Read Dagara, Northern Zɔb 33 Bible Online

Zɔb 33 - Dagara, Northern bible

Zɔb 33

¹Zɔb i, bɛr wõ a ƴɛ̀rʋ ɩ̃ na tɛr a, ƴãw tobr a ɩ̃ ƴɛ̀rʋ za ƴãw.

²Ɩ̃ háarɛ nɩ a nʋɔr k'ɩ̃ɩ ƴɛ̀r, ɛ́ a ƴɛ̀r-bie cɔbrɩ baarɩ na yi.

³A ɩ̃ pʋɔ za n'ʋ ɩ̃ na ƴɛ̀r'ɩ, ɩ̃ na yel'ɩ cãamɩ́ lɛ a ʋlɩ bom nɛ ɩ̃ na bãw a.

⁴A Naaŋmɩn Vʋʋrʋ n'ʋ ír mɛ̃, a Kpɛnʋ-za-sob pɩɛlʋ n'a so ɩ̃ vʋʋrɛ.

⁵Fʋ̃ʋ na na tʋ̃ɔ́ a, fʋ̃ʋ wul a ɩ̃ dem na bɛ de a. Cɔbrɩ tɩ tuori taa!

⁶Nyɛ̃, mãa nɩ fʋ̃ʋ zɛ̃ n taa a Naaŋmɩn niŋé, a mãa mɩ̀ a, yawra n'a bɛ mɛ n mɛ̃.

⁷A na ɩ lɛ a, a bɛ tɛr kɛ́ fʋ màwr a ɩ̃ niŋé ɩ, Mɩ̀ ta tɩɛrɛ k'ɩ̃ɩ bɔbr'a k'ɩ̃ɩ dĩ nɩ fʋ a ɩ̃ fãw ɛ.

⁸Ɛcɛ fʋ ƴɛ̀r'a ƴãw a ɩ̃ tobe pʋɔ, ɩ̃ cãà wone fʋ yere:

⁹«Ɩ̃ vɩɛl'a, ɩ̃ bɛ tɛr yel-bier ɛ, ɩ̃ zaa n'ɩ ŋa, faalʋ za bɛ be ɩ̃ zie ɩ.

¹⁰Ɛcɛ a Naaŋmɩn cãà na yel k'ɩ̃ɩ sãw na, ɛ́ ɩrɛ mɛ̃ mɛ̃ a ʋ dɔ̃ sob a.

¹¹Ʋ ƴãw nɩ kpule a ɩ̃ gbɛ́ɛ ƴãw ɛ́ piwre a ɩ̃ ɩ-ɩrɩ za.»

¹²A ka a, Zɔb i, ɩ̃ yel kʋ̀ b, fʋ bɛ tɛr yel-mɩŋa ɩ, bʋ̃ʋ n'ʋ vɛ̃, a Naaŋmɩn ɩ n kpɛ̃ɛ zuo a nɩsaal.

¹³Bʋnʋ ƴãw n'a fʋ bɔbr ʋ nɔhaarʋ ʋ na bɛ sɔwr a fʋ sowru a?

¹⁴Naaŋmɩn mɩ́ ƴɛ̀r'ɩ à ŋá, ɛ́ lɛb ƴɛ̀r à ŋá, ɛ́ a nɩbɛ bɛ cɛlɛ be ɩ.

¹⁵Ʋ mɩ́ ƴɛ̀r'ɩ zánʋ pʋɔ, tɩ̃ɩsɔw yel-nyɛra pʋɔ, a lɛn daar a nɩsaalbɛ na mɩ́ gúr kpalɩtam gã a, a lɛn daar bɛ na mɩ́ gúr gã a bɛ bʋ̃-gana pʋɔ a.

¹⁶Lɛ n'a ʋ mɩ́ yuo a nɩsaalbɛ tobe, ɛ́ ƴɛ̀r a kpãàfʋ ƴɛ̀r-bie kʋ̀ bɛ a nʋɔr kʋ:

¹⁷k'aa nɩsaalbɛ tʋ̃ɔ́ bɛr a bɛ ɩb, k'aa gãdaa ta ɩrɛ pɔ̀lʋ ɛ.

¹⁸À ŋá n'a ʋ mɩ́ gù a bɛ nyɔ-vʋʋrʋ a bɔw-zɩɛ ƴãw, ɛ́ bɛ sàw a kafin páw bɛ ɩ.

¹⁹Ɛcɛ, a nɩsaal bʋ̃-gana zu n'a a Naaŋmɩn mɩ́ kpãa ʋ nɩ a 'wɔbrʋ: lɛ n'a a ƴã-tʋlʋ mɩ́ ɩ ʋ màwr kʋralɛ,

²⁰a bʋ̃-dɩra mɩ́ ɩrɛ ʋ nɩ tiiru, bʋ̃-dɩ-nʋ̃ɔ̀ vʋla za bɛ mɩ́ cãà kpɩɛr ʋ ɛ.

²¹Ʋ mɩ́ sɩrɛ na, ɛ́ a ʋ kɔbɛ na bɛ tɩ sãá a, mɩ́ ƴaw na yi sãá.

²²Lɛ n'a ʋ mɩ́ tɩ cɛ a bɔw-zɩɛ yɩ̃ɛlɛ, ɛ́ a ʋ nyɔ-vʋʋrʋ ɩ mɛ̃ ʋ be n a nɩ-kʋrbɛ nuru pʋɔ a.

²³Ɛcɛ a nɩsaal wa ɩ mɛ̃ ʋ nyɛ̃ nɩ malkɩ, malkɩ-been a Naaŋmɩn malkɩ túr pʋɔ, ʋ wul ʋ a sɔ́r dẽdẽ,

²⁴ʋ zɔrɛ a ʋ nɩbaalʋ ɛ́ yel a Naaŋmɩn: «Ta bɛr ʋ ʋ siw a bɔw-zɩɛ pʋɔ ɩ, ɩ̃ nyɛ̃ nɩ sã-ya a ʋ ƴãw» a,

²⁵a lɛn daar, a nɩsaal mɩ́ lɛb'a kpɛmɛ, ʋ mɩ́ lɛb'a pɔl mɛ̃ a ʋ pɔ̀lʋ daarɩ́ a.

²⁶Ʋ mɩ́ puor'ɩ a Naaŋmɩn, ʋ pɛlɩ pʋɔ de a ʋ puoru. Nʋ̃ɔ̀ cɛlsɩ n'a ʋ mɩ́ ŋmɛ wa n a Naaŋmɩn niŋé, ʋl na mɩ́ ɩ a nɩsaal ʋ lɛb ŋmɛ̃ ʋ ŋmɛ̃a a.

²⁷Ʋ mɩ́ yiele nɩ a nɩbɛ niŋé yere nɩ: «Ɩ̃ tɩ maal'ɩ yel-bier, a ɩ̃ ɩb bɛ tɩ tu sɔ́r ɛ, ɛcɛ a Naaŋmɩn bɛ dɔwrɩ mɛ̃ mɛ̃ a lɛ a na tɩ sɛw taa nɩ a ɩ.

²⁸Ʋ faa nɩ a ɩ̃ nyɔ-vʋʋrʋ a bɔw-zɩɛ nʋɔrɩ́, k'ɩ̃ɩ cãà be nyɛrɛ a cãà.»

²⁹Nyɛ̃, à á ŋá za n'a a Naaŋmɩn ɩrɛ a nɩsaal ƴãw, mɩ́ ɩ gb'a ayi, gb'a ata,

³⁰k'ʋʋ ír ʋ a bɔw-zɩɛ pʋɔ, k'ʋʋ caalɩ ʋ nɩ a nɩ-vʋbɛ cãà.

³¹Zɔb i, cɛlɛ be, bɛr wõ a ɩ̃ ƴɛ̀rʋ, ɩ gbili, ɩ̃ cãà na tɛr ƴɛ̀rʋ a fʋ zie.

³²Fʋ̃ʋ wa tɛr sɔwfʋ na sɔw a, fʋ̃ʋ ƴɛ̀r, bʋ̃ʋ n'ʋ vɛ̃, ɩ̃ bɔbr'a kɛ́ fʋ nãá tɛr yel-mɩŋa.

³³Ɛcɛ, fʋ̃ʋ bɛ wa tɛr sɔwfʋ a, fʋ̃ʋ bɛrɛ wone a ɩ̃ ƴɛ̀rʋ, ŋmãa vʋʋrʋ, ɩ̃ɩ na zanɩ nɩ fʋ nɩ a yã-bãwfʋ.