Read Dagara, Northern Ziditɩ 8 Bible Online

Ziditɩ 8 - Dagara, Northern bible

Ziditɩ 8

¹A alɩ bibie nɛ pʋɔ, a Ziditɩ tɩ wõ n a yele á ŋá. Ɔsɩ bidɛb Merari pɔwyaa tɩ n'ʋ. A Ɔsɩ tɩ ɩ n Zuzɛb bidɛb, a Zuzɛb ɩ Ozɩɛl bidɛb, a Ozɩɛl ɩ Hɛlkɩa bidɛb, a Hɛlkɩa ɩ Anani bidɛb, a Anani ɩ Zedeɔ̃ bidɛb, a Zedeɔ̃ ɩ Arafayin bidɛb, a Arafayin ɩ Akɩtɔb bidɛb, a Akɩtɔb ɩ Eli bidɛb, a Eli ɩ Kɛlkɩasɩ bidɛb, a Kɛlkɩasɩ ɩ Eliyaavʋ bidɛb, a Eliyaavʋ ɩ Natanayɛl bidɛb, a Natanayɛl ɩ Salamɩɛl bidɛb, a Salamɩɛl ɩ Sarasadaɩ bidɛb, a Sarasadaɩ ɩ Zakɔb bidɛb.

²A Ziditɩ sɩr tɩ n'ɩ Manase. Ʋlɛ nɩ a Manase tɩ lãw nɩ dɔwlʋ nɩ yir[9]. A Manase tɩ kpi n a ɔɔzʋ deb daar.

³Ʋ tɩ piwre nɩ a bɛlɩ dem na 'lene a ɔɔzʋ zuru ɓanɛ taa a póru pʋɔ a, mʋ̃tɔ̃w tʋlʋ wa dɩ ʋ a zu, ʋ gã bàalʋ, kpi a ʋ tẽw Betuli, bɛ ũù ʋ a ʋ sãàkʋm-kore ũufʋ zie, a púo ʋl pʋɔ na be a Dotayim nɩ a Balamon cara pʋɔ a.

⁴Yome ata nɩ cuwr anaar'ɩ à ŋá a Ziditɩ na tɩ ɩ a pɔw-kʋɔr a, ʋ tɩ kpɩɛr'ɩ a ʋ yir.

⁵Ʋ tɩ ƴãw na bɛ maalɩ sɛw kʋ̀ ʋ a ʋ yir garʋ́. Ʋ mɩ́ tɩ sɛ n vʋɔra[10] a ʋ sɩɛmɩ́ ɛ́ de a ʋ pɔw-kʋɔlʋ bome su dɔwlɩ.

⁶A ʋ sɩr kũu daar za n'a ʋ tɛrɛ a mʋta-tuo bibie za, ɛ́ tɩ cɛ a pɩ̃ɛnʋ-bibie yõ nɩ a zãa daarɩ́, a cuw-paala bibie nɩ a zãa daarɩ́, lãwnɩ a Ɩsɩrayɛl nɩbɛ cuwr al na cɛ a nɩ a bɛ cɩlʋ bibie.

⁷A Ziditɩ tɩ pɔ̀l'a bɛ mɩ́ nyɛ̃ cen gù. A ʋ sɩr Manase tɩ bɛr ʋ nɩ salm-pla nɩ salm-zɩɛ, tõ-tõ-bi-dɛbr nɩ tõ-tõ-bi-pɔwbɛ, dʋn nɩ wɛrʋ, ʋʋ tɩ kaarɛ a na-bome á ŋá za zie.

⁸Nɩr bɛ tɩ be be na yel yel-faa a ʋ ƴãw ɛ, bʋ̃ʋ n'ʋ vɛ̃, ʋ tɩ zɔrɛ nɩ a Naaŋmɩn yaga za.

⁹Ʋ tɩ wõ n a lɛ a kʋ̃ɔ-nyúur na tɩ kpɛ a nɩbɛ a bɛ kanyir baarɩ, bɛ yere a tẽw nɩ-kpɛ̃ɛ a. Ʋ mɩ̀ tɩ wõ n a lɛ a Ozɩasɩ na tɩ sɔw kʋ̀ a nɩbɛ a, nɩ a lɛ ʋ na tɩ sàw kʋ̀ bɛ k'ʋʋ na de nɩ a tẽw kʋ̀ a Asiiri tẽw dem ka nɩ bibie anũu a.

¹⁰Lɛ n'a a Ziditɩ tɩ tõ a ʋ tõ-tõ-bi-pɔw kãw, na kaarɛ a ʋ bome za zie a, k'ʋʋ tɩ bʋɔlɩ a Ozɩasɩ, a Karmisɩ nɩ a Kabirisɩ na ɩ a tẽw nɩ-bɛrɛ a, bɛ wa a ʋ zie.

¹¹Bɛ na tɩ ta a ʋ zie a, ʋ tɩ yel bɛ na: «Betuli tẽw nɩbɛ nɩ-bɛrɛ ɛ, nyɩ bɛr wõ a ɩ̃ ƴɛ̀rʋ. A lɛ nyɩ na ƴɛ̀r a nɩbɛ zie a dɩ̃a a, a bɛ sɛw ɛ, a lɛ nyɩ na pɔ nyɩɩm nɩ a Naaŋmɩn cara pʋɔ, yel kɛ́ ka nɩ bibie anũu a Sore bɛ wa sõw nyɩ a, ɛ́ nyɩ na de nɩ a tẽw kʋ̀ a nyɩ dɔ̃ dem a, a bɛ sɛw ɛ.

¹²A na ɩ à ŋá a, nyɩɩm n'ɩ tẽbowle na yel kɛ́ nyɩ ɩ a Naaŋmɩn kaa, nɩ kɛ́ nyɩ lɩɛrɩ ʋ a nɩsaalbɛ yele maalʋ ƴãw?

¹³Ƴɛrɛŋa a, nyɩ ɩrɛ nɩ a Sore kpɛnʋ-za-sob kaar, ɛcɛ nyɩ bɛ be za na bãw a ʋ pʋ-tɩɛrʋ towtow ɛ.

¹⁴Nyɩ kʋ̃ tʋ̃ɔ́ bãw a nɩsaal pʋɔ na ŋmɛ̃ lɛ a ɩ, nyɩ kʋ̃ tʋ̃ɔ́ bãw a lɛ ʋ na tɩɛrɛ a ʋ yã pʋɔ a ɩ. Ɛ́ ŋmɩŋmɩn za n'a nyɩ na tʋ̃ɔ́ bãw a Naaŋmɩn, ʋl na ír a bome á ŋá za tɩ na nyɛrɛ a? Ŋmɩŋmɩn n'a nyɩ na tʋ̃ɔ́ bãw a lɛ ʋ na tɩɛrɛ a, bɩɩ bãw a lɛ ʋ na bɔbr k'ʋʋ ɩ a? Aɩ, ɩ̃ yɛbr i, nyɩ ta ɩ a Sore tɩ Naaŋmɩn suur ìr ɛ!

¹⁵Ʋlɛ bɛ wa bɔbr k'ʋʋ faa tɩ ka nɩ bibie anũu a, ʋ tɛr'ɩ fãw na sõw tɩ lɛn daar za ʋ na bɔbr a, bɩɩ na bɛr tɩ tɩ kpi a tɩ dɔ̃ dem mimirí.

¹⁶Nyɩ ta mɩ́ fɛrɛ k'aa Naaŋmɩn kʋ̀ nyɩ bãwfʋ, wul k'ʋʋ na ɩ n a lɛ ʋ na yel a ɩ. Bʋ̃ʋ n'ʋ vɛ̃, a Naaŋmɩn bɛ ɩ nɩsaal ɛ, bɛ kʋ̃ tʋ̃ɔ́ fɛr ʋ ʋ ɩ bom ɛ, bɩɩ fɛr ʋ wõ-taa kãw ƴãw ɛ.

¹⁷Lɛ so, tɩ cãà zɛlɛ ʋ k'ʋʋ wa sõw tɩ, gùre nɩ a lɛn daar ʋ na na faa tɩ a. Ʋ na sàw nɩ a tɩ zɛlʋ, a ʋ yã wa nɔ̃w a.

¹⁸A dãwdãw nɩbɛ pʋɔ, wa tɩ tɔ a dɩ̃a a, dɔwlʋ kãw za, yir kãw za, a tɩ tẽ-bɛrɛ nɩ a tẽli nɩr kãw za bɛ dãw puori ŋmɩmɛ nɩsaalbɛ nuru na maalɩ a ɩ, mɛ̃ a lɛ a na tɩ ɩ a koro za a ɩ.

¹⁹Alɛ n'a tɩ so a bɛ dɔ̃ dem dɔwrɩ bɛ a zɛbr pʋɔ, ɛ́ za a bɛ bome, ɛ́ tʋ̃ɔ́ bɛ pẽlẽpẽlẽ.

²⁰Ɛcɛ tɩɩm bɛ puore naaŋmɩn-yũo a bɛ ɩ a Sore ɩ. Lɛ so, tɩ na tʋ̃ɔ́ na tɩɛrɛ k'ʋʋ kʋ̃ zawrɩ tɩ bɛr ɛ, a tɩɩm bɩɩ a tɩ bʋʋrɛ nɩr kãw ɛ.

²¹Bɛlɛ wa de a tɩ tẽw a, bɛ mɩ̀ na de nɩ a Zude tẽw za. Bɛ na za n a tɩ Ŋmɩn-yir-kpɛ̃ɛ, ɛ́ a Naaŋmɩn na sowri tɩ nɩ bom bɛ na dɛw ʋ bɛr a ƴãw.

²²A tɩ nɩ-bʋʋrɛ nɩbɛ bɛ na na kʋ faa faa a, a nɩbɛ bɛ na na nyɔw cen nɩ tẽ-yũo bɛ tɩ ɩ gbãgbaar a, nɩ a tɩ tẽw bɛ na na sãw bɛr a, a Naaŋmɩn na ɩ n à á ŋá za sãwna lɛb lo a tɩ zu. A nɩbɛ na na so tɩ a na kpɔwrɛ tɩ na ɛ́ tʋʋr tɩ.

²³A tɩ gbãgbaalʋ kʋ̃ ɩrɛ nɩr za nɩbaalʋ ɛ, ɛcɛ a Sore Naaŋmɩn na nɩ̃ɛ na ɩ a lɩɛbɩ vĩ kpɩɛr tɩ.

²⁴Yɛbr i, nyɩ ɩ tɩ wul a tɩ yɛbr, kɛ́ tɩɩm zie n'a a bɛ nyɔ-vʋʋrʋ yi, k'aa zi-sõw, a Ŋmɩn-yir-kpɛ̃ɛ nɩ a bàwr-maal-kuur be n a tɩ nuru pʋɔ.

²⁵A yele á ŋá za ƴãw a, nyɩ ɩ tɩ puori a Sore tɩ Naaŋmɩn yãanɩ, ʋl na ɩrɛ tɩ kaar mɛ̃ ʋ na tɩ ɩ a tɩ sãàkʋm-kore kaa a.

²⁶Nyɩ lɛb tɩɛrɩ a lɛ ʋ na tɩ ɩ a Abraham zie a, nɩ a lɛ ʋ na tɩ ɩ a Ɩzaakɩ kaa a, nyɩ lɛb tɩɛrɩ bom nɛ na tɩ ta a Zakɔb, a Mezopotami tẽw Saa-zu a, a lɛn daar ʋ na tɩ àrɛ nɩ a ʋ mã-dɛb Labã píir a.

²⁷Naaŋmɩn ɩ na bɛ wõ tuo, k'ʋʋ bãw a lɛ a bɛ pʋɔ na sɩrɩ ŋmɛ̃ a, ɛcɛ ʋ bɛ ɩ tɩ mɛ̃ a lɛ ʋ na ɩ bɛ a ɩ, ʋ bɛ dɔwrɩ tɩ ɛ. A bɛ kpãàfʋ ƴãw n'a a Naaŋmɩn mɩ́ ŋmɛ a bɛlɩ dem na tawr pɩɛlɛ ʋ a.»

²⁸A Ozɩasɩ tɩ sɔw ʋ na: «A fʋ ƴɛ̀rʋ za fʋ na ƴɛ̀r'a tɛr'ɩ yel-mɩŋa, ɛ́ nɩr kʋ̃ sàw yel bʋ̃-yoru ɛ.

²⁹A fʋ yã-bãwfʋ na sãá a, dɩ̃a tɛwr bɛ n'a ɩ. A fʋ pɔ̀lʋ daar za n'a nɩr za nyɛ̃ a lɛ fʋ na bãw a yã a, nɩ a lɛ a fʋ pʋɔ na vɩɛl sɛw a.

³⁰Ɛcɛ a nɩbɛ tɩ kpiir'ɩ kʋ̃ɔ-nyúur, ɛ́ fɛr tɩ tɩ ɩ a bɛ ƴãw mɛ̃ a lɛ tɩ na yel kʋ̀ bɛ a. Tɩ pɔ n pɔb tɩ na kʋ̃ tʋ̃ɔ́ lɩɛbɩ bɛr a.

³¹A na ɩ à ŋá a, fʋ ɩ n pɔw na nɔ̃w puoru a, puori a Sore ʋ kʋ̀ tɩ a saa. A tɩ sa-bie-kʋ̃ɔ-bɔwrɩ[11] na paal'a ɛ́ tɩ kʋ̃ lɛb bãw a kʋ̃ɔ-nyúur bàlʋ ɛ.»

³²Lɛ n'a a Ziditɩ tɩ yel bɛ: «Nyɩ bɛr wõ m, ɩ̃ na ɩ n ɩb kãw a tɩ bʋʋrɛ na dɔwr lɩɛrɛ taa na na wone bɛ ƴɛ̀rɛ a ʋ ƴɛ̀rʋ a.

³³A dɩ̃a tɩ̃ɩsɔw a, nyɩ àr a tẽw dɩ̃dɔrɩ́, ɛ́ mãa nɩ a ɩ̃ tõ-tõ-bi-pɔw yi. A Sore na tu n a ɩ̃ zie sõw a Ɩsɩrayɛl nɩbɛ, ɛ́ a bibie al nyɩ na ƴãw kɛ́ nyɩ de a tẽw kʋ̀ a tɩ dɔ̃ dem a bãw ta.

³⁴Ɛcɛ nyɩɩm a, nyɩ ta bɔbr kɛ́ nyɩ bãw bom nɛ ɩ̃ na bɔbr k'ɩ̃ɩ ɩ a ɩ: mãa bɛ wa ɩ ʋ baar'a, ɩ̃ kʋ̃ yel ʋ kʋ̀ nyɩ ɛ.»

³⁵A Ozɩasɩ nɩ a nɩ-bɛrɛ tɩ yel ʋ na: «Cere nɩ ƴã-ɓaarʋ. A Sore Naaŋmɩn, ʋ de b niwn tɩ dɔwrɩ a tɩ dɔ̃ dem yáa a san!»

³⁶Bɛ tɩ yi n a Ziditɩ sɛw pɛr, lɛb cen a bɛ beba ziir.