Read Dagara, Northern Eziptɩ tẽw yib 22 Bible Online

Eziptɩ tẽw yib 22 - Dagara, Northern bible

Eziptɩ tẽw yib 22

¹«Bɛlɛ wa ùr nyãnyuge tɩ̃ɩsɔw, ʋ ŋmɩɛr dacin puore k'ʋʋ zu a, ɛ́ bɛlɛ wa ŋmɛ ʋ ʋ kpi a, a bɛ ɩ nɩr'ʋ bɛ kʋ ɛ.

²Ɛcɛ a mʋ̃tɔ̃w wa pur baarɩ, ɛ́ a ɩ a, nɩr'ʋ bɛ kʋ. A fɛr'a kɛ́ nyãnyuge mɩ́ ya a ʋ bʋ̃-zura. Ʋlɛ kʋ̃ wa tʋ̃ɔ́ ya a, bɛ na kʋ̀ɔr'ʋ na ʋ ɩ gbãgbaa.»

³«Bɛlɛ wa nyɛ̃ dʋ̃-zura a nyãnyuge nuru pʋɔ, náab, bõw, pɛrʋ bɩɩ bʋɔ, ʋ cãà ɩ dʋ̃-mimir a, a nyãnyuge na ya n dʋn ayi.»

⁴«Nɩr wa bɛr a ʋ dʋn k'aa cen tɩ 'wɔb a ʋ ble púo bɩɩ a ʋ divɛ̃ tɩɩr púo mʋ̃ɔ, ɛ́ a cen nɩ-yũo púo pʋɔ a, ʋ na tɩr'ɩ a ʋ ble po-vla zie nɩ a ʋ divɛ̃ tɩɩr po-vla zie bome yáa a san.»

⁵«Nɩr wa ƴãw vũu gɔ-tuwr ƴãw a dɩ tɩ nyɔw ble bɛ na ŋma ɓã taa, bɩɩ na cãà àr'ɩ a daar, bɩɩ na cãà ɩ va-sɛbla a, a vũu-ƴãwnɛ na ya n a bome na dɩ a.»

⁶«Nɩr wa kʋ̀ libir bɩɩ bome a ʋ tɔ sob k'ʋʋ bin, ɛ́ nyãnyuge wa zu a a sob yir pʋɔ a, bɛlɛ wa nyɔw a nyãnyuge a, ʋ na ya n a bome ʋ na zu a gb'a ayi dɔwlɩ.

⁷Bɛlɛ bɛ wa nyɔw a nyãnyuge a, a sob nɛ bɛ na kʋ̀ a bome ʋ bin a na wa n a Naaŋmɩn niŋé wa pɔ k'ʋʋ bɛ de a ʋ tɔ bome ɩ.

⁸Taw-taa za na be nɩbɛ ayi cara pʋɔ, náab, bõw, pɛrʋ bɩɩ bʋɔ, kparʋ bɩɩ bom kãw za na bɔr a ƴãw a, a nɩbɛ ayi bɛl na wa n a Naaŋmɩn niŋé: a sob ʋl a Naaŋmɩn nãà wa yel kɛ́ ʋlɛ n'ɩ a sãwna sob a, ʋ na ya n a bom gb'a ayi dɔwlɩ.»

⁹«Nɩr wa kʋ̀ a ʋ tɔ sob bõw, náab, pɛrʋ, bʋɔ bɩɩ dʋ̃w kãw za k'ʋʋ tɛlɛ a, a dʋ̃w wa kpi, ʋlɛ wa tɛr bàalʋ bɩɩ nɩ-farbɛ wa diw zɔ n, ɛ́ nɩr za bɛ nyɛ̃ a,

¹⁰a sob nɛ bɛ na kʋ̀ a dʋ̃w a na pɔ n a Sore niŋé k'ʋʋ bɛ de a ʋ tɔ sob bom ɛ. A dʋ̃w sob na sàw nɩ a pɔb ŋa na pɔ a, ɛ́ a sob nɛ kʋ̃ tɩr bom yáa a san ɛ.

¹¹Ɛcɛ a sob nɛ wa bɛr bɛ zu a dʋ̃w a ʋ yir a, ʋ na ya n a dʋ̃w sob.

¹²Wɛ-dʋ̃w wa n'ʋ nyɔw a dʋ̃w a, ʋ na wa n nɩ a zarmɛ a wa dɩ a ʋ dãsɩɛ. A lɛn daar a, ʋ bɛ yarɛ bom za ɩ.»

¹³«Nɩr wa pɛ̃w dʋ̃w a ʋ tɔ zie, ɛ́ a dʋ̃w wa ɩ bàal bɩɩ kpi ɛ́ a dʋ̃w sob bɛ ka be a, a sob nɛ na pɛ̃w a dʋ̃w a na ya n a dʋ̃w.

¹⁴Ɛcɛ a dʋ̃w sob wa be be a, a dʋ̃-pɛ̃wnɛ bɛ yarɛ bom za ɩ. Alɛ wa ɩ fʋ de nɩ a dʋ̃w kɛ́ fʋ tõ n kɛ́ ya a, a yar ʋl'ʋ na lɩɛrɩ.»

¹⁵«Nɩr wa bɛlɩ pɔwsɩrale na bɛ ƴãw yúor sɛr, gã nɩ ʋ a, a na fɛr'a ʋ kul ʋ, ɛ́ kʋ̀ a powle sãà a bome.

¹⁶A powle sãà bɛ wa kʋ̀rɛ ʋ a powle a, ʋ na cãà na ya a san nɩ libie a man a lɛ bɛ na mɩ́ car kɛ́ dɔ a pɔwsɩrale a[73].»

¹⁷«Nyɩ kʋ̃ bɛr pɔw-sɩ̃ɛ ʋ cãà vʋʋrɛ ɩ[74].»

¹⁸«A fɛr'a kɛ́ bɛ kʋ nɩr na gã nɩ dʋ̃w a[75].»

¹⁹«Nɩr wa maalɩ bagɛ kʋ̀ ŋmɩn-yoru a bɛ ɩ a mãa Sore yõ a, a fɛr'a kɛ́ bɛ kʋ ʋ[76].»

²⁰«Nyɩ kʋ̃ nɛbr a nʋʋrɩ ɛ, nyɩ kʋ̃ dɔwrɛ bɛ ɩ. Nyɩ mɩ̀ tɩ dãw na ɩ nʋʋrɩ a Eziptɩ tẽw.

²¹Nyɩ mɩ̀ ta ɩrɛ a kpɩɛr a pɔw-kɔbɛ nɩ a bi-kpebe ɩ[77].

²²Nyɩmɛ wa ɩrɛ a kpɩɛr bɛ, ɛ́ bɛlɛ wa kone bʋɔlɛ mɛ̃ a, ɩ̃ na wõ n a bɛ kon.

²³Ɩ̃ na nyɛ̃ nɩ suur, ɛ́ ɩ nyɩ kpi a zɛbr zie. Lɛ n'a a nyɩ pɔwbɛ mɩ̀ na ɩ pɔw-kɔbɛ, ɛ́ a nyɩ bibiir mɩ̀ ɩ bi-kpebe.»

²⁴«Nyɩmɛ wa pɛ̃w libie a ɩ̃ nɩ-bʋʋrɛ nɩr kãw na ɩ nã́w sob be a nyɩ zie a, nyɩ taa ɩrɛ mɛ̃ a ŋmaarɛ bɛl na mɩ́ pɛ̃w a bɛ libie a ɩ, nyɩ taa yel k'ʋʋ ya lãwnɩ dɔwlɛ ɩ[78].»

²⁵«Nyɩmɛ wa de nɩr kpar-kpɛ̃ɛ bin ɛ́ gù k'ʋʋ wa ya a ʋ san a, nyɩ na lɛb'a kʋ̀ ʋ ɛ́ a mʋ̃tɔ̃w wa bãw kpɛ,

²⁶bʋ̃ʋ n'ʋ vɛ̃, a ʋ bʋ̃-pila yõ n'ɩ a ʋl, ʋlɛ n'ʋ ʋ mɩ́ vaarɩ pàw a ʋ ƴã-gan. Ʋlɛ bɛ wa ka be a, bʋ̃ʋ n'ʋ ʋ na pili gã nɩ? Ʋlɛ wa kõ bʋɔlɩ mɛ̃ a, ɩ̃ na wõ a na: mãa ɩ n nɩbaal-zɔrɛ[79].»

²⁷«Nyɩ taa tʋʋr mɛ̃ ɩ, a mãa, nyɩ Naaŋmɩn ɛ. Nyɩ taa ŋmɩɛr ƴãwn a nyɩ nɩ-bʋʋrɛ nɩ-kpɛ̃ɛ kãw ɛ[80].»

²⁸«A nyɩ ble nɩ a nyɩ divɛ̃ tɩɩr wɔmɛ al na ɩ a ɩ̃ sób a, nyɩ kʋ̃ nɩɩnɛ nɩ a ɩ̃ kʋ̀b ɛ. Nyɩ mɩ́ de a nyɩ bidɛb-dãw kʋ̀ m.»

²⁹«Nyɩ mɩ̀ na mɩ́ ɩ n a lɛ a nyɩ dʋn ƴãw. Náab, pɛrʋ bɩɩ bʋɔ bil-dãw-dɔwra na mɩ́ be n a ʋ mã zie bibie ayopõi. A bibie ani sob a, nyɩ na mɩ́ nyɔw ʋ na maal'ɩ bàwr kʋ̀ m.»

³⁰«Nyɩ na ɩ n nɩ-son a ɩ̃ zie. A na ɩ lɛ a, nɛn nyɩ na nyɛ̃ wɩ̀ɛ pʋɔ, wɛ-dʋn taw cɩɛrɩ a, nyɩ taa 'wɔbr ʋ ɛ, nyɩ lɔb ʋ ƴãw baar[81].»