Read Dagara, Northern Sɛb-sõw yielu 148 Bible Online

Sɛb-sõw yielu 148 - Dagara, Northern bible

Sɛb-sõw yielu 148

¹Aleluya! Nyɩ be a salom zu ɛ́ danɛ a Sore, nyɩ danɛ ʋ, nyɩɩm za na be a saa-zu be a.

²Nyɩɩm ʋ malkɩ mɩnɛ za, nyɩ danɛ ʋ, nyɩɩm ʋ zɛbr-nɩbɛ za, nyɩ danɛ ʋ.

³Mʋ̃tɔ̃w nɩ cuw, nyɩ danɛ ʋ, nyɩɩm ŋmar-bie za na nyɩwrɛ a, nyɩ danɛ ʋ.

⁴Nyɩɩm salom zi-zãánɩ za, nyɩ danɛ ʋ, nɩ nyɩɩm, kʋ̃ɔnɩ na be a salom zu-sɔw a.

⁵A za, a íre a Sore yúor, bʋ̃ʋ n'ʋ vɛ̃, ʋ ƴɛ̀r'a, ɛ́ a be.

⁶Ʋ ƴãw a na a be, a nʋɔr kʋ, ʋ bin nɩ nʋɔr na na gã kʋralɛ a.

⁷Nyɩ be a tẽw zu ɛ́ danɛ a Sore, nyɩ danɛ ʋ, nyɩɩm kʋ̃ɔ-bɛrɛ, nɩ a nyɩ dʋ̃-bɩɩr bɩɩr,

⁸nɩ nyɩɩm mɩ̀, vũu nɩ sa-bi-kube, sa-pupure nɩ ulu, saa-sɛsɛb na sàwr a ʋ ƴɛ̀rʋ a.

⁹Nyɩ danɛ ʋ, nyɩɩm tã-bɛrɛ nɩ tãli, tɩ-wɔnɩ nɩ sɛɛdɩr tɩɩr za,

¹⁰wɛ-dʋn nɩ yir dʋn, bʋ̃-vuri nɩ bʋ̃-pɩgɛ.

¹¹Nyɩ danɛ ʋ, tẽw zu na-mɩnɛ ɛ, nɩ nyɩɩm, nɩ-bʋʋrɛ za, a nɩ-bɛrɛ nɩ a tẽw kaarbɛ za.

¹²Dɛbli nɩ powli, pɔ́lɛ́ nɩ dɛb-nyamɛ, nyɩ danɛ ʋ.

¹³Nyɩ danɛ a Sore, ʋl yõ yúor'ʋ yi, a ʋ vɩɛlʋ paal'ɩ a tẽw nɩ a salom.

¹⁴Ʋ lɛb'a kʋ̀ a ʋ nɩ-bʋʋrɛ fãw na bɛrmɛ a. Yúor'ʋ a ʋ nɩbɛ zie, a Ɩsɩrayɛl bibiir za zie, a nɩ-bʋʋrɛ na pɩɛl'ʋ a. Aleluya!