Read Dagara, Northern Sɛb-sõw yielu 103 Bible Online

Sɛb-sõw yielu 103 - Dagara, Northern bible

Sɛb-sõw yielu 103

¹Daviir yielu kãw n'ʋ. Ɩ̃ sɩ́ɛ ɛ, danɛ a Sore, a ɩ̃ pʋɔ za, ʋ danɛ a ʋ yo-sõw!

²Ɩ̃ sɩ́ɛ ɛ, danɛ a Sore, taa yiire a ʋ maalʋ been kãw za bɛrɛ ɩ.

³Ʋlɛ n'ʋ mɩ́ dɩ a fʋ sãwna suur kʋ̀ b, ɛ́ sanɩ a fʋ bàalʋ za.

⁴Ʋ mɩ́ ya na de a fʋ nyɔ-vʋʋrʋ a bɔw-zɩɛ zie, ɛ́ tɛr nɔ̃wfʋ nɩ su-ɓaarʋ ɩb yaga a fʋ zie.

⁵Ʋ mɩ́ paalɩ fʋ na nɩ maalʋ a fʋ nyɔ-vʋʋrʋ daar, ɛ̀ fʋ mɩ́ lɛb pɔl pili mɛ̃ a sɩla a.

⁶A Sore mɩ́ dɩ n a ƴɛ̀rʋ a tu yel-mɩŋa, a bɛlɩ dem za bɛ na dɔwrɛ a, ʋ mɩ́ wul'ɩ a bɛ yel-mɩnʋ.

⁷Ʋ wul'ɩ a ʋ pʋ-tɩɛrʋ sɛ́ɛ Moyiir, ɛ́ wul a ʋ gãda-tome a Ɩsɩrayɛl nɩbɛ.

⁸A Sore ɩ n su-ɓaarʋ sob nɩ nɩbaal-zɔrɛ, a ʋ suur bɛ páwr ɛ, ʋʋ ɩ nɔ̃wfʋ tɛwr.

⁹Ʋ bɛ mɩ́ zɛbr kʋralɛ ɩ, mɩ̀ bɛ mɩ́ nyɛ̃ suur a bɛ tɛr baarʋ ɛ.

¹⁰Ʋ bɛ mɩ́ ɩ a kpɛ tɩ man nɩ a yel-bebe tɩ na maalɩ a ɩ, ʋ bɛ mɩ́ dɔwrɩ tɩ man nɩ a tɩ sãwna ɩ.

¹¹Mɛ̃ a lɛ a salom na do gãw a tẽw a, lɛ n'a a ʋ nɔ̃wfʋ ɩ kpɛ̃ɛ a bɛlɩ dem na zɔrɛ ʋ a zie.

¹²Mɛ̃ a lɛ a mʋ̃tɔ̃w puru zie na zãá nɩ a kpɛb zie a, lɛ n'a ʋ mɩ́ ɩ a tɩ sãwna a zãá nɩ tɩ.

¹³Mɛ̃ a lɛ sãà na mɩ́ zɔrɛ a ʋ bibiir nɩbaalʋ a, lɛ n'a a Sore zɔrɛ a bɛlɩ dem na zɔrɛ ʋ a nɩbaalʋ.

¹⁴Mɛ̃ ʋ taa bãw ʋlɩ bom nɛ bɛ na maal'ɩ tɩ a, ʋ bɛ yiiri tɩ na ɩ tanɛ a ɩ.

¹⁵Mɛ̃ a nɩsaal! A ʋ nyɔ-vʋʋrʋ ɩ na mɛ̃ a mʋ̃ɔ a, ʋ ŋmɛ̃ na taa nɩ a póru pʋɔ va-puuru. Ʋ mɩ́ tĩ na pure,

¹⁶al pùorí, a sɛsɛb fu ŋmɛ, ʋ tɔl, bɛ kʋ̃ lɛb bãw a be ʋ na tɩ dãw àr a ɩ.

¹⁷Ɛcɛ a Sore nɔ̃wfʋ be n be koro kãw za, ɛ́ na be be kʋralɛ a bɛlɩ dem na zɔrɛ ʋ a zie. Ɛ́ a ʋ mɩnʋ be a bɛ bibiir bibiir ƴãw,

¹⁸a bɛl na tuur a ʋ wõ-taa nɛ́ɛ a, ɛ́ tɩɛrɛ kɛ́ bɛ ɩrɛ a lɛ ʋ na yel a.

¹⁹A Sore bin nɩ a ʋ naalʋ-dà-kɔw a salom zu, ʋ dɩrɛ nɩ naalʋ bom za zu.

²⁰Nyɩ danɛ a Sore, nyɩɩm ʋ malkɩ mɩnɛ ɛ, nyɩɩm na mɩ́ ƴãw fãw ɩrɛ a lɛ ʋ na yel a, ʋʋ mɩ́ ƴɛ̀rɛ wa báarɛ nyɩ sàw a ʋ nʋɔr a.

²¹Nyɩ danɛ a Sore, nyɩɩm ʋ tõ-tõ-biir na yãwmɛ bɛ dɩ vuo a, nyɩɩm na maalɛ a ʋ pʋ-tɩɛrʋ a.

²²Nyɩɩm za ʋ na ír a, nyɩ danɛ a Sore a ziir za ʋ na dɩrɛ a naalʋ a. Ɩ̃ sɩ́ɛ ɛ, danɛ a Sore.