Read Dagara, Northern Sɛb-sõw yielu 105 Bible Online

Sɛb-sõw yielu 105 - Dagara, Northern bible

Sɛb-sõw yielu 105

¹Nyɩ puore a Sore yãanɩ, nyɩ íre a ʋ yúor, nyɩ manɩ a ʋ gãda-tome kʋ̀ a nɩ-bʋʋr-yoru.

²Nyɩ yiele a ʋ ƴãw, nyɩ yiele ŋmɩɛr'ɩ bʋ̃-ŋmɩɛrɩ a ʋ ƴãw, nyɩ lɛb manɩ a ʋ nɔ-ɓãa-yele za.

³Nyɩ danɛ nyɩ tʋɔra a ʋ ƴãw, ʋl Naaŋmɩn na ɩ sõw a, nyɩɩm na bɔbr a Sore a, nʋ̃ɔ̀, a kpɩɛr nyɩ.

⁴Nyɩ bɔbr a Sore lãwnɩ a ʋ fãw, nyɩ bɔbr a ʋ niwn nyɛ́b kʋralɛ.

⁵Nyɩɩm, ʋ tõ-tõ-bie Abraham, bʋʋrɛ ɛ, nyɩɩm, Zakɔb bibiir, ʋ na kaa ír a, nyɩ lɛb tɩɛrɩ a nɔ-ɓãa-yele ʋ na maalɩ a, nyɩ lɛb tɩɛrɩ a gãda-tome nɩ a lɛ ʋ na yel k'ʋʋ na ɩ na a.

⁷Ʋlɛ n'ɩ a Sore, a tɩ Naaŋmɩn na dɩrɛ naalʋ a tẽ-daa za zu a.

⁸Ʋ cãà na bãwnɩ a ʋ wõ-taa, a ƴɛ̀rʋ ʋ na ƴɛ̀r nɩbɛ tu-tu-túr ƴãw a.

⁹A wõ-taa ʋ na maal'ɩ a Abraham a n'ʋ, a pɔb ʋ na pɔ a Ɩzaakɩ zie a n'ʋ.

¹⁰Ʋ ɩ na a wõ-taa ŋa ɩ nʋɔr a Zakɔb zie, wõ-taa na bɛ tɛr baarʋ a, a Ɩsɩrayɛl zie,

¹¹a lɛn daar ʋ na tɩ yel à ŋá a: «Ɩ̃ na kʋ̀ b'ɩ a Kanãa tẽw, ʋ na ɩ n a nyɩ sób.»

¹²A lɛn daar, a tɩ sãàkʋm-kore bɛ tɩ saalɩ ɛ, nʋʋrɩ blãle lɛ tɩ nɛbɛ a tẽw pʋɔ.

¹³Bɛ mɩ́ tɩ yi n tẽw ŋa cen tẽw ŋa, yi naalʋ-tẽw ŋa cen naalʋ-tẽw ŋa.

¹⁴Ɛcɛ a Sore bɛ tɩ sàw nɩr na dɔwrɩ bɛ ɩ, ʋ tɩ kpãa nɩ na-mɩnɛ a bɛ ƴãw.

¹⁵Ʋ mɩ́ tɩ yere na: «Nɩr za taa tʋɔr a ɩ̃ nɩ-kabrɩ ɛ, nɩr taa ɩrɛ a kpɩɛr a ɩ̃ ƴɛ̀r-manbɛ ɩ!»

¹⁶Ʋ tɩ ɩ na kɔ̃ lo a tẽw pʋɔ, a bʋ̃-dɩrɩ bɛ tɩ cãà nyɛrɛ ɩ.

¹⁷Ʋ tɩ tõ n nɩr a tɩ sãàkʋm-kore nidaa, Zuzɛb, bɛ na nyɔw da mɛ̃ gbãgbaa a.

¹⁸Bɛ tɩ ƴãw ʋ nɩ bamɛ a gbɛ́ɛ ƴãw, ɛ́ ƴãw ʋ kure bãw a kɔkɔrɩ́,

¹⁹ɛ́ gù a ƴɛ̀rʋ ʋ na ƴɛ̀r a tɩ tu, ɛ́ gù a Sore ƴɛ̀rʋ tɩ wul ʋ na bɛ tɛr sãwna a.

²⁰A Eziptɩ tẽw nãà tɩ ƴãw na bɛ cɛ̀r ʋ bɛr, a nɩ-bʋʋrɛ zu-sob tɩ ƴãw na bɛ yuo ʋ bɛr.

²¹Ʋ tɩ ƴãw na ʋ dɩ nɩ-kpɛ̃ɛnʋ a ʋ yir pʋɔ, ʋ ɩ a ʋ na-bome za kaarɛ,

²²k'ʋʋ tʋ̃ɔ́ wule a tõ-tõ-biir mɛ̃ a lɛ ʋ na bɔbr a, ɛ́ zanɛ nɩ a yã-bãwfʋ a yã-wul-kore.

²³Al pùorí, a Zakɔb tɩ wa n a Eziptɩ tẽw, a Ɩsɩrayɛl tɩ ɩ n a Kam tẽw sãan.

²⁴A Sore tɩ ɩ na a ʋ nɩ-bʋʋrɛ dɔw yɛ̀r yaga, ʋ ɩ na bɛ tɛr fãw zuo a bɛ dɔ̃ dem.

²⁵Ʋ tɩ ɩ na a Eziptɩ tẽw dem tɩɛrʋ lɩɛbɩ, bɛ hɩ̃ɛn a ʋ nɩ-bʋʋrɛ, ɛ́ ɩrɛ libelibe-ɩb a ʋ tõ-tõ-biir zie.

²⁶Lɛ n'a ʋ tɩ tõ a ʋ tõ-tone Moyiir, nɩ Aarɔ̃ ʋ na tɩ kaa ír a.

²⁷Bɛ tɩ maal'ɩ a ʋ nɔ-ɓãa-yele a Eziptɩ tẽw dem zie, bɛ tɩ maal'ɩ yel-bãw-guuri a Kam tẽw pʋɔ.

²⁸A Naaŋmɩn tɩ ɩ na lige wa, a zie liw ʋ za, ɛ́ nɩr za bɛ tɩ ŋmɛ n ʋ nɔkpɛn ɛ.

²⁹Ʋ tɩ ɩ na a kʋ̃ɔ lɩɛbɩ zɩ̃ɩ, ɩ a zʋ́mɛ́ na be a kʋ̃ɔmɩ́ a, a kpi.

³⁰Lɔn tɩ paal'ɩ a bɛ tẽw za, tɩ lãwnɩ a na-mɩnɛ diru pʋɔ.

³¹A Naaŋmɩn tɩ ƴɛ̀r a, ɛ́ nakpon, nɩ dʋ̃-dʋnɩ yi pàw a Eziptɩ tẽw za.

³²Sa-bi-kube n'a ʋ ƴãw a lɩɛrɩ a saa lo, saa vũu n'a ʋ ƴãw a nyɔw a tẽw za.

³³Ʋ sãw nɩ a bɛ divɛ̃ tɩɩr nɩ a bɛ kãkã-tɩɩr bɛr, ʋ kár'ɩ a Eziptɩ tẽw tɩɩr za bɛr.

³⁴A Naaŋmɩn tɩ ƴɛ̀r a, ɛ́ sãsoge nɩ sãsow-nãa-nʋrɩ wa bɛ dɩ vuo ɩ,

³⁵wa 'wɔb a tẽw mʋ̃ɔ za, wa 'wɔb a tẽsɔw bʋ̃-bul za.

³⁶Ʋ tɩ kʋ n a bidɛb-dãw-dɔwrɩ za a Eziptɩ tẽw dem yie pʋɔ, a bɛ dɛpaal-biir nɩ a bɛ pɔwsɩ-biir.

³⁷Al pùorí, ʋ tɛr a ʋ nɩbɛ yi n, bɛ tuo salm-pla nɩ salm-zɩɛ. A bɛ dɔwlʋ pʋɔ a, nɩr za bɛ tɩ faa lo ɩ.

³⁸Nʋ̃ɔ̀ tɩ kpɛ n a Eziptɩ tẽw dem a Ɩsɩrayɛl nɩbɛ na tɩ yi a bɛ tẽw pʋɔ a, bʋ̃ʋ n'ʋ vɛ̃, bɛ tɩ ƴãw bɛ nɩ dɛ̃bɩ̃ɛ yaga.

³⁹A Naaŋmɩn tɩ yɛ́r'ɩ zũzuwr piw nɩ bɛ, ɛ́ vũu be be, mɩ́ caalɛ bɛ a tɩ̃ɩsɔw.

⁴⁰Bɛ tɩ zɛlɩ nɩ bʋ̃-dɩrɩ, ʋ ɩ caparapɩɩr ƴaw wa lo, ɛ́ ʋ kʋ̀ bɛ salom zu dipɛ̃ bɛ 'wɔb tɩw.

⁴¹Ʋ tɩ ŋmɛ n a pìir puo, a kʋ̃ɔ tɛb yi, a kʋ̃ɔ tɩ zɔrɛ nɩ a wɛja-kpalɛ pʋɔ mɛ̃ man a.

⁴²Ʋ tɩ sɩrɩ na bãwnɩ a ʋ nɔ-sõw, ʋ na tɩ ƴɛ̀r a ʋ tõ-tõ-bie Abraham zie a.

⁴³Pʋ-pɩɛlʋ pʋɔ n'a ʋ tɛr a ʋ nɩbɛ yi n a Eziptɩ tẽw pʋɔ, a bɛlɩ dem ʋ na tɩ kaa ír a tɩ ŋmɩɛr'ɩ nʋ̃ɔ̀ cɛlsɩ.

⁴⁴Ʋ tɩ de nɩ nɩ-bʋʋr-yoru tẽsɔwr kʋ̀ bɛ, bɛ tɩ ír'ɩ a nɩ-bʋʋr-yoru tome tɔnɛ,

⁴⁵kɛ́ bɛ tʋ̃ɔ́ tuur a Sore wulu, ɛ́ sàwr a ʋ nɛ-ƴãwnɩ. Aleluya!