Read Dagara, Northern Eziptɩ tẽw yib 28 Bible Online

Eziptɩ tẽw yib 28 - Dagara, Northern bible

Eziptɩ tẽw yib 28

¹«Moyiir i, ƴãw a fʋ yɛb Aarɔ̃ wa a fʋ zie, ʋlɛ n'ɩ a ʋ bidɛbr Nadavʋ, Avihu, Eleazaar nɩ Itamaar. Fʋ na bʋ́r bɛ na, bɛlɛ nɩ a Ɩsɩrayɛl nɩbɛ ŋmãa na cɛ a, bɛ ɩ bàwr-maalbɛ tone a ɩ̃ tome.

²Bɛ na sɛ n dɛpaal-kpar-son kʋ̀ a Aarɔ̃.

³A lɛ pʋɔ a, fʋ na ƴɛ̀r'ɩ a nuru-tõ-tonbɛ za ɩ̃ na kʋ̀ bãwfʋ yaga a zie, ɛ́ bɛ na sɛ n a kparɩ a Aarɔ̃ na na su a ʋ nũu-ka-ƴãwfʋ daar, nɩ a lɛn daar ʋ nãà mɩ́ wa tone a ʋ bàwr-maalɛ tome a.

⁴A kparɩ bɛ na na sɛ a n'ɩ á ŋá: a bàwr-maal-kara-nyãa-zu-zʋbɛ, a nyãa-kpale, a kpar-kpɛ̃ɛ-wogo, a kpali-mawra, a pɛn-kpawʋɔ nɩ a pɛn-kpawr. A fʋ yɛb Aarɔ̃ nɩ a ʋ bidɛbr na mɩ́ su a na a bɛ tome tob ƴãw.

⁵Píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ, lɛ̃ pɛn-vʋlvʋl nɩ salm-zɩɛ fomie n'a a pɛn-mawrɛ na de tõ n a tome.»

⁶«Nuru-tõ-tonbɛ na maal'ɩ a bàwr-maal-kara nyãa-kpale nɩ lɛ̃ fomi-kpɛn kpɛn na jɛr'ɩ píir-kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a, ɛ́ maw ʋ nɩ salm-zɩɛ fomie.

⁷Bɛ na ƴãw nɩ pɛn yaar ayi a nyãa-kpale nɛ́ɛ ƴãw, bɛ mɩ́ tʋ̃ɔ́ 'lẽ nɩ ʋ.

⁸A kpàwr na mɩ́ 'lẽ a nyãa-kpale a na sɛ na mɛr ʋ. Lɛ̃ fomi-kpɛn kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a, alɛ n'a bɛ mɩ̀ na maal'ɩ ʋ. Bɛ na maw ʋ na nɩ salm-zɩɛ fomie.

⁹Bɛ na de nɩ kʋsɛ-bi-nyɩlɩ[108] kãw bɛ na bʋɔlɛ kɔnalin a, bome ayi, wi a Zakɔb bidɛbr yée ƴãw:

¹⁰yée ayʋɔb a kʋsɛ-bi-dãw-niwn sob zu, yée ayʋɔb a ayi sob zu, mɛ̃ a lɛ bɛ na dɔw tu taa a.

¹¹Kʋsɛ-wire n'ʋ na wi a yée ƴãw a kʋsɛ-bie ayi zu, mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a. Al pùorí ʋ sawl'a sawlʋ ziir bɛ na maal'ɩ salm-zɩɛ a.

¹²Bɛ na ƴãw nɩ a kʋsɛbɛ ayi á ŋá a bàwr-maal-kara nyãa-kpale yaar zu, a ɩ cãà-bãwnɩ a Ɩsɩrayɛl nɩbɛ dɔwlʋ pie nɩ ayi maalʋ ƴãw. À ŋá n'a a Aarɔ̃ na mɩ́ tɛr a bɛ yée a ʋ bawŋmamɛ zu, a mãa Sore niŋé, ɩ̃ɩ na mɩ́ cãà na bãwnɩ nyɩ.

¹³A sawlʋ ziir ayi al na ɩ n salm-zɩɛ,

¹⁴ɛ́ bɛ 'lẽ salm-zɩɛ mɩŋa mɩŋa bãzɔlɩ ayi ƴãw, bãzɔlɩ bɛ na na maalɩ mɛ̃ miw-mini a.»

¹⁵«Nuru-tõ-tonbɛ na maal'ɩ a ƴɛ̀rʋ-dɩb nyãa-zu-zʋbɛ nɩ lɛ̃ fomi-kpɛn kpɛn, na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a, ɛ́ maw ʋ nɩ salm-zɩɛ fomie, mɛ̃ a bàwr-maal-kara nyãa-kpale a.

¹⁶A nyãa-zu-zʋbɛ ŋa na ɩ n ɓãgala, ɛ́ a lõboge sɛw taa, lõbowr za mɩ́ ɩ mɛtɩr-kʋba-bie lɩzɛr'ɩ anũu.

¹⁷Bɛ na ƴãw ʋ nɩ kʋsɛ-bi-nyɩlɩ gbɛlɛ anaar, ʋ vɩɛl: a gbɛ̀l-dãw-niwn sob kʋsɛ-bi-nyɩlɩ na ɩ n iribi, topaazʋ nɩ emerodɩ,

¹⁸a gbɛlɛ ayi sob ɩ girena, safɩɩr nɩ dɩamã,

¹⁹a gbɛlɛ ata sob ɩ yasɛ̃tɩ, agatɩ nɩ ametisɩ,

²⁰ɛ́ a gbɛlɛ anaar sob ɩ kirizolitɩ, konalin nɩ zasɩpʋ. Kʋsɛ-bi-nyɩla za na mɩ́ sawl'ɩ salm-zɩɛ bʋ̃-sawla pʋɔ.

²¹Bɛ na wi n a Zakɔb bidɛbr pie nɩ ayi been been yée ƴãw kʋsɛ-bir za zu, mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a. A kʋsɛ-bie pie nɩ ayi na ɩ n a Ɩsɩrayɛl nɩbɛ dɔwlʋ pie nɩ ayi bãwfʋ.»

²²«Bɛ na maal'ɩ bãzɔlɩ ayi nɩ salm-zɩɛ mɩŋa mɩŋa mɛ̃ mie bɛ na mĩ a, ƴãw a nyãa-zu-zʋbɛ ƴãw,

²³nɩ salm-zɩɛ bamɛ ayi bɛ na na ƴãw a nyãa-zu-zʋbɛ saa-zu gõgone ƴãw a.

²⁴Bɛ na 'lẽ nɩ a bãzɔlɩ ƴãw a nyãa-zu-zʋbɛ bamɛ ƴãw.

²⁵Bɛ na 'lẽ nɩ a bãzɔlɩ nɛ́ɛ ayi al na cɛ a ƴãw a kʋsɛ-bi-nyɩlɩ sawlʋ ziir ayi bɛ na maal'ɩ salm-zɩɛ a ƴãw, ɛ́ a be a bàwr-maal-kara nyãa-kpale yaar ƴãw, a nyãa-zu-zʋbɛ tʋ̃ɔ́ be niŋé.

²⁶Bɛ na maal'ɩ bãw-yoru ayi nɩ salm-zɩɛ ƴãw a nyãa-zu-zʋbɛ gõgone ayi na be a pile a ƴãw, a zʋbɛ lõbowr ʋl na tʋɔr a nyãa-kpale a ƴãw.

²⁷Bɛ na lɛb maal'ɩ bãw-yoru ayi nɩ salm-zɩɛ ƴãw a nyãa-kpale yaar ƴãw a pile nɩ a niŋé, a be bɛ na sɛ a ƴãw a. Bɛ na ƴãw nɩ a bamɛ á ŋá a nyãa-kpale kpàwr zu-sɔw.

²⁸Fomi-mina zɩɛ-mʋɔlɛ n'ʋ bɛ na ƴãw a nyãa-zu-zʋbɛ bamɛ ƴãw, nɩ a nyãa-kpale bamɛ ƴãw, ɩ a nyɔw taa a nyãa-kpale kpàwr zu, ɛ́ ta zaalɛ a ʋ zu ɛ.»

²⁹«À à ŋá n'a a Aarɔ̃ mɩ́ wa kpɩɛr a zi-sõw pʋɔ a, ʋ na mɩ́ tɛr'ɩ a ƴɛ̀rʋ-dɩb nyãa-zu-zʋbɛ a ʋ nyãa zu, nɩ a Ɩsɩrayɛl nɩbɛ dɔwlʋ yée, lɛ n'a a mãa Sore na mɩ́ cãà bãwnɩ nyɩ kʋralɛ.

³⁰A fʋ̃ʋ Moyiir, fʋ na ƴãw nɩ a kpan-bie[109] a ƴɛ̀rʋ-dɩb nyãa-zu-zʋbɛ pʋɔ, a tʋ̃ɔ́ mɩ́ be a Aarɔ̃ nyãa zu, a lɛn daar ʋ na na mɩ́ wa a ɩ̃ niŋé a. Bʋ̃ʋ n'ʋ vɛ̃, a na fɛr'a k'aa mɩ́ be a ʋ zie kʋralɛ, a lɛn daar ʋ nãà wa be a ɩ̃ niŋé a, ʋ tʋ̃ɔ́ mɩ́ bãw a lɛ ɩ̃ na bɔbr a Ɩsɩrayɛl nɩbɛ zie a.»

³¹«Bɛ na wob'ɩ a kpar-kpɛ̃ɛ-wogo ʋl a Aarɔ̃ na na mɩ́ su a nyãa-kpale dɔwlɩ a, nɩ píir kɔblʋ fomi-zɩɩr-mʋɔlɛ.

³²Bɛ na ƴãw nɩ a zu tob zie a sɔwlɩsɔw, ɛ́ wob a ʋ nʋɔr jɩɩrɩ koli, ʋ kpɛmɛ, taa cɩɛrɛ ɩ.

³³Bɛ na maal'ɩ a kparʋ pɛr nɩ dɛpaalʋ, maw tɩ-wɔmɛ kãw bɛ na bʋɔlɛ girenadɩ a nɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ ƴãw viiri koli. Bɛ mɩ̀ na ƴãw nɩ salm-zɩɛ gbelsɩ:

³⁴bɛ na mɩ́ ƴãw nɩ salm-zɩɛ gbelnyɛ̃, ƴãw girenadɩ tu, lɛb ƴãw gbelnyɛ̃, ɛ́ ƴãw girenadɩ tu, tɩ viiri koli nɩ.

³⁵A Aarɔ̃ na mɩ́ su n a kparʋ ŋa ʋlɛ wa tone a ʋ bàwr-maal-tome a. Ʋlɛ wa waar a ɩ̃ niŋé a zi-sõw pʋɔ bɩɩ ʋlɛ wa lɛbr yire a, bɛ na mɩ́ wone nɩ a gbelsɩ na ŋmɩɛr a. Lɛ n'a ʋ kʋ̃ kpi ɛ.»

³⁶«Bɛ na maal'ɩ pɩ̃ɛmɛ nɩ salm-zɩɛ mɩŋa mɩŋa, ʋ ɩ mɛ̃ tɩ-puuru a, ɛ́ bɛ wi ƴãw a ʋ zu kɛ́: “Sore bʋ̃-sora.” Bɛ na wi ʋ na mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a.

³⁷Bɛ na 'lẽ ʋ na nɩ fomi-mina na ɩ zɩɛ-mʋɔlɛ a, ƴãw a pɛn-kpawʋɔ niŋé.

³⁸A Aarɔ̃ na mɩ́ ƴãw nɩ a pɩ̃ɛmɛ ŋa kʋralɛ a ʋ gbẽé, a lɛn daar ʋ nãà wa waar a mãa Sore niŋé a. À ŋá n'a ɩ̃ na mɩ́ sàw de a Ɩsɩrayɛl nɩbɛ bʋ̃-son bɛ na na kʋ̀rɛ mɛ̃ a, bɛlɛ saa mɩ́ wa tuli a de-kʋ̀b tub pʋɔ a.»

³⁹«Bɛ na baa na wob a kpale nɩ lɛ̃ fomie, ɛ́ maalɩ a pɛn-kpawʋɔ nɩ lɛ̃ pɛn nɩ kpawr-mawra, a Aarɔ̃ ƴãw.»

⁴⁰«A Aarɔ̃ bidɛbr ƴãw a, bɛ mɩ̀ na sɛ n kpali-wowr-vɩɛlɩ vɩɛlɩ, kpàgɛ nɩ dɛpaal-kpawʋʋr.»

⁴¹«A fʋ̃ʋ Moyiir, fʋ na su n a kparɩ á ŋá a fʋ yɛb Aarɔ̃ nɩ a ʋ bidɛbr. Fʋ na cir'ɩ a kãá ƴãw bɛ a zuru ƴãw, ɛ́ ka a nũu ƴãw bɛ. À à ŋá n'a fʋ na maalɩ bɛ bɛ ɩ son, ɩ bàwr-maalbɛ tone a ɩ̃ tome.

⁴²Bɛ na sɛ n lɛ̃ pɛn tɔ̃tɔlɛ kʋ̀ bɛ bɛ mɩ́ pàw nɩ a bɛ faalʋ[110]. A na mɩ́ pàw nɩ a sɩɛ tɩ tɔ a gbɛbɛrɛ.

⁴³A Aarɔ̃ nɩ a ʋ bidɛbr na mɩ́ sɛ a na kpɛ n a tuor-taa pɛn-sɛw pʋɔ, bɩɩ taw pɩɛl'ɩ a bàwr-maal-kuur, a lɛn daar bɛ nãà mɩ́ wa tone a bàwr-maal-tome a zi-sõw pʋɔ a. Lɛ n'a bɛ kʋ̃ mɩ́ wul a bɛ faalʋ, kpi a al ƴãw ɛ. Nʋɔr'ʋ ƴãw gã kʋralɛ a Aarɔ̃ nɩ a ʋ bʋʋrɛ ƴãw.»