Read Dagara, Northern Zɔb 19 Bible Online

Zɔb 19 - Dagara, Northern bible

Zɔb 19

¹Lɛ n'a a Zɔb tɩ de a ƴɛ̀rʋ yel:

²Debor'a nyɩ na dɔwrɩ mɛ̃ tɩ ta? Debor'a nyɩ na dĩ nɩ mɛ̃ a nyɩ ƴɛ̀rʋ tɩ ta?

³Gb'a à ŋá za n'a nyɩ tʋ m. Vĩ bɛ kpɩɛr nyɩ, nyɩ na dɔwrɛ mɛ̃ à à ŋá a ɩ?

⁴Alɛ mɩ̀ saa tɩ ɩ sɩza n'a ɩ̃ tuli a, mãa yõ n'ʋ a ɩ̃ tulu ŋa nãá jɩ́rɛ!

⁵Nyɩmɛ wa sɩrɩ bɔbr kɛ́ nyɩ wul kɛ́ nyɩ tɛr'ɩ yel-mɩŋa, ɛ́ yere mɛ̃ a vĩ-kpɛ̃ɛ ŋa na páw mɛ̃ a ƴãw a,

⁶nyɩɩm bãw kɛ́ Naaŋmɩn n'ʋ ɩ m à à ŋá, ʋlɛ n'ʋ ɩ a ʋ mɩ̃ɛ pili pàw mɛ̃.

⁷Mãa wa yere bɛ na ɩrɛ mɛ̃ po-to-fãw-ɩb a, nɩr za bɛ sɔwr ɛ. Mãa wa ŋmɛ cɛl a, nɩr bɛ be be tuur a yele pùor k'ɩ̃ɩ tɛr yel-mɩŋa ɩ.

⁸Naaŋmɩn piw nɩ a sɔ́r k'ɩ̃ɩ ta tɔl ɛ, ʋ ɩ n a ɩ̃ soli liw gã.

⁹Ʋ ɩ n a ɩ̃ yúor na tɩ yi a, ʋ baarɩ, ʋ ír'ɩ a ɩ̃ dɛpaal bom.

¹⁰Ʋ sãw nɩ a ɩ̃ yele za bɛr ɩ̃ kpiir, ʋ ír'ɩ a tɩɛrʋ ɩ̃ na ƴãw a nɩdaar ƴãw a bɛr, mɛ̃ tɩɛ bɛ na vʋ̃ɔ a.

¹¹A ʋ suur zɛl'ɩ a ɩ̃ ƴãw, ʋ ɩ mɛ̃ na mɛ̃ ʋ dɔ̃ sob a.

¹²A ʋ nɩ-kʋrbɛ gbone nɩ taa bɛ dɩ vuo ɩ, bɛ puo nɩ sɔ́r wa ta n a ɩ̃ zie, bɛ ŋmãa na viiri koli a ɩ̃ pɛn-sɛw.

¹³A Naaŋmɩn diw nɩ a ɩ̃ yɛbr za zãá nɩ mɛ̃. A bɛlɩ dem na bãw mɛ̃ a dɛrɛ mɛ̃ na.

¹⁴A ɩ̃ nɩbɛ nɩ a ɩ̃ bárɩ zawrɩ mɛ̃ na bɛr,

¹⁵A ɩ̃ yir sãanbɛ nɩ a ɩ̃ tõ-tõ-bi-pɔwbɛ bʋɔlɛ mɛ̃ nɩ nɩ-sãan, bɛ nyɛ̃ m'a ɩ̃ ɩ nɩ-dɔwla.

¹⁶Ɩ̃ mɩ́ bʋɔl'ɩ a ɩ̃ tõ-tõ-bie, ʋ bɛ mɩ́ sɔw ɛ, mãa saa zɛlɛ ʋ yãayãa a.

¹⁷A ɩ̃ pɔw bɛ cãà tʋ́ɔr a ɩ̃ nʋɔr nyũu ɛ, ɩ̃ mɩ́ ɩrɛ nɩ a ɩ̃ yɛbr tɛɛ za kɔkɔrʋ.

¹⁸Bibi-nyɔ-fɛrɛ tɛɛ za jewre mɛ̃ na: mãa wa maal k'ɩ̃ɩ ƴɛ̀r a, bɛ mɩ́ ɩrɛ mɛ̃ na laar.

¹⁹Ɩ̃ lɩɛb'ɩ nɩ-faa faa a ɩ̃ bá-nɔnɩ za zie, a bɛlɩ dem ɩ̃ na tɩ nɔnɛ a lɩɛb'a lo a ɩ̃ zu.

²⁰Ɩ̃ cɛ nɩ kɔbɛ tɛwr, ɛ́ faar na kpi.

²¹Nɩbaalʋ, nɩbaalʋ wɛ, ɩ̃ bárɩ i! Naaŋmɩn n'ʋ ŋmɛ m.

²²Bʋ̃ʋ n'ʋ so nyɩ dɔwrɛ mɛ̃ mɛ̃ a Naaŋmɩn a? Nyɩ bɛ dɔwrɩ mɛ̃ bàl ɛ?

²³'Woi! Ɩ̃ bɔbr'a k'aa ɩ̃ ƴɛ̀rʋ nãá sɛb, bɛ nãá sɛb a ƴãw sɛbɛ pʋɔ!

²⁴Bɛ nãá wi a nɩ kure dali-cɩlʋ, ɛ́ ɩ a nɩ kur-mɔrmɔr a sɔb, gã pìir zu kʋralɛ!

²⁵Ɛcɛ mãa a, ɩ̃ bãw na k'aa ɩ̃ faarɛ vʋʋrɛ na, ɛ́ a baarʋ daar a, ʋ na ìr'a àr a tẽw zu.

²⁶Bɛlɛ wa sãw a ɩ̃ gán ŋa bɛr a, a mãa tɔr za a, ɩ̃ na nyɛ̃ nɩ a Naaŋmɩn!

²⁷Mãa mɩŋa na nyɛ̃ ʋ na nɩ mimir, mãa n'ʋ na nyɛ̃ ʋ, nɩ-yũo bɛ n'ʋ ɛ. A daar ŋa a, ʋ ta fɔ̃w. Ɩ̃ nyɔwr'ɩ ɩ̃ tʋɔra guur.

²⁸Nyɩmɛ wa yere kɛ́: «Ŋmɩŋmɩn n'a tɩ na dɔwr'ʋ tʋ̃ɔ́ ɩ mɛ̃ tɩ nyɛ̃ nɩ bom dɩ n ʋ a ƴɛ̀rʋ a?»

²⁹A lɛn daar a, nyɩ zɔrɛ a zɛbr-sɔ-kpɛ̃ɛ a nyɩɩm mɩŋa ƴãw, bʋ̃ʋ n'ʋ vɛ̃, a zɛbr-sɔ-kpɛ̃ɛ dɔwrʋ na kpɛ n faa bɛ dɩ vuo ɩ, lɛ n'a nyɩ na bãw kɛ́ ƴɛ̀rʋ maalʋ be na!