Read Dagara, Northern Sɛb-sõw yielu 122 Bible Online

Sɛb-sõw yielu 122 - Dagara, Northern bible

Sɛb-sõw yielu 122

¹Zerizalɛm dob daar yielu. Daviir yielu. Nʋ̃ɔ̀ tɩ ɩrɛ mɛ̃ nɩ a lɛn daar bɛ na tɩ yel mɛ̃: «Nyɩ ɩ tɩ cen a Sore Ŋmɩn-yir-kpɛ̃ɛ́!»

²Tɩ tɛw na àr a fʋ dɩ̃dɛɛ ƴãw, Zerizalɛm i!

³Zerizalɛm, tẽ-kpɛ̃ɛ bɛ na ŋmãa vla, a yie nyɔw taa cen a.

⁴A fʋ zie ka n'a a Ɩsɩrayɛl dɔwlʋ, a Sore dɔwlʋ nɩbɛ dúor waar, kɛ́ bɛ wa puor'ʋ yãanɩ, mɛ̃ a lɛ a na ɩrɛ a Ɩsɩrayɛl tẽw a.

⁵A fʋ zie ka mɩ̀ n'a a Daviir bʋʋrɛ naalʋ-dà-kɔw bin, a be ʋ na mɩ́ zɩ̃ dɩ a ƴɛ̀rʋ a.

⁶Nyɩ zɛlɛ a ƴã-ɓaarʋ kʋ̀rɛ a Zerizalɛm: «Zerizalɛm i, a bɛlɩ dem na nɔnɛ fʋ a, damnʋ zaa yee ta ka a bɛ zie ɩ!

⁷A ƴã-ɓaarʋ, ʋ be a fʋ pʋɔ, ɛ́ a fʋ yir-vɩɛlɩ vɩɛlɩ gã zoom!

⁸A ɩ̃ yɛbr nɩ a ɩ̃ bárɩ ƴãw a, ɩ̃ na yel a: A ƴã-ɓaarʋ, ʋ be a fʋ zie!

⁹A Sore tɩ Naaŋmɩn yir zũú a, ɩ̃ bɔbr'ɩ a fʋ vla.»