Read Dagara, Northern Eziptɩ tẽw yib 19 Bible Online

Eziptɩ tẽw yib 19 - Dagara, Northern bible

Eziptɩ tẽw yib 19

¹A Ɩsɩrayɛl nɩbɛ tɩ bɛr'ɩ a Erefidim. Bɛ na tɩ yi a Eziptɩ maalɩ cuwr ata a, a cuwr ata sob bibi-dãw-niwn sob'a bɛ tɩ kpɛ a Sinayi wɛja-kpalɛ pʋɔ. Bɛ tɩ maal'ɩ a bɛ pɛnɛ-sɛwr a wɛja-kpalɛ pʋɔ, tori a Sinayi tãw.

³A Moyiir tɩ do n a tãw, k'ʋʋ tɩ tuori a Naaŋmɩn. A Sore tɩ be n a tãw nyʋɔrɩ́, ɛ́ bʋɔlɩ a Moyiir yel ʋ: «Tɩ yel à ŋá kʋ̀ a Zakɔb bʋʋrɛ, a Ɩsɩrayɛl nɩbɛ:

⁴“Nyɩɩm mɩŋa nyɛ̃ nɩ a lɛ ɩ̃ na ɩ a Eziptɩ tẽw nɩbɛ a. Nyɩ nyɛ̃ nɩ a lɛ ɩ̃ na tɛr nyɩ, mɛ̃ sɩla pɩgɛ zu a, wa n a ɩ̃ zie ka a.

⁵Ƴɛrɛŋa a, nyɩmɛ wa wone a ɩ̃ ƴɛ̀rʋ, ɛ́ tɛr a ɩ̃ wõ-taa vla a, nyɩ na ɩ na mɛ̃ na-bom a a ɩ̃ zie, a nɩ-bʋʋrɛ za pʋɔ. Bʋ̃ʋ n'ʋ vɛ̃, mãa so a tẽ-daa za,

⁶ɛcɛ nyɩ na ɩ n bàwr-maalbɛ naalʋ-tẽw[59] a ɩ̃ zie nɩ nɩ-bʋʋr-sõw.” À á ŋá n'a fʋ na tɩ yel kʋ̀ a Ɩsɩrayɛl nɩbɛ.»

⁷A Moyiir tɩ lɛb'a wa a pɛnɛ-sɛwr pʋɔ wa bʋɔlɩ a Ɩsɩrayɛl nɩ-kore manɩ a ƴɛ̀rʋ al za a Sore na tɩ ƴãw k'ʋʋ yel a kʋ̀ bɛ.

⁸A nɩbɛ za tɩ sɔw na mɛ̃ nɩ-been a, yel à ŋá: «Tɩ na ɩ n a lɛ za a Sore na yel a.» A Moyiir tɩ lɛb'a tɩ manɩ a lɛ a nɩbɛ na sɔw a kʋ̀ a Sore.

⁹Lɛ n'a a Sore tɩ yel a Moyiir: «Ɩ̃ na wa n a fʋ zie zʋ̀ʋr-sɛbla[60] pʋɔ, a nɩbɛ tʋ̃ɔ́ wone ɩ̃ na ƴɛ̀rɛ a fʋ zie a, ɛ́ mɩ̀ mɩ́ sàw de b kʋralɛ.» A Moyiir tɩ lɛb'a yel a lɛ a nɩbɛ na sɔw a kʋ̀ a Sore.

¹⁰A Sore tɩ cãà na lɛb yel a Moyiir: «Lɛb cen a nɩbɛ zie tɩ yel bɛ kɛ́ bɛ so a bɛ dɛwr bɛr, a dɩ̃a nɩ a bio. Bɛ mɩ̀ pɛ́w a bɛ kparɩ.

¹¹Bɛ cɔbrɩ gù a deyere, bʋ̃ʋ n'ʋ vɛ̃, a deyere n'a ɩ̃ na siw a Sinayi tãw zu, a nɩbɛ za niŋé.

¹²Ƴãw tʋr-bɔwrɩ viiri koli a tãw, ɛ́ yel bɛ à ŋá: “Nyɩ taa dúor a tãw zu ɛ, nyɩ taa tawr pɩɛlɛ ʋ ɛ. Nɩr za wa tawr pɩɛlɛ a tãw a, bɛ na kʋ ʋ na.

¹³Nɩsaal'ʋ bɩɩ dʋ̃w n'ʋ a, ʋ bɛ cãanɛ ɩ. Nɩr bɛ tʋɔr a sãwna sob ɛ, kʋsɛbɛ n'a bɛ na lɔb'ɩ kʋ, bɩɩ pime n'a bɛ na baw nɩ ʋ kʋ. A ɩɩl wa pɛblɩ a lɛn daar a n'a bɛ mɩnɛ na do a tãw zu.»

¹⁴A Moyiir tɩ yi n a tãw zu lɛb siw a nɩbɛ zie, tɩ ƴãw bɛ so a bɛ dɛwr bɛr, ɛ́ pɛ́w a bɛ kparɩ.

¹⁵Al pùorí ʋ yel bɛ: «Nyɩ cɔbrɩ gù a deyere. Nyɩ taa pɩɛlɛ a nyɩ pɔwbɛ ɩ.»

¹⁶A deyere daarɩ́ biɓaara a, a saa tɩ tanɛ na, ɛ́ nyɩwrɛ, ɛ́ zʋ̀ʋr-sɛbla tɩ pàw a tãw. Ɩɩl mɩ̀ tɩ pɛblɛ nɩ kpɛ̃w kpɛ̃w za. Dɛ̃bɩ̃ɛ tɩ nyɔw nɩ a nɩbɛ a pɛnɛ-sɛwr pʋɔ, bɛ màwr.

¹⁷A Moyiir tɩ ɩ na bɛ yi a pɛnɛ-sɛwr pʋɔ tuori a Naaŋmɩn. Bɛ tɩ tɛw na àr a tãw sɩɛ ƴãw.

¹⁸A Sinayi tãw tɩ ɩ n zʋ̀ʋ́r tɛwr, a Sore na tɩ siw a ʋ zu a vũu pʋɔ a ƴãw. A zʋ̀ʋ́r tɩ ìre na dúor mɛ̃ vũu-kpɛ̃ɛ zʋ̀ʋ́r a, ɛ́ a tãw za gbiwre gbigbigbi!

¹⁹A ɩɩl kɔkɔr tɩ lɛb'a bãw yire. A Moyiir mɩ́ tɩ ƴɛ̀r a, ɛ́ a Naaŋmɩn sɔw nɩ a saa-tanʋ.

²⁰A Sore tɩ siw nɩ a Sinayi tãw nyʋɔrɩ́, ɛ́ bʋɔlɩ a Moyiir a be, ʋ do.

²¹A Sore tɩ yel ʋ na: «Siw tɩ kpãa a nɩbɛ, kɛ́ bɛ taa zɔrɛ birbir waar kɛ́ bɛ wa nyɛ̃ m ɛ, alɛ bɛ ɩ lɛ nɩ-yaga nãà mab'a kpi.

²²Mɔ̃ mɩ̀, a bàwr-maalbɛ mɩ̀ na saa mɩ́ tʋ̃ɔ́ taw pɩɛlɩ mɛ̃ a, a fɛr'a kɛ́ bɛ so a bɛ dɛwr bɛr, alɛ bɛ ɩ lɛ, ɩ̃ nãà mab'a nyɛ̃ nɩ bɛ suur, a mãa Sore.»

²³A Moyiir tɩ sɔw ʋ na: «A nɩbɛ kʋ̃ tʋ̃ɔ́ do a Sinayi tãw zu ɛ. Mɛ̃ fʋ taa kpaalɩ tɩ yel à ŋá: “Ƴãw tʋr-bɔwrɩ viiri koli a tãw, ʋ ɩ tã-sõw.”»

²⁴A Sore tɩ yel ʋ na: «Lɛb siw, al pùorí fʋ̃ʋ nɩ a Aarɔ̃ do wa. Ɛcɛ a bàwr-maalbɛ nɩ a nɩbɛ a, bɛ taa wa zɔrɛ birbir dúor waar a ɩ̃ zie, ɩ̃ wa mab nyɛ̃ nɩ bɛ suur ɛ.»

²⁵A Moyiir tɩ lɛb'a siw a nɩbɛ zie, tɩ ƴɛ̀r a bɛ zie.