Read Dagara, Northern Eziptɩ tẽw yib 21 Bible Online

Eziptɩ tẽw yib 21 - Dagara, Northern bible

Eziptɩ tẽw yib 21

¹A Sore tɩ yel'a ƴãw pʋɔ: «Nyɛ̃ a wulu a mɩnɛ fʋ na na tɩ ƴɛ̀r wul a Ɩsɩrayɛl nɩbɛ a:

²Nyɩmɛ wa dà gbãgbaa ʋ ɩ Ebre nɩr a, ʋ na tõ n yome ayʋɔb. A yome ayopõi sob a, ʋ na tʋ̃ɔ́ na yi so ʋ tʋɔra cere, ɛ́ bɛ tɛr nɩr za san ɛ.

³A gbãgbaa nɛ wa ɩ dɛ-kʋɔr a ʋ waa daar a, ʋ na yi n ʋ yõ. Ɛ́ ʋlɛ wa kul pɔw a ʋ waa daar a, bɛ na lãw na yi.

⁴A ʋ zu-sob wa n'ʋ kʋ̀ ʋ pɔw, a pɔw dɔw bidɛbr bɩɩ pɔwyaar a, a ʋ zu-sob na so a pɔw nɩ a bibiir, ɛ́ a ʋl yi ʋ yõ.

⁵Ɛcɛ a gbãgbaa wa yel: “Ɩ̃ nɔnɛ nɩ a ɩ̃ zu-sob, a ɩ̃ pɔw nɩ a ɩ̃ bibiir, ɩ̃ bɛ bɔbr k'ɩ̃ɩ bɛr bɛ ɛ́ yi so ɩ̃ tʋɔra ɩ”,

⁶a ʋ zu-sob na ɩ na k'ʋ taw pɩɛlɩ a Naaŋmɩn, ʋ na ɩ na k'ʋ taw pɩɛlɩ a dɩ̃dɔr bɩɩ a dɩ̃dɔr dàa, ʋʋ vʋr ʋ a tobr nɩ bʋ̃-cɩlʋ. A lɛn daar a, a sob nɛ na ɩ n a ʋ gbãgbaa kʋralɛ.

⁷Nɩr wa nyɔw a ʋ pɔwyaa kʋ̀ɔrɩ ʋ ɩ gbãgbaa a, a ʋ pɔwyaa ŋa kʋ̃ mɩ́ lɛb yi so ʋ tʋɔra, mɛ̃ a lɛ a na mɩ́ tu dɛbr na ɩ gbãgbaar a ƴãw ɛ.

⁸A ʋ zu-sob wa dà ʋ k'ʋʋ ɩ a ʋ pɔw kãw, ʋʋ bɛ wa pɛlɩ a ʋ pʋɔ a, ʋ na ɩ na bɛ ya de ʋ. Ʋ bɛ tɛr sɔ́r na kʋ̀ɔrɩ a powle kʋ̀ nɩ-bʋʋr-yoru ɛ: a na ɩ n zub ʋ zu a powle.

⁹Ʋlɛ wa dà ʋ a ʋ bidɛb ƴãw a, ʋ na tu n a powle zie mɛ̃ a lɛ bɛ na mɩ́ tu a powli kul-taa ƴãw a.

¹⁰A zu-sob wa de pɔw ƴãw pʋɔ a, ʋ na cãà na kʋ̀rɛ a dãw-niwn sob a bʋ̃-dɩrɩ, a bʋ̃-suuri, ɛ́ cãà lãwnɛ nɩ ʋ mɛ̃ a dãwdãw a.

¹¹Ʋlɛ bɛ wa kʋ̀rɛ ʋ a bome ata á ŋá a, a pɔw na tʋ̃ɔ́ na yi so ʋ tʋɔra mɔlɛ, ɛ́ bɛ tɩr libir ɛ.»

¹²«Nɩr na ŋmɛ nɩr kʋ a, a fɛr'a kɛ́ bɛ kʋ ʋ[69].

¹³Ɛcɛ ʋlɛ bɛ wa jɩɛrɩ ʋ, ɛ́ ɩ Naaŋmɩn n'ʋ ɩ k'ʋ lo a ʋ nuru pʋɔ a, ɩ̃ na wul nyɩ nɩ zie a sob na na tʋ̃ɔ́ zɔ tɩ kpɛ naayir a.

¹⁴Ɛcɛ nɩr na bãw kɛ́ maalɩ yã kʋ a ʋ tɔ sob a, nyɩ na vɩr ʋ na faa a ɩ̃ bàwr-maal-kuur tɔr za ƴãw, kʋ ʋ[70].»

¹⁵«Nɩr na ŋmɛ ʋ sãà bɩɩ ʋ mã a, a fɛr'a bɛ kʋ ʋ.»

¹⁶«Nɩr na nyɔw nɩr a, ʋ kʋ̀ɔr'ʋ na bɩɩ ʋ cãà na tɛr ʋ a, a fɛr'a kɛ́ bɛ kʋ ʋ[71].»

¹⁷«Nɩr na tʋ ʋ sãà bɩɩ ʋ mã a, a fɛr'a kɛ́ bɛ kʋ ʋ[72].»

¹⁸«Nɩbɛ wa zɛbr taa, a kãw wa gùr nũu ŋmɛ n a ʋ tɔ sob, bɩɩ lɔb'ɩ ʋ kʋsɩɛr ʋ bɛ kpi ɛ́ gã bàalʋ a,

¹⁹ʋlɛ wa tʋ̃ɔ́ mɩ́ lɛb dĩ dàa ìr yi yẽw a, a sob nɛ na ŋmɛ ʋ a kʋ̃ nyɛ̃ dɔwrʋ ɛ. Ɛcɛ a na fɛr'a ʋ ya ʋ a ʋ gaa ʋ na gã bɛ tõ a, ɛ́ ƴãw bɛ sanɩ ʋ, ʋ tɩ kpɛ̃w.»

²⁰«Nɩr wa de dàa ŋmɛ n a ʋ gbãgba-dɛb bɩɩ a ʋ gbãgba-pɔw ʋ kpi a, a fɛr'a kɛ́ bɛ ƴãw ʋ dɔwrʋ.

²¹Ɛcɛ a sob ʋ na ŋmɛ a wa maalɩ bibi-been bɩɩ bibie ayi ɛ́ bãw kpi a, bɛ bɛ ƴãwnɛ ʋ dɔwrʋ ɛ. Bʋ̃ʋ n'ʋ vɛ̃, ʋlɛ so ʋ gbãgbaa.»

²²«Nɩbɛ wa zɛbr taa mʋɔr tɩ ŋmɛ pɔw-púor, a ɩ ʋ pʋ̃ɔ̀ dɔw, ɛ́ a bɛ ɩ ʋ faa a, a sãwna sob na ya n a san a pɔw sɩr na ŋmãa a, mɛ̃ a lɛ a yel-jielbɛ na jieli yel a.

²³Ɛcɛ alɛ wa ɩ faa a pɔw zie a, a sãwna sob na nyɛ̃ nɩ dɔwrʋ: nyɔ-vʋʋrʋ ya nyɔ-vʋʋrʋ,

²⁴mimir ya mimir, nyɩ́ɩm ya nyɩ́ɩm, nũu ya nũu, gbɛ́r ya gbɛ́r,

²⁵bʋ̃-tʋlʋ na vaarɩ a ya bʋ̃-tʋlʋ na vaarɩ a, natɩr ya natɩr, ŋmɩɛrʋ ya ŋmɩɛrʋ.»

²⁶«Nɩr wa ŋmɛ a ʋ gbãgbaa mimir kpol a, dɛb ʋ bɩɩ pɔw n'ʋ a, ʋ na bɛr ʋ na ʋ so ʋ tʋɔra, yaa a ʋ mimir san.

²⁷A ʋ nyɩ́ɩm wa n'ʋ ʋ ŋmɛ ka a, ʋ mɩ̀ na bɛr ʋ na ʋ so tʋɔra, yaa a ʋ nyɩ́ɩm san.»

²⁸«Nadɛr wa cɔ̀r dɛb bɩɩ pɔw kʋ a, bɛ na lɔb'ɩ ʋ nɩ kʋsɛbɛ kʋ, ɛ́ nɩr bɛ 'wɔbr a ʋ nɛn ɛ. A náab sob ʋl kʋ̃ tɛr sãwna ɩ.

²⁹Ɛcɛ a nadɛr wa dãw ɩ na-wobra, bɛ yel kʋ̀ a náab sob ʋ bãwnɩ a, ɛ́ bɛ piwre ʋ, ʋʋ wa kʋ nɩr a, bɛ na lɔb'ɩ a nadɛr nɩ kʋsɛbɛ kʋ, ɛ́ bɛ mɩ̀ na kʋ n a náab sob.

³⁰Bɛlɛ wa ŋmãa san kʋ̀ a nadɛr sob a, ʋ na tɩr'ɩ bom nɛ za bɛ na yel k'ʋʋ tɩr a, ya de nɩ a ʋ nyɔ-vʋʋrʋ.

³¹A nadɛr wa cɔ̀r dɛble bɩɩ powle kʋ a, a alɩ tub-been nɛ n'a bɛ na tu.

³²A nadɛr wa cɔ̀r gbãgba-dɛb bɩɩ gbãgba-pɔw kʋ a, a nadɛr sob na kʋ̀ n a gbãgbaa sob salm-pla libie lɩzɛr'ɩ pie, ɛ́ bɛ lɔb a nadɛr nɩ kʋsɛbɛ kʋ.»

³³Nɩr wa yuo sa-bie-kʋ̃ɔ-bɔw bɛr, bɛ pàw, bɩɩ ʋlɛ wa tuw a bɔw ŋa ɛ́ bɛ pàw, ɛ́ náab bɩɩ bõw wa lo a,

³⁴ʋ na kʋ̀ n libie a dʋ̃w sob yaa a dʋ̃w san. A lɛn daar a, ʋlɛ na so a dʋ̃-kũu.

³⁵«Nɩr nadɛr wa cɔ̀r ʋ tɔ sob nadɛr kʋ a, bɛ na kʋ̀ɔr'ɩ a nadɛr-mimir põ a libie, ɛ́ mɩ̀ cãà lãw a dʋ̃-kũu.

³⁶Ɛcɛ bɛlɛ wa dãw bãw a nadɛr ʋ ɩ na-wobra, ɛ́ a náab sob bɛ piwri ʋ a, ʋ na tɩr'ɩ nadɛr-mimir lɩɛr'ɩ a nadɛr-kũu. A lɛn daar a, ʋlɛ na so a dʋ̃-kũu ʋ za.»

³⁷«Nɩr wa zu náab, pɛrʋ bɩɩ bʋɔ a, al pùorí ʋ kʋ bɩɩ kʋ̀ɔrɩ a dʋ̃w a, ʋ na kʋ̀ n a dʋ̃w sob nĩi anũu, bɩɩ píir anaar, bɩɩ bʋʋr anaar yáa a san.»