Read Dagara, Northern Zɔb 12 Bible Online

Zɔb 12 - Dagara, Northern bible

Zɔb 12

¹Lɛ n'a a Zɔb tɩ de a ƴɛ̀rʋ yel:

²Sɩza, nyɩmɛ nɛbɛ tɛr a nɩsaal bãwfʋ za, ɛ́ nyɩmɛ wa kpiir a, a yã-bãwfʋ na lãw nɩ nyɩ na kpi!

³Ɛcɛ a mãa mɩ̀ a, ɩ̃ mɩ̀ tɛr'ɩ yã mɛ̃ a nyɩɩm a, ɩ̃ bɛ gem zuo nyɩ ɛ! Ãa n'ʋ bɛ bãw à á ŋá nyɩ na yel a?

⁴Ɩ̃ bʋɔlɛ nɩ a Naaŋmɩn tɩɛrɛ k'ʋʋ sɔw mɛ̃, ɛ́ mãa n'ɩ ŋan lɩɛbɩ nɩr a ʋ bárɩ na ɩrɛ laar a: a nɩ-mɩŋa, a nɩr ʋl na bɛ tɛr sãwna a, ʋlɛ n'ʋ bɛ ɩrɛ laar!

⁵A bɛlɩ dem bom na bɛ fɛrɛ a, bɛ mɩ́ yel'a: «Baw-bio sob so jewru!» À ŋá n'a bɛ mɩ̀ mɩ́ yel a sob nɛ a gbɛ́r na sar a.

⁶A nyãnyu-nɩ-kʋrbɛ nyɛrɛ nɩ ƴã-ɓaarʋ a bɛ pɛnɛ-sɛwr pʋɔ, a bɛlɩ dem na bɔbr a Naaŋmɩn nɔhaarʋ a, bom bɛ fɛrɛ bɛ ɩ: bɛ bɛ bãw ŋmɩn-yoru a bɛ ɩ a bɛ fãw ɛ.

⁷Ɛcɛ sowri a dʋn nɩ a saa-zu lili, a na wul fʋ nɩ a Naaŋmɩn.

⁸Jɩ́r a bʋ̃-íri na be a tẽsɔw nɩ a kʋ̃ɔ-kpɛ̃ɛ pʋɔ a, ɛ́ fʋ na zanɩ nɩ yã.

⁹Bʋ̃ʋ n'ʋ vɛ̃, a dʋn á ŋá pʋɔ a, buor sob'ʋ bɛ bãw k'aa Sore nũu n'ʋ maalɩ à á ŋá za?

¹⁰Ʋlɛ n'ʋ tɛr a bʋ̃-íri za nyɔ-vʋʋrʋ a ʋ nũú, nɩ a pɩɛlʋ na kʋ̀rɛ a vʋʋrʋ a nɩsaalbɛ a.

¹¹Mɛ̃ bɛ taa mɩ́ yel kɛ́: «Tobr so a ƴɛ̀rʋ vɩɛlʋ bãwfʋ, mɛ̃ a lɛ a zɛl na so a bʋ̃-dɩrɩ nʋ̃ɔ̀ bãwfʋ a[9].

¹²Dɛnyamɛ so a yã-bãwfʋ ɛ́ nɩ-kore bãw lɛ a yele na ɩrɛ a.»

¹³Ɛcɛ Naaŋmɩn zie n'a a yã-bãwfʋ nɩ a kpɛnʋ be, ʋlɛ so a bãwfʋ nɩ a yã.

¹⁴Bom nɛ Naaŋmɩn na ŋmɛr bɛr a, bɛ kʋ̃ lɛb tʋ̃ɔ́ mɛ ɩ, ʋlɛ wa pàw nɩr a, nɩr bɛ yuore ʋ bɛrɛ ɩ.

¹⁵Ʋlɛ wa nyɔw a saa tɛr a, a wɛr'ʋ, ɛ́ ʋlɛ wa yuo a kʋ̃ɔnɩ bɛr a, a tẽsɔw n'ʋ a mɩ́ sãw.

¹⁶Ʋlɛ so a kpɛnʋ nɩ a zɛb-tʋ̃ɔ́fʋ. Ʋlɛ so a nɩr na bɔr a, nɩ a nɩr na ɩ a ʋ tɔ bɔr a.

¹⁷Ʋ mɩ́ siwr'ɩ a ten nɩ-bɛrɛ ɛ́ ɩ a bɛ yã-wulbɛ yã bɔr.

¹⁸Ʋ mɩ́ ɩ n a na-mɩnɛ naalʋ-dɩb baarɩ, ɛ́ 'lẽ bɛ a nɩ-pàwrɩ miwr a sɩɛmɩ́.

¹⁹Ʋ mɩ́ siwr'ɩ a bàwr-maalbɛ, ɛ́ ɩ a bɛlɩ dem na dɩrɛ a naalʋ a, a bɛ naalʋ baarɩ.

²⁰Ʋ mɩ́ faa nɩ a ƴɛ̀rʋ a ƴɛ̀r-bãw-ƴɛ̀rbɛ zie, ɛ́ faa a yã-bãwfʋ a dɛb-nyamɛ zie.

²¹Ʋ mɩ́ ɩrɛ nɩ a nɩ-yée laar, ɛ́ ɩrɛ a po-to-dem fãw báarɛ.

²²Ʋ mɩ́ diw nɩ a liw-varkpara bɛr, ɛ́ ɩ a lige pʋɔ bome yi cãà pʋɔ.

²³Ʋ mɩ́ ɩ na a nɩ-bʋʋrɛ bɛ yɛ́r, al pùorí ʋ ɩ bɛ lo. Ʋ mɩ́ ɩ na bɛ yãwmɛ, al pùorí, ʋ diw bɛ cen nɩ zi-yoru.

²⁴Ʋ mɩ́ ír'ɩ a bɛlɩ dem na so a tẽw a yã, ɛ́ bɛr bɛ bɛ bɔrɛ gʋɔr a wɛja-kpalɛ na bɛ tɛr sɛ́ɛ a pʋɔ.

²⁵Bɛ mɩ́ bɔblɛ nɩ a lige pʋɔ cãà na bɛ ka be a, ʋ mɩ́ ɩ na bɛ dẽdere mɛ̃ dã-kuolbɛ a.