Read Dagara, Northern Zɔb 36 Bible Online

Zɔb 36 - Dagara, Northern bible

Zɔb 36

¹A Elihu tɩ cãà na cow a ʋ ƴɛ̀rʋ yel:

²Cãà alɛ blã, Zɔb i, ɩ̃ wul fʋ yã: ƴɛ̀rʋ cãà nɩ be ɩ̃ na ƴɛ̀r kpɛ a Naaŋmɩn.

³Ɩ̃ na wul nyɩ nɩ lɛ a ɩ̃ bãwfʋ na ɩ kpɛ̃ɛ a, nɩ a lɛ a ɩ̃ Íre na tɛr yel-mɩŋa a.

⁴Sɩza, a ɩ̃ ƴɛ̀rʋ bɛ ɩ ziri ɛ, nɩr na sɩrɩ bãw a n'ʋ àr kɔw fʋ.

⁵Nyɛ̃, Naaŋmɩn kpɛmɛ na zuo nɩ a nɩr jewru, ʋ so nɩ bom za, a lɛ ʋ na mɩ́ yel a bɛ tɛr lɩɛb-bɛrʋ ɛ.

⁶Ʋ bɛ mɩ́ bɛr a nɩ-faa ʋ vʋʋrɛ ɩ, ɛcɛ a bɛlɩ dem bɛ na dɔwrɛ a, ʋ mɩ́ wul'ɩ a bɛ yel-mɩŋa.

⁷Ʋ bɛ ŋmɛlɛ kpaar cɔwr a nɩ-mɩn ɛ. Tɩ mɩ̀ ƴɛ̀r a na-mɩnɛ na zɩ̃ naalʋ-dà-kɔw zu a ƴɛ̀rʋ. A Naaŋmɩn zɩɩlɩ bɛ na k'aa bɛ naalʋ kɔwrɩ. Ɛcɛ bɛl mɩ́ ɩrɛ nɩ pɔ̀lʋ.

⁸Bɛlɛ n'ɩ bɛ ŋan ɩ nɩ-pàwrɩ bɛ 'lẽ nɩ bɛ bamɛ, bɛ be n kpɩɛrʋ pʋɔ.

⁹À ŋá n'a a Naaŋmɩn mɩ́ wul bɛ a bɛ ɩ-faa: al zũú a, bɛ gaar'ɩ a ʋ zie.

¹⁰Ʋ yuo nɩ a bɛ tobe kɛ́ bɛ wõ a ʋ kpãàfʋ, ʋ yel bɛ na kɛ́ bɛ bɛr a bɛ ɩ-faa.

¹¹Bɛlɛ wa bɛrɛ wone ɛ́ sàw a Naaŋmɩn so bɛ a, a bibie nɩ a yome na cɛ bɛ a, bɛ na baarɩ a nɩ nʋ̃ɔ̀-kpɛ̃ɛ pʋɔ.

¹²Ɛcɛ bɛlɛ bɛ wa bɛrɛ wone a, kafin n'ʋ na kʋ bɛ, bɛ na kpi na ɛ́ bɛ bãwnɩ a ɩ.

¹³A nɩ-faar bɛl a, bɛl na mɩ́ nyɛ̃ suur kʋ̃ bɛr a, a Naaŋmɩn mɩ́ wa ƴãwnɛ bɛ bamɛ a, bɛ bɛ mɩ́ zɛlɛ ʋ k'ʋʋ bɛr bɛ ɩ.

¹⁴A bɛ daar'a bɛ mɩ́ kpi, ɛ́ a bɛ nyɔ-vʋʋrʋ baarɩ vĩ pʋɔ.

¹⁵Ɛcɛ a sob nɛ bɛ na dɔwrɛ a, a dɔwrʋ n'a a Naaŋmɩn mɩ́ faa nɩ ʋ, ɛ́ kpɩɛrʋ n'a ʋ mɩ́ yuo nɩ a ʋ tobe.

¹⁶A Naaŋmɩn tɩ dãw na ɩ a kpɩɛrʋ zãá nɩ fʋ, ʋʋ kʋ̀ b tɛra a ʋr. Bʋ̃-dɩ-nʋʋr'a mɩ́ tɩ paalɩ a fʋ dɩb tabal.

¹⁷Ɛcɛ bɛ dɩ n fʋ nɩ ƴɛ̀rʋ ƴãw fʋ dɔwrʋ, ɛ́ a dɔwrʋ ʋl na lo a fʋ zu a bɛ tɛr lɩɛb-bɛrʋ ɛ.

¹⁸Gù vla a libir taa wa bɔrɛ fʋ ɛ! ɛ́ a nʋɔr-ŋmɛb bʋ̃-kʋ̀rɩ taa wa sãwnɛ fʋ bɛrɛ ɩ.

¹⁹A fʋ na-bome nɩ a fʋ salm-zɩɛ bɛ zɛ̃ bom ɛ, ɛ́ a fʋ fãw za mɩ̀ kʋ̃ tʋ̃ɔ́ sõw fʋ ɛ.

²⁰Mɩ̀ ta tɩɛrɛ ƴãwn a tɩ̃ɩsɔw ʋl a nɩ-bʋʋrɛ za na na baarɩ a ƴãw ɛ.

²¹Nɩ̃ɛ gù fʋ tʋɔra ta lɩɛbɩ tu a faalʋ pùor ɛ, alɛ n'a na so fʋ be a kpɩɛrʋ pʋɔ.

²²Sɩza n'a, a Naaŋmɩn so bom za a ʋ kpɛnʋ zũú. Wul-wule buor'ʋ na tʋ̃ɔ́ wul vla zuo ʋ?

²³Nɩr be n be piwre a ʋ ɩb bɩɩ? Nɩr be n be na sàw yel ʋ k'ʋʋ maal'ɩ faa a?

²⁴Taa yiire na danɛ a ʋ tome a nɩsaalbɛ za na mɩ́ yiele danɛ nɩ a ɩ!

²⁵A nɩsaalbɛ za jɩ́rɛ a na, ɛ́ nɩr za mɩ́ zãá na ɛ́ nyɛ̃ a.

²⁶Nyɛ̃, a Naaŋmɩn ɩ n kpɛ̃ɛ zuo, tɩ kʋ̃ tʋ̃ɔ́ bãw ʋ pɩɩrɩ ɛ, a ʋ yome nʋɔr bɛ tɛr sɔ́rʋ ɛ.

²⁷Ʋ mɩ́ de nɩ a kʋ̃ɔ a tẽw, tɩ ɩ a lɩɛbɩ a sa-bie.

²⁸Ʋ mɩ́ bɛr'ɩ a saa ʋ yi a zũzuge pʋɔ waar caaa a nɩsaalbɛ za zu.

²⁹Ãa n'ʋ na tʋ̃ɔ́ yel k'ʋʋ bãw nɩ a lɛ a zũzuge na cere a? Nɩ a lɛ a saa na mɩ́ tanɩ a salom zu a?

³⁰Nyɛ̃, ʋlɛ n'ʋ mɩ́ ɩ a saa nyɩwrɩ pàw a salom, ɛ́ ɩ a kʋ̃ɔ paalɩ a kʋ̃ɔ-kpɛ̃ɛ tɩ tɔ a pɛr.

³¹A saa ʋ na mɩ́ tɩr a n'ʋ mɩ́ so a bʋ̃-dɩrɩ ʋr, ɛ́ alɛ n'a ʋ guole nɩ a nɩbɛ.

³²Ʋ tɛr'ɩ a saa a ʋ nuru ayi pʋɔ, ɛ́ wul ʋ a be ʋ na na siw a.

³³A saa-tanʋ n'a mɩ́ yel k'ʋʋ waar'a, ɛ́ a dʋn tɛɛ za mɩ́ bãwnɩ a k'ʋʋ pɩɛl'a.