmɩŋmɩn n'a tɩ na ɩ lɛb páw a kʋ̀ b? Ɩsɩrayɛl nɩr kãw za bɛ ka a tɩ laɩ pʋɔ ɩ.»

⁴A Ziditɩ tɩ sɔw ʋ na: «Ɩ̃ sore e, ɩ̃ pɔ n nɩ a fʋ nyɔ-vʋʋrʋ, ɩ̃ kʋ̃ dɩ a bome ɩ̃ na tɛr a baarɩ sɛr ɛ, ɛ́ a Sore tu m maalɩ a lɛ ʋ na cɔbrɩ a.»

⁵A Holofɛn sojarɩ nɩ-bɛrɛ tɩ tɛr ʋ na cen nɩ pɛn-sɛw kãw pʋɔ, ʋ tɩ gã a be gúr tɩ ta a tɩ̃ɩsɔw põ-zɛ̃-taa. Ʋ tɩ ìr'a, ɛ́ a mʋ̃tɔ̃w bɛ pur sɛr ɛ.

⁶Ʋ tɩ tõ na kɛ́ bɛ tɩ yel a Holofɛn à ŋá: «A ɩ̃ sore, ʋ ƴãw bɛ bɛr mɛ̃ sɔ́r ɩ̃ yi a puoru ƴãw.»

⁷A Holofɛn tɩ yel'ɩ a sojarɩ na gùre ʋ a, kɛ́ bɛ bɛr ʋ ʋ yi. A Ziditɩ tɩ maal'ɩ bibie ata a laɩ pʋɔ. A tɩ̃ɩsɔw, ʋ mɩ́ tɩ cen nɩ a Betuli fʋɔla pʋɔ, tɩ so a kʋ̃ɔ na bule yire a.

⁸Ʋ na mɩ́ tɩ lɛb do a, ʋ mɩ́ tɩ puor'ɩ a Sore, a Ɩsɩrayɛl Naaŋmɩn, k'ʋʋ wule ʋ a lɛ ʋ na na ɩ faa a ʋ nɩ-bʋʋrɛ a.

⁹Ʋ na mɩ́ tɩ so a ʋ dɛwr bɛr baarɩ à ŋá a, ʋ mɩ́ tɩ lɛb'a kpɛ a ʋ pɛn-sɛw pʋɔ, tɩ be a be tɩ ta a zaanʋɔra bɛ wa kʋ̀ ʋ a ʋ bʋ̃-dɩrɩ.

¹⁰A bibie anaar sob a, a Holofɛn tɩ maal'ɩ cuw dɩb a ʋ tõ-tõ-biir tɛwr ƴãw, ɛ́ bɛ bʋɔlɩ a ʋ zɛbr-nɩbɛ nɩ-kpɛ̃ɛ kãw za ɩ.

¹¹Ʋ tɩ yel'ɩ a dɛ-vár, Bagowasɩ, na tɩ kaarɛ a ʋ yele za zie a: «Cen tɩ páw a Zifʋ bʋʋrɛ pɔw ŋa fʋ na gùre a. Ɩ ʋ sàw wa lãw nɩ tɩ dɩ ɛ́ nyũ.

¹²Bʋ̃ʋ n'ʋ vɛ̃, tɩɩm bɛr a pɔw ŋa tɔ ʋ lɛb kul ɛ́ tɩ bɛ páw ʋ a, vĩ n'a. Tɩmɛ bɛ wa bʋɔl'ʋ a, ʋ na ɩrɛ tɩ na laar.»

¹³A Bagowasɩ tɩ yi n a Holofɛn zie cen a Ziditɩ zie tɩ yel ʋ: «Fʋ̃ʋ, tõ-tõ-bi-pɔw na pɔ̀l a, taa bʋ́nɛ a ɩ̃ sore zie cenu ƴãw ɛ. Ʋ bʋɔlɛ fʋ na, ʋ na ƴãwnɛ fʋ a zũú. Fʋ na tɩ lãw nɩ tɩ na nyũ divɛ̃, ɛ́ a dɩ̃a a, nʋ̃ɔ̀ na ɩrɛ fʋ na, mɛ̃ a Asiiri tẽw pɔwsɩrali na kpɩɛr a Nabikodonozɔɔr yir a.»

¹⁴A Ziditɩ tɩ sɔw ʋ na: «Ãa nɛ m na zawrɩ a ɩ̃ sore nʋɔr? Bom nɛ za na pɛlɩ a ʋ pʋɔ a, ɩ̃ na ɩ ʋ nɩ fɔ̃w fɔ̃wlɛ, ɛ́ a na ɩ m'ɩ nʋ̃ɔ̀ tɩ ta n a ɩ̃ kũu daar.»

¹⁵Ʋ tɩ ìr'a cen tɩ su a ʋ bʋ̃-vɩɛlɩ vɩɛlɩ, ɛ́ ƴãw a ʋ pɩ̃ɛmɛ za. A ʋ tõ-tõ-bi-pɔw tɩ cen nɩ a Holofɛn pɛn-sɛw pʋɔ, tɩ yɛ́r a píir gamɛ a tẽw tori a Holofɛn. A píir gamɛ al a Bagowasɩ na tɩ kʋ̀ a Ziditɩ k'ʋʋ mɩ́ gã a zu nɩ lõbowr ɛ́ dɩrɛ a n'a.

¹⁶A Ziditɩ tɩ kpɛ n a pɛn-sɛw pʋɔ gã a píir gamɛ zu. A Holofɛn tɩ nyɛ̃ ʋ na, a dam ʋ, ɛ́ a ʋ yã za bɔr. Ʋ tɩ bɔbr'ɩ tuotuo k'ʋʋ gã nɩ ʋ. A ʋlɩ bibir nɛ za ʋ na dɛ tɩ nyɛ̃ ʋ a, ʋ tɩ bɔbr'ɩ a vo-vla ʋ na na gã nɩ ʋ a.

¹⁷A Holofɛn tɩ yel'ɩ a Ziditɩ: «Nyúur ɛ́ lãw nɩ tɩ wone nʋ̃ɔ̀!»

¹⁸A Ziditɩ tɩ sɔw ʋ na: «Ɩ̃ na nyũ na, sore e, bʋ̃ʋ n'ʋ vɛ̃, ɩ̃ na cɔ̃ kɛ́ dɔw a, bɛ bɛ dãw ƴãw mɛ̃ mɛ̃ a dɩ̃a a ɩ.»

¹⁹Ʋ tɩ dɩ na ɛ́ nyũ a al a ʋ tõ-tõ-bi-pɔw na tɩ cɔbrɩ a ʋ ƴãw a, a Holofɛn niŋé.

²⁰Nʋ̃ɔ̀ tɩ ɩrɛ nɩ a Holofɛn a Ziditɩ ƴãw, ʋ nyũ a divɛ̃ bɛ dɩ vuo ɩ. Ʋ na cɔ̃ kɛ́ dɔw a, ʋ bɛ dãw nyũ divɛ̃ man a al ʋ na nyũ a ʋlɩ bibir nɛ a ɩ.