Read Dagara, Northern Zɔb 21 Bible Online

Zɔb 21 - Dagara, Northern bible

Zɔb 21

¹Lɛ n'a a Zɔb tɩ de a ƴɛ̀rʋ yel:

²Nyɩ ƴãw fãw bɛr wõ a ɩ̃ ƴɛ̀rʋ, lɛ n'a nyɩ na mɔwlɩ mɛ̃.

³Nyɩ mɩ̀ sàw k'ɩ̃ ƴɛ̀r, ɛ́ mãa wa ƴɛ̀r baar'a, fʋ na tʋ̃ɔ́ na ɩrɛ mɛ̃ laar, Sofaar i.

⁴A mãa a, nɩsaal'ʋ ɩ̃ zɛbr'ɩ bɩɩ? Ʋ̃ʋ'hʋ̃! A lɛ pʋɔ a, bʋnʋ ƴãw n'a ɩ̃ kʋ̃ tɛrɛ ɩ̃ tʋɔra guur?

⁵Nyɩ jɩ́r a ɩ̃ yele kaa, nʋɔr na ɓãá nyɩ na, nyɩ na ír'ɩ nũu pàw nɩ a nʋɔr, nyɩ na ɩ n gbili.

⁶A mãa mɩŋa, mãa mɩ́ wa lɛb tɩɛrɛ a yele á ŋá a, pʋ̀lá mɩ́ vʋ̃ɔ mɛ̃ na, ɛ́ ƴã-gan za màwr mɛ̃.

⁷Bʋ̃ʋ n'ʋ so a ɩ-fa-maalbɛ vʋʋrɛ? Bʋ̃ʋ n'ʋ so bɛ mɩ́ kore, ɛ́ lɛb bãw tɛrɛ fãw dɔwlɛ?

⁸A bɛ bibiir mɩ́ be n a bɛ zie, ɛ́ a bɛ yan pɔ̀lɛ a bɛ mimirí.

⁹A bɛ yie pʋɔ a, ƴã-ɓaarʋ n'a, bɛ bɛ bãw dɛ̃bɩ̃ɛ ɩ, ɛ́ Naaŋmɩn dabɔl bɛ ŋmɩɛr bɛ towtow ɛ.

¹⁰A bɛ nadɛr bɛ dúor na-nyãw ʋʋ bɛ tɛrɛ pʋɔ ɩ, ɛ́ a bɛ na-nyãw bɛ dɔwr sãwnɛ ɩ.

¹¹A bɛ bibi-cãpili mɩ́ dɩ̃ɛnɛ na mɛ̃ dʋn a, ɛ́ a bɛ yan ƴawr viire.

¹²Gãgaar nɩ pɛ̀nɛ́ n'a a ɩ-fa-maalbɛ mɩ́ ŋmɩɛr yiele nɩ, wele n'ʋ bɛ mɩ́ pɛblɛ dɩ̃ɛnɛ nɩ.

¹³Bɛ mɩ́ wõ n a nʋ̃ɔ̀ tɩ kpi n, ƴã-ɓaarʋ n'a bɛ mɩ́ siw nɩ a kpɩmɛ tẽw.

¹⁴Ɛcɛ bɛ tɩ yel'ɩ a Naaŋmɩn: «Taw zaa a tɩ zie, tɩ tobr bɛ ka a fʋ pʋ-tɩɛrʋ maalʋ ƴãw ɛ.

¹⁵Ãa n'ɩ a Kpɛnʋ-za-sob tɩ na ɩ a ʋ tõ-tõ-biir? Bʋ̃ʋ n'ʋ tɩ na páw, tɩmɛ wa puore ʋ a?»

¹⁶Ɛcɛ bɛlɛ bɛ tɩ so a bɛ nʋ̃ɔ̀ ɩ! A ɩ-fa-maalbɛ ɩ-ɩrɩ, a zãá nɩ mɛ̃!

¹⁷Cã̀cã̀ n'a a ɩ-fa-maalbɛ mɩ́ ùr kpi i? Kʋralɛ n'a a bɛ yele sãwnɛ ɛ? Gb'aa ŋmɩn n'a a Naaŋmɩn ɩ a ʋ suur ìr a bɛ ƴãw?

¹⁸A nɩbɛ bɛ ŋa a, bɛ ɩ mɛ̃ sàwr sɛsɛb na ɓáw cere nɩ a, bɛ ɩ mɛ̃ sɛsɛb-pɩl uuru na ìre dúor a!

¹⁹Bɛ mɩ́ yel'a: «A sãà dɔwrʋ n'a a Naaŋmɩn gùre nɩ a bibiir.» Ʋl mɩŋa n'ʋ a Naaŋmɩn nãá dɔwrɩ, ʋ bãw a pɛr!

²⁰Ʋl mɩŋa n'ʋ nãá nyɛ̃ a ʋ loba nɩ mimir, ɛ́ lɛm a Kpɛnʋ-za-sob suur kaa!

²¹Bɛlɛ wa sɔ́r a cuwr na cɛ ʋ na vʋʋrɩ a, a ʋ tobr cãà na be a ʋ bibiir ƴãw ɩ?

²²Nɩr na tʋ̃ɔ́ na zanɩ nɩ a Naaŋmɩn a yele bãwfʋ ʋ? Ʋl na nɩ̃ɛ bãwnɛ a saa-zu malkɩ mɩnɛ yele a?

²³A kũu mɩ́ kʋ n kãw na cãà kpɛmɛ ɛ́ wone nʋ̃ɔ̀, ɛ́ bom za bɛ damnɛ ʋ a.

²⁴Ʋ dɩ na tɩ 'wɔr, ʋ cãà na kpɛmɛ kpɛmɛ.

²⁵Ɛ́ kãw kpi n pʋ-sãwna ɛ́ bɛ lɛm a nʋ̃ɔ̀ kaa ɩ.

²⁶Bɛ mɩ́ ũù nɩ bɛ za a bɔw pʋɔ, zãzule yɛ́r pàw.

²⁷Nyɩ nyɛ̃, ɩ̃ bãw nɩ a nyɩ tɩɛrʋ, nɩ a lɛ za nyɩ na tɩɛrɛ a ɩ̃ ƴãw a.

²⁸Bʋ̃ʋ n'ʋ vɛ̃, nyɩ mɩ́ yel'a: «Nyɩnɛ n'a a po-to-sob yir be? A yir ʋl pʋɔ a nyãnyuwr na tɩ sɔwlɛ a ɩ n ŋmɩn?»

²⁹Ɛ́ bʋnʋ? Nyɩ bɛ sowri a sɔr-tɔlbɛ kaa a ɩ? Nyɩ bɛ sàw de a lɛ bɛ na yel a bɩɩ?

³⁰A kpɩɛrʋ daar a, a ɩ-fa-maalɛ mɩ́ cɩ̃ɛ na, a Naaŋmɩn suur wa ìr a ʋlɩ bibir a, ʋ mɩ́ jɩɩr'ʋ na bɛr.

³¹Ãa n'ʋ na manɩ a ʋ ɩb na bɛ vɩɛl a wul ʋ? Ãa n'ʋ na ƴãw ʋ ya a ɩ-faar ʋ na maalɩ a san?

³²A ʋ kũu daar a, bɛ mɩ́ ũù ʋ na, ɛ́ kaarɛ a ʋ yaa zie.

³³A nɩbɛ za cɔrɩ na tu a ʋ kũu, nɩ-yaga yaga cere na tɔlɛ a ʋ niŋé. A bɔw tanɛ bɛ dĩ a ʋ ƴã-gan ɛ!

³⁴Bʋ̃ʋ mɔwlʋ n'a nyɩ mɔwlɛ mɛ̃? Mɔwl-zawl! A sɔwfʋ nyɩ na sɔw a, a ɩ n ziri tɛwr.