Read Dagara, Northern Sɛb-sõw yielu 140 Bible Online

Sɛb-sõw yielu 140 - Dagara, Northern bible

Sɛb-sõw yielu 140

¹Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Daviir na maalɩ a.

²Sore e, faa mɛ̃ a nɩ-faar ƴãw, gùre mɛ̃ a po-to-fãw dem ƴãw.

³Faa tɛwr maalʋ n'a bɛ mɩ́ tɩɛrɛ, ɛ́ ŋmarɛ zɛbr bibie za.

⁴A bɛ zɛl ɩ n ɓɩlɓɩl mɛ̃ waab zɛl a, dɔpan lɔw n'a be a bɛ nʋɔrɩ́. Tɛw-àrʋ

⁵Sore e, taa sàwr k'ɩ̃ lore a nɩ-faar nuru pʋɔ ɩ. Gùre mɛ̃ a po-to-fãw dem, na tɩɛrɛ kɛ́ bɛ ɩ m ɩ̃ lo a ƴãw.

⁶Pɔ̀lʋ dem sɔwl'ɩ bɛra a ɩ̃ nisɔw. Bɛ 'lẽ 'lẽ nɩ mié nɩ mɩ̃ɛ a ɩ̃ nyɔwfʋ ƴãw, bɛ ƴãw nɩ bɛrɩ a sɔ́r nʋɔr. Tɛw-àrʋ

⁷Ɛcɛ ɩ̃ yel'ɩ a Sore: «Fʋ ɩ n a ɩ̃ Naaŋmɩn! Sore e, ƴãw tobr a ɩ̃ yãayãa zɛlʋ ƴãw.

⁸Sore Naaŋmɩn i, fʋ̃ʋ na ɩ a fãw na mɩ́ faa mɛ̃ a, fʋ mɩ́ gù n a ɩ̃ zu a zɛbr daar.

⁹Sore e, ta sàw kʋ̀ a nɩ-faar a lɛ bɛ na bɔbr a ɩ, ta sàw a bɛ pʋ-tɩɛrʋ ʋ maalɩ ɛ.»

¹⁰A bɛlɩ dem na ŋmãa jil mɛ̃ a ɩrɛ nɩ pʋr-ɩb. Bɛ tɩ bɔbr'a kɛ́ faa páw mɛ̃. A faa ŋa, ʋ páw a bɛl tɛɛ za. Tɛw-àrʋ

¹¹Vũu-bi-tʋlɛ, a cir waarɩ bɛ! Bɛ lɔb bɛ ƴãw vũumí, bɔw-zulsɩ bɛ na kʋ̃ lɛb tʋ̃ɔ́ yi a pʋɔ!

¹²A gɛgɛrɩ kʋ̃ kpɛ a tẽw ɛ, ɛ́ a faa na tuur'ɩ a po-to-fãw sob kʋralɛ!

¹³Ɩ̃ bãwnɩ a na, a Sore mɩ́ bãw nɩ a bãbàalbɛ yele kʋ̀ bɛ, ʋ mɩ́ kpɛ n a nan dem.

¹⁴Yel-mɩŋa za, a nɩ-mɩn na puore fʋ nɩ yãanɩ, Sore e, a nɩ-dẽdẽ mɩnɛ na kpɩɛr'ɩ a fʋ zie.