Read Dagara, Northern Ziditɩ 15 Bible Online

Ziditɩ 15 - Dagara, Northern bible

Ziditɩ 15

¹A sojarɩ na tɩ be a pɛnɛ-sɛwr pʋʋr na wa wõ a yel ŋa a, bɛ tɩ gbini na àr.

²Dɛ̃bɩ̃ɛ tɩ nyɔw bɛ na bɛ màwr. Nɩr kãw za bɛ tɩ cãà àr kɔw ʋ tɔ sob ɛ. Bɛ za tɩ lãw na ŋmɛr yaarɩ tu a tɩ̃tal pʋɔ nɩ a tan vuo pʋɔ sɛ́ɛ zɔ.

³A bɛl na tɩ maalɩ a bɛ laɩ a tan pʋɔ viiri koli a Betuli a, mɩ̀ tɩ lɩɛb'a zɔ. Lɛ n'a a Ɩsɩrayɛl nɩbɛ za, na na tʋ̃ɔ́ a zɛbr zɛb a, tɩ ta tu bɛ.

⁴A Ozɩasɩ tɩ tõ n nɩbɛ Betomɛsɩtayim, Bebaɩ, Koba, Kola nɩ a Ɩsɩrayɛl tẽw ziir za, kɛ́ bɛ tɩ yel a bom nɛ na ɩ a, ɛ́ yel a nɩbɛ kɛ́ bɛ ta tu a dɔ̃ dem tɩ kʋ bɛ pàw pɛr.

⁵A Ɩsɩrayɛl nɩbɛ na dɛ wa wone a a, bɛ za tɩ lãw na ìr lo a dɔ̃ dem zu, zɛb tʋ̃ɔ́ bɛ tɩ sãá nɩ a Koba. A Zerizalɛm tẽw dem nɩ a tan vuo pʋɔ dem mɩ̀ tɩ wa na, bʋ̃ʋ n'ʋ vɛ̃, bɛ tɩ wõ n a lɛ na ɩ a Asiiri tẽw dem laɩ pʋɔ a. A Galaadɩ tẽw dem nɩ a Galile tẽw dem tɩ 'law nɩ a dɔ̃ dem kʋ bɛ faa faa tɩ sãá nɩ Damasɩ nɩ a ʋ vuo ʋl za pʋɔ.

⁶A Betuli nɩbɛ ŋmãa na cɛ a, tɩ siw nɩ a Asiiri tẽw dem laɩ pʋɔ, tɩ za a bɛ bome kpɛ naalʋ bɛ dɩ vuo ɩ.

⁷A Ɩsɩrayɛl nɩbɛ na tɩ yi a zɛbr lɛb wa a, bɛ tɩ baa na de a bome al na cɛ a. A tẽli pʋɔ nɩbɛ nɩ a kura pʋɔ dem, a tan vuo pʋɔ nɩbɛ nɩ a tɩ̃tal pʋɔ nɩbɛ mɩ̀ tɩ wob'ɩ a zɛbr-na-bome yaga yaga, a bɛ tɩ tɛr vuo ɩ.

⁸A bàwr-maal-kara Zʋakɩm nɩ a Ɩsɩrayɛl nɩbɛ nɩ-kore lãw na kpɩɛr a Zerizalɛm a, tɩ wa n a Betuli kɛ́ bɛ wa nyɛ̃ a yel-vɩɛlɩ a Sore na maalɩ a Ɩsɩrayɛl nɩbɛ ƴãw a, ɛ́ nyɛ̃ a Ziditɩ ɛ́ puor'ʋ.

⁹Bɛ na tɩ kpɛ a ʋ zie a, bɛ za tɩ lãw na mʋʋr'ʋ yel: «Fʋ̃ʋ n'ɩ a Zerizalɛm yúor, a Ɩsɩrayɛl bʋʋrɛ, a tɩ nɩ-bʋʋrɛ nyʋ̀ʋ́r!

¹⁰Fʋ̃ʋ tɔr za n'ʋ ɩ à á ŋá za! Fʋ maal'ɩ a Ɩsɩrayɛl bʋʋrɛ vla, ɛ́ a Naaŋmɩn tɔr za pʋɔ pɛlɩ a al ƴãw. A Sore kpɛnʋ-za-sob, ʋ́ maalɩ fʋ dɩ̃a nɩ bio!» Ɛ́ a nɩbɛ za sɔw: «Amɛn! A sɩrɩ ɩ a lɛ!»

¹¹A Ɩsɩrayɛl nɩbɛ tɩ za n a Asiiri tẽw dem laɩ bome bibie lɩzɛr'ɩ pie. Bɛ tɩ kʋ̀ n a Ziditɩ a Holofɛn zu, a ʋ salm-pla labɛ, a ʋ gadori, a ʋ labɛ nɩ a ʋ bome za. Ʋ tɩ de nɩ a za, tuo a ʋ bòn a mɩnɛ, ɛ́ ƴãw a ŋmãa a ʋ torkori a wie na tawr a pʋɔ.

¹²A Ɩsɩrayɛl bʋʋrɛ pɔwbɛ za tɩ wa na kɛ́ bɛ wa nyɛ̃ ʋ ɛ́ mʋʋr'ʋ. Bɛ mɩnɛ tɩ cɛ n nuru a ʋ ƴãw. A Ziditɩ tɩ de nɩ tɩ-vaar na ɓã taa a ƴãw a nũú, ɛ́ mɩ̀ kʋ̀ a pɔwbɛ na bɩɛlɛ ʋ a.

¹³Ʋlɛ nɩ a ʋ taabɛ tɩ de nɩ olivʋ tɩ-vaar vili a zuru mɛ̃ nãà-kpawʋʋr a. Al pùorí, a Ziditɩ tɩ tɔl'a de a nɩbɛ na cɔrɩ a niwn, ɛ́ kaarɛ a nuru a pɔwbɛ na cɩɛr a zie. A Ɩsɩrayɛl bʋʋrɛ dɛbr za tɩ tuur bɛ na nɩ a bɛ zɛbr bome, ɛ́ mɩ̀ vili a tɩ-vaar a zuru mɛ̃ nãà-kpawʋʋr a. Bɛ tɩ yiele nɩ kpɛ̃w kpɛ̃w za.

¹⁴Lɛ n'a a Ziditɩ tɩ cɛ danʋ yielu a Ɩsɩrayɛl nɩbɛ za niŋé, ɛ́ a nɩbɛ sɔw gbolololo.