Read Dagara, Northern Zɔb 27 Bible Online

Zɔb 27 - Dagara, Northern bible

Zɔb 27

¹Lɛ n'a a Zɔb tɩ cow a ʋ ƴɛ̀rʋ yel:

²A Naaŋmɩn na vʋʋrɛ a n'ʋ ɩ̃ pɔrɛ nɩ, ʋl na bɛ sàw wul a ɩ̃ yel-mɩŋa a, a Kpɛnʋ-za-sob na ƴãw mɛ̃ a su-sãwna a:

³lɛn daar za ɩ̃ na na cãà tʋ́ɔr vʋʋrɛ a, ɛ́ a Naaŋmɩn pɩɛlʋ yire a ɩ̃ nyʋɔrɩ́ a,

⁴a ɩ̃ nʋɔr kʋ̃ ƴɛ̀r ƴɛ̀r-faa ɩ, ɛ́ a ɩ̃ zɛl kʋ̃ ŋmãa ziri ɛ.

⁵Ɩ̃ bɛ be za na sàw kɛ́ nyɩ tɛr'ɩ yel-mɩŋa ɩ, tɩ ta n a ɩ̃ kũu daar a, ɩ̃ na yel'a k'ɩ̃ɩ bɛ tɛr sãwna ɩ.

⁶Ɩ̃ cãà na yere k'aa ɩ̃ cenu tu n yel-mɩŋa, ɩ̃ kʋ̃ bɛr towtow ɛ. A ɩ̃ tɩɛrʋ bɛ zɛbr'ɩ mɛ̃ yel kãw za ƴãw ɛ.

⁷Bɛ dɔwr'ɩ a ɩ̃ dɔ̃ sob mɛ̃ a lɛ bɛ na mɩ́ dɔwrɩ nɩ-faa a, ɛ́ dɔwrɩ a sob nɛ na zɛbr'ɩ mɛ̃ a, mɛ̃ a lɛ bɛ na mɩ́ dɔwrɩ ɩ-fa-maalɛ a!

⁸A Naaŋmɩn wa ŋmãa a nɩ-faa nyɔ-vʋʋrʋ miwr a, bʋ̃ʋ n'ʋ na lɛb cɛ ʋ?

⁹Kpɩɛrʋ wa ùr ta ʋ a, Naaŋmɩn na bɛr a wõ a ʋ cɛl bɩɩ?

¹⁰A Kpɛnʋ-za-sob zie tɩ n'a ʋ nyɛ̃ a ʋ nʋ̃ɔ̀ a, ʋ nãá puore na bʋɔlɛ a Naaŋmɩn kʋralɛ.

¹¹Ɩ̃ na wul nyɩ nɩ a lɛ a Naaŋmɩn kpɛnʋ na sɛw a, ɩ̃ kʋ̃ sɔwlɩ a Kpɛnʋ-za-sob pʋ-tɩɛrʋ a nyɩ zie ɩ.

¹²Nyɩ nyɛ̃ a na nyɩ za, bʋ̃ʋ n'ʋ so nyɩ ƴɛ̀r ƴɛ̀rʋ na bɛ tɛr bir a?

¹³Nyɩ nyɛ̃ a ʋlɩ bom nɛ a Naaŋmɩn na cɔbrɩ gùre nɩ a nɩ-faa a, a ʋlɩ bom nɛ a Kpɛnʋ-za-sob na cɔbrɩ cɛlɛ nɩ a po-to-sob a:

¹⁴ʋlɛ wa tɛr bibiir yaga a, zɛbr-sɔ-kpɛ̃ɛ so bɛ, a ʋ bʋ̃-dɔwrɩ na bɔ n bʋ̃-dɩrɩ gù.

¹⁵A ʋ nɩbɛ na na cɛ vʋʋrɛ a, jɛ̀lmɛ̃ bàalʋ na baarɩ bɛ na, a bɛ pɔw-kɔbɛ kʋ̃ tʋ̃ɔ́ bɛ kõ ɩ.

¹⁶Ʋlɛ wa bɔbr libie gbone taa mɛ̃ tanɛ a, ʋlɛ wa bɔbr pɛnɛ gbone taa mɛ̃ mɛ̃mɛrɛ a...,

¹⁷ʋ̃ʋ bɔbr bine, nɩ-mɩŋa n'ʋ nãà su a, ɛ́ a ʋ libie a, nɩ-dẽdẽ n'ʋ nãà de a.

¹⁸A yir ʋ na ŋmãa a bɛ kpɛmɛ ɩ, bʋ̃-gùre sɛw n'ʋ.

¹⁹Ʋ gánɛ na ɩ nãà, ɛcɛ a pɛ-baara n'a, ʋ wa yuore nɩ a mimie, bom bɛ cãà ɩ.

²⁰Dɛ̃bɩ̃ɛ ur'a nyɔw ʋ mɛ̃ kʋ̃ɔ na paalɩ yi nɛ́ɛ a, sɛsɛb-pɩl ɓáw ʋ na cen nɩ tɩ̃ɩsɔw-been.

²¹Saa-pɛrɩ́ sɛsɛb ɓáw ʋ na tɔlɛ cere nɩ, ʋ fu n nɩ fãw ír ʋ a ʋ yir.

²²Bɛ tɛ̀br ʋ na kʋ̃ zɔ ʋ nɩbaalʋ ɛ, a fɛr k'ʋʋ nɩɩrɛ a tã-tɛbrɛ pime.

²³Bɛ ŋmɛ n kuryii ʋ na lo a ƴãw, a be ʋ na tɩ be a, bɛ 'húore ʋ na.