Read Dagara, Northern Sɛb-sõw yielu 145 Bible Online

Sɛb-sõw yielu 145 - Dagara, Northern bible

Sɛb-sõw yielu 145

¹Danʋ yielu Daviir na maalɩ a. Ɩ̃ Naaŋmɩn i, fʋ̃ʋ Nãà a, ɩ̃ na manɛ na fʋ na ɩ kpɛ̃ɛ a, ɩ̃ na puore fʋ nɩ yãanɩ kʋrakʋralɛ.

²Bibie za n'a ɩ̃ na puore fʋ a yãanɩ, ɛ́ íre a fʋ yúor kʋrakʋralɛ.

³A Sore ɩ n kpɛ̃ɛ ɛ́ sɛwnɩ danʋ yaga za, nɩr kʋ̃ tʋ̃ɔ́ bãw a lɛ ʋ na ɩ kpɛ̃ɛ sɛw a ɩ.

⁴A nɩbɛ na dɔwr lɩɛrɛ taa a, na manɛ nɩ a tome fʋ na tõ a kʋ̀rɛ taa.

⁵Ɩ̃ na manɛ na fʋ na ɩ kpɛ̃ɛ a, ɛ́ íre a fʋ yúor vɩɛlʋ, ɩ̃ na manɛ nɩ a nɔ-ɓãa-yele fʋ na maalɩ a.

⁶Bɛ na ƴɛ̀rɛ nɩ a fʋ fãw na ɩrɛ dɛ̃bɩ̃ɛ a ƴɛ̀rʋ, ɛ́ mãa manɛ fʋ na ɩ kpɛ̃ɛ a.

⁷Bɛ na lɛb'a tɛr a fʋ yel-vɩɛlɩ na bɛ dɩ vuo a tɩɛrʋ, bɛ na ŋmɩɛr'ɩ nʋ̃ɔ̀ cɛlsɩ a fʋ mɩnʋ ƴãw.

⁸A Sore ɩ n su-ɓaarʋ sob nɩ nɩbaal-zɔrɛ, a ʋ suur bɛ pawr ɛ, ʋʋ ɩ nɔ̃wfʋ tɛwr.

⁹A Sore ɩ n nɩ-vla a nɩbɛ za zie, ʋ nɔnɛ nɩ a bɛlɩ dem za ʋ na ír a.

¹⁰Sore e, a fʋ bʋ̃-íri za na danɛ fʋ na, ɛ́ a nɩbɛ na sàw de fʋ a puore fʋ yãanɩ.

¹¹Bɛ na ƴɛ̀rɛ nɩ a fʋ naalʋ vɩɛlʋ ƴɛ̀rʋ, ɛ́ manɛ a fʋ kpɛnʋ yele.

¹²Lɛ n'a bɛ na ɩ a nɩsaalbɛ bãw a fʋ gãda-tome nɩ a fʋ naalʋ yúor-vɩɛlʋ-danʋ.

¹³A fʋ naalʋ ɩ n naalʋ na be kʋralɛ a, fʋ na dɩrɛ nɩ naalʋ yome yome za. A Sore mɩ́ tu n a lɛ ʋ na yel a, a ʋ nɔ̃wfʋ mɩ́ sãá nɩ a ʋ ɩ-ɩrɩ za pʋɔ.

¹⁴A Sore mɩ́ tɩɛ nɩ a bɛlɩ dem na lore a tɛr, ɛ́ nyɔw a bɛlɩ dem na bɛ tɛr fãw a bɛ lɛb ìr.

¹⁵Bɛ za úore fʋ na ɛ́ tɩɛrɛ fʋ, fʋ mɩ́ kʋ̀ bɛ nɩ a bɛ bʋ̃-dɩrɩ a daar na mɩ́ wa ta a.

¹⁶Fʋ mɩ́ yuo nɩ a fʋ nũu, ɛ́ bʋ̃-vʋʋra za páw a ʋlɩ bom nɛ ʋ na bɔbr a.

¹⁷A Sore ɩ n nɩ-mɩŋa a ʋ tub za pʋɔ, a ʋ nɔ̃wfʋ mɩ́ sãá nɩ a ʋ ɩ-ɩrɩ za pʋɔ.

¹⁸A Sore pɩɛl'ɩ a bɛlɩ dem za na bʋɔlɛ ʋ a, a bɛlɩ dem za na bʋɔlɛ ʋ yel-mɩŋa za a.

¹⁹A bɛlɩ dem na zɔrɛ ʋ a, ʋ mɩ́ maal'ɩ a lɛ bɛ na bɔbr a, ʋ mɩ́ wõ n a cɛl bɛ na lɔb a, ɛ́ faa bɛ.

²⁰A Sore mɩ́ gùre nɩ a bɛlɩ dem za na nɔnɛ ʋ a, ɛcɛ ʋ mɩ́ kʋ n a nɩ-faar za.

²¹Ɩ̃ na yiele na danɛ nɩ a Sore, ɛ́ bʋ̃-vʋʋra za na puore nɩ a Naaŋmɩn na ɩ sõw a yãanɩ yome yome za.