Read Dagara, Northern Sɛb-sõw yielu 143 Bible Online

Sɛb-sõw yielu 143 - Dagara, Northern bible

Sɛb-sõw yielu 143

¹Sɛb-sõw yielu Daviir na maalɩ a. Sore e, bɛr wõ a ɩ̃ puoru, ƴãw tobr a ɩ̃ yãayãa zɛlʋ ƴãw. Fʋ̃ʋ na ŋmɛ̃ fʋ ŋmɛ̃a a ɛ́ tɛr yel-mɩŋa a, sɔw mɛ̃.

²Ɩ̃ ɩ n a fʋ tõ-tõ-bie, ta dɩ n mɛ̃ ƴɛ̀rʋ ɛ, nɩsaal za na bɛ ɩ nɩ-mɩŋa a fʋ niŋé a ƴãw.

³A ɩ̃ dɔ̃ sob diwr mɛ̃ na, ʋ nyɔw mɛ̃ na lɔb yel k'ʋʋ nɛb'ɩ gbɛ́ɛ, ʋ ƴãw mɛ̃ nɩ lige pʋɔ, mɛ̃ a bɛlɩ dem na kpi a koro za a.

⁴Ɩ̃ bàl'a, a bɛ lɛb tɛr mɛ̃ ɩb za ɩ.

⁵Ɩ̃ lɛb'a bãwnɩ a koro za, ɩ̃ tɩɛrɛ nɩ a ɩb za fʋ na ɩ a, ɩ̃ tɛr'ɩ a fʋ nuru tome za tɩɛrɛ.

⁶Ɩ̃ ture nɩ a nuru cɔwr fʋ, mãa n'ɩ ŋan a fʋ niŋé, ɩ mɛ̃ tẽsɔw na ko ʋ za a. Tɛw-àrʋ

⁷Sore e, sɔw mɛ̃ fɔ̃w, ɩ̃ bɛ cãà laar towtow ɛ! Ta sɔwlɩ a fʋ niwn a ɩ̃ ƴãw ɛ, alɛ bɛ ɩ lɛ, ɩ̃ na ŋmɛ̃ na taa nɩ a bɛlɩ dem na siwr a bɔw-zɩɛ pʋɔ a.

⁸Ɩ k'ɩ̃ nyɛ̃ a fʋ nɔ̃wfʋ biɓaaralɛ, ɩ̃ na ƴãw a ɩ̃ tɩɛrʋ a fʋ ƴãw a zũú. Ɩ k'ɩ̃ bãw a sɔ́r a na fɛr k'ɩ̃ɩ tuur a, ɩ̃ na lɩɛbɩ kaa fʋ a zũú.

⁹Sore e, faa mɛ̃ a ɩ̃ dɔ̃ dem nuru pʋɔ, a fʋ zie n'a ɩ̃ sɔwlɩ.

¹⁰Fʋ̃ʋ n'ɩ a ɩ̃ Naaŋmɩn, zanɩ nɩ mɛ̃ a fʋ pʋ-tɩɛrʋ maalʋ. A fʋ vʋʋrʋ, ʋ tɛr mɛ̃ nɩ nɔ̃wfʋ, cere nɩ tẽsɔw na man taa ʋ za a zu.

¹¹Sore e, lɛb kʋ̀ m a nyɔ-vʋʋrʋ, a fʋ yúor zũú, ír mɛ̃ a kpɩɛrʋ pʋɔ bɛr, a fʋ mɩnʋ zũú.

¹²A fʋ nɔ̃wfʋ zũú a, kʋ a ɩ̃ dɔ̃ dem pàw pɛr. Ɩ a bɛlɩ dem za na dɔwrɛ mɛ̃ a bɛ kpi, ɩ̃ na ɩ a fʋ tõ-tõ-bie a ƴãw.