Read Dagara, Northern Ziditɩ 5 Bible Online

Ziditɩ 5 - Dagara, Northern bible

Ziditɩ 5

¹A Asiiri tẽw zɛbr-nɩbɛ nɩ-bɛrɛ bɛrɛ za nɩ-kpɛ̃ɛ, Holofɛn, tɩ wõ na k'aa Ɩsɩrayɛl nɩbɛ cɔbrɛ nɩ a zɛbr ƴãw, fur a tɔlʋ ziir a tan pʋɔ, mɛ zɛbr-yir-kpɛn a tan nyɛɛ za zu, ɛ́ ƴãw bɛrɩ a tɩ̃tal pʋɔ.

²Lɛ n'a ʋ tɩ nyɛ̃ suur pi kɔkɛɛ, bʋɔlɩ a Mowab tẽw dem nɩ-bɛrɛ, a Amɔ̃ tẽw dem zɛbr-nɩbɛ nɩ-bɛrɛ bɛrɛ nɩ a Mediterane kʋ̃ɔ-kpɛ̃ɛ nʋɔr na-kpɛ̃ɛ-lɩɛrbɛ za ɓã taa.

³Ʋ tɩ yel bɛ na: «Kanãa tẽw dem i, nyɩ yel ɩ nyɛ̃: nɩ-bʋʋr-tẽbowle nɛbɛ kpɩɛr a tan vuo pʋɔ? Tẽ-bɛrɛ abobe n'a bɛ kpɩɛr? Ŋmɩŋmɩn n'a a bɛ zɛbr-nɩbɛ sɛw? Nyɩnɛ n'a a bɛ fãw nɩ a bɛ kpɛnʋ yi? Na-buor'ʋ so a bɛ zɛbr-nɩbɛ?

⁴A mʋ̃tɔ̃w-kpɛb-lowr nɩ-bʋʋrɛ za pʋɔ a, bʋ̃ʋ n'ʋ so a bɛl tɛwr zawrɩ na tuori mɛ̃?»

⁵Akɩyɔɔr, na ɩ a Amɔ̃ tẽw dem za nɩ-kpɛ̃ɛ a, tɩ sɔw ʋ na yel à ŋá: «Ɩ̃ zɛbr-nɩbɛ nɩ-kpɛ̃ɛ kpɛ̃ɛ ɛ, ɩ̃ zɛlɛ fʋ na, bɛr wõ a mãa fʋ tõ-tõ-bie ƴɛ̀rʋ. Ɩ̃ na yel'ɩ a yel-mɩŋa kʋ̀ b a nɩ-bʋʋrɛ bɛ ŋa ƴãw, bɛl na kpɩɛr a tan vuo pʋɔ pɩɛlɩ a fʋ laɩ a. Ziri bɛ yire a ɩ̃ nʋɔrɩ́ ɛ.

⁶Kalde[6] tẽw dem'ɩ a nɩ-bʋʋrɛ bɛ ŋa.

⁷Bɛ tɩ zawr'ɩ a bɛ sãàkʋm-kore mɩnɛ na kpɩɛr a Kalde a ŋmɩmɛ bɛr. Bɛ tɩ zawr'ɩ a bɛ sãàkʋm-kore tub bɛr, ɛ́ puore a salom zu Naaŋmɩn, ʋl bɛ na tɩ de ʋ ɩ a Naaŋmɩn-sɩza a. Bɛ tɩ diw bɛ nɩ a bɛ tẽw, a bɛ dãwdãw ŋmɩmɛ tẽsɔw pʋɔ, bɛ yi de niwn cen tɩ kpɛ Mezopotami tẽw Saa-zu kɔwrɩ yaga.

⁹Al pùorí, a bɛ Naaŋmɩn tɩ yel bɛ na kɛ́ bɛ yi a be bɛ na kpɩɛr a, ɛ́ cen Kanãa tẽw. Bɛ tɩ cen na tɩ zɩ̃ a be, páw salm-pla nɩ salm-zɩɛ nɩ dʋn bɛ dɩ vuo ɩ.

¹⁰Al pùorí, kɔ̃ wa tɩ lo n a Kanãa tẽw za pʋɔ, bɛ ìr cen Eziptɩ tẽw tɩ páw dɩb a be. A be n'a bɛ tɩ yɛ̀r, ɩ nɩ-yaga yaga nɩr na kʋ̃ tʋ̃ɔ́ sɔ́r a.

¹¹Ɛcɛ a Eziptɩ tẽw nãà tɩ ìr'ɩ a bɛ zu, maalɩ yã ƴãw bɛ a birkiri ŋmab tome. Ʋ tɩ ƴãw bɛ nɩ vĩ ɛ́ ɩ bɛ lɩɛbɩ gbãgbaar.

¹²Bɛ tɩ kõ na bʋɔlɩ a bɛ Naaŋmɩn, ʋ ƴãw bʋ̃-faar[7] na bɛ tɛr tɩ̃ɩ a, a Eziptɩ tẽw za. Lɛ n'a a Eziptɩ tẽw dem tɩ diw bɛ a bɛ tẽw pʋɔ.

¹³A Naaŋmɩn tɩ ɩ na a Kʋ̃ɔ-kpɛ̃ɛ-zɩɛ ko a bɛ niŋé

¹⁴ɛ́ ƴãw bɛ tu a Sinayi tãw nɩ a Kadɛsɩ-Barneya sɔ́r. Bɛ tɩ diw nɩ a bɛlɩ dem za na kpɩɛr a wɛja-kpalɛ pʋɔ a,

¹⁵ɛ́ kpɛ so a Amoritɩ mɩnɛ tẽw, ɛ́ kpɛmɛ kʋ a Hɛsɩbon tẽw dem pàw pɛr. Al pùorí, bɛ gãw a Zurdɛ̃ de a tan vuo za.

¹⁶Bɛ tɩ diw nɩ a Kanãa tẽw dem, a Perizitɩ mɩnɛ, a Zebi tẽw dem, a Sɩsɛm tẽw dem nɩ a Gɩrgasitɩ mɩnɛ za a bɛ niŋé, ɛ́ kpɛ a tẽw kɔwrɩ.

¹⁷Lɛn daar za bɛ na bɛ tɩ maalɩ faa a bɛ Naaŋmɩn zie a, bɛ tɩ wone nɩ nʋ̃ɔ̀. Bʋ̃ʋ n'ʋ vɛ̃, a Naaŋmɩn ʋl na piw bɛ tɛr a ciir'ɩ a faa.

¹⁸Ɛcɛ bɛ na wa bɛr a sɔ́r a bɛ Naaŋmɩn na tɩ wul bɛ a, a bɛ dɔ̃ dem tɩ zɛb'a tʋ̃ɔ́ bɛ pẽlẽpẽlẽ zɛbr yaga yaga pʋɔ, ɛ́ tɩ diw bɛ cen nɩ tẽ-yũo pʋɔ. A bɛ dɔ̃ dem tɩ ŋmɛr'ɩ a bɛ Naaŋmɩn yir bɛr, ɛ́ zɛb de a bɛ tẽ-bɛrɛ.

¹⁹Ƴɛrɛŋa bɛ na lɛb tu a bɛ Naaŋmɩn a, bɛ yi n a ten al pʋɔ bɛ na tɩ diw bɛ yaarɩ cen nɩ a, lɛb wa. Bɛ lɛb'a zɩ̃ a Zerizalɛm, be a bɛ Ŋmɩn-yir-kpɛ̃ɛ na be a, ɛ́ lɛb kpɩɛr a tan vuo na tɩ gã zawla a pʋɔ.

²⁰Ƴɛrɛŋa a, ɩ̃ zɛbr-nɩbɛ nɩ-kpɛ̃ɛ kpɛ̃ɛ ɛ, a nɩbɛ bɛ ŋa wa sãw a bɛ Naaŋmɩn ɛ́ saa bɛ bãwnɩ a a, ɛ́ tɩ sɩrɩ bãw kɛ́ bɛ sãw ʋ na a, a lɛ pʋɔ a, tɩ na tʋ̃ɔ́ na cen tɩ zɛb'ɩ bɛ.

²¹Ɛcɛ a nɩ-bʋʋrɛ bɛ ŋa bɛ wa sãw a bɛ Naaŋmɩn a, fʋ̃ʋ bɛr bɛ zoom, ɩ̃ zɛbr-nɩbɛ nɩ-kpɛ̃ɛ kpɛ̃ɛ ɛ. Alɛ bɛ ɩ lɛ, a Sore bɛ Naaŋmɩn na piw bɛ na tɛr, ɛ́ a tẽ-daa za na ɩrɛ tɩ na laar.»

²²A Akɩyɔɔr na dɛ wa báarɛ a ʋ ƴɛ̀rʋ a, a nɩbɛ za na tɩ viiri koli a zɛbr-nɩbɛ nɩ-kpɛ̃ɛ kpɛ̃ɛ pɛn-sɛw a tɩ zɛbr'a. A Holofɛn sojarɩ nɩ-bɛrɛ nɩ a Mediterane kʋ̃ɔ-kpɛ̃ɛ nʋɔr nɩbɛ nɩ a Mowab tẽw dem tɩ bɔbr'ɩ a Akɩyɔɔr kʋb.

²³Bɛ tɩ yere na: «Tɩ bɛ zɔrɛ a Ɩsɩrayɛl nɩbɛ ɩ. Nɩ-bʋʋrɛ na bɛ kpɛmɛ, ɛ́ bɛ tɛr fãw zɛb-kpɛ̃w ƴãw a nɛbɛ.

²⁴A na ɩ à ŋá a, tɩ nɩ-kpɛ̃ɛ Holofɛn ɩ, tɩ cen tɩ zɛb'ɩ bɛ: a fʋ zɛbr-nɩbɛ na zɛb'a tʋ̃ɔ́ bɛ fɔ̃wlɛ.»