Read Dagara, Northern Zɔb 23 Bible Online

Zɔb 23 - Dagara, Northern bible

Zɔb 23

¹Lɛ n'a a Zɔb tɩ de a ƴɛ̀rʋ yel:

²Mãa saa yel k'ɩ̃ɩ na sɩb'ɩ a ɩ̃ kon tɛr a, a ƴɛrɛŋa a, a zɛbr ɩ̃ na zɛbr a lɛb'a bãw dɔwlɩ.

³'Woi! Mãa tɩ bãw be ɩ̃ na na páw a Naaŋmɩn a, ɩ̃ nãá ta n a ʋ naalʋ-dà-kɔw pɛr.

⁴Ɩ̃ nãá tɩ manɩ nɩ a ɩ̃ yel-mɩŋa kʋ̀ ʋ. A yel-mɩŋa man-wulu ƴɛ̀r-bie nãá paal'ɩ a ɩ̃ nʋɔr.

⁵Ɩ̃ nãá bãw nɩ ʋlɩ sɔwfʋ nɛ ʋ nãá sɔw kʋ̀ m a, ɩ̃ɩ nãá bãw nɩ a ʋlɩ bom nɛ ʋ na bɔbr k'ʋʋ yel kʋ̀ m a pɛr.

⁶Gãdaalʋ n'a ʋ nãá ɩrɛ maalɛ nɩ mɛ̃ a ƴɛ̀rʋ bɩɩ? Ʋ̃ʋ'hʋ̃! Ʋl a, ʋ nãá cɛlɛ nɩ be wõ a ɩ̃ ƴɛ̀rʋ.

⁷Lɛ n'a ɩ̃ nãá manɩ a ɩ̃ yel-mɩŋa kʋ̀ ʋ, ɛ́ a ɩ̃ ƴɛ̀r-dɩrɛ nãá bɛr mɛ̃ na a baarɩ.

⁸Ɛcɛ mãa cen a saa-pɛrɩ́ a, ʋ bɛ be a be ɩ, ɩ̃ cen a mʋ̃tɔ̃w-kpɛb-lowr bɛ nyɛ̃ ʋ ɛ.

⁹Ʋ be n a saa-pɛrɩ́-gʋba-lowr tɛr tome a be bɩɩ? Ɩ̃ kʋ̃ tʋ̃ɔ́ nyɛ̃ ʋ a be ɩ. Ʋ be n a saa-pɛrɩ́-dʋrʋ-lowr sɔwlɛ bɩɩ? Ɩ̃ bɛ nyɛ̃ ʋ a be ɩ.

¹⁰Ɛcɛ ʋ bãw nɩ a sɔ́r ʋl ɩ̃ na tuur a: ʋ ƴãw mɛ̃ nɩ kpɩɛrʋ pʋɔ, ɛcɛ ɩ̃ na yi na nyɩwrɛ mɛ̃ salm-zɩɛ bɛ na zuw ír a.

¹¹Ɩ̃ ƴãw nɩ fãw sawlɩ a ɩ̃ gbɛ́ɛ a ʋ gbɛ́ɛ bɔwrɩ pʋɔ, ɩ̃ tu n a ʋ sɔ́r bɛ bɩɛ ɩ.

¹²Ɩ̃ tu n a ʋ nɛ-ƴãwnɩ bɛ cɛ ɩ, ɩ̃ nɔ̃w nɩ a lɛ ʋ na mɩ́ yel a, zuo a lɛ a mãa na mɩ́ bɔbr a.

¹³Ɛcɛ, ʋ na tɛr a ʋ tɩɛrʋ a n'a ʋ tɛr, ãa n'ʋ na ɩ ʋ lɩɛbɩ? A lɛ ʋ na bɔbr a n'a ʋ ɩ.

¹⁴Ʋlɩ bom nɛ ʋ na mɩ́ yel a ɩ̃ ƴãw a, ʋ mɩ́ ɩ ʋ na, mɛ̃ a lɛ ʋ na mɩ́ ɩ a yele al za a ʋ pʋ-tɩɛrʋ na tɩɛrɩ bin a.

¹⁵Alɛ n'a so dɛ̃bɩ̃ɛ mɩ́ kpɩɛr mɛ̃ yaga za mãa wa be a ʋ niŋé a. Mãa mɩ́ wa tɩɛrɛ a yele á ŋá a, dɛ̃bɩ̃ɛ mɩ́ lɛb'a bãw kpɩɛr mɛ̃ dɔwlɩ.

¹⁶A Naaŋmɩn ɩ n a ɩ̃ kanyir za baarɩ, a Kpɛnʋ-za-sob ƴãwnɛ mɛ̃ nɩ pʋl-vʋ̃ɔ.

¹⁷Ɛcɛ a zie na saa sɔb pàw mɛ̃ a, a lige na saa lo pàw mɛ̃ a, ɩ̃ bɛ ɩ gbili ɛ.