Read Dagara, Northern Eziptɩ tẽw yib 14 Bible Online

Eziptɩ tẽw yib 14 - Dagara, Northern bible

Eziptɩ tẽw yib 14

¹A Sore tɩ ƴɛ̀r'ɩ a Moyiir zie yel à ŋá:

²«Yel a Ɩsɩrayɛl nɩbɛ kɛ́ bɛ lɛb wa maalɩ a pɛnɛ-sɛwr tori Pi-Hahirɔtɩ, a Migɩdɔl nɩ a kʋ̃ɔ-kpɛ̃ɛ cara pʋɔ. Be n'a nyɩ na maalɩ a nyɩ pɛnɛ-sɛwr tori Baal-Sefon, pɩɛlɩ a kʋ̃ɔ-kpɛ̃ɛ.

³A Faarawɔ̃ na yel'ɩ à ŋá a nyɩ ƴãw: “A Ɩsɩrayɛl nɩbɛ n'ɩ bɛ ŋan na bɔrɛ gʋɔr a tẽw pʋɔ a, a wɛja-kpalɛ lɩɛb'ɩ a bɛ gaso.”

⁴Ɩ̃ na ɩ na a Faarawɔ̃ kpãa tobr diwr bɩ́ɛrɛ nyɩ. Lɛ n'a ɩ̃ na tʋ̃ɔ́ ʋ pẽlẽpẽlẽ, ʋlɛ nɩ a ʋ zɛbr-nɩbɛ za. À ŋá n'a ɩ̃ na ɩ a ɩ̃ yúor-vɩɛlʋ-danʋ ʋ sãá, ɛ́ a Eziptɩ tẽw dem bãw kɛ́ mãa n'ɩ a Sore.» A Ɩsɩrayɛl nɩbɛ tɩ ɩ n a lɛ.

⁵Bɛ na wa yel a Eziptɩ tẽw nãà k'aa Ɩsɩrayɛl nɩbɛ zɔ na a, ʋlɛ nɩ a ʋ tõ-tõ-bi-bɛrɛ tɩɛrʋ tɩ lɩɛb'ɩ a bɛ ƴãw, bɛ yel: «Bʋ̃ʋ n'ʋ tɩ ɩ à à ŋá? Tɩ bɛr'ɩ a Ɩsɩrayɛl nɩbɛ bɛ cen, kʋ̃ cãà ɩ a tɩ gbãgbaar ɛ!»

⁶A Faarawɔ̃ tɩ ƴãw na bɛ caw a ʋ zɛbr-torko a wie ƴãw, ʋʋ tɛr a ʋ zɛbr-nɩbɛ cen nɩ.

⁷Ʋ mɩ̀ tɩ de nɩ a ʋ zɛbr-torkori kɔbr ayʋɔb (600) al na vɩɛl zuo a za a, lãwnɩ a Eziptɩ tẽw zɛbr-torkori za, ɛ́ torko ŋa mɩ́ tɛr a ʋ nɩbɛ za.

⁸A Sore tɩ ɩ na a Eziptɩ tẽw nãà Faarawɔ̃ kpãa tobr ìr diwr bɩ́ɛrɛ a Ɩsɩrayɛl nɩbɛ na tɩ so bɛ tʋɔra yire a.

⁹A Eziptɩ tẽw zɛbr-nɩbɛ nɩ a bɛ wie, a bɛ zɛbr-torkori nɩ a bɛ wi-zɔmnbɛ za tɩ diw na bɩɛrɩ a Ɩsɩrayɛl nɩbɛ, tɩ páw bɛ bɛ pɩɛlɩ Pi-Hahirɔtɩ na tori Baal-Sefon a, a be bɛ na tɩ maalɩ a bɛ pɛnɛ-sɛwr pɩɛlɩ a kʋ̃ɔ-kpɛ̃ɛ a.

¹⁰A Ɩsɩrayɛl nɩbɛ tɩ nyɛ̃ na k'aa Eziptɩ tẽw nɩbɛ ta na tu bɛ, ɛ́ a Faarawɔ̃ tarɛ. Dɛ̃bɩ̃ɛ tɩ ɩrɛ bɛ nɩ yaga bɛ ŋmɩɛr cɛlsɩ bʋɔlɛ nɩ a Sore,

¹¹ɛ́ tɩ yere a Moyiir: «Yarʋ n'a bɛ ka a Eziptɩ, fʋ tɛr tɩ wa n kɛ́ tɩ wa kpi a wɛja-kpalɛ pʋɔ ka bɩɩ? Bʋnʋ ƴãw n'a fʋ ɩ tɩ yi a Eziptɩ?

¹²Tɩ tɩ yel'a kʋ̀ b a lɛn daar tɩ na tɩ cãà be a be a: “Bɛr tɩ tɩ tone a Eziptɩ tẽw nɩbɛ tome! A bɛ tome tob sa tɩ na na kpi a wɛja-kpalɛ pʋɔ a”.»

¹³A Moyiir tɩ sɔw nɩ a Ɩsɩrayɛl nɩbɛ à ŋá: «Nyɩ ta zɔrɛ dɛ̃bɩ̃ɛ ɩ! Nyɩ ƴãw fãw ɛ́ nyɩ na nyɛ̃ nɩ a lɛ a Sore na na faa nyɩ a dɩ̃a a. Bʋ̃ʋ n'ʋ vɛ̃, a Eziptɩ tẽw nɩbɛ bɛ ŋa nyɩ na nyɛrɛ a dɩ̃a a, nyɩ kʋ̃ lɛb nyɛ̃ bɛ towtow ɛ.

¹⁴A Sore na lɩɛrɩ nyɩ na zɛb, nyɩ bɛ damnɛ damnʋ za ɩ.»

¹⁵A Sore tɩ yel'ɩ a Moyiir: «Bʋ̃ʋ n'ʋ so fʋ ŋmɩɛr cɛlsɩ cɔwr mɛ̃? Yel a Ɩsɩrayɛl nɩbɛ kɛ́ bɛ ìr lo a sɔ́r.

¹⁶Ɛ́ a fʋ̃ʋ a, de a fʋ dabɔl zɛw a kʋ̃ɔ-kpɛ̃ɛ zu. Ɓar ʋ ziir ayi, puo tɔlʋ zie, a Ɩsɩrayɛl nɩbɛ gãw ʋ nɩ gbɛ-kon.

¹⁷Mãa ƴãw a, ɩ̃ na ɩ na a Eziptɩ tẽw nɩbɛ kpãa tobr, ɛ́ tu a nyɩ pùor kpɛ a kʋ̃ɔ-kpɛ̃ɛ pʋɔ. Lɛ n'a ɩ̃ na tʋ̃ɔ́ a Faarawɔ̃ nɩ a ʋ zɛbr-nɩbɛ za, a ʋ zɛbr-torkori, a ʋ wi-zɔmnbɛ, lɛ n'a ɩ̃ na tʋ̃ɔ́ bɛ pẽlẽpẽlẽ, wul a ɩ̃ yúor-vɩɛlʋ-danʋ.

¹⁸A Eziptɩ tẽw nɩbɛ na bãw na kɛ́ mãa n'ɩ a Sore, a lɛn daar ɩ̃ nãà wa tʋ̃ɔ́ a Faarawɔ̃, a ʋ zɛbr-torkori nɩ a ʋ wi-zɔmnbɛ pẽlẽpẽlẽ, wul a ɩ̃ yúor-vɩɛlʋ-danʋ a.»

¹⁹A Naaŋmɩn malkɩ na tɩ de a Ɩsɩrayɛl nɩbɛ niwn a tɩ wa na wa be a bɛ pùorí. A zũzuwr[49] na tɩ be a bɛ nidaa a mɩ̀ tɩ wa na wa be a bɛ pùorí.

²⁰Ʋ tɩ wa na wa be a Eziptɩ tẽw nɩbɛ nɩ a Ɩsɩrayɛl tẽw nɩbɛ cara pʋɔ. A zũzuwr ŋa tɩ ɩ n lige a lõbowr kãw, ɛ́ a lõbowr kãw caalɛ a tɩ̃ɩsɔw. À ŋá n'a a Ɩsɩrayɛl tẽw nɩbɛ nɩ a Eziptɩ tẽw nɩbɛ bɛ tɩ tʋ̃ɔ́ pɩɛlɩ taa a tɩ̃ɩsɔw za ɩ.

²¹A Moyiir tɩ dɔl'ɩ a nũu a kʋ̃ɔ-kpɛ̃ɛ zu. Lɛ n'a a Sore tɩ ɩ saa-pɛrɩ́ sɛsɛb fu n fãw, da a kʋ̃ɔ-kpɛ̃ɛ kʋ̃ɔ cen nɩ, ɛ́ bɛr ʋ ʋ ko gã. A kʋ̃ɔnɩ tɩ bʋ́r'ɩ ziir ayi,

²²ɛ́ a Ɩsɩrayɛl nɩbɛ gãw a kʋ̃ɔ-kpɛ̃ɛ nɩ gbɛ-kon, a kʋ̃ɔ ɩ mɛ̃ dacĩ-kpɛ̃ɛ a, be a bɛ dʋrʋ lowr nɩ a bɛ gʋba lowr.

²³A Eziptɩ nɩbɛ tɩ ta na tu bɛ. A Faarawɔ̃ wie za, a ʋ torkori nɩ a ʋ wi-zɔmnbɛ tɩ tu bɛ na kpɛ a kʋ̃ɔ-kpɛ̃ɛ pʋɔ.

²⁴A zie na wa bɩ põ-zɛ̃-taa tɔl blã a, a Sore tɩ be n a vũu nɩ a zũzuwr na ɩ mɛ̃ kpul a pʋɔ, ɛ́ jɩ́r a Eziptɩ tẽw zɛbr-nɩbɛ, dam bɛ nyaw taa.

²⁵Ʋ tɩ ɩ na a bɛ zɛbr-torkori gbɛ́ɛ kʋ̃ lɛb tʋ̃ɔ́ lɩɛbɩ ɛ, a dãanʋ ɩ kpɛ̃w. Lɛ n'a a Eziptɩ tẽw nɩbɛ tɩ yel: «Nyɩ ɩ tɩ zɔ zãá nɩ a Ɩsɩrayɛl nɩbɛ, bʋ̃ʋ n'ʋ vɛ̃, a Sore n'ʋ lãw nɩ bɛ zɛbr'ɩ tɩ!»

²⁶A Sore tɩ yel'ɩ a Moyiir: «Dɔl a fʋ nũu a kʋ̃ɔ-kpɛ̃ɛ zu, a kʋ̃ɔ lɛb wa pàw a Eziptɩ tẽw nɩbɛ, a bɛ zɛbr-torkori nɩ a bɛ wi-zɔmnbɛ.»

²⁷A Moyiir tɩ dɔl'ɩ a nũu a kʋ̃ɔ-kpɛ̃ɛ zu, ɛ́ a zie na wa wɛlɛ a, a kʋ̃ɔ-kpɛ̃ɛ tɩ lɛb'a paalɩ àr a ʋ àrʋ zie. A Eziptɩ tẽw nɩbɛ na tɩ zɔrɛ a tɩ tuor'ɩ a kʋ̃ɔ gboro, a Sore cã bɛ wuli lɔb a kʋ̃ɔmɩ́.

²⁸A kʋ̃ɔ tɩ lɛb'a wa wa paalɩ pàw a Faarawɔ̃ zɛbr-nɩbɛ torkori za na tɩ tu a Ɩsɩrayɛl nɩbɛ kpɛ a kʋ̃ɔ-kpɛ̃ɛ pʋɔ a. Nɩr za bɛ tɩ cɩ̃ɛ ɩ.

²⁹Ɛcɛ, a Ɩsɩrayɛl nɩbɛ bɛl tɩ kpɛ na tɔl a kʋ̃ɔ-kpɛ̃ɛ dĩo pʋɔ nɩ gbɛ-kon: a kʋ̃ɔ tɩ ɩ na mɛ̃ dacĩ-kpɛ̃ɛ a, be a bɛ dʋrʋ lowr nɩ a bɛ gʋba lowr.

³⁰A Sore tɩ faa nɩ a Ɩsɩrayɛl nɩbɛ a Eziptɩ tẽw dem nuru pʋɔ a ʋlɩ bibir nɛ, ɛ́ bɛ nyɛ̃ a Eziptɩ nɩbɛ na kpi gã a kʋ̃ɔ-kpɛ̃ɛ nʋɔr a.

³¹A Ɩsɩrayɛl nɩbɛ tɩ nyɛ̃ nɩ a kpɛnʋ a Sore na wul a Eziptɩ tẽw dem a. Alɛ so bɛ tɩ zɔrɛ ʋ. Bɛ tɩ sàw na de a Sore nɩ a ʋ tõ-tone Moyiir.