Read Dagara, Northern Eziptɩ tẽw yib 33 Bible Online

Eziptɩ tẽw yib 33 - Dagara, Northern bible

Eziptɩ tẽw yib 33

¹A Sore tɩ yel'ɩ a Moyiir: «Nyɩ ìr lo a sɔ́r, nyɩ bɛr a zie ŋa, fʋ̃ʋ nɩ a nɩbɛ fʋ na ɩ bɛ yi a Eziptɩ a. Nyɩ cen a tẽw ʋl ɩ̃ na pɔ a Abraham, a Ɩzaakɩ nɩ a Zakɔb zie yel k'ɩ̃ɩ na kʋ̀ n a bɛ bʋʋrɛ a[122].

²Ɩ̃ na tõ n a ɩ̃ malkɩ ʋ de nyɩ niwn. Ɩ̃ na diw nɩ a Kanãa tẽw dem nɩ a Amoritɩ mɩnɛ, a Hititɩ mɩnɛ, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ.

³A na ɩ lɛ a, nyɩ cen a tẽw ŋa pʋɔ bʋ̀rʋ nɩ sɩwr na gbɔlɛ a[123]. Ɛcɛ a mãa mɩŋa kʋ̃ bɩɛlɛ nyɩ ɛ. A nyɩ zuru kpɛmɛ na zuo, ɩ̃ nãà mab'a kʋ nyɩ pàw pɛr a sɔ́r zu.»

⁴A nɩbɛ na tɩ wõ a ƴɛ̀r-bi-kpɛn á ŋá a, pʋ-sãwna tɩ tɛr bɛ na. Nɩr za bɛ tɩ sàw ƴãw a ʋ pɩ̃ɛmɛ ɩ.

⁵A Sore tɩ yel'ɩ a Moyiir: «Yel a Ɩsɩrayɛl nɩbɛ: “Nɩ-bʋʋrɛ a zuru na kpɛmɛ a n'ɩ nyɩ. Mãa yel k'ɩ̃ɩ bɩɛlɩ nyɩ zaa pʋrɩ a, ɩ̃ nãà mab'a kʋ nyɩ pàw pɛr. A na ɩ lɛ a, nyɩ yaarɩ a nyɩ pɩ̃ɛmɛ bɛr, ɩ̃ɩ na nyɛ̃ nɩ a lɛ ɩ̃ na na ɩ nyɩ a pùorí a”.»

⁶A Orɛb tãgɛ̃́ n'a a Ɩsɩrayɛl nɩbɛ tɩ tĩ bɛ cãà ƴãwnɛ a bɛ pɩ̃ɛmɛ ɩ.

⁷Bɛlɛ wa maalɛ a pɛnɛ-sɛwr a, a Moyiir mɩ́ de nɩ a pɛn-sɛw-sõw yi n tɩ maalɩ zãá nɩ a pɛnɛ-sɛwr. Bɛ tɩ bʋɔlɛ ʋ nɩ kɛ́ «Tuor-taa pɛn-sɛw». Bɛlɩ dem za na mɩ́ tɩ bɔbr kɛ́ bɛ sowri a Sore bãw bom a, bɛ mɩ́ tɩ yi n a pɛnɛ-sɛwr pʋɔ cen a pɛn-sɛw ŋa pɛr.

⁸A Moyiir wa n'ʋ cere a be a, a nɩbɛ za mɩ́ tɩ ìr'a àr! Ŋa za mɩ́ tɩ àr'ɩ a ʋ pɛn-sɛw dɩ̃dɔrɩ́, ɛ́ jɩ́rɛ a Moyiir, ʋ tɩ kpɛ a pɛn-sɛw-sõw pʋɔ.

⁹A Moyiir mɩ́ wa kpɛ a pɛn-sɛw pʋɔ baarɩ a, a zũzuwr[124] kpul mɩ́ siw na bà a pɛn-sɛw dɩ̃dɔr nʋɔr, ɛ́ a Sore ƴɛ̀rɛ nɩ a Moyiir.

¹⁰A nɩbɛ za mɩ́ tɩ nyɛ̃ nɩ a zũzuwr kpul na bà àr a pɛn-sɛw dɩ̃dɔr nʋɔr a. Ŋa za mɩ́ tɩ gbĩ n dume gũu tɩ tɔ tẽw a ʋ pɛn-sɛw dɩ̃dɔr nʋɔr.

¹¹A Sore mɩ́ tɩ ƴɛ̀rɛ nɩ nɩ a Moyiir, bɛ tori taa mɛ̃ nɩsaal na ƴɛ̀rɛ nɩ ʋ nɩsaal-tɔ a. Al pùorí, a Moyiir mɩ́ tɩ lɛb'a wa a pɛnɛ-sɛwr pʋɔ, ɛ́ a ʋ tõ-tõ-bi-pɔl Zozue na ɩ Nun bidɛb a mɩ́ be a pɛn-sɛw-sõw pʋɔ kʋralɛ.

¹²A Moyiir tɩ yel'ɩ a Sore: «Nyɛ̃, Sore e! Fʋ̃ʋ n'ʋ yel mɛ̃ k'ɩ̃ɩ tɛr a nɩbɛ bɛ ŋa, ɛcɛ fʋ bɛ ɩ ɩ̃ bãw a sob nɛ fʋ na na tõ ʋ wa sõwne mɛ̃ a ɩ. Ɛcɛ fʋ̃ʋ n'ʋ yel mɛ̃: “Ɩ̃ bãw fʋ na pɩɩrɩ” nɩ kɛ́: “Ɩ̃ pʋɔ pɛlɩ nɩ a fʋ ƴãw.”

¹³Ƴɛrɛŋa a, a fʋ pʋɔ wa sɩrɩ pɛlɩ a ɩ̃ ƴãw a, fʋ̃ʋ ɩ k'ɩ̃ bãw a lɛ fʋ na tɩɛrɩ kɛ́ fʋ ɩ a. Lɛ n'a ɩ̃ na sɩrɩ bãw fʋ, ɛ́ nyɛ̃ a fʋ pʋ-pɩɛlʋ maalʋ. Mɩ̀ cãà bãwnɩ a a nɩbɛ bɛ ŋa na ɩ a fʋ nɩ-bʋʋrɛ a.»

¹⁴A Sore tɩ sɔw nɩ a Moyiir: «Mãa mɩŋa na wa na! Fʋ kʋ̃ dɩ tuo bàlɛ fʋ tʋɔra ɩ.»

¹⁵A Moyiir lɛb yel: «Fʋ̃ʋ mɩŋa bɛ wa waar a, fʋ̃ʋ ta yel kɛ́ tɩ bɛr a zie ŋa ɩ.

¹⁶Bʋ̃ʋ n'ʋ vɛ̃, fʋ̃ʋ bɛ wa bɩɛlɛ tɩ a, ŋmɩŋmɩn n'a a nɩbɛ na bãw k'aa fʋ pʋɔ pɛlɩ nɩ a mãa nɩ a fʋ nɩ-bʋʋrɛ ƴãw? A ʋlɩ bom nɛ na na ɩ kɛ̀ tɩɩm nɩ a tẽw zu nɩ-bʋʋrɛ za bɛ ɩ been a, ʋlɛ n'ɩ fʋ na na bɩɛlɛ a mãa nɩ a fʋ nɩ-bʋʋrɛ a.»

¹⁷A Sore tɩ sɔw nɩ a Moyiir: «Ɩ̃ na ɩ n a lɛ fʋ na yel a ƴɛrɛŋa a, bʋ̃ʋ n'ʋ vɛ̃, ɩ̃ pʋɔ pɛlɩ nɩ a fʋ ƴãw, ɩ̃ɩ bãw fʋ pɩɩrɩ.»

¹⁸Lɛ n'a a Moyiir tɩ yel a Sore: «Ɩ̃ zɛlɛ fʋ na, ɩ k'ɩ̃ nyɛ̃ a fʋ yúor-vɩɛlʋ-danʋ.»

¹⁹A Sore sɔw: «Ɩ̃ na tɔl'ɩ a fʋ niŋé, ɩ fʋ nyɛ̃ a ɩ̃ maalʋ za, ɛ́ bʋɔlɩ a ɩ̃ yúor ŋa: “A Sore.” Ɩ̃ na zɔ n sob nɛ nɩbaalʋ ɩ̃ na bɔbr a, ɛ́ tɛr su-ɓaarʋ sob nɛ zie ɩ̃ na bɔbr a[125].»

²⁰Ʋ tɩ yel'a ƴãw pʋɔ: «Fʋ kʋ̃ tʋ̃ɔ́ nyɛ̃ a ɩ̃ niwn ɛ. Bʋ̃ʋ n'ʋ vɛ̃, nɩsaal za kʋ̃ tʋ̃ɔ́ nyɛ̃ a ɩ̃ niwn ɛ́ cãà vʋʋrɛ ɩ.»

²¹A Sore tɩ cãà na yel: «Zie n'ɩ ŋan na pɩɛlɩ mɛ̃ a, fʋ na àr'ɩ a pìir zu.

²²A ɩ̃ yúor-vɩɛlʋ-danʋ wa tɔlɛ a lɛn daar a, ɩ̃ na sɔwlɩ fʋ nɩ a pìir bɔw pʋɔ, ɛ́ piw fʋ tɛr nɩ a ɩ̃ nũu, ɛ́ gù ɩ̃ wa tɩ tɔl baarɩ.

²³Al pùorí, ɩ̃ na ír'ɩ a ɩ̃ nũu, ɛ́ fʋ nyɛ̃ a ɩ̃ zikur, nɩr na bɛ nyɛrɛ a ɩ̃ niwn a ƴãw.»