Read Dagara, Northern Ziditɩ 16 Bible Online

Ziditɩ 16 - Dagara, Northern bible

Ziditɩ 16

¹Nyɛ̃ a danʋ yielu ʋl a Ziditɩ na tɩ yieli a: «Nyɩ cɛ danʋ yielu a ɩ̃ Naaŋmɩn ƴãw, nyɩ ŋmɩɛr gãgaɩ cɛ n yielu a ɩ̃ Naaŋmɩn ƴãw, nyɩ wɔwrɛ sɛ̃sɛgɛ yiele nɩ a Sore ƴãw! Nyɩ maalɩ yielu a ʋ ƴãw, nyɩ zɛwr a ʋ yúor, nyɩ bʋɔlɛ k'ʋʋ wa sõw nyɩ!

²Sɩza, a Sore ɩ n Naaŋmɩn na mɩ́ ɩ a zɛbr baar'a. Ʋ faa mɛ̃ nɩ a ɩ̃ dɔ̃ dem nuru pʋɔ, ʋ lɛb'a tɛr mɛ̃ wa n a ʋ laɩ pʋɔ nɩ ƴã-ɓaarʋ, a ʋ nɩ-bʋʋrɛ sɔgɔ.

³A Asiiri tẽw zɛbr-nɩbɛ yi n a saa-pɛrɩ́-gʋba-lowr tan pʋɔ wa, zɛbr-nɩbɛ na bɛ tɛr nʋɔr a. A soja-yaga bilili bɛ ŋa tɩ piw nɩ a bàrʋ tɛr, ɛ́ a soja-wi-zɔmnbɛ yɛ́r pàw a tãli.

⁴A dɔ̃ dem tɩ bɔbr'a kɛ́ bɛ nyɩw a tɩ tẽw, kɛ́ bɛ kʋ a tɩ pɔ́lɛ́ pàw pɛr nɩ a zɛbr-sɔ-kpɛ̃ɛ, kɛ́ bɛ lɔb a tɩ bi-pɩɩlɛ bɛr tẽw, kɛ́ bɛ tɛr a tɩ bibiir cen nɩ bɛ ɩ gbãgbaar, ɛ́ nyɔw a tɩ pɔwsɩrali cen nɩ.

⁵A Sore kpɛnʋ-za-sob piw bɛ nɩ sɔ́r nɩ pɔw nũu.

⁶Pɔ́l-kpɛn kpɛn bɛ nɛbɛ kʋ a bɛ gãdaa ɩ, dɛbr na tɛr fãw a bɛ nɛbɛ ŋmɛ ʋ lɔb ɛ, nɩbɛ na kɛrɩ bɛ tɛr vuo a bɛ nɛbɛ zɛb'ɩ ʋ ɛ. Ɛcɛ Merari pɔwyaa Ziditɩ n'ʋ, ʋlɛ n'ʋ tʋ̃ɔ́ ʋ nɩ a ʋ niwn vɩɛlʋ.

⁷A Ɩsɩrayɛl nɩbɛ na tɩ be a kpɩɛrʋ pʋɔ a faafʋ ƴãw a, ʋ tɩ yaa nɩ a ʋ pɔw-kʋɔlʋ bʋ̃-suuri bɛr, ɛ́ zɛ kãá a ʋ niwn,

⁸ʋ tɩ de nɩ pɛn 'lẽ nɩ a ʋ zukɔbɛ. Ʋ tɩ su n lɛ̃ pɛn kpar-vla vla, k'ʋʋ bɛlɩ nyɔw nɩ a dɔ̃ sob.

⁹A zɛbr-nɩbɛ nɩ-kpɛ̃ɛ kpɛ̃ɛ tɩ nyɛ̃ nɩ a ʋ nafawr cen gù, a ʋ vɩɛlʋ tɩ gbini ʋ na bɛr, zɛbr-sɔ-kpɛ̃ɛ n'ʋ ʋ tɩ cɛ n a ʋ zu ŋmãa.

¹⁰A ʋ pʋra tɩ ɩ na a Pɛrsɩ mɩnɛ màwr, a ʋ kanyir tɩ ɩ na pʋl-vʋ̃ɔ nyɔw a Mɛdɩ mɩnɛ.

¹¹Lɛ n'a a ɩ̃ nɩ-bʋʋrɛ bɛ na tɩ jewre a, tɩ lɔb a zɛbr cɛl, ɛ́ pʋl-vʋ̃ɔ tɩ nyɔw a Asiiri tẽw dem. A ɩ̃ nɩ-bʋʋrɛ na bɛ tɛr fãw a tɩ cɩɩr'a, ɛ́ dɛ̃bɩ̃ɛ tɩ nyɔw bɛ. Bɛ tɩ lɔb'ɩ cɛl ɛ́ a tɩ dam bɛ yaga.

¹²A bɛl bɛ na tɩ nyɛ̃ bɛ bɛ ɩ nɩbɛ a, bɛlɛ nɛbɛ cɔ̀r bɛ col, bɛ ŋmɛ bɛ na ƴãw bàalʋ, bɛ lɩɛbɩ zɔ mɛ̃ dɛ̃bɩ̃ɛ dem a. Bɛ kpi na, a Sore na tɩ zɛb'ɩ bɛ a ƴãw.»

¹³«Ɩ̃ na yiel'ɩ yiel-paala a ɩ̃ Naaŋmɩn ƴãw. Sore e, fʋ ɩ n kpɛ̃ɛ ɛ́ tɛr yúor-vɩɛlʋ-danʋ, a fʋ fãw bɛ tɛr dɩ̃ɛnʋ ɛ, ɛ́ nɩr bɛ be na tʋ̃ɔ́ fʋ ɛ.

¹⁴A fʋ bʋ̃-íri za, a tone a fʋ tome, fʋ ƴɛ̀r'a ɛ́ a be, fʋ tõ n a fʋ vʋʋrʋ ɛ́ bom za cɔbrɩ. Nɩr bɛ ka be na kʋ̃ tu a lɛ fʋ na yel a ɩ.

¹⁵Fʋ̃ʋ wa pɩɛlɛ a, a tan na 'lawr'ɩ a sɩɩr ƴãw tɩ lo a kʋ̃ɔ-bɛrɛ pʋɔ, a pie na nyɩl'a mɛ̃ sɩ-suur a. Ɛcɛ fʋ mɩ́ wul'ɩ a fʋ nɔ̃wfʋ a bɛlɩ dem na zɔrɛ fʋ a.

¹⁶Bàwr za ɩ n pʋrɩ zuo na tʋ̃ɔ́ pɛlɩ a fʋ pʋɔ, a nɛn-kãánɩ bɛ na mɩ́ nyɩw a bàwr-maal-kuur zu a, bɛ ɩ bom za a fʋ zie ɩ. Ɛcɛ sob nɛ na zɔrɛ a Sore a mɩ́ ɩ n kpɛ̃ɛ kʋralɛ.

¹⁷Baw-bio, ʋ páw a ten al na zɛbr'ɩ a ɩ̃ nɩ-bʋʋrɛ a! A Sore kpɛnʋ-za-sob na dɔwrɩ bɛ na a ƴɛ̀rʋ-dɩb bibir, ʋ na ɩ na vũu nɩ zãzule dɩ bɛ, ɛ́ bɛ na lɔbr'ɩ kpɩɛrʋ cɛlsɩ kʋralɛ.»

¹⁸A nɩbɛ na cɔrɩ a, na tɩ ta a Zerizalɛm a, bɛ za tɩ cen nɩ a Ŋmɩn-yir-kpɛ̃ɛ pʋɔ tɩ puori a Naaŋmɩn nɩ bɛ tʋɔra-siwru. Bɛ tɩ so n a bɛ dɛwr bɛr, ɛ́ maalɩ nyɩw-a-za-bagɛ kʋ̀ a Naaŋmɩn lãwnɩ de-kʋ̀b bome bɛ na nɔnɛ tɩr a, nɩ bʋ̃-kʋ̀rɩ a mɩnɛ.

¹⁹A Ziditɩ tɩ de nɩ a Holofɛn bome za a nɩbɛ na tɩ kʋ̀ ʋ a, ƴãw a Ŋmɩn-yir-kpɛ̃ɛ bome pʋɔ. Ɛ́ a sãje ʋ na tɩ de a zɛbr-nɩbɛ nɩ-kpɛ̃ɛ kpɛ̃ɛ di-gana pʋɔ a, ʋ tɩ de ʋ na kʋ̀ a Sore, ʋ ɩ zɛbr bom a Sore na so a.

²⁰A nɩbɛ tɩ maal'ɩ a zɛb-tʋ̃ɔ́fʋ cuw a Zerizalɛm Ŋmɩn-yir-kpɛ̃ɛ niŋé cuwr ata, ɛ́ a Ziditɩ tɩ be a bɛ zie.

²¹A bibie á ŋá na wa tɔl a, ŋa za mɩ́ tɩ lɛb'a kul a ʋ yir. A Ziditɩ tɩ lɛb'a kul a Betuli tɩ cãà kpɩɛr a ʋ zi-sóra pʋɔ. A ʋ yúor tɩ yi n a tẽw za pʋɔ a ʋ cãafʋ daar za.

²²Dɛbr yaga tɩ bɔbr ʋ na kɛ́ bɛ kul. Ɛcɛ a lɛn daar za a ʋ sɩr Manase na kpi bɛ ũù a, lɛn daar za n'a ʋ bɛ tɩ sàw lɛb kul sɩr ɛ.

²³A Ziditɩ tɩ kor kor kor'a. Ʋ tɩ kpɛ n a ʋ sɩr yir pʋɔ tɩ ta yome kʋba nɩ anũu (105). Ʋ tɩ lɛb'a bɛr a ʋ tõ-tõ-bi-pɔw ʋ so ʋ tʋɔra, ɛ́ pṍ a ʋ bʋ̃-tɛrɩ kʋ̀ a ʋ sɩr Manase nɩbɛ nɩ a ʋl mɩŋa nɩbɛ, ɛ́ bãw kpi. Ʋ tɩ kpi n a Betuli, bɛ ũù ʋ a ʋ sɩr yaa pʋɔ. A nɩbɛ tɩ kõ ʋ nɩ bibie ayopõi.

²⁵A Ziditɩ cãafʋ daar a, nɩr bɛ tɩ be be lɛb dam a Ɩsɩrayɛl nɩbɛ ɩ, ɛ́ a pùorí mɩ̀ a, nɩr bɛ tɩ lɛb dam bɛ ɩ, a tɩ kɔwrɩ.