Read Dagara, Northern Sɛb-sõw yielu 119 Bible Online

Sɛb-sõw yielu 119 - Dagara, Northern bible

Sɛb-sõw yielu 119

¹Zu-nʋ̃ɔ̀ dem'ɩ a bɛl a cenu na vɩɛl, ɛ́ bɛ tuur a Sore wulu a.

²Zu-nʋ̃ɔ̀ dem'ɩ a bɛl na mɩ́ tuur a lɛ ʋ na yel a, a bɛl na mɩ́ bɔbr ʋ nɩ bɛ pʋɔ za a.

³Bɛ bɛ maalɛ yel-faa kãw za ɩ, bɛ mɩ́ tuur'ɩ a ʋ sɛ́ɛ.

⁴Fʋ yel'ɩ a tub a na fɛr k'aa nɩbɛ tuur a, kɛ́ bɛ ƴãw fãw tuur a vla a.

⁵A ɩ̃ sɛ́ɛ nãá ɩ sɛ-vɩɛlɩ gã, ɩ̃ tʋ̃ɔ́ tuur a fʋ pʋ-tɩɛrʋ.

⁶Lɛ n'a vĩ kʋ̃ ɩrɛ mɛ̃, mãa wa jɛlɛ a fʋ nɛ-ƴãwnɩ za a ɩ.

⁷Ɩ̃ na puore fʋ nɩ yãanɩ nɩ tɩɛrʋ na vɩɛl a, zanɛ nɩ a lɛ fʋ na dɩ a ƴɛ̀rʋ a tu yel-mɩŋa a.

⁸Ɩ̃ na ƴãw nɩ fãw maalɛ a fʋ pʋ-tɩɛrʋ, taa zawrɛ mɛ̃ bɛrɛ towtow ɛ.

⁹Ŋmɩŋmɩn n'a pɔlbile na ɩrɛ a ʋ cenu vɩɛl? — Ʋlɛ wa sàwr a fʋ ƴɛ̀rʋ a n'a, Sore e.

¹⁰Ɩ̃ bɔbr fʋ na nɩ ɩ̃ pʋɔ za, ta sàw k'ɩ̃ wa bɔr zãá nɩ a fʋ nɛ-ƴãwnɩ ɛ.

¹¹Ɩ̃ maal'a tɛr a fʋ wulu a ɩ̃ socir pʋɔ, k'ɩ̃ɩ taa wa sãwnɛ fʋ ɛ.

¹²Fʋ tɛr'ɩ puoru, Sore e, zanɩ nɩ mɛ̃ a fʋ pʋ-tɩɛrʋ ɩ̃ bãw ʋ.

¹³A lɛ fʋ na dɩ a ƴɛ̀rʋ yel a, ɩ̃ sɔrɛ nɩ a za.

¹⁴Nʋ̃ɔ̀ mɩ́ ɩrɛ mɛ̃ na, ɩ̃ na mɩ́ tuur a lɛ fʋ na yel a, a mɩ́ ɩ na mɛ̃ ɩ̃ tɛr'ɩ a tẽ-daa na-bome za a.

¹⁵Ɩ̃ na tɩɛrɛ nɩ a fʋ tub a na fɛr kɛ́ bɛ tuur a, ɛ́ tuur a sɔ́r fʋ na puo kʋ̀ m a vla.

¹⁶Nʋ̃ɔ̀ ɩrɛ mɛ̃ nɩ yaga, a fʋ pʋ-tɩɛrʋ maalʋ ƴãw, ɩ̃ bɛ yiire a fʋ ƴɛ̀rʋ bɛrɛ ɩ.

¹⁷Mãa na ɩ a fʋ tõ-tõ-bie a, maalɩ mɛ̃ vla ɩ̃ vʋʋrɛ ɛ́ dier a fʋ ƴɛ̀rʋ.

¹⁸Yuo a ɩ̃ mimie, ɩ̃ɩ na nyɛ̃ nɩ a fʋ wulu vɩɛlʋ.

¹⁹Nʋʋra nɛ m a tẽw zu, ta sɔwlɩ a fʋ nɛ-ƴãwnɩ a ɩ̃ zie ɩ.

²⁰Kʋralɛ n'a ɩ̃ mɩ́ kpiir lore bɔbr'ɩ a lɛ fʋ na dɩ a ƴɛ̀rʋ a.

²¹Fʋ vɛlɛ nɩ nũu cɔwr a pɔ̀lʋ dem bɛ ŋa, a nɩ-ŋmɛ-ƴãwnɩ bɛ ŋa na bɔrɛ zãánɛ nɩ a fʋ nɛ-ƴãwnɩ a.

²²Ɩ a zʋmɛ nɩ a ɩ-lab a zãá nɩ mɛ̃, ɩ̃ na ƴãw fãw tuur a lɛ fʋ na mɩ́ yel a ƴãw.

²³Na-mɩnɛ saa mɩ́ zɩ̃ bʋ̀rɛ taa, a mãa fʋ tõ-tõ-bie ƴãw a, ɩ̃ mɩ́ tɛr'ɩ a fʋ pʋ-tɩɛrʋ tɩɛrɛ kʋralɛ.

²⁴A lɛ fʋ na mɩ́ yel a ɩrɛ mɛ̃ nɩ nʋ̃ɔ̀, alɛ n'a wule mɛ̃ a yã.

²⁵Mãa n'ɩ ŋan ɓiile a tanɛ pʋɔ, ɩ k'ɩ̃ lɛb vʋʋrɛ mɛ̃ a lɛ fʋ na yel a.

²⁶Ɩ̃ man nɩ a ɩ̃ nyɔ-vʋʋrʋ kʋ b fʋ sɔw mɛ̃, wul mɛ̃ a fʋ pʋ-tɩɛrʋ ɩ̃ bãw ʋ.

²⁷A fʋ tub a na fɛr kɛ́ bɛ tuur a, ɩ k'ɩ̃ bãw a pɛr, ɛ́ ɩ̃ na tɛr'ɩ a fʋ nɔ-ɓãa-yele tɩɛrɛ.

²⁸A mʋta-kʋ̃ɔ zɔrɛ mɛ̃ na a pʋ-sãwna zũú, nyɔw mɛ̃ k'ɩ̃ lɛb ìr mɛ̃ a lɛ fʋ na yel a.

²⁹Ɩ a ziri sɔ́r ʋ zãá mɛ̃, ɛ́ ɩ k'ɩ̃ bãw a fʋ wulu a fʋ vɩɛlʋ zũú.

³⁰A fʋ pùor-tub'a ɩ̃ kaa ír, a lɛ fʋ na dɩ a ƴɛ̀rʋ a n'a ɩ̃ sàw de.

³¹A lɛ fʋ na yel kʋ̀ m a n'a ɩ̃ tu, Sore e, ta ɩ k'ɩ̃ nyɛ̃ vĩ ɛ.

³²A fʋ nɛ-ƴãwnɩ sɔ́r zu n'a ɩ̃ zɔrɛ, fʋ na ɩ a ɩ̃ yã ʋ yuo a ƴãw.

³³Sore e, wul mɛ̃ a fʋ pʋ-tɩɛrʋ sɔ́r, ɩ̃ɩ na tu ʋ na tɩ baarɩ.

³⁴Ɩ k'ɩ̃ bãw a fʋ wulu pɛr, ɩ̃ɩ na tuur ʋ na, ɩ̃ na ƴãw nɩ fãw tuur ʋ nɩ a ɩ̃ pʋɔ za.

³⁵Ɩ k'ɩ̃ tuur a fʋ nɛ-ƴãwnɩ sɔ́r, bʋ̃ʋ n'ʋ vɛ̃, ɩ̃ nyɛrɛ nɩ a ɩ̃ nʋ̃ɔ̀ a be.

³⁶Ɩ a ɩ̃ socir nɔ̃w a lɛ fʋ na mɩ́ yel a, ʋ ta nɔ̃w a tɔnɛ ɩ.

³⁷Ta sàw a ɩ̃ mimie jɩ́rɛ a yel-foli ɛ, ɩ k'ɩ̃ vʋʋrɛ mɛ̃ a lɛ fʋ na bɔbr a.

³⁸Maalɩ a mãa, fʋ tõ-tõ-bie zie, a nʋɔr fʋ na ƴãw kʋ̀ a bɛlɩ dem na zɔrɛ fʋ a.

³⁹Gù m a zʋmɛ ƴãw, ɩ̃ zɔrɛ a na, a lɛ fʋ na dɩ a ƴɛ̀rʋ a n'a mɩ́ vɩɛl.

⁴⁰Ɩ̃ nɔnɛ nɩ a fʋ tub a na fɛr kɛ́ bɛ mɩ́ tuur a, ɩ k'ɩ̃ vʋʋrɛ a fʋ mɩnʋ zũú.

⁴¹A fʋ nɔ̃wfʋ ɩb, ʋ ta m, Sore e, faa mɛ̃, mɛ̃ a lɛ fʋ na ƴãw a nʋɔr a.

⁴²Bɛlɛ wa tʋʋr mɛ̃ a lɛn daar a, ɩ̃ na bãw nɩ a sɔwfʋ sɔw, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a fʋ ƴɛ̀rʋ ƴãw.

⁴³Sõw mɛ̃ ɩ̃ yere a yel-mɩŋa kʋralɛ, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a lɛ fʋ na dɩ a ƴɛ̀rʋ a ƴãw.

⁴⁴Ɩ̃ na sàwr'ɩ a fʋ wulu kʋralɛ, dɩ̃a nɩ bio.

⁴⁵Ɩ̃ na ɓãá nɩ ƴãw cere, ɩ̃ na bɔbr a fʋ tub a na fɛr kɛ́ bɛ tuur a ƴãw.

⁴⁶Ɩ̃ na ƴɛ̀rɛ nɩ a lɛ fʋ na yel a ƴɛ̀rʋ a na-mɩnɛ niŋé, ɛ́ vĩ kʋ̃ ɩrɛ mɛ̃ ɩ.

⁴⁷Ɩ̃ nɔnɛ nɩ a fʋ nɛ-ƴãwnɩ, a mɩ́ ɩrɛ mɛ̃ nɩ nʋ̃ɔ̀ yaga.

⁴⁸Ɩ̃ tur'ɩ nuru cɔw a fʋ nɛ-ƴãwnɩ ɩ̃ na nɔnɛ a, ɩ̃ tɛr'ɩ a fʋ pʋ-tɩɛrʋ tɩɛrɛ.

⁴⁹Cãà bãwnɩ a fʋ ƴɛ̀rʋ a fʋ tõ-tõ-bie zie, ƴɛ̀rʋ na ɩ k'ɩ̃ ƴãw a ɩ̃ tɩɛrʋ a fʋ ƴãw a.

⁵⁰A mɔwlʋ ɩ̃ na mɩ́ nyɛ̃ a ɩ̃ wʋ̀ʋr pʋɔ a n'ɩ ŋa: a nʋɔr fʋ na ƴãw kʋ̀ m a ɩ na k'ɩ̃ vʋʋrɛ.

⁵¹A pɔ̀lʋ dem ɩ m a la vla vla, ɛcɛ ɩ̃ bɛ gùr pùor cɔw a fʋ wulu ɛ.

⁵²Sore e, ɩ̃ cãà na bãwnɩ a lɛ fʋ na dɩ a ƴɛ̀rʋ a koro za a, ɛ́ mɩ́ nyɛ̃ mɔwlʋ a pʋɔ.

⁵³Suur za mɩ́ kʋrɛ mɛ̃ nɩ a nɩ-faar ƴãw, na mɩ́ zawrɩ a fʋ wulu bɛr a.

⁵⁴A ɩ̃ nʋʋra kpɛb zie ka a, a fʋ pʋ-tɩɛrʋ n'a ɩ̃ tɛr yiele.

⁵⁵Sore e, a tɩ̃ɩsɔw a, ɩ̃ bɛ mɩ́ yiiri a fʋ yele ɩ, ɛ́ mɩ́ tuur a fʋ wulu.

⁵⁶A ɩ̃ bom'ɩ a tub fʋ na bin kɛ́ tɩ tuur a.

⁵⁷Sore e, ɩ̃ yel'a k'aa ɩ̃ bom'ɩ a fʋ ƴɛ̀rʋ ɩ̃ na na tɛr vla a.

⁵⁸A ɩ̃ pʋɔ za n'ʋ ɩ̃ bɔbr'ɩ k'ɩ̃ɩ ɩ nʋ̃ɔ̀ kpɛ b, zɔ ɩ̃ nɩbaalʋ mɛ̃ a lɛ fʋ na ƴãw a nʋɔr a.

⁵⁹Ɩ̃ tɩɛr'ɩ a ɩ̃ ɩb kaa, ɩ̃ bɔbr'a k'ɩ̃ɩ lɛb wa tuur a lɛ fʋ na yel a.

⁶⁰Ɩ̃ bɛ lɛb gùre bom ɛ, ɛ́ páwr a fʋ nɛ-ƴãwnɩ sàwfʋ ƴãw.

⁶¹A nɩ-faar bɛrɩ jil'a koli mɛ̃, ɛcɛ ɩ̃ bɛ yiiri a fʋ wulu bɛr ɛ.

⁶²Ɩ̃ mɩ́ ìr'ɩ a tɩ̃ɩsɔw-bɩ̃ɩn k'ɩ̃ɩ puori fʋ yãanɩ, a ƴɛ̀rʋ fʋ na mɩ́ dɩ a tu yel-mɩŋa a ƴãw.

⁶³A bɛlɩ dem za na zɔrɛ fʋ ɛ́ tuur a tub fʋ na bin a, ɩ̃ ɩ n a bɛ tɔ.

⁶⁴Sore e, a fʋ nɔ̃wfʋ paal'ɩ a tẽ-daa, wul mɛ̃ a fʋ pʋ-tɩɛrʋ ɩ̃ bãw.

⁶⁵Sore e, fʋ maalɩ mɛ̃ nɩ vla, a mãa fʋ tõ-tõ-bie, mɛ̃ a lɛ fʋ na tɩ yel a.

⁶⁶Zanɩ nɩ mɛ̃ ɩ̃ bãw a yele jielu, ɛ́ bãw a fʋ nɛ-ƴãwnɩ, bʋ̃ʋ n'ʋ vɛ̃, ɩ̃ ƴãw nɩ a ɩ̃ tɩɛrʋ a ƴãw.

⁶⁷Ɩ̃ na bɛ tɩ wõ tuo sɛr a, ɩ̃ tɩ bɔrɛ na, ɛcɛ ƴɛrɛŋa a, ɩ̃ maalɛ nɩ a lɛ fʋ na yel a.

⁶⁸Fʋ ɩ n nɩ-vla ɛ́ maalɛ a nɩbɛ vla, wul mɛ̃ a fʋ pʋ-tɩɛrʋ ɩ̃ bãw ʋ.

⁶⁹Pɔ̀lʋ dem ŋma ŋma n ziri sãw nɩ a ɩ̃ yúor, ɛcɛ mãa a, a fʋ tub'a ɩ̃ tuur'ɩ ɩ̃ pʋɔ za.

⁷⁰Bɛ bɛ bɔbr kɛ́ bɛ bãw bom pɛr towtow ɛ, ɛcɛ mãa a, a fʋ wulu tub ɩrɛ mɛ̃ nɩ nʋ̃ɔ̀ yaga.

⁷¹Mãa zie a, a kpɩɛrʋ ɩ̃ na nyɛ̃ a ɩ n bʋ̃-vla, a wul mɛ̃ nɩ a fʋ pʋ-tɩɛrʋ ɩ̃ bãw.

⁷²A wulu na yi a fʋ nʋɔrɩ́ a, vɩɛl'ɩ a ɩ̃ zie zuo salm-zɩɛ nɩ salm-pla libie tu-tu-túr.

⁷³A fʋ nuru n'a maalɩ mɛ̃, ɛ́ mɩ́ nyɔw mɛ̃ ɩ̃ àr. Ɩ k'ɩ̃ tɛr yã, tʋ̃ɔ́ zanɩ a fʋ nɛ-ƴãwnɩ.

⁷⁴A bɛlɩ dem na zɔrɛ fʋ a, bɛlɛ mɩ́ wa nyɛ̃ m a, nʋ̃ɔ̀ mɩ́ ɩrɛ bɛ na, ɩ̃ na ƴãw a ɩ̃ tɩɛrʋ a fʋ ƴɛ̀rʋ ƴãw a zũú.

⁷⁵Sore e, ɩ̃ sàw na k'aa fʋ ƴɛ̀rʋ-dɩb tu n yel-mɩŋa, ɛ́ fʋ tɛr yel-mɩŋa fʋ na bɛr mɛ̃ a kpɩɛrʋ pʋɔ a.

⁷⁶A fʋ nɔ̃wfʋ, ʋ́ mɔwlɩ mɛ̃ a ƴɛrɛŋa, mɛ̃ a lɛ fʋ na ƴɛ̀r a mãa, fʋ tõ-tõ-bie zie a.

⁷⁷Tɛr su-ɓaarʋ a ɩ̃ zie, ɩ̃ɩ na vʋʋrɛ na, bʋ̃ʋ n'ʋ vɛ̃, a fʋ wulu ɩrɛ mɛ̃ nɩ nʋ̃ɔ̀ bɛ dɩ vuo ɩ.

⁷⁸Ɩ kɛ̀ vĩ nyɔw a pɔ̀lʋ dem na dɔwrɛ mɛ̃ zawla a. Mãa a, a tub fʋ na bin kɛ́ bɛ tuur a n'a ɩ̃ tɛr tɩɛrɛ.

⁷⁹A bɛlɩ dem na zɔrɛ fʋ a, bɛ lɛb wa a ɩ̃ zie wa bãw a lɛ fʋ na yel a!

⁸⁰A fʋ pʋ-tɩɛrʋ n'a ɩ̃ bɔbr k'ɩ̃ɩ maalɛ nɩ ɩ̃ pʋɔ za, lɛ n'a ɩ̃ kʋ̃ nyɛ̃ vĩ ɛ.

⁸¹Ɩ̃ gù n a fʋ faafʋ tɩ bàl, a fʋ ƴɛ̀rʋ ƴãw n'a ɩ̃ ƴãw a ɩ̃ tɩɛrʋ.

⁸²A ɩ̃ mimie gù n a lɛ fʋ na ƴãw a nʋɔr a tɩ bàl, ɩ̃ sowre: «Debor'a fʋ na mɔwlɩ mɛ̃?»

⁸³Ɩ̃ ɩ na mɛ̃ wɔ-gbãw bɛ na yawlɩ zʋ̀ʋ́r pʋɔ ʋ ko a, ɛcɛ ɩ̃ bɛ yiire a fʋ pʋ-tɩɛrʋ bɛrɛ ɩ.

⁸⁴Nyɔ-vʋʋrʋ bibie a ŋmɩn n'a fʋ cãà bɛr mɛ̃? Debor'a fʋ na dɩ n a bɛlɩ dem na dɔwrɛ mɛ̃ a ƴɛ̀rʋ?

⁸⁵Pɔ̀lʋ dem tuw nɩ bɔw a ɩ̃ ƴãw, ɛ́ a lɛ dɛ bɛ tu a fʋ wulu ɛ.

⁸⁶A fʋ nɛ-ƴãwnɩ za ɩ n yel-mɩŋa. Bɛ dɔwrɛ mɛ̃ nɩ zawla, sõw mɛ̃!

⁸⁷Zaa pʋrɩ, a ɩ̃ yele nãá baarɩ a tẽw zu, ɛcɛ ɩ̃ bɛ zawrɩ a fʋ tub fʋ na ƴãw a bɛr ɛ.

⁸⁸A fʋ nɔ̃wfʋ ƴãw a, ɩ k'ɩ̃ vʋʋrɛ, ɩ̃ɩ na tuur'ɩ a lɛ a fʋ nʋɔr na yel a.

⁸⁹Sore e, kʋralɛ n'a a fʋ ƴɛ̀rʋ be a salom zu bɛ tɛr nãà lɩɛbɩ ɛ.

⁹⁰Yome yome za n'a a fʋ yel-mɩŋa be be. Fʋ maal'ɩ a tẽsɔw, ʋ kpɛmɛ àr.

⁹¹A lɛ fʋ na ƴɛ̀r bin a n'a so bom za be be a dɩ̃a. A tẽ-daa za sɩrɩ na be be a fʋ yele maalʋ ƴãw.

⁹²A fʋ wulu bɛ tɩ n'ɩ a ɩ̃ nʋ̃ɔ̀ a, ɩ̃ nãá ɩ n wʋ̀ʋr tɩ kpi.

⁹³Ɩ̃ bɛ be na yiiri a fʋ tub a na fɛr kɛ́ bɛ tuur a bɛr ɛ, alɛ n'a fʋ mɩ́ ɩ n k'ɩ̃ vʋʋrɛ.

⁹⁴Fʋ̃ʋ so m, faa mɛ̃, bʋ̃ʋ n'ʋ vɛ̃, ɩ̃ bɔ n a fʋ tub a na fɛr kɛ́ bɛ tuur a.

⁹⁵Nɩ-faar gù na kɛ́ bɛ ŋmɛ m lɔb, ɛcɛ a lɛ fʋ na yel a zie n'a mãa cɛlɛ.

⁹⁶Ɩ̃ nyɛ̃ a na, vɩɛlʋ za tɛr'ɩ baarʋ zie, ɛcɛ a fʋ nɔ-ƴãwna bɛ tɛr tɛwfʋ zie ɩ.

⁹⁷Nɔ̃wfʋ bɛ n'a ɩ̃ nɔ̃w a fʋ wulu ɛ! Ɩ̃ mɩ́ tɛr ʋ na tɩɛrɛ a bibie za.

⁹⁸A fʋ nɔ-ƴãwna kʋ̀ m'ɩ yã-bãwfʋ zuo a ɩ̃ dɔ̃ dem, a ɩ̃ bom'ʋ kʋralɛ.

⁹⁹Ɩ̃ bãw a na zuo a ɩ̃ wul-wulbɛ za, ɩ̃ na mɩ́ tɛr a lɛ fʋ na yel a tɩɛrɛ a ƴãw.

¹⁰⁰Ɩ̃ bãw nɩ yã zuo a dɛb-nyamɛ, ɩ̃ na sàwr a fʋ tub a na fɛr kɛ́ a nɩbɛ tuur a ƴãw.

¹⁰¹Ɩ̃ zawr'ɩ a yel-faa sɔ́r loba, k'ɩ̃ɩ tʋ̃ɔ́ de a fʋ ƴɛ̀rʋ.

¹⁰²Ɩ̃ bɛ zawrɩ a lɛ fʋ na dɩ a ƴɛ̀rʋ bin a ɩ, fʋ̃ʋ na n'ʋ wule mɛ̃ a ƴãw.

¹⁰³A lɛ fʋ na yel a nʋmɛ nɩ a ɩ̃ nʋɔrɩ́, a nʋmɛ na gãw sɩwr.

¹⁰⁴A ɩ̃ yã yi n a fʋ tub a na fɛr kɛ́ bɛ tuur a pʋɔ, lɛ so ɩ̃ bɛ nɔ̃w bom za na ɩ ziri a ɩ.

¹⁰⁵A fʋ ƴɛ̀rʋ ɩ n fɩ̃tɩlɛ na caalɛ a ɩ̃ gbɛ́ɛ binu zie a, nɩ cãà na caalɛ a ɩ̃ sɔ́r a.

¹⁰⁶Ɩ̃ pɔ na k'ɩ̃ɩ na tu n a lɛ fʋ na dɩ a ƴɛ̀rʋ nɩ mɩnʋ yel a, ɩ̃ɩ bɛ lɩɛbɛ bɛrɛ ɩ.

¹⁰⁷Bɛ ɩ m a a kpɛ tɩ zuo, Sore e, ɩ k'ɩ̃ lɛb vʋʋrɛ mɛ̃ a lɛ fʋ na yel a.

¹⁰⁸Sore e, sàw de a ɩ̃ puoru mɛ̃ de-kʋ̀b bom a, ɛ́ zanɩ nɩ mɛ̃ a lɛ fʋ na dɩ a ƴɛ̀rʋ yel a.

¹⁰⁹A kũu mɩ́ jɩɛrɛ mɛ̃ nɩ kʋralɛ, ɛcɛ ɩ̃ bɛ yiire a fʋ wulu bɛrɛ ɩ.

¹¹⁰A nɩ-faar ƴãw nɩ bɛra a ɩ̃ nyɔwfʋ ƴãw, ɛcɛ ɩ̃ bɛ taw zãá nɩ a tub fʋ na ƴãw kɛ́ bɛ tuur a ɩ.

¹¹¹A lɛ fʋ na yel a ɩ n na-bom kʋralɛ a ɩ̃ zie, a mɩ́ ɩ na k'ɩ̃ tɛr su-nʋ̃ɔ̀.

¹¹²Ɩ̃ ƴãw nɩ fãw maalɛ a fʋ pʋ-tɩɛrʋ, a ɩ̃ tɔnɛ n'ɩ a lɛ kʋralɛ.

¹¹³Ɩ̃ bɛ nɔnɛ a nɩbɛ a tɩɛrʋ na mɩ́ põ a ɩ, a fʋ wulu n'ʋ ɩ̃ nɔnɛ.

¹¹⁴Fʋ̃ʋ n'ɩ a ɩ̃ sɔwlʋ zie nɩ a ɩ̃ zɛbr-kur-pãgala. Ɩ̃ ƴãw nɩ a ɩ̃ tɩɛrʋ a fʋ ƴɛ̀rʋ ƴãw.

¹¹⁵Nyɩ cen taw zaa a ɩ̃ zie, nyɩɩm yel-fa-maalbɛ bɛ ŋan i, ɩ̃ɩ na sàwr'ɩ a ɩ̃ Naaŋmɩn nɛ-ƴãwnɩ.

¹¹⁶Tɩɛ mɛ̃, mɛ̃ a lɛ fʋ na yel a, ɩ̃ɩ na vʋʋrɛ na. Ta ɩ k'ɩ̃ ƴãw a ɩ̃ tɩɛrʋ a fʋ ƴãw zawla ɩ.

¹¹⁷Ɩ a sob nɛ na tɩɛ mɛ̃ tɛr a, ɩ̃ɩ na nyɛ̃ nɩ a faafʋ, ɩ̃ na mɩ́ bɔbr'ɩ kʋralɛ k'ɩ̃ɩ bãw a fʋ pʋ-tɩɛrʋ.

¹¹⁸Fʋ mɩ́ diw nɩ a bɛlɩ dem na bɛ maalɛ a fʋ pʋ-tɩɛrʋ a bɛr, bʋ̃ʋ n'ʋ vɛ̃, a bɛ libelibe-ɩb ɩ n ziri tɛwr.

¹¹⁹A tẽw zu nɩ-faar ɩ na mɛ̃ sagɛ a a fʋ zie, alɛ n'a so ɩ̃ nɔnɛ a lɛ fʋ na yel a.

¹²⁰Fʋ ɩrɛ mɛ̃ nɩ dɛ̃bɩ̃ɛ, ƴãw a ɩ̃ ƴã-gan za ʋ màwr, a lɛ fʋ na dɩ a ƴɛ̀rʋ yel a mɩ̀ ɩrɛ mɛ̃ nɩ dɛ̃bɩ̃ɛ.

¹²¹Ɩ̃ maal'ɩ a lɛ-na-tu-sɔr nɩ yel-mɩnʋ a, ta bɛr mɛ̃ kʋ̀ a bɛlɩ dem na dɔwrɛ mɛ̃ a ɩ.

¹²²Ɩ k'ɩ̃ bãwnɩ a k'aa yele za na tu n vla. A pɔ̀lʋ dem, bɛ taa wa dɔwrɛ mɛ̃ ɩ.

¹²³A ɩ̃ mimie piwr'ɩ a fʋ sõwfʋ bàl, nɩ a faafʋ fʋ na yel a.

¹²⁴Ɩrɛ a mãa fʋ tõ-tõ-bie zie mɛ̃ a lɛ a fʋ nɔ̃wfʋ na ŋmɛ̃ a, wul mɛ̃ a fʋ pʋ-tɩɛrʋ ɩ̃ bãw.

¹²⁵Ɩ̃ ɩ n a fʋ tõ-tõ-bie: kʋ̀ m yã, ɩ̃ tʋ̃ɔ́ bãw a lɛ fʋ na yel a vla.

¹²⁶Ɩ ɩb kãw, Sore e, a daar ta na: bɛ zawr'ɩ a fʋ wulu.

¹²⁷Alɛ so ɩ̃ nɔnɛ a fʋ nɛ-ƴãwnɩ zuo a salm-zɩɛ, zuo a salm-zɩɛ ʋl na vɩɛl zuo a salm-zɩɛ za a.

¹²⁸A fʋ tub a na fɛr kɛ́ bɛ tuur a, ɩ̃ nyɛ̃ nɩ a za a ɩ yel-mɩŋa, yel za na ɩ ziri a, ɩ̃ bɛ nɔnɛ ʋ towtow ɛ.

¹²⁹A lɛ fʋ na yel a vɩɛl'a bɛ dɩ vuo ɩ, alɛ so ɩ̃ ƴãw fãw tuur a.

¹³⁰A fʋ ƴɛ̀rʋ bãwfʋ waar'ɩ nɩ cãà, ʋ mɩ́ kʋ̀ n yã a nɩbɛ na bɛ tɛr a mɩnɛ kãw a.

¹³¹Ɩ̃ dier'ɩ a fʋ ƴɛ̀rʋ mɛ̃ kʋ̃ɔ n'a ɩ̃ nyúur a, ɩ̃ na nɔnɛ a fʋ nɛ-ƴãwnɩ vũuvũu a ƴãw.

¹³²Lɩɛb kaa mɛ̃, ɛ́ zɔ ɩ̃ nɩbaalʋ, mɛ̃ a lɛ fʋ na yel kɛ́ fʋ na ɩ n a bɛlɩ dem na nɔnɛ fʋ a zie a.

¹³³A lɛ fʋ na yel a, a ɩ ɩ̃ ɓãá ƴãw cere, ta sàw yel-faa kãw za wa tʋ̃ɔ́ mɛ̃ ɩ.

¹³⁴Faa mɛ̃ a nɩbɛ na dɔwrɛ mɛ̃ a nuru pʋɔ, ɩ̃ɩ na sàwr'ɩ a tub fʋ na ƴãw kɛ́ bɛ tuur a.

¹³⁵Tɛr niw-vla a mãa, fʋ tõ-tõ-bie zie, wul mɛ̃ a fʋ pʋ-tɩɛrʋ ɩ̃ bãw ʋ.

¹³⁶A ɩ̃ mimie zɔrɛ nɩ mʋta-kʋ̃ɔ, bɛ na bɛ sàwr a fʋ wulu a ƴãw.

¹³⁷Sore e, fʋ tɛr'ɩ yel-mɩŋa, ɛ́ a ƴɛ̀rʋ fʋ na dɩ a tori.

¹³⁸A lɛ fʋ na yel a, a mɩnʋ nɩ a yel-mɩŋa tɔr za n'a a tu.

¹³⁹A nɔ̃wfʋ ɩ̃ na nɔnɛ fʋ a dɩrɛ mɛ̃ na mɛ̃ vũu a, a ɩ̃ dɔ̃ dem na yiire a fʋ ƴɛ̀rʋ bɛrɛ a ƴãw.

¹⁴⁰A fʋ ƴɛ̀rʋ sɩrɩ na tɛr yel-mɩŋa, ɩ̃ nɔnɛ ʋ nɩ yaga, a mãa fʋ tõ-tõ-bie.

¹⁴¹Ɩ̃ ɩ n pʋrɩ ɛ́ bɛ bɛ ŋmɛlɛ kaar mɛ̃ ɩ, ɛcɛ ɩ̃ bɛ yiiri a fʋ tub a na fɛr kɛ́ bɛ tuur a bɛr ɛ.

¹⁴²A fʋ mɩnʋ ɩ n mɩnʋ na be be kʋralɛ a, ɛ́ a fʋ wulu ɩ yel-mɩŋa.

¹⁴³Kpɩɛrʋ nɩ pʋl-vʋ̃ɔ nyɔw mɛ̃ na, ɛcɛ a fʋ nɛ-ƴãwnɩ ɩrɛ mɛ̃ nɩ nʋ̃ɔ̀.

¹⁴⁴A lɛ fʋ na yel a ɩ n yel-mɩŋa kʋralɛ, ɩ k'ɩ̃ bãw a pɛr, ɩ̃ɩ na vʋʋrɛ na.

¹⁴⁵Sore e, ɩ̃ bʋɔlɛ fʋ na nɩ ɩ̃ pʋɔ za, sɔw mɛ̃, ɩ̃ na maal'ɩ a lɛ fʋ na bɔbr a.

¹⁴⁶Ɩ̃ bʋɔlɛ fʋ na, faa mɛ̃, ɛ́ ɩ̃ na sàwr'ɩ a lɛ fʋ na yel a.

¹⁴⁷A zie bɛ mɩ́ vɩɛ sɛr ɛ, ɩ̃ɩ kone bʋɔlɛ fʋ, ɩ̃ mɩ́ ƴãw nɩ a ɩ̃ tɩɛrʋ a fʋ ƴɛ̀rʋ ƴãw.

¹⁴⁸Ɩ̃ mɩ́ ŋmãa nɩ zie ìr, k'ɩ̃ɩ tʋ̃ɔ́ tɩɛrɛ a fʋ wulu ƴɛ̀r-bie.

¹⁴⁹Sore e, a fʋ nɔ̃wfʋ zũú a, wõ a ɩ̃ bʋɔlʋ, ɛ́ ɩ k'ɩ̃ vʋʋrɛ, a tu a lɛ fʋ na dɩ a ƴɛ̀rʋ yel a.

¹⁵⁰A nɩbɛ na zɔrɛ tuur a faalʋ a pɩɛlɛ mɛ̃ na, ɛcɛ bɛ zãá nɩ nɩ a fʋ wulu.

¹⁵¹Sore e, fʋ̃ʋ a, fʋ pɩɛlɩ mɛ̃ na, ɛ́ a fʋ nɛ-ƴãwnɩ za ɩ yel-mɩŋa.

¹⁵²Koro za n'a ɩ̃ bãwnɩ k'aa lɛ fʋ na yel a be n be kʋralɛ.

¹⁵³Nyɛ̃ a ɩ̃ wʋ̀ʋr ɛ́ faa mɛ̃, bʋ̃ʋ n'ʋ vɛ̃, ɩ̃ bɛ yiiri a fʋ wulu bɛr ɛ.

¹⁵⁴Ƴɛ̀r faa mɛ̃ ɛ́ ya de m, lɛb kʋ̀ m a nyɔ-vʋʋrʋ mɛ̃ a lɛ fʋ na yel a.

¹⁵⁵A faafʋ zãá nɩ nɩ a nɩ-faar, bɛ na bɛ maalɛ a fʋ pʋ-tɩɛrʋ a ƴãw.

¹⁵⁶Sore e, a fʋ nɩbaal-zɔba ɩ n kpɛ̃ɛ, ɩ k'ɩ̃ vʋʋrɛ, a tu a lɛ fʋ na dɩ a ƴɛ̀rʋ yel a.

¹⁵⁷A bɛlɩ dem na dɔwrɛ mɛ̃ a, nɩ a ɩ̃ dɔ̃ dem a, bɛ yãwmɛ na, ɛcɛ ɩ̃ bɛ dɛ a lɛ fʋ na yel a ɩ.

¹⁵⁸Ɩ̃ nyɛ̃ nɩ nɩbɛ na zawrɩ fʋ bɛr a kɔkɔrʋ ɩrɛ mɛ̃, a nɩbɛ bɛ ŋa bɛ dier a fʋ wulu ƴɛ̀r-bie ɩ.

¹⁵⁹Sore e, nyɛ̃, ɩ̃ nɔnɛ nɩ a fʋ tub a na fɛr kɛ́ bɛ tuur a yaga. Ɩ k'ɩ̃ vʋʋrɛ a fʋ nɔ̃wfʋ zũú.

¹⁶⁰Zuo a za, a fʋ ƴɛ̀rʋ ɩ n yel-mɩŋa, ɛ́ a ƴɛ̀rʋ fʋ na dɩ a tu a mɩnʋ a, be n be kʋralɛ.

¹⁶¹Na-mɩnɛ dɔwrɛ mɛ̃ nɩ zawla, ɛcɛ a fʋ ƴɛ̀rʋ tɛwr dɛ̃bɩ̃ɛ n'a ɩ̃ zɔrɛ.

¹⁶²A lɛ fʋ na yel a ɩrɛ mɛ̃ nɩ nʋ̃ɔ̀ mɛ̃ nɩr na nyɛ̃ na-bʋ̃-kpɛ̃ɛ a.

¹⁶³Ɩ̃ bɛ nɔnɛ a ziri ɛ, ɩ̃ hɩ̃ɛn ʋ na, ɛcɛ ɩ̃ nɔnɛ nɩ a fʋ wulu.

¹⁶⁴Ɩ̃ mɩ́ danɩ fʋ nɩ gb'a ayopõi a bibi-ɓil, a fʋ ƴɛ̀rʋ fʋ na mɩ́ dɩ a tu yel-mɩŋa a ƴãw.

¹⁶⁵Bɛlɩ dem na nɔnɛ a fʋ wulu a mɩ́ tɛr'ɩ ƴã-ɓaarʋ yaga, ɛ́ bom bɛ ɩrɛ bɛ ŋmɩɛr gbɛ́r ɛ.

¹⁶⁶A ɩ̃ tɩɛrʋ a, ʋlɛ n'ɩ kɛ́ fʋ na faa mɛ̃ na, Sore e, a na ɩ lɛ a, ɩ̃ sàwr'ɩ a fʋ nɛ-ƴãwnɩ.

¹⁶⁷Ɩ̃ maal'a tɛr a lɛ fʋ na yel a, ɩ̃ nɔnɛ a nɩ yaga.

¹⁶⁸Ɩ̃ tɛr'ɩ a fʋ tub a na fɛr kɛ́ bɛ tuur a, nɩ a lɛ fʋ na yel a, a ɩ̃ sɛ́ɛ za be n a fʋ niŋé.

¹⁶⁹Sore e, a cɛl ɩ̃ na ŋmɛ a, ɩ ʋ ta b! Kʋ̀ m a yã, mɛ̃ a lɛ fʋ na yel a.

¹⁷⁰A ɩ̃ zɛlʋ, ʋ ta fʋ, faa mɛ̃ mɛ̃ a lɛ fʋ na ƴãw a nʋɔr a.

¹⁷¹Ɩ̃ na yiele na danɛ nɩ fʋ, fʋ na wule mɛ̃ a fʋ pʋ-tɩɛrʋ a ƴãw.

¹⁷²Ɩ̃ na manɛ nɩ a fʋ ƴɛ̀rʋ, a fʋ nɛ-ƴãwnɩ za na ɩ yel-mɩŋa a ƴãw.

¹⁷³A fʋ nũu, ʋ gù a ɩ̃ sõwfʋ, a fʋ tub ɩ̃ na kaa ír a ƴãw.

¹⁷⁴A fʋ faafʋ n'ʋ ɩ̃ bɔbr, Sore e, ɛ́ a fʋ wulu n'ɩ a bom na ɩrɛ mɛ̃ nʋ̃ɔ̀ a.

¹⁷⁵Ɩ̃ na vʋʋrɛ na tʋ̃ɔ́ danɛ fʋ, ɛ́ a lɛ fʋ na dɩ a ƴɛ̀rʋ yel a na sõwne mɛ̃ na.

¹⁷⁶Ɩ̃ viire na gʋɔr mɛ̃ pɛrʋ na bɔr a: bɔ nyɔw mɛ̃, mãa fʋ tõ-tõ-bie, bʋ̃ʋ n'ʋ vɛ̃, ɩ̃ bɛ yiiri a fʋ nɛ-ƴãwnɩ bɛr ɛ.