Read Dagara, Northern Ziditɩ 7 Bible Online

Ziditɩ 7 - Dagara, Northern bible

Ziditɩ 7

¹A bio daarɩ́ a, a Holofɛn tɩ ƴãw nɩ a ʋ zɛbr-nɩbɛ za, nɩ a sojarɩ bɛl za na tɩ wa kɛ́ bɛ wa sõw ʋ a, bɛ lo a Betuli tẽw sɔ́r, ʋ tɩ yel'a kɛ́ bɛ piw a tɔlʋ ziir al za na dúor a tan zu a, nɩ kɛ́ bɛ ŋmãa nɩ a Ɩsɩrayɛl nɩbɛ a zɛbr.

²A ʋlɩ bibir nɛ a, a dɛbr za na na tʋ̃ɔ́ a zɛbr zɛb a tɩ ìr'a lo a sɔ́r. A zɛbr-nɩbɛ pʋɔ a, a soja-gbɛ́ɛ dem tɩ ɩ n tùr-lɩz'a ani nɩ pie (170 000) ɛ́ a soja-wi-zɔmnbɛ tɩ ɩ tùr-pie nɩ ayi (12 000), ɛ́ bɛ bɛ sɔ́r a tuor nɩ a gbɛ́ɛ dem na kaarɛ a zie a ƴãw ɛ. Zu-sɛbla na bɛ dɩ vuo a tɩ nɛbɛ.

³Bɛ tɩ maal'ɩ a bɛ laɩ a fʋɔla ʋl na pɩɛlɩ a Betuli a, a kʋ̃ɔ nʋɔr. Bɛ tɩ so nɩ a vuo ʋl za, a na tĩ a Dotayim tɩ sãá a Bɛlbayim a, ɛ́ lɛb tĩ a Betuli tɩ tɔ a Kɩamon na tori a Ɛsɩdirelon a.

⁴A Ɩsɩrayɛl nɩbɛ na tɩ nyɛ̃ a zu-sɛbla ŋa a, pʋl-vʋ̃ɔ tɩ nyɔw bɛ nɩ yaga bɛ yere kʋ̀rɛ taa: «A nɩbɛ bɛ ŋa na sãw nɩ bom za bɛr a tẽw pʋɔ. Bɛ na yɛ̀r'a pàw a tã-bɛrɛ, a fʋɔlɩ nɩ a tãli za.»

⁵Ŋa za mɩ́ tɩ de nɩ a ʋ zɛbr bome. Bɛ tɩ gbɔw nɩ vũu a zɛbr-yir-cõcowli zu, ɛ́ gù a zie a ʋlɩ tɩ̃ɩsɔw nɛ za.

⁶A bio daarɩ́ a, a Holofɛn tɩ ƴãw nɩ a ʋ soja-wi-zɔmnbɛ za yi àr tori a Ɩsɩrayɛl nɩbɛ a Betuli.

⁷Ʋ tɩ piwr'a bãw a tɔlʋ ziir al za na dúor a tẽw pʋɔ a, ɛ́ bɔ nyɛ̃ a bɛ kʋ̃ɔnɩ ziir za, piw a tɛr. Ʋ tɩ ƴãw nɩ zɛbr-nɩbɛ a be, bɛ gù a, ʋʋ lɛb cen a ʋ zɛbr-nɩbɛ zie.

⁸Lɛ n'a a Edɔm tẽw nɩbɛ nɩ-bɛrɛ za, a Mowab tẽw dem sojarɩ nɩ-bɛrɛ nɩ a Mediterane kʋ̃ɔ-kpɛ̃ɛ nʋɔr zɛbr-nɩbɛ nɩ-bɛrɛ bɛrɛ za, tɩ taw pɩɛl'ʋ yel à ŋá:

⁹«Tɩ zu-sob i, fʋ̃ʋ sàw bɛr wõ tɩ a, a fʋ soja-been kãw za kʋ̃ kpi ɛ.

¹⁰A Ɩsɩrayɛl nɩbɛ bɛ ŋa bɛ ɩrɛ ƴãwn a bɛ zɛbr bome ƴãw ɛ, a tan na kɛrɩ kɛrɩ a zu bɛ na be a, al ƴãw n'a bɛ ɩrɛ ƴãwn. Bʋ̃ʋ n'ʋ vɛ̃, a tan á ŋá nyɛɛ páwfʋ bɛ ɩ mɔlɛ ɩ.

¹¹A na ɩ à ŋá a, zu-sob i, ta pɩɛrɩ a fʋ nɩbɛ zɛb'ɩ bɛ ɩ, ɛ́ a fʋ soja-been kãw za bɛ kpiir ɛ.

¹²Be a fʋ laɩ pʋɔ ɛ́ tɛr a fʋ zɛbr-nɩbɛ a be, ɛ́ ƴãw a fʋ tõ-tõ-biir bɛ gù a kʋ̃ɔ na bule yire a tãw sɩɛmɩ́ a.

¹³Bʋ̃ʋ n'ʋ vɛ̃, be n'a a Betuli tẽw dem waar wa 'wɔ̃wnɛ a kʋ̃ɔ. A kʋ̃ɔ-nyúur na tʋ̃ɔ́ bɛ na, fɛr bɛ ƴãw bɛ de a bɛ tẽw tɩr. Tɩɩm a, tɩ na do n a tan nyɛɛ al na pɩɛlɩ a zu nɩ a tɩ zɛbr-nɩbɛ, tɩ gù kɛ́ nɩr za taa yire a tẽw pʋɔ ɩ.

¹⁴A tẽw dem na kpi n kɔ̃ bɛ za: a dɛbr, a pɔwbɛ nɩ a bibiir. Tɩ kʋ̃ tĩ nɩ bɛ a zɛbr sɛr mɩ̀ ɛ, ɛ́ a bɛ kũuni pàw a bɛ tẽ-kpɛ̃ɛ sɛ́ɛ.

¹⁵Fʋ na dɔwrɩ bɛ nɩ yaga, bɛ na gaarɩ bɛ sàw tuori fʋ zɛlɩ a ƴã-ɓaarʋ a.»

¹⁶A Holofɛn nɩ a ʋ sojarɩ nɩ-bɛrɛ za tɩ sàw nɩ a bɛ yã ŋa, ʋʋ yel kɛ́ bɛ tu a lɛ bɛ na yel a.

¹⁷A Amɔ̃ tẽw nɩ a Asiiri tẽw sojarɩ túr-anũu (5 000) tɩ cen na tɩ zɩ̃ a fʋɔla pʋɔ, ɛ́ piw a Ɩsɩrayɛl nɩbɛ kʋ̃ɔnɩ ziir nɩ a bɛ bul-nɛ́ɛ.

¹⁸A Edɔm tẽw dem nɩ a Amɔ̃ tẽw dem tɩ do na tɩ maalɩ a bɛ laɩ a tan vuo pʋɔ, tori a Dotayim. Al pùorí, bɛ tɩ tõ n a bɛ nɩbɛ bɛ mɩnɛ a saa-pɛrɩ́-dʋrʋ-lowr nɩ a saa-pɛrɩ́ tori a Egirebɛl na pɩɛlɩ a Kusɩ, a Mokimuur bàa nʋɔr a. A Asiiri zɛbr-nɩbɛ ŋmãa na cɛ a, tɩ maal'ɩ a bɛ laɩ a tɩ̃tal pʋɔ, ɛ́ yɛ̀r pàw a ʋ za. A bɛ tuor nɩ a bɛ pɛnɛ-sɛwr tɩ ɩ na a bɛ laɩ bɛrmɛ bɛ dɩ vuo ɩ, zu-sɛbla na bɛ dɩ vuo a nɩbɛ nɛbɛ tɩ be a laɩ ŋa pʋɔ.

¹⁹A Ɩsɩrayɛl nɩbɛ kanyir za tɩ baar'a, bɛ kone bʋɔlɛ a Sore bɛ Naaŋmɩn k'ʋʋ wa sõw bɛ. A bɛ dɔ̃ dem tɩ viir'a koli bɛ, bɛ kʋ̃ tʋ̃ɔ́ cɩ̃ɛ ɩ.

²⁰A Asiiri tẽw zɛbr-nɩbɛ za, a soja-gbɛ́ɛ dem, a zɛbr-torkori, nɩ a soja-wi-zɔmnbɛ, tɩ piw bɛ na bibie lɩz'a ayi ŋmãa anũu for bir. A Betuli tẽw dem tɩ nyɛ̃ nɩ a bɛ kʋ̃ɔnɩ a baarɩ a kʋ̃ɔ bʋ̃-ƴãwnɩ za pʋɔ.

²¹A kʋ̃ɔnɩ tɩ baar'ɩ a sa-bie-kʋ̃ɔ-bɔwrɩ[8] pʋɔ, ɛ́ nɩr bɛ mɩ́ lɛb tɩ nyɛ̃ kʋ̃ɔ nyũ sɛw bibi-been yõ ɩ, bʋ̃ʋ n'ʋ vɛ̃, bɛ mɩ́ tɩ manɩ nɩ a kʋ̃ɔ tɩr.

²²A bibiir fãw tɩ baar'a, a kʋ̃ɔ-nyúur tɩ bàl'ɩ a pɔwbɛ nɩ a pɔ́lɛ́, bɛ lore a sɛ́ɛ pʋɔ nɩ a tẽw dɩ̃dɛɛ ƴãw. Bɛ bɛ tɩ cãà tɛr fãw kãw za ɩ.

²³A nɩbɛ za, a pɔ́lɛ́, a pɔwbɛ nɩ a bibiir tɩ ɓã n taa a Ozɩasɩ nɩ a tẽw nɩ-bɛrɛ zie. Bɛ tɩ cɩɩrɛ nɩ kpɛ̃w kpɛ̃w za, ɛ́ yere à ŋá a nɩ-kore za niŋé:

²⁴«A Naaŋmɩn, ʋ dɩ a ƴɛ̀rʋ a tɩɩm nɩ a nyɩɩm cara pʋɔ! Nyɩ na bɛ bɔ a ƴã-ɓaarʋ a Asiiri tẽw dem zie a, nyɩ ƴãw tɩ nɩ yele pʋɔ a dɩ̃a.

²⁵Ƴɛrɛŋa a, nɩr bɛ ka be na sõw tɩ ɛ. Naaŋmɩn ƴãw tɩ nɩ a bɛ nuru pʋɔ. Kʋ̃ɔ-nyúur na kʋ tɩ nɩ nɩbaal-kʋb a bɛ mimirí.

²⁶A na ɩ à ŋá a, nyɩ bʋɔlɩ a Holofɛn nɩbɛ, nyɩ bʋɔlɩ a ʋ zɛbr-nɩbɛ za, nyɩ de a tẽw kʋ̀ bɛ, bɛ za a bome za.

²⁷Tɩmɛ lo a bɛ nuru pʋɔ a, alɛ sa tɩ na na kpi a kʋ̃ɔ-nyúur a: sɩza n'a, tɩ na ɩ n a bɛ gbãgbaar, ɛcɛ tɩ na cãà na vʋʋrɛ ɛ́ tɩ kʋ̃ nyɛ̃ a tɩ bi-pɩɩlɛ, a tɩ pɔwbɛ nɩ a tɩ bibiir ŋmãa vʋʋrʋ ɛ.

²⁸Tɩ zɛlɛ nyɩ nɩ a salom nɩ a tẽsɔw yúor ƴãw, a tɩ Naaŋmɩn yúor ƴãw, a tɩ sãàkʋm-kore Sore, ʋl na mɩ́ dɔwrɩ tɩ a tɩ yel-bebe nɩ a tɩ sãàkʋm-kore yel-bebe ƴãw a, tɩ zɛlɛ nyɩ na, nyɩ ɩ ʋ ta sàw a kpɩɛrʋ á ŋá páw tɩ a dɩ̃a ɩ.»

²⁹A nɩbɛ na tɩ ɓã taa a tɩ lãw na kone yaga yaga. Bɛ za tɩ cɩɩrɛ nɩ kpɛ̃w kpɛ̃w za zɛlɛ nɩ a Sore Naaŋmɩn.

³⁰Lɛ n'a a Ozɩasɩ tɩ yel bɛ: «Ɩ̃ yɛbr i, nyɩ dɩ kanyir! Nyɩ ɩ tɩ cãà tɛr à à ŋá bibie anũu, a Sore tɩ Naaŋmɩn na zɔ n tɩ nɩbaalʋ: ʋ kʋ̃ jɛ tɩ bɛr a baarɩ ɛ.

³¹Ɛcɛ a bibie anũu wa tɔl, ʋʋ bɛ sõw tɩ a, ɩ̃ na ɩ n a lɛ nyɩ na zɛlɛ a.»

³²Al pùorí, ʋ tɩ bɛr'ɩ bɛ za: a dɛbr tɩ lɛb'a cen a bɛ beba ziir a dacine zu nɩ a tẽ-kpɛ̃ɛ zɛbr-yir-cõcowli zu, ɛ́ a pɔwbɛ nɩ a bibiir lɛb kul a bɛ yie pʋɔ. Kpɩɛrʋ yaga tɩ nyɔw nɩ a nɩbɛ za.