Read Dagara, Northern Zɔb 28 Bible Online

Zɔb 28 - Dagara, Northern bible

Zɔb 28

¹Yel-mɩŋa n'a, salm-pla bɔwrɩ be n be, ɛ́ salm-zɩɛ yɩɩlʋ ziir be be.

²A kure a, tẽsɔw n'a bɛ mɩ́ tuw ír ʋ, ɛ́ kʋsɩɛr'ʋ mɩ́ nyɩl lɩɛbɩ kur-zɩɛ.

³A salm-tuwrbɛ mɩ́ siw nɩ nɩ vũu a salm-bɔwrɩ pʋɔ. Bɛ mɩ́ tuw na tɩ ta n a be bɛ na tʋ̃ɔ́ a, bɔbr'ɩ a kʋsɛ-sɛbla na be liw-varkpara pʋɔ a.

⁴A salm-tuwrbɛ yuo nɩ bɔwrɩ zãá nɩ a nɩbɛ kpɛb ziir. Bɛ yawlɩ na zaalɛ, zãá nɩ a nɩsaalbɛ, be nɩr na kʋ̃ tʋ̃ɔ́ ta a.

⁵A tẽsɔw zu-sɔw n'ʋ tɩrɛ a bʋ̃-dɩra, ɛcɛ a ʋ pʋɔ dam'a nyaw taa mɛ̃ vũu na dɩ a.

⁶A ʋ kʋsɛbɛ pʋɔ n'a kʋsɛ-nyɩwra kãw bɛ na bʋɔlɛ safɩɩr a be, ɛ́ a ʋ uuru pʋɔ n'a a salm-zɩɛ be.

⁷A sɩla bɛ bãw a tẽsɔw pʋ̃ɔmɩ sɛ́ɛ á ŋá ɩ, ɛ́ sidume mimir bɛ dãw nyɛ̃ a ɩ.

⁸Wɛ-dʋ̃-faar bɛ dãw nɛ̃ gbɛ́r a be ɩ, gbẽw bɛ dãw tu a ɩ.

⁹Ɛcɛ a nɩsaal tuwr'ɩ kʋsɛ-kpam, ʋ tĩ nɩ a tan sɩɩr ƴãw ɛ́ ŋmɩɛr a wɛlɛ.

¹⁰Ʋ wɛr'ɩ bɔwrɩ a pie pʋɔ, a ʋ mimir nyɛ̃ nɩ bom za na tɛr yúor a.

¹¹Ʋ nɛb'ɩ a bul-nɛ́ɛ kpar ɛ́ ɩ bom za na tɩ sɔwlɩ a sãá cãàmɩ́.

¹²Ɛcɛ a Yã-bãwfʋ a, nyɩnɛ n'a bɛ na nyɛ̃ ʋ? Nyɩn lowr'a a yã kpɩɛr?

¹³A nɩsaalbɛ bɛ bãw a Yã-bãwfʋ daarʋ ɛ, ʋ bɛ be a tẽw zu ka ɩ.

¹⁴A Kʋ̃ɔ-kpɛ̃ɛ-zulu zulu[16] yel'a: «Ʋ bɛ be a ɩ̃ pʋ̃ɔmɩ ɛ», ɛ́ a kʋ̃ɔ-kpɛ̃ɛ yel: «Ʋ bɛ be a ɩ̃ zie ɩ.»

¹⁵Bɛ kʋ̃ tʋ̃ɔ́ de ʋ tɛw nɩ salm-zɩɛ mɩŋa mɩŋa ɩ, salm-pla na tɩbrɛ a, kʋ̃ tʋ̃ɔ́ ta a ʋ daarʋ ɛ.

¹⁶Ofɩɩr tẽw salm-zɩɛ bɛ gbʋ́r ʋ ɛ, kʋsɛ-nyɩwrɩ kãw bɛ na bʋɔlɛ onisɩ nɩ safɩɩr a, bɛ ta ʋ ɛ.

¹⁷A ʋ daarʋ zuo nɩ a salm-zɩɛ nɩ a bom ʋl bɛ na mɩ́ maal'ɩ a butole a daarʋ, fʋ̃ʋ saa tɩr salm-zɩɛ mɩŋa duwle a, fʋ bɛ páwr ʋ ɛ,

¹⁸bɛ nãà yere a kʋsɛ-zɩɛ ɓõɓõ bɛ na bʋɔlɛ koraɩ a, nɩ a butoli bʋ̃-maala bʋʋrɛ kãw bɛ na bʋɔlɛ kɩrɩsɩtal a. A Yã-bãwfʋ vɩɛlʋ sa n a lɛw-vɩɛlɩ vɩɛlʋ.

¹⁹A Etiopi tẽw kʋsɛ-nyɩwra ʋl bɛ na bʋɔlɛ topaazʋ a daarʋ bɛ ta a Yã-bãwfʋ dem ɛ. A salm-zɩɛ mɩŋa mɩŋa mɩ̀ cãà bɛ ta ʋ ɛ.

²⁰Ɛcɛ nyɩnɛ n'a a Yã-bãwfʋ pãa yi a? Nyɩn lowr'ɩ a yã kpɛb zie?

²¹Ʋ sɔwl'a, bʋ̃-vʋʋra kãw za kʋ̃ nyɛ̃ ʋ ɛ, a saa-zu lili kʋ̃ tʋ̃ɔ́ nyɛ̃ ʋ ɛ.

²²A bɔw-zulu zulu nɩ a kũu yere na: «A ʋ yúor na yi a, a lo n a tɩ tobrí.»

²³Ɛcɛ Naaŋmɩn bãw nɩ a ʋ yi-waa zie, ʋl bãw nɩ a be ʋ na be a.

²⁴Ʋlɛ n'ʋ mɩ́ jɩ́r tɩ tɔ a tẽw baarʋ zie, ɛ́ nyɛ̃ bom za na be a salom pile a.

²⁵Bʋ̃ʋ n'ʋ vɛ̃, ʋlɛ n'ʋ mɩ́ kʋ̀ a ʋ fãw a sɛsɛb, ɛ́ manɩ a kʋ̃ɔ zɛ̃a,

²⁶ʋ ƴãw nɩ tʋr-bɔw kʋ̀ a saa, ɛ́ puo a saa sɔ́r.

²⁷A lɛn daar'a a Naaŋmɩn tɩ nyɛ̃ a Yã-bãwfʋ ɛ́ nɔ̃w ʋ. Ʋ tɩ nyɛ̃ ʋ na ɛ́ bɔbr k'ʋʋ bãw a lɛ a ʋ vɩɛlʋ na zɛ̃ a.

²⁸Al pùorí, ʋ tɩ yel'ɩ a nɩsaal: «A zɔrɛ-a-Sore n'ɩ a Yã-bãwfʋ! A ta-pɩɛlɛ-yel-faa n'ɩ a yã!»