Read Dagara, Northern Ziditɩ 4 Bible Online

Ziditɩ 4 - Dagara, Northern bible

Ziditɩ 4

¹A Ɩsɩrayɛl nɩbɛ na tɩ kpɩɛr a Zude a, tɩ wõ n a lɛ a Asiiri tẽw nãà Nabikodonozɔɔr sojarɩ nɩ-kpɛ̃ɛ, Holofɛn, na tɩ ɩ a ten al na cɛ a, nɩ a lɛ ʋ na tɩ za, ɛ́ sãw a bɛ zi-son bɛr a.

²Dɛ̃bɩ̃-kpɛ̃ɛ tɩ nyɔw bɛ nɩ a Holofɛn ƴãw, ɛ́ pʋ̀lá vʋ̃ɔnɛ bɛ a Zerizalɛm nɩ a Sore bɛ Naaŋmɩn yir ƴãw.

³Bʋ̃ʋ n'ʋ vɛ̃, daar yɩ̃ɛlɛ n'a bɛ tɩ yi a bɛ diw-cenu zie lɛb wa. A ɓã-taa n'a bɛ lɛb tɩ ɓanɛ taa a Zude tẽw wa báarɛ a lɛ. A Sore yir nɩ a ʋ bàwr-maal-kuur nɩ a ʋ pʋɔ bome a nɩbɛ na tɩ dɛw bɛr a, daar yɩ̃ɛlɛ n'a bɛ tɩ lɛb maal'a ƴãw, lɛb de a kʋ̀ a Naaŋmɩn.

⁴A Ɩsɩrayɛl nɩbɛ tɩ tõ n nɩbɛ a Samaari tẽw vuo za pʋɔ, a Kona, a Bɛtɩ-Horon, a Abɛl-Mayim nɩ a Zeriko, a pùorí bɛ tõ nɩbɛ a Koba, a Ayisoor nɩ a Salɛm fʋɔla pʋɔ.

⁵Bɛ tɩ do na so a tan na kɛrɩ kɛrɩ a nyɛɛ za, ɛ́ mɛ dacine viiri koli a vuo ʋl tẽli za. Bɛ tɩ bɔ n bʋ̃-dɩrɩ bin a zɛbr ƴãw, bʋ̃ʋ n'ʋ vɛ̃, a bɛ bʋ̃-dieri n'a bɛ tɩ cãà de baarɩ.

⁶Zʋakɩm'ʋ tɩ ɩ a bàwr-maal-kara a Zerizalɛm a lɛn daar. Ʋ tɩ sɛb'ɩ sɛbɛ kʋ̀ a Betuli nɩ a Betomɛsɩtayim ten dem. A ten ayi á ŋá tɩ tori nɩ a Ɛsɩdirelon, a Dotayim fʋɔla niŋé.

⁷Ʋ tɩ yel'a kʋ̀ bɛ kɛ́ bɛ gù a tãw pʋɔ sɛ́ɛ na cere a Zude tẽw a. A sɛ́ɛ á ŋá gub tɩ ɩ n mɔlɛ, bʋ̃ʋ n'ʋ vɛ̃, nɩbɛ ayi tɛwr nɛbɛ mɩ́ tʋ̃ɔ́ ɓɛrɩ taa tu tɔl a sɛ́ɛ á ŋá zu, a na tɩ ɩ fɩɩrɩ a ƴãw.

⁸A Ɩsɩrayɛl nɩbɛ tɩ tu n a lɛ tɔr za a bàwr-maal-kara, Zʋakɩm, nɩ a nɩ-kore lãw na be a Zerizalɛm a, na tɩ yel kʋ̀ bɛ a.

⁹A Ɩsɩrayɛl nɩbɛ za tɩ puore nɩ a Naaŋmɩn kpɛ̃w kpɛ̃w za, ɛ́ tʋlɛ a mʋta-tuo tɛrʋ ƴãw.

¹⁰A dɛbr nɩ a bɛ pɔwbɛ nɩ a bɛ bibiir nɩ a bɛ dʋn, a sãanbɛ na kpɩɛr a bɛ zie a, a tõ-tõ-biir na dier sã-ya a, nɩ a gbãgbaar, bɛ za tɩ sɛ n vʋɔrɩ a bɛ sɩɛmɩ́[4].

¹¹A Zerizalɛm tẽw dem za, a dɛbr, a pɔwbɛ, nɩ a bibiir mɩ́ tɩ lo na gã tẽw a Ŋmɩn-yir-kpɛ̃ɛ niŋé. Bɛ tɩ ŋmɛ n tãpɛlʋ[5] a bɛ zuru, ɛ́ wule a vʋɔrɩ bɛ na sɛ a, k'aa Sore zɔ bɛ nɩbaalʋ.

¹²Bɛ mɩ̀ tɩ de nɩ vʋɔrɩ vili pàw a bàwr-maal-kuur. Bɛ za tɩ lɔbr'ɩ nuru zɛlɛ nɩ yãayãa k'aa Ɩsɩrayɛl Naaŋmɩn ta bɛr a dɔ̃ dem nyɔw a bɛ bi-pʋrmɛ, tɛr'ɩ a bɛ pɔwbɛ cen nɩ ɛ, k'ʋʋ ta sàw bɛ sãw a tẽ-bɛrɛ ʋ na kʋ̀ a ʋ nɩ-bʋʋrɛ a bɛr ɛ. Bɛ mɩ̀ tɩ lɔbr'ɩ nuru zɛlɛ nɩ ʋ, k'ʋʋ ta bɛr a nɩ-bʋʋr-yoru dɛw a ʋ zi-sõw bɛr, ɛ́ ɩ ʋ la ɩ.

¹³A Sore tɩ wõ n a bɛ puoru ɛ́ nyɛ̃ a bɛ kpɩɛrʋ. A nɩbɛ tɩ cãà na tɛr a mʋta-tuo bibi-yaga a Zude tẽw za pʋɔ nɩ a Zerizalɛm, a Sore kpɛnʋ-za-sob yir-kpɛ̃ɛ niŋé.

¹⁴A bàwr-maal-kara Zʋakɩm nɩ a bàwr-maalbɛ za na tɩ àr a Sore nɩ a ʋ tõ-tõ-biir niŋé a, tɩ sɛ n vʋɔrɩ a bɛ sɩɛmɩ́, dier'ɩ a bibie za nyɩw-a-za-bàwr tɩrɛ, lãwnɩ a de-kʋ̀b bome nɩ a bʋ̃-kʋ̀rɩ a nɩbɛ na nɔnɛ waar'ɩ a.

¹⁵A pɛnɛ bɛ na mɩ́ vili pàw a bɛ zu a, tɩ ɩ n tãpɛlʋ, ɛ́ bɛ lɔbr nuru zɛlɛ nɩ a Sore yãayãa nɩ a bɛ fãw za, k'ʋʋ ɩ ɩb kãw a ʋ nɩ-bʋʋrɛ Ɩsɩrayɛl vla ƴãw.