Read Dagara, Northern Eziptɩ tẽw yib 8 Bible Online

Eziptɩ tẽw yib 8 - Dagara, Northern bible

Eziptɩ tẽw yib 8

¹A Sore tɩ cãà na yel a Moyiir: «Yel a Aarɔ̃ k'ʋʋ dɔl a nũu, ɛ́ tùr a ʋ dabɔl cɔw a bàrʋ, a fʋɔlɩ bɛ na wɛr a nɩ a gbãtarɩ, ɩ a lɔn yi pàw a Eziptɩ tẽw za.»

²A Aarɔ̃ tɩ dɔl'ɩ a ʋ nũu cɔw a Eziptɩ tẽw kʋ̃ɔnɩ. Lɔn tɩ yi n a pʋɔ paalɩ pàw a tẽw.

³Ɛcɛ a Eziptɩ tẽw tɩtɩlbɛ tɩ ɩ n a bɛ tɩtɩblʋ, maalɩ a lɛ mɩ̀: bɛ tɩ ɩ na a lɔn yi pàw a tẽw.

⁴A Faarawɔ̃ tɩ bʋɔl'ɩ a Moyiir nɩ a Aarɔ̃ wa yel bɛ: «Nyɩ zɛlɩ a Sore ʋ diw a lɔn á ŋá bɛr mãa nɩ a ɩ̃ nɩbɛ, ɩ̃ɩ na bɛr'ɩ a Ɩsɩrayɛl nɩbɛ bɛ cen tɩ maalɩ a bàwr kʋ̀ ʋ.»

⁵A Moyiir tɩ sɔw na yel: «Sàw yel kʋ̀ m, debor'a ɩ̃ na puori a Naaŋmɩn fʋ̃ʋ nɩ a fʋ tõ-tõ-nɩ-bɛrɛ nɩ a fʋ nɩbɛ za ƴãw, a lɔn ta cãà be a fʋ zie, a fʋ yie pʋɔ, ɛ́ be a Nɩl yõ pʋɔ?»

⁶A nãà sɔw: «Bio.» A Moyiir yel: «Ɩ̃ na ɩ na mɛ̃ a lɛ fʋ na zɛlɩ a, fʋ tʋ̃ɔ́ bãw kɛ́ nɩr bɛ ŋmɛ̃ taa nɩ a Sore tɩ Naaŋmɩn ɛ.

⁷A lɔn na cen na kɛ́ bɛr fʋ, ɛ́ bɛr a fʋ yie, a fʋ tõ-tõ-nɩ-bɛrɛ nɩ a fʋ nɩbɛ. A Nɩl yõ pʋɔ n'a a na cãà be.»

⁸A Moyiir nɩ a Aarɔ̃ tɩ yi n a Faarawɔ̃ zie. A Moyiir tɩ zɛlɩ nɩ a Sore k'ʋʋ faa a Faarawɔ̃ ʋ na dɔwr'ɩ a lɔn a.

⁹A Sore tɩ ɩ n a lɛ a Moyiir na zɛlɩ a: a lɔn tɩ kpi n a yie pʋɔ, a davʋrɩ pʋɔ nɩ a póru pʋɔ.

¹⁰Bɛ tɩ wob'a na ɓã ɓã taa a bɛ dɩ vuo ɩ, ɛ́ a tɩ nyu pàw a tẽw za.

¹¹A Faarawɔ̃ na tɩ nyɛ̃ a yele ŋmɛ pɩɛlʋ a, ʋ tɩ lɛb'a kpãa tobr bɛ bɛr wõ a Moyiir nɩ a Aarɔ̃ ɛ, mɛ̃ a lɛ a Sore na tɩ yel a.

¹²A Sore tɩ yel'ɩ a Moyiir: «Yel a Aarɔ̃ k'ʋʋ zɛw a ʋ dabɔl ŋmɛ n a tẽsɔw uuru a lɩɛbɩ dʋn[23] pàw a Eziptɩ tẽw za.»

¹³A Moyiir nɩ a Aarɔ̃ tɩ ɩ n a lɛ: a Aarɔ̃ tɩ zɛw nɩ a nũu ɛ́ ŋmɛ a tẽsɔw uuru nɩ a ʋ dabɔl. A uuru tɩ lɩɛb'ɩ dʋ̃-dʋnɩ mɛ pàw a nɩbɛ nɩ a dʋn za. A tẽsɔw uuru tɩ lɩɛb'ɩ dʋn a Eziptɩ tẽw za pʋɔ.

¹⁴A Eziptɩ tẽw tɩtɩlbɛ tɩ ɩ n a bɛ tɩtɩblʋ, bɔbr kɛ́ bɛ diw a dʋn, ɛ́ bɛ tɩ tʋ̃ɔ́ ɩ. A dʋ̃-dʋnɩ tɩ mɛ na pàw a nɩbɛ nɩ a dʋn.

¹⁵Lɛ n'a a tɩtɩlbɛ tɩ yel a Faarawɔ̃: «Naaŋmɩn fãw ton n'ɩ a yel ŋa[24]!» Ɛcɛ, mɛ̃ a lɛ a Sore na tɩ yel a, a Faarawɔ̃ tɩ kpãa nɩ tobr bɛ bɛr wõ a Moyiir nɩ a Aarɔ̃ ɛ.

¹⁶A Sore tɩ yel'ɩ a Moyiir: «Dãwnɩ ìru a bio cen a Faarawɔ̃ niŋé, a lɛn daar ʋ na siwr a man nʋɔr a. Tɩ yel ʋ: “À ŋá n'a a Sore ƴɛ̀rɛ: Bɛr a ɩ̃ nɩbɛ bɛ cen tɩ maalɩ mɛ̃.

¹⁷Fʋ̃ʋ bɛ wa bɛrɛ bɛ bɛ cere a, ɩ̃ na ɩ na nakpon wa a fʋ ƴãw, a fʋ tõ-tõ-nɩ-bɛrɛ nɩ a fʋ nɩbɛ ƴãw, ɛ́ wa a fʋ yie pʋɔ. A nakpon na paal'ɩ a Eziptɩ tẽw dem yie, ɛ́ pàw a tẽsɔw za.

¹⁸Ɛcɛ a ʋlɩ bibir nɛ a, a na ɩ n a tʋɔra a Gosɛn[25] vuo ƴãw, a be a ɩ̃ nɩbɛ na kpɩɛr a: bɛ kʋ̃ nyɛ̃ nakpõw been kãw za a be ɩ. À ŋá n'a fʋ na bãw k'aa mãa, a Sore, ɩ̃ be n a fʋ tẽw pʋɔ.

¹⁹Ɩ̃ na tu n faafʋ tub kãw, bʋ́r a ɩ̃ nɩbɛ nɩ a fʋ nɩbɛ. Bio n'a a nɔ-ɓãa-yel ŋa na maalɩ.”»

²⁰A Sore tɩ ɩ n a lɛ ʋ na yel a: nakpon tɩ kpɛ na paalɩ a Faarawɔ̃ yir, a ʋ tõ-tõ-nɩ-bɛrɛ yie, ɛ́ paalɩ a Eziptɩ tẽw za. A nakpon tɩ sãw nɩ a tẽw bɛr.

²¹A Faarawɔ̃ tɩ bʋɔl'ɩ a Moyiir nɩ a Aarɔ̃ wa yel bɛ: «Nyɩ cen tɩ maalɩ a bàwr kʋ̀ a nyɩ Naaŋmɩn, ɛcɛ a ɩ a tẽw pʋɔ ka!»

²²A Moyiir tɩ sɔw na: «Aɩ, tɩ kʋ̃ tʋ̃ɔ́ ɩ à à ŋá ɩ. Bʋ̃ʋ n'ʋ vɛ̃, a Eziptɩ tẽw dem bɛ nɔnɛ a tɩ bàwr tɩ na mɩ́ maalɩ kʋ̀ a Sore tɩ Naaŋmɩn a ɩ. Bɛlɛ ɩ mɛ̃ bɛ nyɛ̃ tɩ na tɩ maalɛ a bagɛ á ŋá taabɛ a, bɛ kʋ̃ lɔb'ɩ tɩ kʋsɛbɛ ɩ?

²³Bibie ata n'a tɩ na cen a wɛja-kpalɛ pʋɔ tɩ maal a bàwr kʋ̀ a Sore tɩ Naaŋmɩn, mɛ̃ a lɛ ʋ na na yel kʋ̀ tɩ a.»

²⁴A Faarawɔ̃ tɩ yel'a: «Ɩ̃ na bɛr nyɩ na nyɩ cen tɩ maal a bàwr kʋ̀ a Sore nyɩ Naaŋmɩn, a wɛja-kpalɛ pʋɔ. Ɛcɛ nyɩ taa cere zãánɛ zuo ɩ, ɛ́ nyɩ puori kʋ̀ m.»

²⁵A Moyiir sɔw: «Mãa wa yire a fʋ zie wa báarɛ a, ɩ̃ na puor'ɩ a Sore. Bio, ʋ na diw nɩ a nakpon á ŋá bɛr fʋ̃ʋ nɩ a fʋ tõ-tõ-nɩ-bɛrɛ nɩ a fʋ nɩbɛ. Ɛcɛ a fɛr'a kɛ́ fʋ ta cãà ɩrɛ tɩ laar, bɛ sàwr a Ɩsɩrayɛl nɩbɛ na cen tɩ maal a bàwr kʋ̀ a Sore ɩ.»

²⁶A Moyiir tɩ yi n a Faarawɔ̃ zie tɩ puori a Sore.

²⁷A Sore tɩ ɩ n a lɛ a Moyiir na zɛlɛ ʋ a: ʋ tɩ diw nɩ a nakpon za bɛr a Faarawɔ̃ nɩ a ʋ tõ-tõ-nɩ-bɛrɛ nɩ a ʋ nɩbɛ. Nakpõw been za bɛ tɩ cãà be ɩ.

²⁸Lɛ n'a a Faarawɔ̃ lɛb tɩ maal kpãa tobr, bɛ sàw bɛr a Ɩsɩrayɛl nɩbɛ bɛ cen ɛ.