Read Dagara, Northern Eziptɩ tẽw yib 39 Bible Online

Eziptɩ tẽw yib 39 - Dagara, Northern bible

Eziptɩ tẽw yib 39

¹Bɛ tɩ sɛ n dɛpaal-kparɩ a zi-sõw pʋɔ tome tob ƴãw, ɛ́ sɛ a Aarɔ̃ kpar-son. Bɛ tɩ sɛ a na nɩ píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ, mɛ̃ a lɛ a Sore na tɩ yel kʋ̀ a Moyiir a.

²Bɛ tɩ sɛ n a bàwr-maal-kara nyãa-kpale nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ a, ɛ́ tɩ maw ʋ nɩ salm-zɩɛ fomie.

³Salm-zɩɛ bɛ na ŋmɛ ʋ tɩ ɩ ɓɛrɓɛr mɛ̃ váar a, ʋlɛ n'ʋ bɛ tɩ ŋma zaa bàali bàali, pɛn-mawrbɛ de jɛr'ɩ píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ nɩ lɛ̃ fomie.

⁴Bɛ tɩ sɛ n yaar ayi ƴãw a nyãa-kpale nɛ́ɛ ƴãw, kɛ́ bɛ mɩ́ tʋ̃ɔ́ 'lẽ nɩ ʋ.

⁵A nyãa-kpale pɛn-kpawr bɛ na sɛ n a fomi-been a tɩ sɛ na mɛr ʋ a lãw taa, mɛ̃ a lɛ a Sore na tɩ yel kʋ̀ a Moyiir a.

⁶Bɛ tɩ cɔbr'ɩ a konalin kʋsɛ-bi-nyɩlɩ ayi sawlɩ a sawlʋ ziir bɛ na maal'ɩ salm-zɩɛ a. Bɛ tɩ wi n a Zakɔb bidɛbr yée ƴãw a kʋsɛ-bi-nyɩlɩ á ŋá zu, mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a.

⁷Bɛ tɩ ƴãw a nɩ a nyãa-kpale yaar zu, a ɩ cãà-bãwnɩ a Ɩsɩrayɛl nɩbɛ dɔwlʋ pie nɩ ayi maalʋ ƴãw, mɛ̃ a lɛ a Sore na tɩ yel kʋ̀ a Moyiir a.

⁸Nuru tõ-tonbɛ tɩ maal'ɩ a nyãa-zu-zʋbɛ nɩ lɛ̃ fomi-kpɛn na jɛr'ɩ píir kɔblʋ pɛn-zɩɩr-mʋɔlɛ, pɛn-zɩɩr-kãbala nɩ pɛn-zɩɩr-ɓõɓõ a, ɛ́ maw ʋ nɩ salm-zɩɛ fomie, mɛ̃ a nyãa-kpale a.

⁹Bʋ̃-zʋbɛ a lõboge na sɛw taa a tɩ n'ʋ. Lõbowr za mɩ́ tɩ n mɛtɩr-kʋba-bie lɩzɛr'ɩ anũu.

¹⁰Bɛ tɩ ƴãw ʋ nɩ kʋsɛ-bi-nyɩlɩ gbɛlɛ anaar pɩ̃ɛmɛ: a gbɛ̀l-dãw-niwn sob kʋsɛ-bi-nyɩlɩ tɩ ɩ n iribi, topaazʋ nɩ emerodɩ,

¹¹a gbɛlɛ ayi sob ɩ girena, safɩɩr nɩ dɩamã,

¹²a gbɛlɛ ata sob ɩ yasɛ̃tɩ, agatɩ nɩ ametisɩ,

¹³ɛ́ a gbɛlɛ anaar sob ɩ kirizolitɩ, konalin nɩ zasɩpʋ. Kʋsɛ-bi-nyɩla za tɩ sawlɩ nɩ salm-zɩɛ bʋ̃-sawla pʋɔ.

¹⁴Bɛ tɩ wi n a Zakɔb bidɛbr pie nɩ ayi yée ƴãw a kʋsɛbɛ zu, mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a: a kʋsɛ-bi-nyɩlɩ tɩ ɩ n a Ɩsɩrayɛl nɩbɛ dɔwlʋ pie nɩ ayi bãwfʋ.

¹⁵A nyãa-zu-zʋbɛ ƴãw a, bɛ tɩ maal'ɩ bãzɔlɩ ayi nɩ salm-zɩɛ mɩŋa mɩŋa, mɛ̃ mie bɛ na mĩ a,

¹⁶ɛ́ maalɩ sawlʋ ziir ayi nɩ bamɛ ayi nɩ salm-zɩɛ, ƴãw a nyãa-zu-zʋbɛ saa-zu gõgone ƴãw.

¹⁷Bɛ tɩ 'lẽ nɩ a bãzɔlɩ ƴãw a nyãa-zu-zʋbɛ bamɛ ƴãw.

¹⁸Bɛ tɩ 'lẽ nɩ a bãzɔlɩ nɛ́ɛ ayi al na cɛ a ƴãw a sawlʋ ziir ayi ƴãw bɛ na maal'ɩ salm-zɩɛ, ɛ́ a be a nyãa-kpale yaar zu a, k'aa nyãa-zu-zʋbɛ tʋ̃ɔ́ be niŋé.

¹⁹Bɛ tɩ maal'ɩ salm-zɩɛ bãw-yoru ayi ƴãw a nyãa-zu-zʋbɛ gõgone ayi na be a pile a ƴãw, a zʋbɛ lõbowr ʋl na tʋɔr a nyãa-kpale a ƴãw.

²⁰Bɛ tɩ lɛb'a maalɩ salm-zɩɛ bãw-yoru ƴãw a nyãa-kpale yaar ƴãw, a pile nɩ a niŋé, a be bɛ na sɛ a ƴãw a. Bɛ tɩ ƴãw nɩ a bamɛ á ŋá a nyãa-kpale pɛn-kpawr zu-sɔw.

²¹Bɛ tɩ ƴãw nɩ fomi-mina zɩɛ-mʋɔlɛ a nyãa-zu-zʋbɛ bamɛ ƴãw, nɩ a nyãa-kpale bamɛ ƴãw, ɩ a nyɔw taa. Lɛ n'a a nyãa-zu-zʋbɛ mɩ́ tɩ gã a nyãa-kpale pɛn-kpawr zu, ɛ́ bɛ zaalɛ a nyãa-kpale zu ɛ, mɛ̃ a lɛ a Sore na tɩ yel kʋ̀ a Moyiir a.

²²A kpar-wogo ʋl zu a Aarɔ̃ na mɩ́ su a nyãa-kpale dɔwlɩ a, bɛ tɩ wob'ɩ ʋ za nɩ píir kɔblʋ fomi-zɩɩr-mʋɔlɛ.

²³Bɛ tɩ ƴãw nɩ vʋɔr a sɔwlɩsɔw a zu tob ƴãw, ɛ́ wob a vʋɔr nʋɔr viiri koli ʋ kpɛmɛ, taa cɩɛrɛ ɩ.

²⁴Bɛ tɩ maal'ɩ a kparʋ pɛr nɩ dɛpaalʋ, ƴãw tɩ-wɔmɛ kãw bɛ na bʋɔlɛ girenadɩ, ɛ́ bɛ maal'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala, fomi-zɩɩr-ɓõɓõ nɩ lɛ̃ fomi-kpɛn a viiri koli.

²⁵Bɛ tɩ maal'ɩ salm-zɩɛ mɩŋa mɩŋa gbelsɩ mɩ̀ ƴãw a kparʋ pɛr ƴãw viiri koli, a girenadɩrɩ cara pʋɔ.

²⁶Bɛ mɩ́ tɩ ƴãw nɩ salm-zɩɛ gbelnyɛ̃, ɛ́ ƴãw girenadɩ tu, lɛb ƴãw gbelnyɛ̃, ɛ́ ƴãw girenadɩ tu, tɩ viiri koli nɩ a bàwr-maal-tome kparʋ ŋa, mɛ̃ a lɛ a Sore na tɩ yel kʋ̀ a Moyiir a.

²⁷Nuru tõ-tonbɛ tɩ cãà na lɛb wob lɛ̃ pɛn-kpali a Aarɔ̃ nɩ a ʋ bidɛbr ƴãw.

²⁸Bɛ mɩ̀ tɩ wob'ɩ zu-pɛn-vili nɩ a lɛ̃ pɛn, a lɛ̃ pɛn a dɛpaal-kpawʋʋr ƴãw nɩ lɛ̃ fomi-kpɛn tɔ̃tɔlɛ.

²⁹Bɛ tɩ wob'ɩ a pɛn-kpawr-mawra nɩ lɛ̃ fomi-kpɛn na jɛr'ɩ píir kɔblʋ fomi-zɩɩr-mʋɔlɛ, fomi-zɩɩr-kãbala nɩ fomi-zɩɩr-ɓõɓõ, mɛ̃ a lɛ a Sore na tɩ yel kʋ̀ a Moyiir a.

³⁰Bɛ tɩ baa na maalɩ a bãwfʋ na ɩ sõw a, a salm-zɩɛ mɩŋa mɩŋa pɩ̃ɛmɛ na ɩ mɛ̃ tɩ-puuru a, a ʋl zu bɛ na wi ƴãw “A Sore so ʋ”, mɛ̃ a lɛ bɛ na mɩ́ wi nɩr ŋmaarʋ-bʋ̃-ƴãwna a.

³¹Bɛ tɩ 'lẽ ʋ na nɩ fomi-mina zɩɛ-mʋɔlɛ ƴãw a pɛn-kpawʋɔ niŋé, mɛ̃ a lɛ a Sore na tɩ yel kʋ̀ a Moyiir a.

³²À ŋá n'a a tome za na càarɩ a tuor-taa pɛn-sɛw nɩ a zi-sõw a tɩ baarɩ. A Ɩsɩrayɛl nɩbɛ tɩ maal'ɩ a lɛ tɔr za a Sore na tɩ yel kʋ̀ a Moyiir a.

³³A Ɩsɩrayɛl nɩbɛ tɩ de nɩ a zi-sõw bome za wa n a Moyiir zie: — a pɛn-sɛw nɩ a ʋ kpɛ̃kpɛrsɩ: bʋ̃-cawrɩ, dà-tɩɛrɩ, dà-garjɩrɩ, kpule nɩ a dɔwlʋ ziir,

³⁴— a bʋ̃-pàwra na maal'ɩ pʋ́rɩ gan-zɩɩr a, a bʋ̃-pàwra na maal'ɩ gan-kpɛn a, a ziir bʋ́rʋ pɛn-yawla,

³⁵a wõ-taa kʋsɛ-pamɛ daga nɩ a ʋ dàar nɩ a ʋ nɔ-pàwra,

³⁶— a tabal-sõw nɩ a ʋ kpɛ̃kpɛrsɩ nɩ a dipɛ̃ bɛ na de kʋ̀ a Naaŋmɩn a,

³⁷— a fɩ̃tɩlɩ dɔwlʋ zie bɛ na maal'ɩ salm-zɩɛ mɩŋa mɩŋa a, nɩ a ʋ fɩ̃tɩlɩ na pɩɛrɩ a, a ʋ kpɛ̃kpɛrsɩ nɩ a kãá a fɩ̃tɩlɩ ƴãw,

³⁸— a salm-zɩɛ bàwr-maal-kuur, a nũu-ka-ƴãwfʋ kãá, a parfɛ̃ bɛ na na mɩ́ nyɩw a, — a pɛn-sɛw dɩ̃dɔr pɛn-yawla,

³⁹— a kur-zɩɛ bàwr-maal-kuur nɩ a ʋ kur-zɩɛ mɩ̃ɛ, a ʋ dàar nɩ a ʋ kpɛ̃kpɛrsɩ, — a dɛwr-so-bɛrʋ kur-zɩɛ-dʋw nɩ a ʋ dɔwlʋ zie,

⁴⁰— a davʋra pɛnɛ nɩ a kpule nɩ a dɔwlʋ ziir, lãwnɩ a davʋra dɩ̃dɔr pɛn-yawla, nɩ a ʋ mie nɩ a ʋ kpawbie, — a zi-sõw tõ-tõ-bome za a tuor-taa pɛn-sɛw ƴãw,

⁴¹— a dɛpaal-kparɩ a zi-sõw pʋɔ tome tob ƴãw, — a bàwr-maal-kara Aarɔ̃ kpar-son nɩ a kparɩ a na tɩ fɛrɛ k'aa ʋ bidɛbr mɩ́ su tone nɩ a bɛ bàwr-maal-tome a.

⁴²A Ɩsɩrayɛl nɩbɛ tɩ tõ n a tome á ŋá za mɛ̃ a lɛ a Sore na tɩ yel kʋ̀ a Moyiir a.

⁴³A Moyiir na wa nyɛ̃ bɛ tõ a tome za mɛ̃ a lɛ tɔr za a Sore na tɩ yel a, ʋ ƴɛ̀r'ɩ nɔ-vla ƴãw a Ɩsɩrayɛl nɩbɛ.