Read Dagara, Northern Ziditɩ 6 Bible Online

Ziditɩ 6 - Dagara, Northern bible

Ziditɩ 6

¹A nɩbɛ na tɩ ɓã taa viiri koli a pɛn-sɛw ʋl pʋɔ a zɛbr-nɩbɛ nɩ-bɛrɛ na tɩ be maalɛ a wõ-taa a, a gɔmɛ na wa lo a, a Asiiri tẽw zɛbr-nɩbɛ nɩ-kpɛ̃ɛ kpɛ̃ɛ, Holofɛn, tɩ yel'ɩ a Akɩyɔɔr a sãanbɛ za niŋé, nɩ a Mowab tẽw dem niŋé:

²«A fʋ̃ʋ Akɩyɔɔr nɩ a nyɩɩm bɛ na kʋɔrɩ kʋ̀ a Ɩsɩrayɛl nɩbɛ a, tẽbowle n'ɩ nyɩ na ƴɛ̀rɛ a tɩ zie mɛ̃ naaŋmɩn-ƴɛ̀r-manbɛ a, yere nɩ kɛ́ tɩ ta cen tɩ zɛb'ɩ a Ɩsɩrayɛl nɩbɛ, a bɛ Naaŋmɩn na na piw bɛ tɛr a ƴãw? Ãa n'ʋ ɩ naaŋmɩn a bɛ ɩ a Nabikodonozɔɔr'ʋ? Ʋ na tõ n a ʋ zɛbr-nɩbɛ nɩ-kpɛn kpɛn bɛ tɩ kʋ a nɩbɛ bɛ ŋa pàw pɛr a tẽw zu. A bɛ Naaŋmɩn bɛ n'ʋ na faa bɛ ɩ.

³Tɩɩm na ɩ a Nabikodonozɔɔr tõ-tõ-biir a, tɩ na zɛb'a tʋ̃ɔ́ bɛ pẽlẽpẽlẽ mɛ̃ nɩ-been a. Bɛ kʋ̃ tʋ̃ɔ́ bà gbɛ́r a tɩ soja-wi-zɔmnbɛ niŋé ɩ.

⁴Tɩ na nyɩw bɛ na bɛr sãsaralɛ. A bɛ tan na nyũ n a bɛ zɩ̃ɩ tɩ sɛw, ɛ́ a bɛ kũuni gã vɛwlɩkɛlkɛl paalɩ a bɛ tɩ̃talɛ. Bɛ kʋ̃ tʋ̃ɔ́ bà gbɛ́r blãlɛ a tɩ niŋé ɩ. Tɩ na kʋ bɛ na pàw pɛr bɛ za, mɛ̃ a lɛ a nãà Nabikodonozɔɔr na yel a, ʋl na ɩ a tẽ-daa za zu-sob a. Ʋ ƴɛ̀r'a, ɛ́ a ʋ ƴɛ̀rʋ kʋ̃ ɩ zawla ɩ.

⁵Ɛ́ a fʋ̃ʋ Akɩyɔɔr, Amɔ̃ tẽw nɩr bɛ na kʋɔrɩ kʋ̀ a dɔ̃ sob a, nɩ-mɩl ƴɛ̀rʋ n'a fʋ ƴɛ̀r a dɩ̃a. A na ɩ à ŋá a, fʋ kʋ̃ lɛb nyɛ̃ a ɩ̃ niwn ɛ, ɛ́ gù ɩ̃ tɩ dɔwrɩ a nɩbɛ bɛ ŋa, bɛl na yi a Eziptɩ tẽw zɔ a.

⁶Mãa wa lɛb waar a, a ɩ̃ sojarɩ nɩ a ɩ̃ sojarɩ nɩ-bɛrɛ na cɔ̀r fʋ nɩ a nyabie col nɩ zɛbr-sɔ-bɛrɛ nɩ kafine, ɛ́ lɔb fʋ ƴãw a Ɩsɩrayɛl nɩbɛ bɛ na ƴãw bàalʋ a pʋɔ.

⁷Ƴɛrɛŋa a, a ɩ̃ nɩbɛ na nyɔw fʋ na cen nɩ a tan vuo pʋɔ tɩ bɛr fʋ a tãw sɩ̃ɛ́ tẽ-kpɛ̃ɛ kãw pʋɔ.

⁸Be n'a fʋ na be gùre kɛ́ bɛ wa kʋ b lãwnɩ a Ɩsɩrayɛl nɩbɛ.

⁹Fʋ na sɩrɩ tɩɛrɛ kɛ́ bɛ kʋ̃ nyɔw bɛ a, ta sãw niwn ɛ. Mãa ƴɛ̀r'a baarɩ, ɛ́ a lɛ za ɩ̃ na yel a na tu na.»

¹⁰A Holofɛn tɩ ƴãw nɩ a ʋ tõ-tõ-biir na tɩ be a ʋ pɛn-sɛw pʋɔ a, bɛ nyɔw a Akɩyɔɔr cen nɩ a Betuli tɩ kʋ̀ a Ɩsɩrayɛl nɩbɛ.

¹¹A tõ-tõ-biir tɩ nyɔw ʋ na tɛr yi n a laɩ pʋɔ tu n a tɩ̃tal lowr. Bɛ tɩ yi n a be tu a tan vuo lowr tɩ ta a be a kʋ̃ɔnɩ na bule yire a Betuli pile a.

¹²A Betuli tɩ be n a tãw nyʋɔrɩ́. A bɛlɩ dem na tɩ gù a tẽw a na wa nyɛ̃ bɛ a, bɛ de nɩ a bɛ zɛbr bome yi n a Betuli. A dɛbr za tɩ tɛr'ɩ kpalɩ vãwnɛ nɩ kʋsɛbɛ bɛrɛ a Asiiri tẽw dem zu, bɛ sàw bɛ na do ɩ.

¹³A Asiiri tẽw dem tɩ lɛb'a siw a tãw, tɩ nyɔw a Akɩyɔɔr 'lẽ, bɛr ʋ a tãw sɩ̃ɛ́ be, ɛ́ lɛb cen a bɛ zu-sob zie.

¹⁴A Ɩsɩrayɛl nɩbɛ tɩ yi n a bɛ tẽw siw tɩ nyɛ̃ a Akɩyɔɔr. Bɛ tɩ cɛ̀r ʋ na bɛr, ɛ́ tɛr ʋ cen nɩ a Betuli tɩ wul a tẽw nɩ-bɛrɛ.

¹⁵Mɩka bidɛb, Ozɩasɩ, na ɩ Sɩmɩ̃ɔ dɔwlʋ nɩr a, nɩ Otonɩɛl bidɛb, Kabirisɩ, nɩ Mɛlkɩɛl bidɛb, Karmisɩ, tɩ n'ɩ a nɩ-bɛrɛ a lɛn daar.

¹⁶Bɛ tɩ bʋɔl'ɩ a tẽw nɩ-kore za ɓã taa. A pɔ́lɛ́ za nɩ a pɔwbɛ za mɩ̀ tɩ zɔ na wa a ɓã-taa zie. Bɛ tɩ nyɔw nɩ a Akɩyɔɔr ƴãw a nɩbɛ sɔgɔ, ɛ́ a Ozɩasɩ sowr'ʋ bom nɛ na n'ʋ ɩ a.

¹⁷Ʋ tɩ sɔw na manɩ a lɛ a nɩbɛ na tɩ ɓã taa a Holofɛn zie yel a, a lɛ a ʋl mɩŋa na tɩ yel kʋ̀ a Asiiri nɩ-bɛrɛ a, nɩ a pɔ̀l-ƴɛ̀rʋ al a Holofɛn na tɩ ƴɛ̀r càar'ɩ a Ɩsɩrayɛl nɩbɛ a.

¹⁸Lɛ n'a a nɩbɛ tɩ lo gbĩ dume a Naaŋmɩn niŋé, gũu tɩ tɔ tẽw, ɛ́ ŋmɩɛr cɛlsɩ zɛlɛ nɩ ʋ:

¹⁹«Sore e, fʋ̃ʋ Naaŋmɩn na be a salom zu a, nyɛ̃ a tɩ dɔ̃ dem pɔ̀l-ɩb a. Zɔ a fʋ nɩbɛ bɛ na ɩrɛ laar a nɩbaalʋ! Jɩ́r a bɛlɩ dem fʋ na so a kaa a dɩ̃a bibir.»

²⁰Al pùorí, bɛ tɩ mɔwl'ɩ a Akɩyɔɔr ɛ́ mʋʋr'ʋ yaga za.

²¹A Ozɩasɩ tɩ tɛr ʋ na yi n a ɓã-taa zie be, cen nɩ ʋ a ʋ yir, ɛ́ tɩ cɔbrɩ dɩb a nɩ-kore ƴãw. A tɩ̃ɩsɔw za a, bɛ tɩ puor'a zɛlɩ k'aa Ɩsɩrayɛl Naaŋmɩn sõw bɛ.