Read Dagara, Northern Eziptɩ tẽw yib 23 Bible Online

Eziptɩ tẽw yib 23 - Dagara, Northern bible

Eziptɩ tẽw yib 23

¹«Nyɩ ta mɩ́ ŋmɛ yele na bɛ ɩ sɩza a yaarɩ nɩ ɛ. Nyɩ ta mɩ́ dɩ dãsɩ-ziri kpɛ sãwna sob ɛ[82].

²Nyɩ ta mɩ́ tu a lɛ a nɩ-yaga na yel a, maalɩ a yel-faa ɩ. A ƴɛ̀rʋ zie mɩ̀ a, nyɩ taa dɩrɛ a dãsɩɛ tuur'ɩ a lɛ a nɩ-yaga na tɩ́ɛrɛ a ɩ, bɛlɛ wa tuur sɔ́r na bɛ tori a.

³Nyɩ ta mɩ́ ɩ a ɩb wul nyɩ na kpɛ bãbàal a ƴɛ̀rʋ-dɩb pʋɔ a ɩ[83].»

⁴«Nyɩmɛ wa nyɛ̃ a nyɩ dɔ̃ sob náab bɩɩ bõw ʋ bɔrɛ gʋɔr a, nyɩɩm kpa ʋ cen nɩ tɩ kʋ̀ ʋ.

⁵Nyɩmɛ wa nyɛ̃ a sob nɛ na hɩ̃ɛn nyɩ a bõw a tuor dĩ lɔb a, nyɩɩm ta bɛr ʋ a lɛ ɩ, nyɩ sõw ʋ k'ʋ ɩ a bõw ʋ ìr[84].»

⁶«Nyɩ kʋ̃ dɩ a ƴɛ̀rʋ a bɛ tori ɛ nyɩ kʋ̀ a bãbàal na zɛlɛ a nyɩ sõwfʋ a ɩ.

⁷Nyɩ ta cɛlɛ a ziri zie ɩ. Nyɩ taa kʋrɛ nɩr na bɛ tɛr sãwna a ɩ, nɩ nɩr na ɩ nɩ-mɩŋa a ɩ. Bʋ̃ʋ n'ʋ vɛ̃, a mãa Sore a, ɩ̃ bɛ kʋ̀rɛ yel-mɩŋa sãwna sob ɛ.

⁸Nyɩ taa sàwr bɛ ŋmɩɛr nyɩ nʋɔr ɛ, bʋ̃ʋ n'ʋ vɛ̃, a nʋɔr-ŋmɛb liwr'ɩ a bɛlɩ dem na nyɛrɛ a tɩ́ɛrʋ, ɛ́ mɩ́ ɩ a nɩ-vɩɛlɩ ƴɛ̀rʋ-dɩb a bɛ tori ɛ[85].»

⁹«Nyɩ taa ɩrɛ a kpɩɛr a nʋʋrɩ ɛ, a nyɩɩm tɛɛ za bãw nɩ a lɛ a nʋʋra nyɔ-vʋʋrʋ na ŋmɛ̃ a, nyɩ mɩ̀ na tɩ dãw ɩ nʋʋrɩ a Eziptɩ a ƴãw[86].»

¹⁰«Nyɩ na mɩ́ bʋ̀r'ɩ a nyɩ póru, ɛ́ cɛ̀ yome ayʋɔb tu taa.

¹¹Ɛcɛ a yome ayopõi sob a, nyɩ na bɛr'ɩ a tẽsɔw ʋ gã, nyɩ bɛ dier bom a ʋ pʋɔ ɩ. A nan dem a nyɩ pʋɔ na mɩ́ páw nɩ bʋ̃-dɩrɩ a be, ɛ́ a wɛ-dʋn mɩ̀ dɩ a al bɛ nãà wa baa bɛr a. A lɛ n'a nyɩ mɩ̀ na mɩ́ ɩ a nyɩ divɛ̃ tɩɩr póru nɩ a nyɩ olivʋ tɩɩr ƴãw[87].»

¹²«Nyɩ mɩ́ tõ a nyɩ tome bibie ayʋɔb, ɛcɛ a bibie ayopõi sob a, nyɩ ta mɩ́ tõ ton za ɩ, a nyɩ nĩi nɩ a nyɩ bòn pɩ̃ɛnɩ, ɛ́ a tõ-tõ-biir nɩ a nʋʋrɩ mɩ̀ tʋ̃ɔ́ mɩ́ vʋʋrɩ[88].»

¹³«Nyɩ cɛlɛ à á ŋá za zie ɩ̃ na yel kʋ̀ nyɩ a. Nyɩ taa puore ŋmɩn-yoru towtow ɛ. Bɛ taa wone nyɩ pore a yée mɩ̀ ɛ.»

¹⁴«Yũon za a, nyɩ na mɩ́ maal'ɩ cuw-bɛrɛ ata a ɩ̃ ƴãw.

¹⁵A dãw-niwn sob na ɩ n a dipɛ̃ na bɛ ƴãw dãbɩl a cuw: a Abɩb[89] cuw pʋɔ a, nyɩ na 'wɔbr'ɩ dipɛ̃ na bɛ ƴãw dãbɩl a bibie ayopõi ƴãw, mɛ̃ a lɛ ɩ̃ na yel kʋ̀ nyɩ a. Bʋ̃ʋ n'ʋ vɛ̃, a cuw ʋl pʋɔ n'a nyɩ yi a Eziptɩ. Nyɩ bɛ waar wa nyɛrɛ mɛ̃ nɩ nũ-zawlɛ ɩ.

¹⁶Al pùorí, nyɩ na maal'ɩ a Dàrʋ cuw, a lɛn daar nyɩ nãà wa dier a nyɩ póru nyɩ na kʋ́ɔr a bʋ̃-dan a. Ɛ́ a zie wa yi a, a ũo-yi-paala, nyɩ na maal'ɩ a Bʋ̃-dieri-deb cuw, nyɩmɛ wa de a nyɩ póru tome bome za baarɩ a.

¹⁷Yũon za a, a nyɩ nɩ-bʋʋrɛ dɛbr na mɩ́ wa n gb'a ata a ɩ̃ niŋé, a mãa Sore nyɩ Naaŋmɩn.»

¹⁸«Nyɩmɛ wa kʋrɛ dʋn maalɛ nɩ bàwr kʋ̀rɛ mɛ̃ a, nyɩ taa lãwnɛ nɩ dipɛ̃ na ƴãw dãbɩl a ɩ. Nyɩ ta bɛr a bàwr nɛn-kãánɩ a vɩɛ[90] bio ɛ.

¹⁹Nyɩ na wa n nɩ a nyɩ tẽsɔw bʋ̃-dan[91] wa kʋ̀ a mãa Sore nyɩ Naaŋmɩn, a ɩ̃ yir pʋɔ. Nyɩ kʋ̃ dʋw bʋle nɛn a ʋ mã bʋ̀rʋ pʋɔ ɩ.»

²⁰«Ɩ̃ na tõ n malkɩ ʋ de nyɩ niwn, ɛ́ gùre nyɩ a sɔ́r zu. Ʋ na tɛr nyɩ na tɩ ta n a tẽw ɩ̃ na cɔbrɩ bɛr nyɩ a.

²¹Nyɩ ƴãwnɛ ʋ, ɛ́ sàwr a ʋ nʋɔr. Nyɩ ta tɛr bɛ-wonu a ʋ zie ɩ, ʋ bɛ sàwr kʋ̀rɛ nyɩ a lɛ ɩ. Bʋ̃ʋ n'ʋ vɛ̃, a ɩ̃ yúor ƴãw n'a ʋ ɩrɛ.

²²Nyɩmɛ wa sàwr a ʋ nʋɔr vla a, nyɩmɛ wa ɩrɛ a lɛ za ɩ̃ na yel kʋ̀ nyɩ a, ɩ̃ na ɩ n a nyɩ dɔ̃ dem dɔ̃ sob, ɛ́ zɛbr'ɩ a bɛlɩ dem na zɛbr'ɩ nyɩ a.»

²³«A ɩ̃ malkɩ wa de nyɩ niwn tɛr nyɩ tɩ ta n a Amoritɩ mɩnɛ, a Hititɩ mɩnɛ, a Perizitɩ mɩnɛ, a Kanãa tẽw dem, a Hivitɩ mɩnɛ nɩ a Zebizitɩ mɩnɛ zie a, ɩ̃ na kʋ n a nɩ-bʋʋrɛ bɛ ŋa pàw pɛr.

²⁴A lɛn daar a, nyɩ taa gbine dume gũune tɩ tʋɔr tẽw puore a bɛ ŋmɩmɛ ɩ, nyɩ taa cɔwrɛ a lɛ bɛ na mɩ́ maalɩ a a ɩ. Nyɩ nɩ̃ɛ ŋmɛ a ŋmɩmɛ á ŋá dasuli ŋmɛr, ɛ́ ŋmɛ a kʋsɛ-teli[92] kar.

²⁵A mãa yõ, a Sore nyɩ Naaŋmɩn, mãa n'ʋ nyɩ na maalɛ. A lɛn daar a, ɩ̃ na maal'ɩ a nyɩ bʋ̃-dɩra nɩ a nyɩ bʋ̃-nyúura, ɛ́ ɩ a bàalʋ a taw zãá nɩ nyɩ.

²⁶Pɔw bɛ dɔwr sãwnɛ a nyɩ tẽw pʋɔ, bɩɩ ɩrɛ pɔw-ãan ɛ, ɩ̃ɩ na mɩ́ ɩ na nyɩ ta a nyɩ daar.»

²⁷«A nɩ-bʋʋr-yoru wa wõ kɛ́ nyɩ waar a a, dɛ̃bɩ̃ɛ na ɩrɛ bɛ na bɛ dɩ vuo ɩ. A nɩ-bʋʋrɛ bɛl za zie nyɩ nãà wa tarɛ a, ɩ̃ na dam bɛ na nyaw taa, ɛ́ a nyɩ dɔ̃ dem na lɩɛb'a zɔ.

²⁸Ɩ̃ mɩ̀ na ɩ n vurkperi[93] de nyɩ niwn tɩ diw a Hivitɩ mɩnɛ, a Kanãa tẽw dem nɩ a Hititɩ mɩnɛ bɛ zɔ, ɛ́ nyɩ wa bãw ta.

²⁹Ɛcɛ ɩ̃ bɛ diwr a nɩ-bʋʋrɛ bɛ ŋa yũon-been pʋɔ ɩ. Alɛ bɛ ɩ lɛ, a tẽw na lɩɛb'ɩ wɛ-kar a wɛ-dʋn na na paalɩ a, ɛ́ a na ɩ n a nyɩ màlʋ.

³⁰Bɩɛlbɩɛl'a ɩ̃ na diwr a nɩ-bʋʋrɛ bɛ ŋa a nyɩ niŋé, ɛ́ gù nyɩ wa tɩ yɛ̀r yãwmɛ so a tẽw.

³¹A nyɩ tẽw na tĩ nɩ a Bàa-kɛkɛɛ kʋ̃ɔ-kpɛ̃ɛ́ ɛ́ cen tɩ tɔ a Mediterane kʋ̃ɔ-kpɛ̃ɛ, ɛ́ lɛb yi a Sinayi wɛja-kpalɛ ƴãw ɛ́ tɩ tɔ a Efaratɩ man. Bʋ̃ʋ n'ʋ vɛ̃, a nɩbɛ na kpɩɛr a ziir á ŋá a, ɩ̃ na ƴãw bɛ nɩ a nyɩ nuru pʋɔ, nyɩ diw bɛ.

³²Nyɩ kʋ̃ maal'ɩ bɛ wõ-taa kãw za ɩ, ɛ́ mɩ̀ kʋ̃ maal'ɩ a bɛ ŋmɩmɛ ɩ.

³³Nyɩ kʋ̃ sàw bɛ kpɩɛr a nyɩ tẽw ɛ, bɛ nãà mab'a ɩ kɛ̀ nyɩ ɩ sãw mɛ̃. Bʋ̃ʋ n'ʋ vɛ̃, nyɩ nãà mab'a maalɛ a bɛ ŋmɩmɛ a ɩ bɛra pʋɔ nyɩ lo.»