Read Dagara, Northern Eziptɩ tẽw yib 2 Bible Online

Eziptɩ tẽw yib 2 - Dagara, Northern bible

Eziptɩ tẽw yib 2

¹Levi dɔwlʋ nɩr kãw tɩ kul'ɩ pɔw na tɩ ɩ a dɔwlʋ been nɛ nɩr a.

²A pɔw tɩ tɛr'ɩ pʋɔ dɔw dɛble, nyɛ̃ ʋ vɩɛl, ʋ sɔwlɩ ʋ cuwr ata[4].

³Al pùorí, a na bɛ tɩ cãà tɛr ʋ na sɔwlɩ ʋ a, ʋ de nɩ zãkpa bɛ na wob'ɩ papiirisɩ[5] mie a, bʋl'ɩ gudurɔ̃ lãwnɩ súur, de a bie ƴãw a be, ɛ́ cen nɩ tɩ bin a bàa-kɛkɛɛ pʋɔ, a Nɩl nʋɔr.

⁴A bie yeepuule tɩ àr'a zãá blã, k'ʋʋ nyɛ̃ a ʋlɩ bom nɛ na na ɩ ʋ a.

⁵Al pùorí, a Faarawɔ̃ pɔwyaa tɩ siw nɩ a Nɩl pʋɔ k'ʋʋ tɩ puuli kʋ̃ɔ, ɛ́ a ʋ bɩɛlbɛ tɩ dɛnɛ a man nʋɔr. Ʋ tɩ nyɛ̃ nɩ a zãkpa a bàa-kɛkɛɛ pʋɔ, ɛ́ ƴãw a ʋ tõ-tõ-bi-pɔw cen tɩ de ʋ wa n.

⁶Ʋ tɩ yuo nɩ a zãkpa nyɛ̃ ʋ ɩ dɛbli-cãpile n'ʋ kone. Nɩbaalʋ tɩ kpɛ ʋ nɩ a ʋ ƴãw, ʋ yel: «A Ebre mɩnɛ bie kãw n'ʋ!»

⁷A bie yeepuule tɩ sowr'ɩ a Faarawɔ̃ pɔwyaa: «Fʋ bɔbr'a k'ɩ̃ɩ cen a Ebre pɔwbɛ pʋɔ tɩ bʋɔlɩ pɔw na cãà ƴɛnɛ bie a bɩɩ? Ʋ na tʋ̃ɔ́ na ƴɛnɩ a bie kʋ̀ b.»

⁸Ʋ sɔw ʋ: «Cen.» A powle tɩ cen na tɩ bʋɔlɩ a bie mã.

⁹A Faarawɔ̃ pɔwyaa tɩ yel'ɩ a pɔw: «De a bie ŋa tɩ ƴɛnɩ kʋ̀ m, ɩ̃ɩ na ya b'a.» A pɔw tɩ de nɩ a bie tɩ ƴɛnɩ.

¹⁰A bie na wa ɩ kpɛ̃ɛ a, a mã tɛr ʋ na tɩ kʋ̀ a Faarawɔ̃ pɔwyaa, ʋ de ʋ k'ʋ ɩ a ʋ bidɛb, ʋʋ por ʋ a yúor kɛ́ Moyiir[6]. Bʋ̃ʋ n'ʋ vɛ̃, ʋ tɩ yel'a: «Kʋ̃ɔmɩ́ n'a ɩ̃ ír ʋ.»

¹¹A Moyiir na wa ɩ nɩ-kpɛ̃ɛ baar'a, ʋ yi n bibir kãw k'ʋʋ tɩ nyɛ̃ a ʋ yɛbr Ebre mɩnɛ. Ʋ tɩ nyɛ̃ nɩ a pɔ̃tɔrɩ tome bɛ na tone a. Ʋ mɩ̀ tɩ nyɛ̃ nɩ Eziptɩ tẽw nɩr na pɔbr a ʋl Moyiir yɛbr Ebre nɩr kãw a.

¹²Lɛ n'a ʋ tɩ piwri a ziir za bɛ nyɛ̃ nɩr ɛ, ɛ́ ŋmɛ a Eziptɩ tẽw nɩr nɛ kʋ, sɔwlɩ bɛr a biire pʋɔ.

¹³Ʋ tɩ lɛb'a wa a bio daarɩ́ wa nyɛ̃ Ebre nɩbɛ ayi bɛ pɔbr taa, ʋ sowri a sãwna sob: «Bʋnʋ ƴãw n'a fʋ pɔbr a fʋ tɔ?»

¹⁴A nɩr nɛ yel ʋ: «Ãa n'ʋ ƴãw kɛ́ fʋ ɩ a tɩ nɩ-kpɛ̃ɛ maalɛ nɩ tɩ a ƴɛ̀rʋ? Fʋ bɔbr'a kɛ́ fʋ mɩ́ kʋ m mɛ̃ a lɛ fʋ na kʋ a Eziptɩ tẽw nɩr a bɩɩ?» A Moyiir na tɩ nyɛ̃ k'aa yel yi na a, dɛ̃bɩ̃ɛ tɩ kpɛ ʋ na.

¹⁵A Faarawɔ̃ tɔr za tɩ wõ na bɛ ƴɛ̀rɛ a ƴɛ̀rʋ, ɛ́ tɩ bɔbr a ʋ kʋb. Lɛ n'a a Moyiir tɩ yi a Faarawɔ̃ zie zɔ cen tɩ kpɩɛr Madian tẽw. A be n'a ʋ tɩ yi bibir kãw zɩ̃ bule kãw pɛr[7].

¹⁶A Madian tẽw bàwr-maalɛ tɩ tɛr'ɩ pɔwyaar ayopõi. Bɛ tɩ wa na kɛ́ bɛ wa 'wɔ̃w kʋ̃ɔ paalɩ a dʋn balɛ̃wnɩ, a bɛ sãà píir nɩ a bʋʋr nyũ.

¹⁷Ɛcɛ pi-cɩ̃ɩnbɛ tɩ ta na diw bɛ. Lɛ n'a a Moyiir tɩ ìr faa bɛ, ɛ́ 'wɔ̃w a kʋ̃ɔ ƴãw a bɛ dʋn a nyũ.

¹⁸Bɛ tɩ lɛb'a kul a bɛ sãà Erewuyɛl zie, ʋ tɩ sowri bɛ: «Bʋ̃ʋ n'ʋ so nyɩ dãwnɩ waa a dɩ̃a?»

¹⁹Bɛ sɔw: «Eziptɩ tẽw nɩr kãw n'ʋ faa tɩ a pi-cɩ̃ɩnbɛ nuru pʋɔ, ɛ́ 'wɔ̃w a kʋ̃ɔ ʋl mɩŋa ƴãw a tɩ dʋn a nyũ.»

²⁰A bɛ sãà sowri bɛ: «Nyɩnɛ n'a ʋ be? Bʋ̃ʋ n'ʋ so nyɩ bɛr ʋ a be? Nyɩ cen tɩ tɛr ʋ wa n ʋ wa dɩ!»

²¹A Moyiir tɩ sàw na be a Erewuyɛl zie, ʋ kʋ̀ ʋ a ʋ pɔwyaa Sefora ʋ kul.

²²A Sefora tɩ dɔw nɩ bidɛb, a Moyiir por a yúor kɛ́ Gɛrsom, a pɛr lɛ kɛ́ “Nʋʋra-a-ka”. Bʋ̃ʋ n'ʋ vɛ̃, ʋ tɩ yel'a: «Ɩ̃ lɩɛb'ɩ nʋʋra tẽ-sãan pʋɔ.»

²³A tɩ cɛlɩ na ɛ́ a Eziptɩ tẽw nãà wa kpi. A Ɩsɩrayɛl nɩbɛ tɩ kone na ŋmɩɛr'ɩ cɛlsɩ a bɛ gbãgbaalʋ pʋɔ, ɛ́ a bɛ bʋɔlʋ tɩ do ta a Naaŋmɩn.

²⁴A Naaŋmɩn tɩ wõ n a bɛ kon, ɛ́ lɛb tɩ́ɛrɩ bãwnɩ a ʋ wõ-taa ʋ na maal'ɩ a Abraham, a Ɩzaakɩ nɩ a Zakɔb a[8].

²⁵Ʋ tɩ jɩ́r'ɩ a Ɩsɩrayɛl nɩbɛ ɛ́ bãw a lɛ a na ŋmɛ̃ a bɛ zie a.