Read Dagara, Northern Zɔb 5 Bible Online

Zɔb 5 - Dagara, Northern bible

Zɔb 5

¹Ŋmɛ cɛl kaa, ãa n'ʋ na sɔw fʋ? Malkɩ buor zie n'a fʋ na ƴɛ̀rɛ?

²Suur'a mɩ́ kʋ a dãbol sob, ɛ́ nyuur kʋ a gẽgemi sob.

³Ɩ̃ tɩ nyɛ̃ nɩ dãbol sob a yele za na cere vla a, ɛcɛ ɩ̃ tɩ ŋmɛ na ƴãw a ʋ yir daadaalɛ, yel:

⁴«A ʋ bibiir, bɛ taa nyɛrɛ sõwfʋ kãw za ɩ, bɛ dɩ n bɛ ƴɛ̀rʋ, ƴãw bɛ kũu-dɔwrʋ ɛ́ nɩr taa ƴɛ̀rɛ sɔwr ɛ!

⁵A bʋ̃-kʋ́ɔrɩ ʋ na de a, a maalɛ nɩ-yoru! Bɛlɛ saa mɩl gʋʋr pàw a a, bɛ̃ɛ cen tɩ de a! A nɩ-foli, bɛ de a ʋ bʋ̃-tɛrɩ za!»

⁶Bʋ̃ʋ n'ʋ vɛ̃, tẽsɔw bɛ n'a a faalʋ yire ɩ, tẽw bɛ n'a a nãw-woro mɩ́ bul yi ɛ.

⁷Ɛcɛ nãw-woro ƴãw n'a a nɩsaal dɔw, mɛ̃ a vũu-zɛlɛ na be saa-zu ƴaw-dob ƴãw a.

⁸Mãa tɩ n'ɩ fʋ̃ʋ a, Naaŋmɩn zie n'a ɩ̃ nãá ƴɛ̀rɛ, ʋlɛ n'ʋ ɩ̃ nãá tɩ manɩ a ɩ̃ yel kʋ̀.

⁹Ʋlɛ n'ʋ maalɛ yel-bɛrɛ na bɛ tɛr bãwfʋ a, nɩr kʋ̃ tʋ̃ɔ́ sɔ́r a ʋ nɔ-ɓãa-yele ɩ.

¹⁰Ʋlɛ n'ʋ mɩ́ ƴãw a saa mĩ ƴãw a tẽw za, ɛ́ ƴãw a sa-bie lo a póru pʋɔ.

¹¹Ʋlɛ n'ʋ mɩ́ zɛw a bɛlɩ dem bɛ na siwri a, ɛ́ ɩ a pʋ-sãwnɩ dem bɛ nyɛ̃ a faafʋ.

¹²Ʋlɛ n'ʋ mɩ́ sãw a cɩbɛ dem pʋ-tɩɛrʋ bɛr, bɛ bɛ mɩ́ tʋ̃ɔ́ ɩ a lɛ bɛ na bɔbr kɛ́ bɛ ɩ a ɩ.

¹³Ʋlɛ n'ʋ mɩ́ nyɔw a yã-bãwnbɛ a bɛ cɩbɛ bɛrɩ pʋɔ, ɛ́ mɩ́ de niwn bãw a nɩsaal-libelibe pʋ-tɩɛrʋ.

¹⁴Bɛ mɩ́ gbõgbore nɩ lige pʋɔ a mʋ̃tɔ̃-tuo ɛ́ bɔblɛ a mʋ̃tɔ̃-tuo mɛ̃ tɩ̃ɩsɔw a.

¹⁵Ɛcɛ Naaŋmɩn mɩ́ faa nɩ a nɩr a kanyir na baar'a a bɛ nuru pʋɔ, ɛ́ ír a nã́w sob a fãw dem nuru pʋɔ.

¹⁶À ŋá n'a tɩɛrʋ mɩ́ lɛb be be a bãbàal ƴãw, ɛ́ a ɩ-fa-maalbɛ pàw a bɛ nɛ́ɛ.

¹⁷Nyɛ̃: zu-nʋ̃ɔ̀ sob'ɩ a sob nɛ a Naaŋmɩn na kpãanɛ a. A na ɩ lɛ a, taa zawrɛ a wulu a kpɛnʋ-za-sob na kʋ̀rɛ fʋ a ɩ.

¹⁸Naaŋmɩn n'ʋ mɩ́ ƴãw a natɩr ɛ́ lɛb 'lẽ, a ʋ nũu n'ʋ mɩ́ ŋmɛ ƴãw a bàalʋ ɛ́ lɛb sanɩ.

¹⁹Gb'a à ŋá za, ʋ na faa fʋ nɩ a kpɩɛrʋ pʋɔ, ɛ́ a baarʋ daar a, a faa bɛ lɛb páwr fʋ ɛ.

²⁰A kɔ̃ daar a, ʋ kʋ̃ sàw fʋ kpi ɛ, ɛ́ a zɛbr pʋɔ, ʋ na faa nɩ a fʋ nyɔ-vʋʋrʋ.

²¹Ʋ na piw fʋ na tɛr a gɛgɛ-ƴɛ̀rʋ ƴãw, ɛ́ ɩ fʋ bɛr dɛ̃bɩ̃ɛ a zie sãwfʋ daar.

²²Fʋ tobr kʋ̃ ka a zie na sãw a nɩ a kɔ̃ ƴãw ɛ, fʋ kʋ̃ zɔrɛ a wɛ-dʋ̃-faar dɛ̃bɩ̃ɛ ɩ.

²³Fʋ kʋ̃ bãw a yele á ŋá na mɩ́ sãwnɛ a fʋ póru a ɩ: a kʋsɛbɛ bɛ na mɩ́ lɔb ƴãw a, nɩ a dʋn na mɩ́ tɔlɛ a.

²⁴Fʋ na bãw nɩ a ƴã-ɓaarʋ a fʋ yir za pʋɔ. Fʋ̃ʋ wa jɩ́rɛ a fʋ dʋn kaar a, a za na be n be.

²⁵Fʋ na nyɛ̃ nɩ a fʋ bibiir bɛ yãwmɛ bɛ tɛr vuo ɩ, ɛ́ a bɛ yan ɩ mɛ̃ póru pʋɔ mʋ̃ɔ a.

²⁶Fʋ na tɛr'ɩ fãw tɩ ta n a fʋ kũu daar mɛ̃ ble zuru bɛ na 'lẽ ɓã taa a bʋ̃-dieri-deb daar a.

²⁷Nyɛ̃, tɩ zanɩ nɩ a yel ŋa tɩ tɔ: à ŋá n'a ʋ sɩrɩ ŋmɛ̃, bɛr wõ ɛ́ ɩ ʋ sõw fʋ.