Read Dagara, Northern Zɔb 1 Bible Online

Zɔb 1 - Dagara, Northern bible

Zɔb 1

¹Nɩr kãw tɩ be n Usɩ[1] tẽw, a yúor dɩ kɛ́ Zɔb. Ʋ bɛ tɩ tɛr sãwna ɩ, ɛ́ tuur yel-mɩŋa. Ʋ tɩ ƴãwnɛ nɩ a Naaŋmɩn ɛ́ bɛ pɩɛlɛ ɩ-faa ɩ.

²Ʋ tɩ dɔw nɩ bidɛbr ayopõi nɩ pɔwyaar ata.

³Ʋ tɩ tɛr'ɩ píir túr ayopõi (7 000), nyɔ̃wmɩ túr ata (3 000), na-kʋɔrɩ ayiri yiri ziir kɔbr anũu (500), bòn-nyamɛ kɔbr anũu (500), ɛ́ a ʋ yir tõ-tõ-biir bɛ tɩ dɩ vuo ɩ. A nɩr ŋa tɩ ɩ n a saa-pɛrɩ́ tẽ-biir za nɩ-yúor.

⁴A ʋ bidɛbr mɩ́ tɩ maalɛ nɩ cuw lɩɛrɛ taa a bɛ yie pʋɔ, ɛ́ mɩ́ tɩ bʋɔlɩ a bɛ yeepuuli ata kɛ́ bɛ wa bɛ wa lãw dɩ ɛ́ nyũ.

⁵Bɛlɛ wa maalɩ a cuw lɩɛrɩ taa tɩ tɔ a, a Zɔb mɩ́ ƴãw na bɛ wa k'ʋʋ wa so a bɛ dɛwr bɛr bɛ. Ʋ mɩ́ tɩ ìr'ɩ zi-lige maalɩ nyɩw-a-za-bàwr a bɛ been been ƴãw. Bʋ̃ʋ n'ʋ vɛ̃, ʋ mɩ́ tɩ tɩɛr'ɩ ʋ pʋɔ à ŋá: «A mɩnɛ kãw a ɩ̃ bibiir tɛr'ɩ sãwna, kapaw bɛ sãw nɩ a Naaŋmɩn a bɛ tɩɛrʋ pʋɔ.» À à ŋá n'a a Zɔb tɩ ɩrɛ.

⁶Zɩ̃ kɛ́ a bibir ʋl a Naaŋmɩn malkɩ mɩnɛ na mɩ́ cen tɩ manɩ a bɛ tome kʋ̀ a Sore a tɩ vɩɛ na. A Sɩtaana mɩ̀ tɩ pʋɔ na cen.

⁷A Sore tɩ sowr'ɩ a sɩtaana: «Nyɩnɛ n'a fʋ yi waar?» Ʋ tɩ sɔw na: «A tẽw za n'ʋ ɩ̃ cɔlɩ cɔlɩ.»

⁸A Sore tɩ yel ʋ na: «Mɛ̃ fʋ taa nyɛ̃ a ɩ̃ tõ-tõ-bie Zɔb! Ʋ bɛ tɛr ʋ tɔ a tẽw zu ɛ. Nɩr na bɛ tɛr sãwna, ɛ́ tuur yel-mɩŋa a n'ʋ, ʋ ƴãwnɛ mɛ̃ na ɛ́ bɛ pɩɛlɛ ɩ-faa ɩ.»

⁹A Sɩtaana tɩ sɔw na yel a Sore: «Zaalɛ n'a a Zɔb ƴãwnɛ fʋ ʋ?

¹⁰Fʋ bɛ tʋ̃ɔ́ piw ʋ tɛr mɛ̃ dacin bɛ na ŋmãa viiri pàw ʋlɛ nɩ a ʋ yir dem nɩ a ʋ bʋ̃-tɛrɩ za a ɩ? Fʋ maal'ɩ a ʋ tome a cere vla, ɛ́ a ʋ dʋn bʋwlɩ pàw a tẽw.

¹¹Ɛcɛ zɛw a nũu tɔ n a ʋ bʋ̃-tɛrɩ ɛ́ nyɛ̃! Mãa yel fʋ: ʋ na càar'a tʋ b.»

¹²Lɛ n'a a Sore tɩ yel a Sɩtaana: «Ɩ̃ sàw na, fʋ̃ʋ so a ʋ bʋ̃-tɛrɩ za. Ɛcɛ taa wa nanɩ tʋɔr a ʋl tɔr za ɩ.» A Sɩtaana tɩ lɛb'a yi a Sore zie be tɔl cen.

¹³Bibir kãw, a Zɔb bidɛbr nɩ a ʋ pɔwyaar tɩ dɩrɛ na nyúur'ɩ divɛ̃ a bɛ za kpɛ̃ɛ yir.

¹⁴Nɩr kãw tɩ ta n a Zɔb zie yel ʋ: «A nĩi tɩ kʋɔr'a, ɛ́ a bòn-nyamɛ àr pɩɛl'a 'wɔbr mʋ̃ɔ.

¹⁵Sabeyɛ̃[2] mɩnɛ wa ur'a lo a zu, kʋ a fʋ tõ-tõ-biir ɛ́ diw a dʋn cen nɩ. Mãa yõ n'ʋ tʋ̃ɔ́ cɩ̃ɛ, zɔ wa k'ɩ̃ɩ wa yel kʋ̀ b.»

¹⁶A ʋ ƴɛ̀rʋ bɛ tɩ lo tẽw sɛr ɛ, ɛ́ nɩr kãw lɛb wa ta yere: «Saa tanɩ nɩ a píir nɩ a pi-cɩ̃ɩnbɛ kʋ. Mãa yõ n'ʋ tʋ̃ɔ́ cɩ̃ɛ, zɔ wa k'ɩ̃ɩ wa yel kʋ̀ b.»

¹⁷A ʋ ƴɛ̀rʋ mɩ̀ bɛ tɩ lo tẽw sɛr ɛ, ɛ́ kãw lɛb ta yere: «Kaldeyɛ̃[3] mɩnɛ bʋ́r'ɩ ziir ata yi kʋ a fʋ tõ-tõ-biir, ɛ́ diw a nyɔ̃wmɩ cen nɩ. Mãa yõ n'ʋ tʋ̃ɔ́ cɩ̃ɛ, zɔ wa k'ɩ̃ɩ wa yel kʋ̀ b.»

¹⁸A ʋ ƴɛ̀rʋ mɩ̀ bɛ tɩ lo tẽw sɛr ɛ, ɛ́ kãw lɛb zɔ ta yere: «A fʋ bidɛbr nɩ a fʋ pɔwyaar tɩ be n a bɛ za kpɛ̃ɛ yir dɩrɛ nyúur'ɩ divɛ̃

¹⁹wa bere sɛsɛb kpɛ̃ɛ kãw yi a wɛja-kpalɛ pùorí wa fu dam a yir lõbowe a za anaar, a yir lo pàw a pɔ́lɛ́ bɛ kpi. Mãa yõ n'ʋ tʋ̃ɔ́ cɩ̃ɛ, zɔ wa k'ɩ̃ɩ wa yel kʋ̀ b.»

²⁰Lɛ n'a a Zɔb tɩ ìr, taw a ʋ kpar-kpɛ̃ɛ cɩɛrɩ ɛ́ fɔr a ʋ zu, ɛ́ gbĩ dume gũu tɩ tɔ tẽw

²¹ɛ́ yel: «Nũ-zawl'a ɩ̃ dɔw, ɛ́ nũ-zawl'a ɩ̃ na kpi. A Sore tɩr'a, a Sore lɛb'a de. A Sore yúor tɛr'ɩ danʋ!»

²²A kpɩɛrʋ á ŋá za pʋɔ a, a Zɔb bɛ tɩ maalɩ yel-bier ɛ, ʋ bɛ tɩ ƴɛ̀r ƴɛ̀rʋ na bɛ sɛw a, càar'ɩ a Naaŋmɩn ɛ.