Read Dagara, Northern Eziptɩ tẽw yib 15 Bible Online

Eziptɩ tẽw yib 15 - Dagara, Northern bible

Eziptɩ tẽw yib 15

¹Lɛ n'a a Moyiir nɩ a Ɩsɩrayɛl nɩbɛ tɩ yieli a danʋ yielu ŋa a Sore ƴãw[50]: Ɩ̃ na yiele nɩ a Sore ƴãw. Ʋ dɩ n dɛblʋ! A wie nɩ a wi-zɔmnbɛ za a, ʋ lɔb bɛ na ƴãw a kʋ̃ɔ-kpɛ̃ɛ pʋɔ.

²A Sore so a ɩ̃ fãw nɩ a ɩ̃ yielu, ʋl ƴãw n'a ɩ̃ nyɛ̃ a faafʋ[51]. Ʋlɛ n'ɩ a ɩ̃ Naaŋmɩn, ɩ̃ na danɛ ʋ a na. Ʋlɛ n'ɩ a ɩ̃ sãà Naaŋmɩn, ɩ̃ na zɛwr ʋ na.

³A Sore ɩ n zɛ-zɛbrɛ, a ʋ yúor'ɩ a Sore!

⁴A Faarawɔ̃ zɛbr-torkori nɩ a ʋ zɛbr-nɩbɛ, a ʋ soja-zɛb-bãw-karɩ, ʋ lɔb bɛ na ƴãw a kʋ̃ɔ-kpɛ̃ɛ pʋɔ. A Bàa-kɛkɛɛ kʋ̃ɔ-kpɛ̃ɛ kʋ̃ɔ paal'a pàw bɛ.

⁵Bɛ tɔl'a siw a kʋ̃ɔ pɛrɩ́ mɛ̃ kʋsɛ-gbile a, ɛ́ a kʋ̃ɔ-kpɛ̃ɛ kʋ̃ɔnɩ pàw bɛ.

⁶A fʋ dʋrʋ nũu a bɩɩ, Sore e, nyɛ̃ kpɛ̃w ʋ na kpɛmɛ a! A fʋ dʋrʋ nũu a, Sore e, ʋ tʋ̃ɔ́ nɩ a fʋ dɔ̃ dem pẽlẽpẽlẽ.

⁷Fʋ ɩ n kpɛ̃ɛ bɛ pɩɛl ɛ! Fʋ mɩ́ da n a bɛlɩ dem na ìr a fʋ ƴãw a lɔb. Fʋ mɩ́ nyɛ̃ nɩ suur ɩ mɛ̃ vũu a, dɩ bɛ mɛ̃ mɔ̃-kon a.

⁸Fʋ pɛbl'a nɩ fãw a kʋ̃ɔnɩ zɔ gbõ taa, a kʋ̃ɔ-mie ìr àr mɛ̃ dacin a, a kʋ̃ɔnɩ gúr gã a kʋ̃ɔ-kpɛ̃ɛ pɛrɩ́.

⁹A tɩ dɔ̃ dem tɩ yel'a: «Tɩ na diw na bɩɛrɩ bɛ, tɩ na pàw bɛ na, tɩ na põ nɩ a bɛ bome tɩ na fá a, a tɩ zuo a lɛ tɩ na bɔbr a. Tɩ na vɔ̃ n a tɩ zɛbr-sɔ-bɛrɛ, tɩ na lɛb'a nyɔw bɛ.»

¹⁰Ɛcɛ fʋ̃ʋ a, Sore e, fʋ pɛbl'ɩ a fʋ pɩɛlʋ, a kʋ̃ɔ-kpɛ̃ɛ paalɩ pàw bɛ. Bɛ tɔl'a siw mɛ̃ kure a, a kʋ̃ɔnɩ na damnɛ nɩ fãw a pʋɔ.

¹¹A ŋmɩmɛ pʋɔ a, ãa n'ʋ ɩ mɛ̃ a fʋ̃ʋ a, Sore e? Ãa n'ʋ ɩ mɛ̃ a fʋ̃ʋ na nyɩwrɛ nɩ sonu a? Na bɛ tɛr dɩ̃ɛnʋ, ɛ́ sɛwnɩ danʋ a? Na maalɛ nɔ-ɓãa-yele a?

¹²Fʋ zɛw nɩ a fʋ dʋrʋ nũu, ɛ́ a tẽsɔw vɔl a tɩ dɔ̃ dem.

¹³Fʋ faa nɩ a fʋ nɩ-bʋʋrɛ! Fʋ tɛr bɛ na nɩ nɔ̃wfʋ, nɩ fãw, cere nɩ a fʋ kpɛb zie na ɩ sõw a.

¹⁴A nɩ-bʋʋr-yoru wõ n a yel ŋa màwr: pʋl-vʋ̃ɔ nyɔw nɩ a Filisɩtɛ̃ mɩnɛ,

¹⁵dɛ̃bɩ̃ɛ ɩrɛ nɩ a Edɔm na-mɩnɛ, pʋ̀lá vʋ̃ɔnɛ nɩ a Mowab na-mɩnɛ, a Kanãa tẽw dem fãw za baar'a.

¹⁶Dɛ̃bɩ̃ɛ sɩrɩ na tɛr bɛ, bɛ dɩ vuo ɩ. A fʋ kpãkpãw-kpɛ̃w ton ɩ na bɛ gbini àr gbili, ɛ́ gù a fʋ nɩ-bʋʋrɛ tɩ tɔl baarɩ, Sore e, a fʋ nɩ-bʋʋrɛ fʋ na páw a.

¹⁷Ƴɛrɛŋa a, fʋ tɛr bɛ na cere nɩ a fʋ tãw zu, kɛ́ fʋ tɩ ƴãw bɛ a be, Sore e. A zie fʋ na cɔbrɩ a fʋ kpɛb ƴãw a n'ʋ, a zi-sõw fʋ̃ʋ mɩŋa na ƴãw a.

¹⁸Sore e, fʋ dɩrɛ nɩ naalʋ kʋralɛ!

¹⁹A lɛn daar a Faarawɔ̃ wie, a ʋ zɛbr-torkori nɩ a ʋ wi-zɔmnbɛ na tɩ kpɛ a kʋ̃ɔ-kpɛ̃ɛ pʋɔ a, a Sore tɩ ɩ na a kʋ̃ɔnɩ lɛb wa paalɩ pàw bɛ. Ɛcɛ, a Ɩsɩrayɛl nɩbɛ bɛl tɩ kpɛ na tɔl a kʋ̃ɔ-kpɛ̃ɛ dĩo pʋɔ nɩ gbɛ-kon.

²⁰Lɛ n'a a pɔw-naaŋmɩn-ƴɛ̀r-manɛ Miriyam na ɩ a Aarɔ̃ yeepuule a, tɩ de a ʋ gãgaar. A pɔwbɛ za tɩ ìr'a tu ʋ, ŋmɩɛr a gãgaɩ ƴawr'ɩ.

²¹A Miriyam tɩ cɛ na ƴãw bɛ à ŋá: Nyɩ yiele danɛ nɩ a Sore: ʋ dɩ n dɛblʋ, ʋ lɔb'ɩ a wie nɩ a wi-zɔmnbɛ za ƴãw a kʋ̃ɔ-kpɛ̃ɛ pʋɔ!

²²A Moyiir tɩ ɩ na a Ɩsɩrayɛl nɩbɛ yi a Bàa-kɛkɛɛ kʋ̃ɔ-kpɛ̃ɛ́, ɛ́ tu Súùr wɛja-kpalɛ lowr. Bɛ tɩ cen nɩ a wɛja-kpalɛ pʋɔ bibie ata, ɛ́ bɛ nyɛ̃ kʋ̃ɔ ɩ.

²³Bɛ tɩ ta n Maara, ɛ́ bɛ tʋ̃ɔ́ a be kʋ̃ɔ nyũ ɛ, a na tɩ tome a ƴãw. Alɛ so Maara ŋa na por a, a pɛr lɛ kɛ́ “Tuo”.

²⁴A nɩbɛ tɩ zɛbr'ɩ nɩ a Moyiir yere á ŋá: «Bʋ̃ʋ n'ʋ tɩ na nyũ?»

²⁵A Moyiir tɩ kõ na cɔw a Sore, ʋ wul ʋ dàa kãw. A Moyiir tɩ lɔb'ɩ a dàa nɛ ƴãw a kʋ̃ɔmɩ́, a kʋ̃ɔ lɩɛbɩ, tɛr nyub. Be n'a a Sore tɩ tɛr wulu a Ɩsɩrayɛl nɩbɛ zie, ɛ́ ƴãw tub kʋ̀ bɛ. Be mɩ̀ n'a ʋ tɩ ɩ bɛ kaa.

²⁶Ʋ tɩ yel bɛ na: «Nyɩmɛ wa sɩrɩ sàwr a mãa Sore nyɩ Naaŋmɩn nʋɔr, maalɛ a lɛ ɩ̃ na mɩ́ nyɛ̃ a tu sɔ́r a, nyɩmɛ wa bɛrɛ wone a ɩ̃ nɛ-ƴãwnɩ, ɛ́ tuur a ɩ̃ wulu za a, a bàalʋ ɩ̃ na ƴãw a Eziptɩ tẽw nɩbɛ a, ɩ̃ bɛ ƴãwnɛ nyɩ a bàalʋ á ŋá been kãw za ɩ. Bʋ̃ʋ n'ʋ vɛ̃, mãa n'ɩ a Sore na sanɛ nyɩ a.»

²⁷Al pùorí, a Ɩsɩrayɛl nɩbɛ tɩ ta n Elim. Bul-nɛ́ɛ pie nɩ ayi nɩ kpãkparmɛ tɩɩr lɩz'a ata nɩ pie tɩ be n a be. Bɛ tɩ maal'ɩ a bɛ pɛnɛ-sɛwr a be, pɩɛlɩ a kʋ̃ɔ.