Read Dagara, Northern Eziptɩ tẽw yib 3 Bible Online

Eziptɩ tẽw yib 3 - Dagara, Northern bible

Eziptɩ tẽw yib 3

¹A Moyiir tɩ àrɛ nɩ nɩ a ʋ dɩɛm-sãà Zetoro[9] na ɩ a Madian tẽw bàwr-maalɛ a píir nɩ bʋʋr. Bibir kãw, ʋ tɩ kpa n a dʋn tɩ zuo nɩ a wɛja-kpalɛ bɛr ɛ́ tɩ ta n a Naaŋmɩn tãgɛ̃́, a Orɛb.

²A Sore malkɩ tɩ ɩ na a Moyiir nyɛ̃ ʋ a be, vũu-zɛl pʋɔ, tuwle sɔwlɩsɔw. A Moyiir tɩ nyɛ̃ nɩ a tuwle na nyɔw vũu dɩrɛ, ɛ́ bɛ dɩrɛ kabr a.

³Ʋ tɩ yel'a: «Ɩ̃ na bɩɛ na cen tɩ nyɛ̃ a nɔ-ɓãa-yel ŋa: bʋ̃ʋ n'ʋ so a tuwle bɛ dɩrɛ kabr?»

⁴A Sore tɩ nyɛ̃ ʋ na ʋ na bɩɛ k'ʋʋ tɩ bɛl kaa a. Lɛ n'a a Naaŋmɩn tɩ be a tuwle sɔwlɩsɔw, ɛ́ bʋɔl'ʋ: «Moyiir i! Moyiir i!» Ʋ sɔw: «Mãa n'ɩ ŋan!»

⁵A Sore yel: «Taa tawr pɩɛlɛ a ka ɩ! Yaa a fʋ nafawr bɛr, bʋ̃ʋ n'ʋ vɛ̃, zi-sõw pʋɔ n'ɩ a ka fʋ na àr a.

⁶Mãa n'ɩ a fʋ sãàkʋm-kore Naaŋmɩn, a Abraham Naaŋmɩn, a Ɩzaakɩ Naaŋmɩn, a Zakɔb Naaŋmɩn.» A Moyiir tɩ pàw nɩ a ʋ niwn, dɛ̃bɩ̃ɛ na tɩ ɩrɛ ʋ a Naaŋmɩn jɩ́rʋ ƴãw a zũú.

⁷A Sore tɩ yel'a: «Ɩ̃ nyɛ̃ nɩ a ɩ̃ nɩbɛ wʋ̀ʋr a Eziptɩ tẽw. Ɩ̃ wõ n a cɛlsɩ bɛ na dɔwrɛ bɛ bɛ ŋmɩɛr a. Ɩ̃ sɩrɩ na bãw a tuo bɛ na wone a.

⁸Lɛ so ɩ̃ siw wa k'ɩ̃ɩ wa faa bɛ a Eziptɩ tẽw dem nuru pʋɔ, ɛ́ ɩ bɛ yi a tẽw ŋa pʋɔ cen tẽw na vɩɛl ɛ́ yɛlmɛ a pʋɔ, tẽw bʋ̀rʋ nɩ sɩwr na gbɔlɛ[10] a, tẽw a Kanãa tẽw dem, a Hititɩ mɩnɛ, a Amoritɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ na kpɩɛr a.

⁹Bʋ̃ʋ n'ʋ vɛ̃, a Ɩsɩrayɛl nɩbɛ cɛlsɩ do na wa ta a ɩ̃ zie, ɩ̃ɩ mɩ̀ nyɛ̃ a lɛ a Eziptɩ tẽw dem na dɔwrɛ bɛ a.

¹⁰Ƴɛrɛŋa a, ɩ̃ tone fʋ nɩ a Faarawɔ̃ zie: cen tɩ ɩ a ɩ̃ nɩ-bʋʋrɛ, a Ɩsɩrayɛl nɩbɛ, bɛ yi a Eziptɩ tẽw pʋɔ[11].»

¹¹A Moyiir tɩ yel'ɩ a Naaŋmɩn: «Mãa mɩ̀ n'ɩ anʋ na cen Faarawɔ̃ zie, ɛ́ tɩ ɩ a Ɩsɩrayɛl nɩbɛ yi a Eziptɩ tẽw pʋɔ?»

¹²A Naaŋmɩn yel: «Ɩ̃ na be n a fʋ zie. Ɛ́ a bãwfʋ n'ɩ ŋa kɛ́ mãa n'ʋ tone fʋ: fʋ̃ʋ wa tɛr a nɩbɛ yi n a Eziptɩ tẽw pʋɔ a, nyɩ na maalɩ mɛ̃ nɩ a tãw ŋa zu.»

¹³A Moyiir tɩ yel'ɩ a Naaŋmɩn: «Nyɛ̃, ɩ̃ na cen nɩ a Ɩsɩrayɛl nɩbɛ zie tɩ yel bɛ: “A nyɩ sãàkʋm-kore Naaŋmɩn tõ m'ɩ a nyɩ zie.” Bɛlɛ wa sowre mɛ̃: “A ʋ yúor dɩ na kɛ́ bo?” Ɩ̃ sɔw kɛ́ bʋnʋ kʋ̀ bɛ?»

¹⁴A Naaŋmɩn tɩ yel'ɩ a Moyiir: «“Ɩ̃ Ɩ N A SOB NƐ Ɩ̃ NA Ɩ A[12].” Nyɛ̃ a lɛ fʋ na na tɩ yel kʋ̀ a Ɩsɩrayɛl nɩbɛ a: “Ɩ̃ BE NA tõ m'ɩ a nyɩ zie”.»

¹⁵Al pùorí fʋ yel ƴãw pʋɔ: “A Sore n'ʋ tõ m a nyɩ zie, a nyɩ sãàkʋm-kore Naaŋmɩn, a Abraham Naaŋmɩn, Ɩzaakɩ Naaŋmɩn nɩ Zakɔb Naaŋmɩn.” A ɩ̃ yúor'ɩ á ŋà kʋralɛ, ʋlɛ n'ʋ a nɩbɛ na dɔwr lɩɛrɛ taa a na mɩ́ bʋɔlɛ puore nɩ mɛ̃.

¹⁶Pãa cen tɩ bʋɔlɩ a Ɩsɩrayɛl nɩ-kore ɓã taa, ɛ́ yel bɛ: “A Sore, a nyɩ sãàkʋm-kore Naaŋmɩn, a Abraham Naaŋmɩn, Ɩzaakɩ Naaŋmɩn nɩ Zakɔb Naaŋmɩn, ɩ na k'ɩ̃ nyɛ̃ ʋ, ʋʋ yel mɛ̃: Ɩ̃ wa na wa nyɛ̃ nyɩ, ɛ́ nyɛ̃ a lɛ bɛ na ɩrɛ nyɩ a Eziptɩ a,

¹⁷ɛ́ yel: Ɩ̃ na ír nyɩ nɩ a Eziptɩ tẽw wʋ̀ʋr pʋɔ cen nɩ a Kanãa tẽw dem tẽw, a Hititɩ mɩnɛ, a Amoritɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ tẽw, tẽw bʋ̀rʋ nɩ sɩwr na gbɔlɛ a.”

¹⁸«A Ɩsɩrayɛl nɩbɛ na bɛr'a wõ a fʋ ƴɛ̀rʋ, ɛ́ fʋ na cen na, fʋ̃ʋ nɩ a nɩ-kore, a Eziptɩ tẽw nãà zie, nyɩ tɩ yel ʋ: “A Sore, a Ebre mɩnɛ Naaŋmɩn, ɩ na tɩ nyɛ̃ ʋ. Ƴɛrɛŋa a, a fɛr'a kɛ́ tɩ cen a wɛja-kpalɛ pʋɔ bibie ata, tɩ maalɩ bàwr kʋ̀ a Sore tɩ Naaŋmɩn.”

¹⁹Ɛcɛ ɩ̃ bãwnɩ a na a nãà na kʋ̃ sàw nyɩ cen, bɛlɛ bɛ wa fɛr ʋ a.

²⁰Lɛ so ɩ̃ na zɛw nũu ŋmɛ n a Eziptɩ, nɩ a nɔ-ɓãa-yele za ɩ̃ na na maalɩ a ʋ pʋɔ a. Al pùorí, a nãà na bɛr nyɩ na nyɩ cen.

²¹Ɩ̃ na ɩ na a Eziptɩ tẽw nɩbɛ pʋʋr pɛlɩ a nyɩ nɩbɛ zie. Lɛ so, nyɩmɛ wa cere a, nyɩ kʋ̃ cen nɩ nũ-zawlɛ ɩ.

²²A Ɩsɩrayɛl nɩbɛ pɔw za na zɛlɩ nɩ salm-pla nɩ salm-zɩɛ bome nɩ kparɩ a Eziptɩ tẽw pɔwbɛ na kpɩɛr a bɛ yie pʋɔ bɩɩ a bɛ sɩman pʋɔ a zie. Nyɩ na tuo a nɩ a nyɩ bidɛbr nɩ a nyɩ pɔwyaar. À ŋá n'a nyɩ na fà a Eziptɩ tẽw dem.»