Read Dagara, Northern Ziditɩ 3 Bible Online

Ziditɩ 3 - Dagara, Northern bible

Ziditɩ 3

¹A bɛlɩ dem na tɩ kpɩɛr a Mediterane kʋ̃ɔ-kpɛ̃ɛ nʋɔr a tɩ tõ n nɩbɛ a Holofɛn zie, kɛ́ bɛ tɩ zɛlɩ a ƴã-ɓaarʋ nɩ a ƴɛ̀r-bie á ŋá:

²«Nyɛ̃ tɩ, tɩ ɩ n a na-kpɛ̃ɛ Nabikodonozɔɔr tõ-tõ-biir. Ɩrɛ tɩ mɛ̃ a lɛ fʋ na bɔbr a.

³Nyɛ̃, fʋ̃ʋ so a tɩ dʋn nɩ a zawr, a tɩ tẽsɔw za nɩ a tɩ ble póru, a tɩ bʋʋr nɩ a tɩ píir, a tɩ nĩi nɩ a tɩ dʋn za, fʋ̃ʋ so a, lãwnɩ a tɩ laɩ dʋn zawr za. Ɩrɛ a mɛ̃ a lɛ fʋ na bɔbr a.

⁴Fʋ̃ʋ so a tɩ tẽ-bɛrɛ, ɛ́ a tɩɩm na kpɩɛr a pʋɔ a, tɩ ɩ n a fʋ gbãgbaar. A na ɩ à ŋá a, wa kpɛ a tɩ ten pʋɔ mɛ̃ a lɛ fʋ na bɔbr a.»

⁵A nɩbɛ bɛ ŋa tɩ ta n a Holofɛn zie ƴɛ̀r à à ŋá.

⁶Lɛ n'a a Holofɛn nɩ a ʋ zɛbr-nɩbɛ tɩ siw tɩ ta a Mediterane kʋ̃ɔ-kpɛ̃ɛ nʋɔr. Ʋ tɩ ƴãw nɩ soja-zi-gùrbɛ a tẽ-kpɛn kpɛn bɛ na cɔbrɩ a zɛbr ƴãw a pʋɔ, ɛ́ kaa ír nɩ-kpɛn a ten á ŋá pʋɔ, ƴãw bɛ sõwne a ʋ sojarɩ.

⁷A tẽw za pʋɔ a, a nɩbɛ tɩ vɔbl'ɩ tɩ-puuru nãà-kpawʋʋr, ŋmɩɛr'ɩ gãgaɩ ƴawr'ɩ, tuori nyɔw nɩ ʋ.

⁸A Holofɛn tɩ sãw nɩ a bɛ tẽw za bɛr, ɛ́ gɔr gɔr a bɛ tuw-tuor tɩɩr za lɔb, ɛ́ ƴãw bɛ ŋmɛr a ŋmɩmɛ dasuli, mɛ̃ a lɛ bɛ na tɩ yel k'ʋʋ ɩ a. Bʋ̃ʋ n'ʋ vɛ̃, a tɩ fɛr'a k'aa ƴɛ̀r-pɛ-bʋʋrɛ za nɩ a dɔwlʋ bʋʋrɛ za nɩbɛ gbine dume a Nabikodonozɔɔr niŋé, ɛ́ puore a ʋl yõ mɛ̃ naaŋmɩn a.

⁹Al pùorí, a Holofɛn tɩ ta na pɩɛlɩ a Dotayim, tori a Ɛsɩdirelon, a Zude tã-kpɛ̃ɛ-kɔlkɔl niŋé.

¹⁰Ʋ tɩ maal'ɩ a ʋ laɩ a tẽ-bɛrɛ Gebaɩ nɩ Sɩtopolisɩ cara pʋɔ. Ʋ tɩ maal'ɩ cuw-ɓil a be k'ʋʋ lɛb bɔ a ʋ zɛbr-nɩbɛ bʋ̃-dɩrɩ.