Read Dagara, Northern Ziditɩ 14 Bible Online

Ziditɩ 14 - Dagara, Northern bible

Ziditɩ 14

¹Al pùorí, a Ziditɩ tɩ yel bɛ na: «Ɩ̃ yɛbr i, nyɩ bɛr wõ a ɩ̃ ƴɛ̀rʋ. Nyɩ de a zu ŋa tɩ yawl'ʋ a tɩ tẽw dacin saa-zu.

²Bio biɓaar-pipi, a mʋ̃tɔ̃w dɛ wa pure a, a nyɩ kãw za, ʋ de a ʋ zɛbr bome. A nɩ-kpɛn kpɛn za, bɛ yi a tẽw pʋɔ! Nyɩ kaa ír nɩ-kpɛ̃ɛ, ɛ́ ɩ mɛ̃ nyɩ bɔbr'a kɛ́ nyɩ siw a tɩ̃tal lowr, a Asiiri tẽw dem sojarɩ na gùre a zi-dãw-niwn sob a zie. Ɛcɛ nyɩ bɛ siwr ɛ.

³A Asiiri tẽw dem sojarɩ na de nɩ a bɛ zɛbr bome ɛ́ zɔ cen fɔ̃wlɛ a bɛ laɩ pʋɔ tɩ sɩ̃w a bɛ zɛbr-nɩbɛ nɩ-bɛrɛ bɛrɛ. A bɛl mɩ̀ na ìr'a zɔ cen a Holofɛn pɛn-sɛw pɛr, ɛ́ bɛ kʋ̃ tɩ nyɛ̃ ʋ ɛ. Dɛ̃bɩ̃ɛ na nyɔw bɛ na bɛ zɔ zãá nɩ nyɩ.

⁴Nyɩɩm nɩ a bɛlɩ dem za na kpɩɛr a Ɩsɩrayɛl tẽw a, nyɩ na diw bɛ na, ɛ́ nyɩ na kʋ bɛ nɩ a bɛ zɔba pʋɔ.

⁵Ɛcɛ nyɩ de niwn tɛr a Amɔ̃ tẽw dɔɔ, Akɩyɔɔr, wa n a ka, ɛ́ bãw ɩ à à ŋá. A fɛr'a k'ʋʋ nyɛ̃ ɛ́ bãw a sob nɛ na ƴɛ̀r pɔ̀l-ƴɛ̀rʋ kʋ̀ a Ɩsɩrayɛl a zu, ʋl na dáa ʋ bɛr a tɩ zie k'ʋʋ wa kpi a.»

⁶Bɛ tɩ cen nɩ a Ozɩasɩ yir tɩ tɛr a Akɩyɔɔr wa n. Ʋ na wa ta nyɛ̃ a lãw nɩr kãw ʋ tɛr a Holofɛn zu ƴãw nũú a, ʋ lo na kpi fĩw.

⁷Bɛ na wa nyɔw ʋ ʋ lɛb ìr a, ʋ zɔ na cen tɩ lo gbĩ dume a Ziditɩ gbɛ́ɛ ƴãw ɛ́ gũu tɩ tɔ tẽw ɛ́ yel: «A Naaŋmɩn, ʋ maalɩ fʋ a Zude tẽw yie za pʋɔ! Pʋl-vʋ̃ɔ na mɩ́ tɛr'ɩ a nɩ-bʋʋrɛ za nãà wa wone a fʋ yúor a.

⁸Ɛcɛ pãa manɩ bom nɛ fʋ na ɩ a bibie á ŋá pʋɔ a, kʋ̀ m.» Lɛ n'a, a nɩbɛ za niŋé, a Ziditɩ tɩ manɩ bom nɛ za ʋ na ɩ a kʋ̀ ʋ, a na tĩ a bibir ʋl ʋ na yi a tẽw pʋɔ tɩ ta n a lɛn daar ʋ na ƴɛ̀rɛ nɩ bɛ a.

⁹Ʋ na wa ƴɛ̀r baar'a, a nɩbɛ tɩ cáarɩ nɩ kpɛ̃w kpɛ̃w za, ɛ́ lɔb nʋ̃ɔ̀ cɛlsɩ pàw a tẽw za.

¹⁰A Akɩyɔɔr na tɩ nyɛ̃ a lɛ za a Ɩsɩrayɛl Naaŋmɩn na tɩ ɩ a, ʋ tɩ sàw na de ʋ sɩza. Ʋ tɩ ƴãw na bɛ ŋmãa ʋ a yʋ̀ɔr, ʋʋ lɩɛbɩ a Ɩsɩrayɛl nɩ-bʋʋrɛ nɩr kãw wa tɩ tɔ a dɩ̃a.

¹¹A bio daarɩ́ biɓaar-pipi a, bɛ tɩ yawl'ɩ a Holofɛn zu a tẽw dacin zu. Ŋa za tɩ de nɩ a ʋ zɛbr bome, ɛ́ bɛ ŋma gbile gbile siwr a tãw sɩɩr.

¹²A Asiiri tẽw dem na wa nyɛ̃ bɛ a, bɛ tõ n sojarɩ bɛ tɩ yel kʋ̀ a bɛ zɛbr-nɩbɛ nɩ-bɛrɛ, bɛ mɩ̀ tõ bɛ tɩ yel kʋ̀ a bɛ zɛbr-nɩbɛ nɩ-bɛrɛ bɛrɛ, nɩ a bɛ nɩ-bɛrɛ, nɩ a bɛ mɩ̀ nɩ-bɛrɛ.

¹³Bɛ tɩ ta n a Holofɛn pɛn-sɛw pɛr, ɛ́ yel a sob nɛ na tɩ kaarɛ a ʋ yele za zie a: «Kpɛ tɩ sɩ̃w a tɩ nɩ-kpɛ̃ɛ, bʋ̃ʋ n'ʋ vɛ̃, a gbãgbaar kpɛ n pʋra siwr waar kɛ́ bɛ wa zɛb'ɩ tɩ. Bɛ na ɩ na tɩ kʋ bɛ pàw pɛr!»

¹⁴A Bagowasɩ tɩ kpɛ n a pɛn-sɛw pʋɔ tɩ àr a di-gana dɩ̃dɔr nʋɔr ɛ́ ƴãw kɔkɔ: bʋ̃ʋ n'ʋ vɛ̃, ʋ tɩ tɩɛr k'aa Holofɛn nɩ a Ziditɩ nɛbɛ gã gúre.

¹⁵Ɛcɛ nɩr za bɛ tɩ sɔw ɛ, lɛ n'a ʋ tɩ vɩɛ a pɛn-yawla ɛ́ kpɛ a di-gana pʋɔ, nyɛ̃ a Holofɛn ʋ kpi gã dà-kɔwle zu, ɛ́ a zu bɛ ka be ɩ.

¹⁶Lɛ n'a a Bagowasɩ tɩ lɔb cɛl lawlawlaw, kone siwre nɩ, cɩɩrɛ, ùore ɛ́ taw a ʋ bʋ̃-suuri cɩɛrɩ.

¹⁷Ʋ tɩ cen nɩ a pɛn-sɛw ʋl pʋɔ a Ziditɩ na tɩ kpɩɛr a, bɛ tɩ nyɛ̃ ʋ ɛ. Lɛ n'a ʋ tɩ lɛb zɔ cen a zɛbr-nɩbɛ nɩ-bɛrɛ na ɓã taa yaga yaga a zie, tɩ cɩɩrɛ yere nɩ:

¹⁸«A gbãgbaar bɛ ŋa gaar'ɩ a tɩ zu! Ebre bʋʋrɛ pɔw-been yõ ƴãw nɩ vĩ a nãà Nabikodonozɔɔr yir za pʋɔ! Bʋ̃ʋ n'ʋ vɛ̃, a Holofɛn n'ɩ ŋan gã tẽw bɛ tɛr zu ɛ!»

¹⁹A Asiiri tẽw zɛbr-nɩbɛ nɩ-bɛrɛ na dɛ wa wõ a ƴɛ̀r-bie á ŋá a, a tɩ dam bɛ na bɛ dɩ vuo ɩ, bɛ taw a bɛ bʋ̃-suuri cɩɛrɩ. Bɛ tɩ lɔbr'ɩ cɛlsɩ ɛ́ ùore bɛ wone a laɩ za pʋɔ.