Read Dagara, Northern Zɔb 2 Bible Online

Zɔb 2 - Dagara, Northern bible

Zɔb 2

¹A bibir ʋl a Naaŋmɩn malkɩ mɩnɛ na mɩ́ cen tɩ manɩ a bɛ tome kʋ̀ a Sore a tɩ vɩɛ na. A Sɩtaana mɩ̀ tɩ pʋɔ na cen k'ʋʋ tɩ manɩ a ʋ tome.

²A Sore tɩ sowr'ɩ a Sɩtaana: «Nyɩnɛ n'a fʋ yi waar?» Ʋ tɩ sɔw na: «A tẽw za n'ʋ ɩ̃ cɔlɩ cɔlɩ.»

³A Sore lɛb sowr'ʋ: «Mɛ̃ fʋ taa nyɛ̃ a ɩ̃ tõ-tõ-bie Zɔb? Ʋ bɛ tɛr ʋ tɔ a tẽw zu ɛ. Nɩr na bɛ tɛr sãwna ɛ́ tuur yel-mɩŋa a n'ʋ, ʋ ƴãwnɛ mɛ̃ na, ɛ́ bɛ pɩɛlɛ ɩ-faa ɩ. Ʋ cãà na tu a ʋ yel-mɩnʋ. Zawla lɛ n'a fʋ dɔ ƴãw k'ɩ̃ɩ kʋ ʋ.»

⁴Ɛcɛ a Sɩtaana tɩ sɔw na yel: «Tɩr k'ɩ̃ tɩr'a! Bom nɛ za nɩsaal na tɛr a, ʋ mɩ́ de ʋ na tɩr k'ʋʋ faa a ʋ nyʋɔr.

⁵Ɛcɛ, zɛw a nũu tɔ n a ʋl tɔr za ɛ́ nyɛ̃! Mãa yel fʋ: ʋ na càar'a tʋ b!»

⁶Lɛ n'a a Sore tɩ yel a sɩtaana: «Ɩ̃ sàw na, fʋ̃ʋ so ʋ, ɛcɛ taa tʋɔr a ʋ nyɔ-vʋʋrʋ ɛ.»

⁷A Sɩtaana tɩ yi n a Sore zie be tɔl cen. Ʋ tɩ ɩ n natɩ-faar yi pàw a Zɔb ƴã-gan za, a gbɛ́ɛ tɩ tɔ a zu-sɔwlɩsɔw.

⁸Lɛ n'a a Zɔb tɩ zɩ̃ tãpúo zu ɛ́ de kusele dure nɩ a ʋ ƴã-gan.

⁹A Zɔb pɔw tɩ yel ʋ na: «Bʋnʋ ƴãw n'a fʋ cãà bɔbr kɛ́ fʋ ɩ nɩr na bɛ tɛr sãwna a? Tʋ a Naaŋmɩn ɛ́ kpi!»

¹⁰A Zɔb tɩ sɔw ʋ na yel: «Fʋ ƴɛ̀rɛ na mɛ̃ dãbol a! Tɩmɛ mɩ́ wa sàw de a nʋ̃ɔ̀ a Naaŋmɩn na kʋ̀rɛ tɩ a, bʋ̃ʋ n'ʋ so tɩ mɩ̀ kʋ̃ sàw de a tuo?» A yele á ŋá za pʋɔ a, a Zɔb bɛ tɩ sãw a Naaŋmɩn a ʋ nʋɔr ƴɛ̀rʋ pʋɔ ɩ.

¹¹A Zɔb bárɩ ata tɩ wõ n a kpɩɛrʋ á ŋá na ta ʋ a, ɛ́ ŋa za tɩ ìr wa a ʋ nyɛ́b: Elifaazɩ tɩ yi n Teman, Bɩldaadɩ yi Suwa ɛ́ Sofaar yi Naama. Bɛ tɩ wõ n taa kɛ́ bɛ cen tɩ puori a Zɔb ɛ́ mɔwl'ʋ a ʋ kpɩɛrʋ á ŋá pʋɔ.

¹²Bɛ na tɩ cãà zãá a, bɛ tɩ nyɛ̃ nɩ a Zɔb bãw gù. Lɛ n'a bɛ tɩ vaa kɔkɔr kone. Ŋa za tɩ nyɔw nɩ a ʋ kpar-kpɛ̃ɛ taw cɩɛrɩ ɛ́ yɛ́lɩ uuru ƴãw a ʋ zũú.

¹³Bɛ tɩ zɩ̃ n tẽw kɔw a Zɔb bibie ayopõi nɩ tɩ̃ɩsɔwr ayopõi. Bɛ kãw za bɛ tɩ háa nʋɔr ƴɛ̀r ƴɛ̀rʋ sɔw ʋ ɛ, bɛ na tɩ nyɛ̃ a wone ʋ yaga za a ƴãw.