Read Dagara, Northern Zɔb 42 Bible Online

Zɔb 42 - Dagara, Northern bible

Zɔb 42

¹Lɛ n'a a Zɔb tɩ sɔw a Sore yel:

²Ɩ̃ bãw na kɛ́ fʋ tʋ̃ɔ́ nɩ bom za, ɛ́ fʋ na tʋ̃ɔ́ na ɩ bom za fʋ na bɔbr a.

³Fʋ sowr'a kɛ́ ãa n'ɩ a ʋlɛ nɛ fʋ na cɔbrɩ a yele bin a ɩ cãà, ʋʋ ƴɛ̀rɛ dãbol-ƴɛ̀rʋ sãwnɛ nɩ bɛrɛ a? Sɩza n'a, ɩ̃ ƴɛ̀r'ɩ yele na kpɛmɛ zuo mɛ̃ a ƴɛ̀rʋ, ɛ́ bɛ tɩ bãwnɩ a ɩ.

⁴Fʋ tɩ yere nɩ a ɩ̃ zie: «Bɛrɛ wone, ɛ́ bɛr mɛ̃ ɩ̃ ƴɛ̀r, ɩ̃ na sowri fʋ na fʋ sɔw kʋ̀ m.»

⁵A fʋ ƴɛ̀rʋ bɛ na tɩ ƴɛ̀r ɩ̃ wõ a, al tɛwr ƴãw n'a ɩ̃ tɩ bãw fʋ, ƴɛrɛŋa a, ɩ̃ nyɛ̃ fʋ na nɩ mimir.

⁶Lɛ so, ɩ̃ lɩɛb'ɩ a ɩ̃ ƴɛ̀rʋ ɩ̃ na tɩ ƴɛ̀r a bɛr, ɩ̃ sàw nɩ a ɩ̃ sãwna, ɛ́ siwre ɩ̃ tʋɔra zɩ̃ a tanɛ pʋɔ nɩ a tãpɛlʋ pʋɔ.

⁷A Sore na wa ƴɛ̀r a Zɔb zie baar'a, ʋ yel'ɩ a Elifaazɩ na yi Teman a: «Ɩ̃ nyɛ̃ nɩ nɩ fʋ̃ʋ nɩ a fʋ bárɩ ayi suur. Bʋ̃ʋ n'ʋ vɛ̃, a ɩ̃ ƴɛ̀rʋ nyɩ na ƴɛ̀r a, nyɩ bɛ yel yel-mɩŋa mɛ̃ a lɛ a ɩ̃ tõ-tõ-bie Zɔb na yel a ɩ.

⁸Ƴɛrɛŋa a, nyɩ bɔ nadɛɛ ayopõi nɩ pʋ́rɩ ayopõi cen nɩ tɩ páw nɩ a ɩ̃ tõ-tõ-bie Zɔb. Nyɩ na tɩ de a na maal'ɩ nyɩw-a-za-bàwr a nyɩ ƴãw, ɛ́ a ɩ̃ tõ-tõ-bie Zɔb puori kʋ̀ nyɩ. A ʋl ƴãw n'a ɩ̃ kʋ̃ dɔwrɩ nyɩ a nyɩ gẽgẽ-ƴɛ̀rʋ ƴãw ɛ, nyɩɩm na bɛ yel a yel-mɩŋa a ɩ̃ ƴãw mɛ̃ a lɛ a ɩ̃ tõ-tõ-bie Zɔb na yel a.»

⁹A Elifaazɩ na yi Teman, nɩ a Bɩldaadɩ na yi Suwa, nɩ a Sofaar na yi Naama a, tɩ cen na tɩ tu a lɛ a Sore na yel a, ɛ́ a Sore tɩ bɛr wõ a Zɔb puoru.

¹⁰A Zɔb na tɩ puore kʋ̀rɛ a ʋ bárɩ a, a Sore tɩ lɛb'a maalɩ a ʋ yele ƴãw. Mɔ̃ mɩ̀, a Sore tɩ ɩ n a Zɔb bʋ̃-tɛrɩ ʋ na tɩ dãw tɛr a, a yãwmɛ dɔwlɩ gb'a ayi.

¹¹A ʋ yɛbr nɩ a ʋ yeepuuli nɩ a bɛlɩ dem za na tɩ dãw bãw ʋ a, tɩ wa na wa nyɛ̃ ʋ. Bɛ tɩ lãwnɩ ʋ na dɩ ɛ́ kõ ƴãw ʋ, ɛ́ mɔwl'ʋ a dɔwrʋ al za a Sore na tɩ ɩ ʋ nyɛ̃ a ƴãw. Ŋa za mɩ́ tɩ kʋ̀ n a Zɔb salm-pla libir nɩ salm-zɩɛ nũ-tʋʋr.

¹²A Sore tɩ maal'ɩ a Zɔb zuo a dãwdãw. Ʋ tɩ tɛr'ɩ píir tùr-pie nɩ anaar (14 000) nɩ nyɔ̃wmɩ túr-ayʋɔb (6 000), ni-kʋ́ɔrɩ pɛ́ɛ túr (1 000) nɩ bòn-nyamɛ túr (1 000).

¹³Ʋ mɩ̀ tɩ tɛr'ɩ bidɛbr ayopõi nɩ pɔwyaar ata.

¹⁴Ʋ tɩ por'ɩ a pɔwya-kpɛ̃ɛ yúor kɛ́ Naŋmam, a ayi sob kɛ́ Kanɛl tɩ-puuru, ɛ́ a ata sob kɛ́ Mimi-laara.

¹⁵Pɔwbɛ bɛ tɩ be be vɩɛl man a Zɔb pɔwyaar a tẽw za pʋɔ ɩ. A bɛ sãà tɩ kʋ̀ bɛ nɩ a gbã-dɩ-bome lãwnɩ a bɛ yɛ-dɛbr.

¹⁶Al pùorí, a Zɔb tɩ cãà na maalɩ yome lɩz'a ayopõi (140) a tẽw zu, nyɛ̃ a ʋ bibiir nɩ a ʋ yan nɩ a ʋ yãw-suwli gb'a ayi sob.

¹⁷A Zɔb tɩ kor'ɩ yaga, ʋ tɩ dɩ na sɛw ɛ́ pãa kpi.