Read Dagara, Northern Zɔb 11 Bible Online

Zɔb 11 - Dagara, Northern bible

Zɔb 11

¹Lɛ n'a a Sofaar na yi Naama a, tɩ de a ƴɛ̀rʋ yel a Zɔb:

²Sɔwfʋ kãw za dɛ bɛ ka be a ƴɛ̀r-yaga á ŋá ƴãw ɛ? A ƴɛ̀r-yaga sob'ʋ na tɛr yel-mɩŋa bɩɩ?

³A fʋ ƴɛ̀r-gbɛ̃gbɛ̃ na ɩ n a nɩbɛ pàw nʋɔr bɩɩ? Fʋ na ɩrɛ nɩ a nɩbɛ laar ɛ́ nɩr taa yere fʋ ɛ?

⁴Fʋ sʋ̃ɔm'a bul yel: «A ɩ̃ ƴɛ̀rʋ ɩ n yel-mɩŋa, ɩ̃ɩ bɛ tɛr sãwna a Naaŋmɩn niŋé ɩ.»

⁵'Woi! Naaŋmɩn tɩ sàw ƴɛ̀r a! Ʋlɛ tɩ sàw háa nʋɔr sɔw fʋ a!

⁶Ʋlɛ tɩ sàw wul fʋ a ʋ yã-bãwfʋ yel-sɔwlɩ na gãw a nɩsaal yã polpol a, lɛ n'a fʋ nãá bãw kɛ́ Naaŋmɩn yiir'ɩ a fʋ sãwna a mɩnɛ bɛr!

⁷Fʋ tɩɛrɛ kɛ́ fʋ na tʋ̃ɔ́ na bãw a Naaŋmɩn tɩ tɔ ɔ? Fʋ tɩɛrɛ kɛ́ fʋ na tʋ̃ɔ́ na bãw a lɛ a Kpɛnʋ-za-sob vɩɛlʋ na ŋmɛ̃ a tɩ ɓɩɩlɩ ɩ?

⁸A ʋ vɩɛlʋ do na gãw a salom, bʋ̃ʋ n'ʋ fʋ na ɩ? Ʋ zulme na gãw a kpɩmɛ tẽw, bʋ̃ʋ n'ʋ fʋ na bãw?

⁹Ʋ wõwme na zuo a tẽsɔw, ɛ́ yɛlmɛ zuo a kʋ̃ɔ-kpɛ̃ɛ.

¹⁰Naaŋmɩn wa tɔlɛ nyɔw sãwna sob a, ʋlɛ wa bʋɔl'ʋ a ʋ ƴɛ̀rʋ-dɩb zie a, Ãa n'ʋ na yel k'aa lɛ kʋ̃ ɩ?

¹¹Bʋ̃ʋ n'ʋ vɛ̃, ʋ bãw nɩ a bɛlɩ dem na bɛ tɛr bir a, ʋlɛ saa bɛ cɛlɛ be a, ʋ mɩ́ nyɛ̃ nɩ a faalʋ.

¹²Dãbol bɛ tɛr nãà ɩ yã-bãwnɛ alɛ bɛ ɩ a ʋlɩ bibir a bõw-gaara[8] nãà wa ɩ bõw-pɔwlɛ a ɩ.

¹³Ɛcɛ a fʋ̃ʋ a, a fɛr'a kɛ́ fʋ lɩɛbɩ a fʋ tɩɛrʋ tu n a Naaŋmɩn, ɛ́ zɛw nuru cɔw ʋ, puore nɩ ʋ.

¹⁴Ɩ-faa wa mar a fʋ nuru a, pɛ́w a bɛr, ɛ́ ta sàw yel-faa kpɛ a fʋ yir ɛ.

¹⁵Lɛ n'a fʋ kʋ̃ tɛr sãwna ɩ, tʋ̃ɔ́ dʋɔ zu, fʋ kʋ̃ bãw damnʋ za ɩ, ɛ́ kʋ̃ zɔrɛ bom kãw za dɛ̃bɩ̃ɛ ɩ.

¹⁶Bʋ̃ʋ n'ʋ vɛ̃, fʋ kʋ̃ cãà tɩɛrɛ a fʋ kpɩɛrʋ ɛ, fʋ na yiir'a na bɛr mɛ̃ kʋ̃ɔ na zɔ tɔl a.

¹⁷A fʋ nyɔ-vʋʋrʋ na ɩ na mɛ̃ a mʋ̃tɔ̃-tuo cãà a, a ʋ lige na lɩɛb'ɩ zi-wɛl-paala.

¹⁸Fʋ na ɓãa nɩ ƴãw vʋʋrɛ ɛ́ tɩɛrɛ a Naaŋmɩn, ɛ́ niwn saa sɔb fʋ a, fʋ na ɓãa nɩ ƴãw gúre.

¹⁹Nɩr kʋ̃ dam fʋ a fʋ pɩ̃ɛnʋ daar ɛ, nɩ-yaga na nɩ̃ɛ na mʋʋrɛ fʋ.

²⁰Ɛcɛ a nɩ-faar mɩ́ bɔ n sõwfʋ tɩ bàl, vo-yira za bɛ ka be ɩ, a kũu yõ n'ʋ cɛ bɛ tɩɛrɛ.