Read Dagara, Northern Ziditɩ 2 Bible Online

Ziditɩ 2 - Dagara, Northern bible

Ziditɩ 2

¹A Asiiri tẽw nãà, Nabikodonozɔɔr, naalʋ-dɩb yome pie nɩ ani sob, a cuw-dãw-niwn sob bibie lɩzɛr'ɩ ayi sob, bɛ tɩ ƴɛ̀r'ɩ a nãà na yel k'ʋʋ na yáa nɩ a san a tẽw za zu a ƴɛ̀rʋ.

²A Nabikodonozɔɔr tɩ bʋɔl'ɩ a ʋ tõ-tõ-bi-bɛrɛ za nɩ a ʋ naalʋ-tẽw nɩ-bɛrɛ za ɓã taa. Ʋ tɩ yel'ɩ a ʋ pʋ-tɩɛr-sɔwla kʋ̀ bɛ, ʋʋ na dɔwr'ɩ a nɩ-bʋʋrɛ bɛ ŋa.

³A yã-wulbɛ tɩ kpɛ n a nãà, ɛ́ sàw k'aa fɛr'a kɛ́ bɛ kʋ a bɛlɩ dem za na bɛ tɩ tu a nãà nʋɔr a.

⁴Bɛ na tɩ wõ taa baar'a, a Nabikodonozɔɔr tɩ bʋɔl'ɩ a Holofɛn, na ɩ a ʋ zɛbr-nɩbɛ nɩ-kpɛ̃ɛ za, ɛ́ tu a ʋ zu a ʋ naalʋ-tẽw pʋɔ a, wa yel ʋ:

⁵«À ŋá n'a a mãa, a na-kpɛ̃ɛ, a tẽ-daa za zu-sob, ƴɛ̀rɛ: Cen tɩ kaa ír nɩbɛ na bãw k'aa bɛ fãw ta na a, ɓã taa, kaa ír ta soja-gbɛ́ɛ dem tùr-lɩz'a ayʋɔb (120 000) nɩ soja-wi-zɔmnbɛ tùr-pie nɩ ayi (12 000).

⁶Al pùorí, cen tɩ zɛb'ɩ a mʋ̃tɔ̃w-kpɛb-lowr ten[2] nɩbɛ za, bɛ na zawrɩ a ɩ̃ nʋɔr ƴɛ̀rʋ a ƴãw.

⁷Yel a ten á ŋá nɩbɛ kɛ́ bɛ kʋ̀ m tanɛ nɩ kʋ̃ɔ, à wul bɛ na sàw k'ɩ̃ɩ só bɛ na a. Bʋ̃ʋ n'ʋ vɛ̃, a ɩ̃ suur ìr'a, ɩ̃ waar a bɛ ƴãw. Ɩ̃ na ƴãw nɩ a ɩ̃ zɛbr-nɩbɛ yɛ́r pàw a bɛ ten za, ɛ́ za a bɛ bome za.

⁸A bɛl a sojarɩ na na ƴãw a bàalʋ a na paal'ɩ a fʋɔlɩ, a bàrʋ nɩ a mamɛ za na paal'ɩ a bɛ kũuni, paalɩ yi nɛ́ɛ.

⁹Ɩ̃ na tɛr'ɩ a bɛ nɩ-nyɔwrɩ cen nɩ a tẽw za baarʋ zie.

¹⁰Ɛ́ a fʋ̃ʋ, Holofɛn i, cen tɩ so a bɛ ten a ɩ̃ yúor ƴãw. Bɛlɛ wa lo a fʋ nuru pʋɔ baar'a, fʋ̃ʋ tɛr bɛ a ɩ̃ ƴãw, gùre nɩ a bɛ ƴɛ̀rʋ-dɩb bibir.

¹¹Ɛ́ a bɛl nãà wa bàrɛ gbɛ́r a fʋ niŋé a, fʋ kʋ̃ tɛr mimi-ɓaar a bɛ zie ɩ, kʋ bɛ, ɛ́ ƴãw bɛ za a bɛ bome za a tẽw za pʋɔ.

¹²Ɩ̃ pɔ n nɩ a ɩ̃ nyɔ-vʋʋrʋ nɩ a ɩ̃ naalʋ-tẽw, ɩ̃ɩ na ɩ n a lɛ tɔr za ɩ̃ na yel a.

¹³Fʋ̃ʋ ƴãw a, Holofɛn i, taa gãwnɛ à á ŋá ɩ̃ na yel a been kãw za bɛrɛ ɩ. Ƴãw fãw tu a lɛ tɔr za ɩ̃ na yel kʋ̀ b a fɔ̃w fɔ̃wlɛ, bʋ̃ʋ n'ʋ vɛ̃, ɩ̃ ɩ n a fʋ nãà.»

¹⁴A Holofɛn tɩ yi n a nãà zie, tɩ bʋɔlɩ a nàlí za, a Asiiri tẽw sojarɩ nɩ-bɛrɛ bɛrɛ nɩ a sojarɩ nɩ-bɛrɛ za.

¹⁵Ʋ tɩ ɓã n a nɩbɛ na cɔbrɩ tɔ a zɛbr ƴãw a taa, mɛ̃ a lɛ a nãà na tɩ yel kʋ̀ ʋ a: soja-gbɛ́ɛ dem tùr-lɩz'a ayʋɔb (120 000) nɩ soja-wi-zɔmnbɛ na tɛbr tam a tùr-pie nɩ ayi (12 000).

¹⁶Ʋ tɩ põ põ nɩ a sojarɩ mɛ̃ a lɛ bɛ na mɩ́ cɔbrɩ sojarɩ yaga yaga a zɛbr ƴãw a.

¹⁷Ʋ tɩ tɛr'ɩ nyɔ̃wmɩ, bòn nɩ mílɛ̀[3] yaga a bɛ tuor tuofʋ ƴãw, ɛ́ tɛr píir nɩ nĩi nɩ bʋʋr na bɛ tɛr nʋɔr a, a ʋ zɛbr-nɩbɛ guolu ƴãw.

¹⁸Bɛ tɩ cɔbr'ɩ bʋ̃-dɩrɩ yaga yaga a sojarɩ za ƴãw, ɛ́ ír salm-zɩɛ nɩ salm-pla na bɛ dɩ vuo a, a nãà na-bome pʋɔ, a sojarɩ yab ƴãw.

¹⁹A Holofɛn tɩ yi na lo a sɔ́r nɩ a zɛbr-nɩbɛ bɛ ŋa za, k'ʋʋ tɩ cɔbrɩ a Nabikodonozɔɔr tɔr za waa, ɛ́ ɩ a ʋ zɛbr-torkori, a ʋ soja-wi-zɔmnbɛ nɩ a soja-gbɛ́ɛ dem yɛ́r pàw a mʋ̃tɔ̃w-kpɛb-lowr ten za.

²⁰Zu-sɛbla nɩr na kʋ̃ tʋ̃ɔ́ sɔ́r a tɩ páw bɛ na cere, yãwmɛ mɛ̃ sãsoge a, bɩɩ mɛ̃ wɛja-kpalɛ pʋɔ biire a.

²¹Bɛ tɩ yi n a Nɩnɩɩvʋ cen bibie ata, ɛ́ ta a Bekiletɩ tɩ̃talɩ́, ɛ́ yi a be cen tɩ maalɩ a bɛ laɩ a Silisi tẽw zu-sɔw saa-pɛrɩ́-gʋba-lowr tan sɩɛmɩ́.

²²A Holofɛn nɩ a ʋ zɛbr-nɩbɛ za, a soja-gbɛ́ɛ dem, a zɛbr-torkori nɩ a soja-wi-zɔmnbɛ, tɩ kpɛ na so a tan vuo.

²³Ʋ tɩ sãw nɩ a Pudɩ nɩ a Ludɩ ten bɛr, ɛ́ za a Arasisɩ nɩ a Ɩsɩmayɛl dɔwlʋ nɩbɛ bome za. A Arasisɩ nɩ a Ɩsɩmayɛl dɔwlʋ nɩbɛ tɩ kpɩɛr'a tori a wɛja-kpalɛ, a Kelewon saa-pɛrɩ́-dʋrʋ-lowr.

²⁴Ʋ tɩ gãw nɩ a Efaratɩ man, tu tɔl a Mezopotami, sãw a tẽ-bɛrɛ kpɛn kpɛn na pɩɛrɩ a Aborona fʋɔla pʋɔ a bɛr, ɛ́ cen tɩ ta a kʋ̃ɔ-kpɛ̃ɛ́.

²⁵Ʋ tɩ kpɛ na so a Silisi tẽw, kʋ a bɛlɩ dem za na tɩ bàrɛ gbɛ́ɛ a ʋ niŋé a, al pùorí ʋ cen a saa-pɛrɩ́-dʋrʋ-lowr tɩ ta a Zafɛtɩ tẽw na tori a Arabi a.

²⁶Ʋlɛ nɩ a ʋ zɛbr-nɩbɛ tɩ ŋmãa na jil koli a Madian tẽw dem za, nyɩw a bɛ laɩ bɛr, ɛ́ nyɔw a bɛ dʋn cen nɩ.

²⁷Ʋ tɩ siw nɩ a Damasɩ tɩ̃tal pʋɔ a ble deb daar, tɩ nyɩw a ble póru za bɛr, ɛ́ kʋ a píir nɩ a nĩi, za a tẽ-bɛrɛ bome, sãw sãw a tẽli bɛr, ɛ́ kʋ a tẽw pɔ́lɛ́ za nɩ zɛbr-sɔ-kpɛ̃ɛ.

²⁸Lɛ n'a dɛ̃bɩ̃ɛ tɩ nyɔw a Mediterane kʋ̃ɔ-kpɛ̃ɛ nʋɔr nɩbɛ za bɛ màwr. Pʋl-vʋ̃ɔ tɩ tɛr'ɩ a tẽ-bɛrɛ á ŋá nɩbɛ: Suur, Okina, Zamɩnɩa, Azotɔsɩ nɩ Asɩkalon.