Read Dagara, Northern Ziditɩ 9 Bible Online

Ziditɩ 9 - Dagara, Northern bible

Ziditɩ 9

¹A zaanʋɔra a, a ʋlɩ tɛm nɛ bɛ na mɩ́ de a tɩ-suur-zɔ̃-na-nyùur-vla-vla-a kʋ̀ a Naaŋmɩn a Zerizalɛm Ŋmɩn-yir-kpɛ̃ɛ pʋɔ a, a Ziditɩ tɩ gbĩ n dume, gũu tɩ tɔ tẽw. Ʋ tɩ ŋmɛ n tãpɛlʋ a ʋ zu, ɛ́ bɛr a ʋ vʋɔra kparʋ ʋ na tɩ su a ʋ bome pàw a, ʋ sãá. Ʋ tɩ zɛw nɩ kɔkɔr puori a Sore à ŋá:

²«Sore e, fʋ̃ʋ n'ɩ a ɩ̃ sãàkʋm-kʋra Sɩmɩ̃ɔ Naaŋmɩn. Fʋ̃ʋ n'ʋ tɩ ƴãw ʋ zɛbr-sɔ-kpɛ̃ɛ a nũú, k'ʋʋ kʋ n nɩ-sãanbɛ na tɩ fɛr a ʋ yeepuule[12] na bɛ tɩ bãw dɛb sɛr a. A nɩbɛ bɛ ŋa tɩ yaa nɩ a ʋ bʋ̃-suuri, ɛ́ fɛr gã nɩ ʋ, sãw a ʋ yúor. Lɛ n'a fʋ tɩ yel: “A ciir'a”, ɛ́ bɛ ɩ.

³Alɛ n'a so fʋ bɛr bɛ kʋ a bɛ nɩ-bɛrɛ. Bɛ mɩ̀ zu bɛ na mɛ̃ a lɛ bɛ na zu a: a bɛ zɩ̃ɩ cir'a pàw a gado ʋl zu bɛ na tɩ sãw a pɔwsɩrale yúor a. Fʋ ŋmɛ n a gbãgbaar lãwnɩ a bɛ nɩ-bɛrɛ, ɛ́ ŋmɛ a na-mɩnɛ a bɛ naalʋ-dà-kɔwr zu.

⁴Fʋ bɛr'a bɛ nyɔw a bɛ pɔwbɛ cen nɩ. A bɛ pɔwyaar lɩɛb'ɩ gbãgbaar. A bɛ bʋ̃-tɛrɩ za lo n a nɩ-bʋʋrɛ fʋ na nɔnɛ a, a Ɩsɩrayɛl nɩbɛ, nuru pʋɔ, bɛl na tɩ tʋlɛ a fʋ nʋɔr-sàwfʋ ƴãw a. Bɛ bɛ tɩ nɔ̃w a vĩ na lo a bɛ yir zu a towtow ɛ, ɛ́ tɩ zɛlɩ kɛ́ fʋ sõw bɛ.» «Naaŋmɩn i, ɩ̃ Naaŋmɩn i, bɛr wõ a ɩ̃ puoru, mãa na ɩ pɔw-kʋɔr a.

⁵A al za na tɩ dãw ɩ a koro za a, a al na ɩrɛ a dɩ̃a a, nɩ a al na na ɩ a bio a, fʋ̃ʋ n'ʋ maalɩ a za. Fʋ̃ʋ n'ʋ tɩɛrɩ a dɩ̃a nɩ a nɩdaar yele, ɛ́ bom nɛ fʋ na tɩ tɩɛrɩ a maal'a.

⁶A yele fʋ na tɩ tɩɛrɩ kɛ́ fʋ maalɩ a, wa n a fʋ zie wa yel: “Tɩ be n ka!” Bʋ̃ʋ n'ʋ vɛ̃, a fʋ ɩ-ɩrɩ za cɔbr'a, ɛ́ fʋ de niwn bãw a lɛ fʋ na na yel a.

⁷Sore e, fʋ nyɛ̃ a na, a Asiiri tẽw dem wa n yaga yaga ɛ́ kpɛmɛ. Bɛ nyʋʋr'ɩ nɩ a bɛ wie nɩ a bɛ wi-zɔmnbɛ, bɛ ɩrɛ nɩ a bɛ soja-gbɛ́ɛ dem fãw zũú. Bɛ ɩrɛ na ƴãwn a bɛ kafine nɩ a bɛ zɛbr-kur-pãgalɩ ƴãw, a bɛ tamɛ nɩ a bɛ kpalɩ ƴãw, ɛ́ yiiri fʋ̃ʋ na n'ɩ a Sore na na tʋ̃ɔ́ ɩ a zɛbr baar'a.

⁸Fʋ yúor'ɩ a Sore: a fʋ fãw, ʋ ɩ a bɛ gãda-ɩb baarɩ, ɛ́ a fʋ su-yãyaar sãw a bɛ fãw bɛr. Bʋ̃ʋ n'ʋ vɛ̃, bɛ yel'a kɛ́ bɛ sãw a fʋ yir-sõw bɛr, kɛ́ bɛ dɛw a be fʋ na be a fʋ yúor-vɩɛlʋ-danʋ pʋɔ a bɛr, kɛ́ bɛ de kure ŋmɛr'ɩ a fʋ bàwr-maal-kuur bɛr.

⁹Nyɛ̃ a bɛ pɔ̀l-ɩb a! Ɩ bɛ bãw a fʋ suur na ìr a bɛ zu a. A mãa na ɩ pɔw-kʋɔr a, kʋ̀ m a fãw, ɩ̃ tʋ̃ɔ́ tu a lɛ ɩ̃ na tɩɛrɩ a.

¹⁰De a ɩ̃ bɛlʋ ƴɛ̀r-bie ŋmɛ n a zu-sob nɩ a gbãgbaa, a nɩ-kpɛ̃ɛ nɩ a ʋ sojarɩ lɔb. Sãw a bɛ pɔ̀l-ɩb bɛr nɩ pɔw nũu.

¹¹Bʋ̃ʋ n'ʋ vɛ̃, nɩ-yaga yaga bɛ nɛbɛ so a fʋ fãw ɛ, ɛ́ nɩ-kpɛn kpɛn bɛ nɛbɛ so a fʋ kpɛnʋ ɛ. Ɛcɛ fʋ ɩ n a su-siwri dem Naaŋmɩn, a bãbàalbɛ sõwne, fʋ̃ʋ n'ʋ tɩ̀ɛrɛ a bɛlɩ dem na bɛ tɛr fãw a, fʋ̃ʋ n'ʋ mɩ́ piw a bɛlɩ dem na ɩ bɛ tɛwr a tɛr, fʋ̃ʋ n'ʋ mɩ́ faa a bɛlɩ dem a tɩɛrʋ za na mɩ́ wɛ a.

¹²Ɩ̃ zɛlɛ fʋ nɩ yãayãa, ɩ̃ sãà Naaŋmɩn i, Ɩsɩrayɛl tẽw Naaŋmɩn i, salom nɩ tẽw Sore e, kʋ̃ɔnɩ íre e, bʋ̃-íra za nãà a, bɛr wõ a ɩ̃ puoru.

¹³Sàw a ɩ̃ bɛlʋ ƴɛ̀rʋ ƴãw bàalʋ, ɛ́ kʋ a bɛlɩ dem na tɩ tɩɛrɩ tɩɛrʋ na bɛ vɩɛl towtow a fʋ wõ-taa ƴãw, a fʋ yir-sõw ƴãw, a Sɩyɔ̃ tãw nɩ a fʋ nɩ-bʋʋrɛ tẽw ƴãw a.

¹⁴Ɩ kɛ̀ nɩ-bʋʋrɛ za, nɩ dɔwlʋ za bãw kɛ́ fʋ̃ʋ n'ɩ a kpɛnʋ za nɩ a fãw za Naaŋmɩn, kɛ́ fʋ̃ʋ yõ tẽtẽ n'ʋ gùre a Ɩsɩrayɛl nɩ-bʋʋrɛ.»