Read Dagara, Northern Sɛb-sõw yielu 144 Bible Online

Sɛb-sõw yielu 144 - Dagara, Northern bible

Sɛb-sõw yielu 144

¹Daviir so ʋ. A Sore, ɩ̃ pìir, ʋlɛ so yãanɩ, ʋl na zanɛ nɩ mɛ̃ a mɔb ɛ́ cɔbrɛ mɛ̃ a zɛbr ƴãw a.

²Ʋlɛ n'ɩ a ɩ̃ maal-maalɛ nɩ a ɩ̃ zɛbr-yir-kpɛ̃w, a zie na kɛrɩ ɩ̃ mɩ́ sɔwlɩ a, nɩ a ɩ̃ faarɛ, ʋlɛ n'ɩ a zɛbr-kur-pãgala na mɩ́ piw mɛ̃ a, nɩ a ɩ̃ taw-lanʋ zie. Ʋlɛ n'ʋ mɩ́ dĩ nɩ-bʋʋrɛ bin a ɩ̃ pile.

³Sore e, bʋ̃ʋ n'ɩ a nɩsaal fʋ ŋmɛlɛ kaar ʋ? Bʋ̃ʋ n'ɩ a nɩsaal bie fʋ tɩɛrɛ a ʋ yele?

⁴Pɩɛlʋ tɛwr'ɩ a nɩsaal, a ʋ nyɔ-vʋʋrʋ ɩ n ɓaarʋ tɛwr na lɩɛbɛ a.

⁵Sore e, nɛ̃ a fʋ salom gbɩɛlɩ ɛ́ siw, tɔ a tan ɛ́ a ɩrɛ zʋ̀ʋ́r.

⁶Ɩ a saa ʋ nyɩwrɩ diw a fʋ dɔ̃ dem yaarɩ, tɛ a fʋ pime, diw bɛ bɛ lɩɛbɩ zɔ.

⁷Be a saa-zu ɛ́ tur mɛ̃ a fʋ nũu, faa mɛ̃, yaarɩ mɛ̃ a kʋ̃ɔ na bɛ dɩ vuo a pʋɔ, faa mɛ̃ a nɩ-bʋʋr-yoru nuru pʋɔ.

⁸Bɛ ŋmarɛ nɩ ziri ɛ́ mɩ́ zɛw a nũu pɔ n, ɛ́ bɛ tu ɛ.

⁹Naaŋmɩn i, ɩ̃ na yiel'ɩ yiel-paala kʋ̀ b, a fʋ ƴãw n'a ɩ̃ na ŋmɛ a fomie pie korijom.

¹⁰Fʋ̃ʋ n'ʋ mɩ́ ɩ a na-mɩnɛ zɛb tʋ̃ɔ́, fʋ̃ʋ n'ʋ mɩ́ faa a fʋ tõ-tõ-bie Daviir a zɛbr-sɔ-kpɛ̃ɛ-faa ƴãw.

¹¹Faa mɛ̃, ír mɛ̃ bɛr a nɩ-bʋʋr-yoru nuru pʋɔ, bɛ ŋmarɛ nɩ ziri, ɛ́ mɩ́ zɛw a nũu pɔ n ɛ́ bɛ tu ɛ.

¹²A tɩ bidɛbr ɩ na mɛ̃ tɩɩr na bul ìr kpɛmɛ a! A tɩ pɔwyaar ŋmɛ̃ na mɛ̃ kpule bɛ na wi vla ƴãw na-mɩnɛ yie pʋɔ a vɩɛl a.

¹³A tɩ boge paal'a yi nɛ́ɛ, a paal'a nɩ bʋ̃-pɛ-bʋʋrɛ za. A tɩ píir yɛ̀r'a dɔwlɩ gb'aa túr, gb'aa tùr-pie mɔ̃ mɩ̀, a tɩ wɛrʋ pʋɔ.

¹⁴A tɩ nĩi 'wɔr 'wɔr'a! Vɛɛ bɛ ka a dacine ƴãw ɛ, nɩr bɛ lɛb diwr tɩ cere nɩ tẽ-yũo ɩ. Bɛ bɛ lɛb cãà wone wʋ̀ʋr cɛlsɩ a tɩ laɩ pʋɔ ɩ.

¹⁵Zu-nʋ̃ɔ̀ dem'ɩ a nɩ-bʋʋrɛ bɛl na tɛr à à ŋá za a, zu-nʋ̃ɔ̀ dem'ɩ a nɩ-bʋʋrɛ a Sore na ɩ a bɛ Naaŋmɩn a!